೭. ಆಕಾಸೋ ಸನಿದಸ್ಸನೋತಿಕಥಾವಣ್ಣನಾ

೪೬೩-೪೬೪. ಇದಾನಿ ಆಕಾಸೋ ಸನಿದಸ್ಸನೋತಿಕಥಾ ನಾಮ ಹೋತಿ. ತತ್ಥ ಯೇಸಂ ತಾಳಚ್ಛಿದ್ದಾದೀಸು ಞಾಣಪ್ಪವತ್ತಿಂ ನಿಸ್ಸಾಯ ‘‘ಸಬ್ಬೋಪಿ ಅಜಟಾಕಾಸೋ ಸನಿದಸ್ಸನೋ’’ತಿ ಲದ್ಧಿ, ಸೇಯ್ಯಥಾಪಿ ಅನ್ಧಕಾನಂ; ತೇ ಸನ್ಧಾಯ ಆಕಾಸೋ ಸನಿದಸ್ಸನೋತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಅಥ ನಂ ‘‘ಯದಿ ಸನಿದಸ್ಸನೋ, ಏವಂವಿಧೋ ಭವೇಯ್ಯಾ’’ತಿ ಚೋದನತ್ಥಂ ರೂಪನ್ತಿಆದಿ ವುತ್ತಂ. ಚಕ್ಖುಞ್ಚ ಪಟಿಚ್ಚಾತಿಪಞ್ಹೇಸು ಏವರೂಪಸ್ಸ ಸುತ್ತಸ್ಸ ಅಭಾವೇನ ಪಟಿಕ್ಖಿಪಿತ್ವಾ ತುಲನ್ತರಿಕಾದೀನಂ ಉಪಲದ್ಧಿಂ ನಿಸ್ಸಾಯ ಪಟಿಜಾನಾತಿ. ದ್ವಿನ್ನಂ ರುಕ್ಖಾನಂ ಅನ್ತರನ್ತಿ ಏತ್ಥ ರುಕ್ಖರೂಪಂ ಚಕ್ಖುನಾ ದಿಸ್ವಾ ಅನ್ತರೇ ರೂಪಾಭಾವತೋ ಆಕಾಸನ್ತಿ ಮನೋದ್ವಾರವಿಞ್ಞಾಣಂ ಉಪ್ಪಜ್ಜತಿ, ನ ಚಕ್ಖುವಿಞ್ಞಾಣಂ. ಸೇಸೇಸುಪಿ ಏಸೇವ ನಯೋ. ತಸ್ಮಾ ಅಸಾಧಕಮೇತನ್ತಿ.

ಆಕಾಸೋ ಸನಿದಸ್ಸನೋತಿಕಥಾವಣ್ಣನಾ.