೫. ಪಾರಿಚ್ಛತ್ತಕಸುತ್ತವಣ್ಣನಾ

೬೯. ಪಞ್ಚಮೇ ಪನ್ನಪಲಾಸೋತಿ ಪತಿತಪಲಾಸೋ. ಜಾಲಕಜಾತೋತಿ ಸಞ್ಜಾತಪತ್ತಪುಪ್ಫಜಾಲೋ. ತಸ್ಸ ಹಿ ಪತ್ತಜಾಲಞ್ಚ ಪುಪ್ಫಜಾಲಞ್ಚ ಸಹೇವ ನಿಕ್ಖಮತಿ. ಖಾರಕಜಾತೋತಿ ಪಾಟಿಯೇಕ್ಕಂ ಸಞ್ಜಾತೇನ ಸುವಿಭತ್ತೇನ ಪತ್ತಜಾಲಕೇನ ಚ ಪುಪ್ಫಜಾಲಕೇನ ಚ ಸಮನ್ನಾಗತೋ. ಕುಟುಮಲಕಜಾತೋತಿ ಸಞ್ಜಾತಮಕುಳೋ. ಕೋರಕಜಾತೋತಿ ಅವಿಕಸಿತೇಹಿ ಮಹಾಕುಚ್ಛೀಹಿ ಸಮ್ಭಿನ್ನಮುಖೇಹಿ ಪುಪ್ಫೇಹಿ ಸಮನ್ನಾಗತೋ. ಸಬ್ಬಪಾಲಿಫುಲ್ಲೋತಿ ಸಬ್ಬಾಕಾರೇನ ಸುಪುಪ್ಫಿತೋ. ದಿಬ್ಬೇ ಚತ್ತಾರೋ ಮಾಸೇತಿ ದಿಬ್ಬೇನ ಆಯುನಾ ಚತ್ತಾರೋ ಮಾಸೇ. ಮನುಸ್ಸಗಣನಾಯ ಪನ ತಾನಿ ದ್ವಾದಸ ವಸ್ಸಸಹಸ್ಸಾನಿ ಹೋನ್ತಿ. ಪರಿಚಾರೇನ್ತೀತಿ ಇತೋ ಚಿತೋ ಚ ಇನ್ದ್ರಿಯಾನಿ ಚಾರೇನ್ತಿ, ಕೀಳನ್ತಿ ರಮನ್ತೀತಿ ಅತ್ಥೋ.

ಆಭಾಯ ಫುಟಂ ಹೋತೀತಿ ತತ್ತಕಂ ಠಾನಂ ಓಭಾಸೇನ ಫುಟಂ ಹೋತಿ. ತೇಸಞ್ಹಿ ಪುಪ್ಫಾನಂ ಬಾಲಸೂರಿಯಸ್ಸ ವಿಯ ಆಭಾ ಹೋತಿ, ಪತ್ತಾನಿ ಪಣ್ಣಚ್ಛತ್ತಪ್ಪಮಾಣಾನಿ, ಅನ್ತೋ ಮಹಾತುಮ್ಬಮತ್ತಾ ರೇಣು ಹೋತಿ. ಪುಪ್ಫಿತೇ ಪನ ಪಾರಿಚ್ಛತ್ತಕೇ ಆರೋಹನಕಿಚ್ಚಂ ವಾ ಅಙ್ಕುಸಕಂ ಗಹೇತ್ವಾ ನಮನಕಿಚ್ಚಂ ವಾ ಪುಪ್ಫಾಹರಣತ್ಥಂ ಚಙ್ಗೋಟಕಕಿಚ್ಚಂ ವಾ ನತ್ಥಿ, ಕನ್ತನಕವಾತೋ ಉಟ್ಠಹಿತ್ವಾ ಪುಪ್ಫಾನಿ ವಣ್ಟತೋ ಕನ್ತತಿ, ಸಮ್ಪಟಿಚ್ಛನಕವಾತೋ ಸಮ್ಪಟಿಚ್ಛತಿ, ಪವೇಸನಕವಾತೋ ಸುಧಮ್ಮಂ ದೇವಸಭಂ ಪವೇಸೇತಿ, ಸಮ್ಮಜ್ಜನಕವಾತೋ ಪುರಾಣಪುಪ್ಫಾನಿ ನೀಹರತಿ, ಸನ್ಥರಣಕವಾತೋ ಪತ್ತಕಣ್ಣಿಕಕೇಸರಾನಿ ರಞ್ಜೇನ್ತೋ ಸನ್ಥರತಿ. ಮಜ್ಝಟ್ಠಾನೇ ಧಮ್ಮಾಸನಂ ಹೋತಿ ಯೋಜನಪ್ಪಮಾಣೋ ರತನಪಲ್ಲಙ್ಕೋ ಉಪರಿ ತಿಯೋಜನೇನ ಸೇತಚ್ಛತ್ತೇನ ಧಾರಿಯಮಾನೇನ, ತದನನ್ತರಂ ಸಕ್ಕಸ್ಸ ದೇವರಞ್ಞೋ ಆಸನಂ ಅತ್ಥರಿಯತಿ, ತತೋ ತೇತ್ತಿಂಸಾಯ ದೇವಪುತ್ತಾನಂ, ತತೋ ಅಞ್ಞೇಸಂ ಮಹೇಸಕ್ಖಾನಂ ದೇವಾನಂ, ಅಞ್ಞತರದೇವತಾನಂ ಪುಪ್ಫಕಣ್ಣಿಕಾವ ಆಸನಂ ಹೋತಿ. ದೇವಾ ದೇವಸಭಂ ಪವಿಸಿತ್ವಾ ನಿಸೀದನ್ತಿ. ತತೋ ಪುಪ್ಫೇಹಿ ರೇಣುವಟ್ಟಿ ಉಗ್ಗನ್ತ್ವಾ ಉಪರಿಕಣ್ಣಿಕಂ ಆಹಚ್ಚ ನಿಪತಮಾನಾ ದೇವತಾನಂ ತಿಗಾವುತಪ್ಪಮಾಣಂ ಅತ್ತಭಾವಂ ಲಾಖಾರಸಪರಿಕಮ್ಮಸಜ್ಜಿತಂ ವಿಯ ಸುವಣ್ಣಚುಣ್ಣಪಿಞ್ಜರಂ ವಿಯ ಕರೋತಿ. ಏಕಚ್ಚೇ ದೇವಾ ಏಕೇಕಂ ಪುಪ್ಫಂ ಗಹೇತ್ವಾ ಅಞ್ಞಮಞ್ಞಂ ಪಹರನ್ತಾಪಿ ಕೀಳನ್ತಿಯೇವ. ಪಹರಣಕಾಲೇಪಿ ಮಹಾತುಮ್ಬಪ್ಪಮಾಣಾ ರೇಣು ನಿಕ್ಖಮಿತ್ವಾ ಸರೀರಂ ಪಭಾಸಮ್ಪನ್ನೇಹಿ ಗನ್ಧಚುಣ್ಣೇಹಿ ಸಞ್ಜತಮನೋಸಿಲಾರಾಗಂ ವಿಯ ಕರೋತಿ. ಏವಂ ಸಾ ಕೀಳಾ ಚತೂಹಿ ಮಾಸೇಹಿ ಪರಿಯೋಸಾನಂ ಗಚ್ಛತಿ. ಅಯಮಾನುಭಾವೋತಿ ಅಯಂ ಅನುಫರಿತುಂ ಆನುಭಾವೋ.

ಇದಾನಿ ಯಸ್ಮಾ ನ ಸತ್ಥಾ ಪಾರಿಚ್ಛತ್ತಕೇನ ಅತ್ಥಿಕೋ, ತೇನ ಪನ ಸದ್ಧಿಂ ಉಪಮೇತ್ವಾ ಸತ್ತ ಅರಿಯಸಾವಕೇ ದಸ್ಸೇತುಕಾಮೋ, ತಸ್ಮಾ ತೇ ದಸ್ಸೇತುಂ ಏವಮೇವ ಖೋತಿಆದಿಮಾಹ. ತತ್ಥ ಪಬ್ಬಜ್ಜಾಯ ಚೇತೇತೀತಿ ಪಬ್ಬಜಿಸ್ಸಾಮೀತಿ ಚಿನ್ತೇತಿ. ದೇವಾನಂವಾತಿ ದೇವಾನಂ ವಿಯ. ಯಾವ ಬ್ರಹ್ಮಲೋಕಾ ಸದ್ದೋ ಅಬ್ಭುಗ್ಗಚ್ಛತೀತಿ ಪಥವಿತಲತೋ ಯಾವ ಬ್ರಹ್ಮಲೋಕಾ ಸಾಧುಕಾರಸದ್ದೇನ ಸಬ್ಬಂ ಏಕಸದ್ದಮೇವ ಹೋತಿ. ಅಯಮಾನುಭಾವೋತಿ ಅಯಂ ಖೀಣಾಸವಸ್ಸ ಭಿಕ್ಖುನೋ ಅನುಫರಣಾನುಭಾವೋ. ಇಮಸ್ಮಿಂ ಸುತ್ತೇ ಚತುಪಾರಿಸುದ್ಧಿಸೀಲಂ ಪಬ್ಬಜ್ಜಾನಿಸ್ಸಿತಂ ಹೋತಿ, ಕಸಿಣಪರಿಕಮ್ಮಂ ಪಠಮಜ್ಝಾನಸನ್ನಿಸ್ಸಿತಂ, ವಿಪಸ್ಸನಾಯ ಸದ್ಧಿಂ ತಯೋ ಮಗ್ಗಾ ತೀಣಿ ಚ ಫಲಾನಿ ಅರಹತ್ತಮಗ್ಗಸನ್ನಿಸ್ಸಿತಾನಿ ಹೋನ್ತಿ. ದೇಸನಾಯ ಹೇಟ್ಠತೋ ವಾ ಉಪರಿತೋ ವಾ ಉಭಯತೋ ವಾ ಪರಿಚ್ಛೇದೋ ಹೋತಿ, ಇಧ ಪನ ಉಭಯತೋ ಪರಿಚ್ಛೇದೋ. ತೇನೇತಂ ವುತ್ತಂ. ಸಙ್ಖೇಪತೋ ಪನೇತ್ಥ ವಟ್ಟವಿವಟ್ಟಂ ಕಥಿತನ್ತಿ ವೇದಿತಬ್ಬಂ.