೬. ಅಬ್ಯಾಕತವಗ್ಗೋ

೧. ಅಬ್ಯಾಕತಸುತ್ತವಣ್ಣನಾ

೫೪. ಛಟ್ಠವಗ್ಗಸ್ಸ ಪಠಮೇ ಅಬ್ಯಾಕತವತ್ಥೂಸೂತಿ ಏಕಂಸಾದಿವಸೇನ ಅಕಥಿತವತ್ಥೂಸು. ತಥಾಗತೋತಿ ಸತ್ತೋ. ದಿಟ್ಠಿಗತಮೇತನ್ತಿ ಮಿಚ್ಛಾದಿಟ್ಠಿಮತ್ತಕಮೇತಂ, ನ ತಾಯ ದಿಟ್ಠಿಯಾ ಗಹಿತಸತ್ತೋ ನಾಮ ಅತ್ಥಿ. ಪಟಿಪದನ್ತಿ ಅರಿಯಮಗ್ಗಂ. ನ ಛಮ್ಭತೀತಿ ದಿಟ್ಠಿವಸೇನ ನ ಕಮ್ಪತಿ. ಸೇಸಪದೇಸುಪಿ ಏಸೇವ ನಯೋ. ತಣ್ಹಾಗತನ್ತಿ ದಿಟ್ಠಿತಣ್ಹಾ. ಸಞ್ಞಾಗತಾದೀಸುಪಿ ಏಸೇವ ನಯೋ. ದಿಟ್ಠಿಸಞ್ಞಾ ಏವ ಹೇತ್ಥ ಸಞ್ಞಾಗತಂ, ದಿಟ್ಠಿನಿಸ್ಸಿತಮಾನೋಯೇವ ದಿಟ್ಠಿಮಞ್ಞಿತಮೇವ ವಾ ಮಞ್ಞಿತಂ, ದಿಟ್ಠಿಪಪಞ್ಚೋವ ಪಪಞ್ಚಿತಂ, ದಿಟ್ಠುಪಾದಾನಮೇವ ಉಪಾದಾನಂ, ದಿಟ್ಠಿಯಾ ವಿರೂಪಂ ಪಟಿಸರಣಭಾವೋಯೇವ ವಿಪ್ಪಟಿಸಾರೋ ನಾಮಾತಿ ವೇದಿತಬ್ಬೋ. ಏತ್ಥ ಚ ದಿಟ್ಠಿಗ್ಗಹಣೇನ ದ್ವಾಸಟ್ಠಿ ದಿಟ್ಠಿಯೋ, ದಿಟ್ಠಿನಿರೋಧಗಾಮಿನಿಪಟಿಪದಾಗಹಣೇನ ಸೋತಾಪತ್ತಿಮಗ್ಗೋ ಗಹಿತೋತಿ.

೨. ಪುರಿಸಗತಿಸುತ್ತವಣ್ಣನಾ

೫೫. ದುತಿಯೇ ಪುರಿಸಗತಿಯೋತಿ ಪುರಿಸಸ್ಸ ಞಾಣಗತಿಯೋ. ಅನುಪಾದಾಪರಿನಿಬ್ಬಾನನ್ತಿ ಅಪಚ್ಚಯನಿಬ್ಬಾನಂ. ನೋ ಚಸ್ಸಾತಿ ಅತೀತೇ ಅತ್ತಭಾವನಿಬ್ಬತ್ತಕಂ ಕಮ್ಮಂ ನೋ ಚೇ ಅಭವಿಸ್ಸ. ನೋ ಚ ಮೇ ಸಿಯಾತಿ ಏತರಹಿ ಮೇ ಅಯಂ ಅತ್ತಭಾವೋ ನ ಸಿಯಾ. ನ ಭವಿಸ್ಸತೀತಿ ಏತರಹಿ ಮೇ ಅನಾಗತತ್ತಭಾವನಿಬ್ಬತ್ತಕಂ ಕಮ್ಮಂ ನ ಭವಿಸ್ಸತಿ. ನ ಚ ಮೇ ಭವಿಸ್ಸತೀತಿ ಅನಾಗತೇ ಮೇ ಅತ್ತಭಾವೋ ನ ಭವಿಸ್ಸತಿ. ಯದತ್ಥಿ ಯಂ ಭೂತನ್ತಿ ಯಂ ಅತ್ಥಿ ಯಂ ಭೂತಂ ಪಚ್ಚುಪ್ಪನ್ನಕ್ಖನ್ಧಪಞ್ಚಕಂ. ತಂ ಪಜಹಾಮೀತಿ ಉಪೇಕ್ಖಂ ಪಟಿಲಭತೀತಿ ತಂ ತತ್ಥ ಛನ್ದರಾಗಪ್ಪಹಾನೇನ ಪಜಹಾಮೀತಿ ವಿಪಸ್ಸನುಪೇಕ್ಖಂ ಪಟಿಲಭತಿ. ಭವೇ ನ ರಜ್ಜತೀತಿ ಅತೀತೇ ಖನ್ಧಪಞ್ಚಕೇ ತಣ್ಹಾದಿಟ್ಠೀಹಿ ನ ರಜ್ಜತಿ. ಸಮ್ಭವೇ ನ ರಜ್ಜತೀತಿ ಅನಾಗತೇಪಿ ತಥೇವ ನ ರಜ್ಜತಿ. ಅತ್ಥುತ್ತರಿ ಪದಂ ಸನ್ತನ್ತಿ ಉತ್ತರಿ ಸನ್ತಂ ನಿಬ್ಬಾನಪದಂ ನಾಮ ಅತ್ಥಿ. ಸಮ್ಮಪ್ಪಞ್ಞಾಯ ಪಸ್ಸತೀತಿ ತಂ ಸಹವಿಪಸ್ಸನಾಯ ಮಗ್ಗಪಞ್ಞಾಯ ಸಮ್ಮಾ ಪಸ್ಸತಿ. ನ ಸಬ್ಬೇನ ಸಬ್ಬನ್ತಿ ಏಕಚ್ಚಾನಂ ಕಿಲೇಸಾನಂ ಅಪ್ಪಹೀನತ್ತಾ ಸಚ್ಚಪಟಿಚ್ಛಾದಕಸ್ಸ ತಮಸ್ಸ ಸಬ್ಬಸೋ ಅವಿದ್ಧಂಸಿತತ್ತಾ ನ ಸಬ್ಬಾಕಾರೇನ ಸಬ್ಬಂ. ಹಞ್ಞಮಾನೇತಿ ಸಣ್ಡಾಸೇನ ಗಹೇತ್ವಾ ಮುಟ್ಠಿಕಾಯ ಕೋಟ್ಟಿಯಮಾನೇ. ಅನ್ತರಾಪರಿನಿಬ್ಬಾಯೀತಿ ಉಪಪತ್ತಿಸಮನನ್ತರತೋ ಪಟ್ಠಾಯ ಆಯುನೋ ವೇಮಜ್ಝಂ ಅನತಿಕ್ಕಮಿತ್ವಾ ಏತ್ಥನ್ತರೇ ಕಿಲೇಸಪರಿನಿಬ್ಬಾನೇನ ಪರಿನಿಬ್ಬುತೋ ಹೋತಿ. ಅನುಪಹಚ್ಚ ತಲನ್ತಿ ಆಕಾಸತಲಂ ಅನುಪಹಚ್ಚ ಅನತಿಕ್ಕಮಿತ್ವಾ, ಭೂಮಿಂ ಅಪ್ಪತ್ವಾ ಆಕಾಸೇಯೇವ ನಿಬ್ಬಾಯೇಯ್ಯಾತಿ ಇಮಾಹಿ ತೀಹಿ ಉಪಮಾಹಿ ತಯೋ ಅನ್ತರಾಪರಿನಿಬ್ಬಾಯೀ ದಸ್ಸಿತಾ.

ಉಪಹಚ್ಚಪರಿನಿಬ್ಬಾಯೀತಿ ಆಯುವೇಮಜ್ಝಂ ಅತಿಕ್ಕಮಿತ್ವಾ ಪಚ್ಛಿಮಕೋಟಿಂ ಅಪ್ಪತ್ವಾ ಪರಿನಿಬ್ಬುತೋ ಹೋತಿ. ಉಪಹಚ್ಚ ತಲನ್ತಿ ಜಲಮಾನಾ ಗನ್ತ್ವಾ ಆಕಾಸತಲಂ ಅತಿಕ್ಕಮಿತ್ವಾ ಪಥವೀತಲಂ ವಾ ಉಪಹನಿತ್ವಾ ಪಥವಿಯಂ ಪತಿತಮತ್ತಾವ ನಿಬ್ಬಾಯೇಯ್ಯ. ಅಸಙ್ಖಾರೇನ ಅಪ್ಪಯೋಗೇನ ಕಿಲೇಸೇ ಖೇಪೇತ್ವಾ ಪರಿನಿಬ್ಬಾಯೀತಿ ಅಸಙ್ಖಾರಪರಿನಿಬ್ಬಾಯೀ. ಸಸಙ್ಖಾರೇನ ಸಪ್ಪಯೋಗೇನ ಕಿಲೇಸೇ ಖೇಪೇತ್ವಾ ಪರಿನಿಬ್ಬಾಯೀತಿ ಸಸಙ್ಖಾರಪರಿನಿಬ್ಬಾಯೀ. ಗಚ್ಛನ್ತಿ ನಿರಾರಕ್ಖಂ ಅರಞ್ಞಂ. ದಾಯನ್ತಿ ಸಾರಕ್ಖಂ ಅಭಯತ್ಥಾಯ ದಿನ್ನಂ ಅರಞ್ಞಂ. ಸೇಸಮೇತ್ಥ ಉತ್ತಾನತ್ಥಮೇವ. ಇಮಸ್ಮಿಂ ಸುತ್ತೇ ಅರಿಯಪುಗ್ಗಲಾವ ಕಥಿತಾತಿ.

೩. ತಿಸ್ಸಬ್ರಹ್ಮಾಸುತ್ತವಣ್ಣನಾ

೫೬. ತತಿಯೇ ಭಿಕ್ಖುನಿಯೋತಿ ಮಹಾಪಜಾಪತಿಯಾ ಪರಿವಾರಾ ಪಞ್ಚಸತಾ ಭಿಕ್ಖುನಿಯೋ. ವಿಮುತ್ತಾತಿ ಪಞ್ಚಹಿ ವಿಮುತ್ತೀಹಿ ವಿಮುತ್ತಾ. ಅನುಪಾದಿಸೇಸಾತಿ ಉಪಾದಾನಸೇಸಂ ಅಟ್ಠಪೇತ್ವಾ ಪಞ್ಚಹಿ ವಿಮುತ್ತೀಹಿ ಅನವಸೇಸಾಹಿಪಿ ವಿಮುತ್ತಾ. ಸಉಪಾದಿಸೇಸೇ ವಾ ಸಉಪಾದಿಸೇಸೋತಿ ಸಉಪಾದಾನಸೇಸೇ ಪುಗ್ಗಲೇ ‘‘ಸಉಪಾದಾನಸೇಸೋ ಅಯ’’ನ್ತಿ. ಇತರಸ್ಮಿಮ್ಪಿ ಏಸೇವ ನಯೋ. ತಿಸ್ಸೋತಿ ಥೇರಸ್ಸ ಸದ್ಧಿವಿಹಾರಿಕಬ್ರಹ್ಮಾ. ಅನುಲೋಮಿಕಾನೀತಿ ಪಟಿಪತ್ತಿಯಾ ಅನುಲೋಮಾನಿ ವಿವಿತ್ತಾನಿ ಅನ್ತಿಮಪರಿಯನ್ತಿಮಾನಿ. ಇನ್ದ್ರಿಯಾನೀತಿ ಸದ್ಧಾದೀನಿ ವಿಪಸ್ಸನಿನ್ದ್ರಿಯಾನಿ. ಸಮನ್ನಾನಯಮಾನೋತಿ ಸಮನ್ನಾಹಾರೇ ಠಪಯಮಾನೋ. ನ ಹಿ ಪನ ತೇತಿ ಇದಂ ಕಸ್ಮಾ ಆರಭಿ? ಸತ್ತಮಸ್ಸ ಪುಗ್ಗಲಸ್ಸ ದಸ್ಸನತ್ಥಂ. ಸತ್ತಮೋ ಹಿ ಸದ್ಧಾನುಸಾರಿಪುಗ್ಗಲೋ ನ ದಸ್ಸಿತೋ. ಅಥ ಭಗವಾ ಬಲವವಿಪಸ್ಸಕವಸೇನ ತಂ ದಸ್ಸೇನ್ತೋ ಏವಮಾಹ. ತತ್ಥ ಸಬ್ಬನಿಮಿತ್ತಾನನ್ತಿ ಸಬ್ಬೇಸಂ ನಿಚ್ಚನಿಮಿತ್ತಾದೀನಂ. ಅನಿಮಿತ್ತನ್ತಿ ಬಲವವಿಪಸ್ಸನಾಸಮಾಧಿಂ.

೪. ಸೀಹಸೇನಾಪತಿಸುತ್ತವಣ್ಣನಾ

೫೭. ಚತುತ್ಥೇ ಮಚ್ಛರೀತಿ ಪಞ್ಚಮಚ್ಛೇರಯುತ್ತೋ. ಕದರಿಯೋತಿ ಥದ್ಧಮಚ್ಛರಿಯೋ, ಪರೇಸಂ ದಿಯ್ಯಮಾನಮ್ಪಿ ವಾರೇತಿ. ಅನುಪ್ಪದಾನರತೋತಿ ಪುನಪ್ಪುನಂ ದಾನಂ ದದಮಾನೋವ ರಮತಿ. ಅನುಕಮ್ಪನ್ತಾತಿ ‘‘ಕೋ ಅಜ್ಜ ಅಮ್ಹೇಹಿ ಅನುಗ್ಗಹೇತಬ್ಬೋ, ಕಸ್ಸ ದೇಯ್ಯಧಮ್ಮಂ ವಾ ಪಟಿಗ್ಗಣ್ಹೇಯ್ಯಾಮ, ಧಮ್ಮಂ ವಾ ದೇಸೇಯ್ಯಾಮಾ’’ತಿ ಏವಂ ಚಿತ್ತೇನ ಅನುಕಮ್ಪಮಾನಾ.

೫. ಅರಕ್ಖೇಯ್ಯಸುತ್ತವಣ್ಣನಾ

೫೮. ಪಞ್ಚಮೇ ನಿಮಿತ್ತನ್ತಿ ಧಮ್ಮನಿಮಿತ್ತಮ್ಪಿ ಪುಗ್ಗಲನಿಮಿತ್ತಮ್ಪಿ. ಅಯಞ್ಹಿ ಅತ್ತನಾ ದೇಸಿತಧಮ್ಮೇ ಏಕಪದಮ್ಪಿ ದುರಕ್ಖಾತಂ ಅನಿಯ್ಯಾನಿಕಂ ಅಪಸ್ಸನ್ತೋ ಧಮ್ಮನಿಮಿತ್ತಂ ನ ಸಮನುಪಸ್ಸತಿ, ‘‘ದುರಕ್ಖಾತೋ ತಯಾ ಧಮ್ಮೋ ನ ಸ್ವಾಕ್ಖಾತೋ’’ತಿ ಉಟ್ಠಹಿತ್ವಾ ಪಟಿಪ್ಫರನ್ತಂ ಏಕಂ ಪುಗ್ಗಲಮ್ಪಿ ಅಪಸ್ಸನ್ತೋ ಪುಗ್ಗಲನಿಮಿತ್ತಂ ನ ಸಮನುಪಸ್ಸತಿ ನಾಮ. ಸೇಸದ್ವಯೇಪಿ ಏಸೇವ ನಯೋ. ಛಟ್ಠಸತ್ತಮಾನಿ ಉತ್ತಾನಾನೇವ.

೮. ಪಚಲಾಯಮಾನಸುತ್ತವಣ್ಣನಾ

೬೧. ಅಟ್ಠಮೇ ಪಚಲಾಯಮಾನೋತಿ ತಂ ಗಾಮಂ ಉಪನಿಸ್ಸಾಯ ಏಕಸ್ಮಿಂ ವನಸಣ್ಡೇ ಸಮಣಧಮ್ಮಂ ಕರೋನ್ತೋ ಸತ್ತಾಹಂ ಚಙ್ಕಮನವೀರಿಯೇನ ನಿಮ್ಮಥಿತತ್ತಾ ಕಿಲನ್ತಗತ್ತೋ ಚಙ್ಕಮನಕೋಟಿಯಂ ಪಚಲಾಯಮಾನೋ ನಿಸಿನ್ನೋ ಹೋತಿ. ಪಚಲಾಯಸಿ ನೋತಿ ನಿದ್ದಾಯಸಿ ನು. ಅನುಮಜ್ಜಿತ್ವಾತಿ ಪರಿಮಜ್ಜಿತ್ವಾ. ಆಲೋಕಸಞ್ಞನ್ತಿ ಮಿದ್ಧವಿನೋದನಆಲೋಕಸಞ್ಞಂ. ದಿವಾಸಞ್ಞನ್ತಿ ದಿವಾತಿಸಞ್ಞಂ. ಯಥಾ ದಿವಾ ತಥಾ ರತ್ತಿನ್ತಿ ಯಥಾ ದಿವಾ ಆಲೋಕಸಞ್ಞಾ ಅಧಿಟ್ಠಿತಾ, ತಥಾ ನಂ ರತ್ತಿಮ್ಪಿ ಅಧಿಟ್ಠಹೇಯ್ಯಾಸಿ. ಯಥಾ ರತ್ತಿಂ ತಥಾ ದಿವಾತಿ ಯಥಾ ಚ ತೇ ರತ್ತಿಂ ಆಲೋಕಸಞ್ಞಾ ಅಧಿಟ್ಠಿತಾ, ತಥಾ ನಂ ದಿವಾಪಿ ಅಧಿಟ್ಠಹೇಯ್ಯಾಸಿ. ಸಪ್ಪಭಾಸನ್ತಿ ದಿಬ್ಬಚಕ್ಖುಞಾಣತ್ಥಾಯ ಸಹೋಭಾಸಂ. ಪಚ್ಛಾಪುರೇಸಞ್ಞೀತಿ ಪುರತೋ ಚ ಪಚ್ಛತೋ ಚ ಅಭಿಹರಣಸಞ್ಞಾಯ ಸಞ್ಞಾವಾ. ಅನ್ತೋಗತೇಹಿ ಇನ್ದ್ರಿಯೇಹೀತಿ ಬಹಿ ಅವಿಕ್ಖಿತ್ತೇಹಿ ಅನ್ತೋ ಅನುಪವಿಟ್ಠೇಹೇವ ಪಞ್ಚಹಿ ಇನ್ದ್ರಿಯೇಹಿ. ಮಿದ್ಧಸುಖನ್ತಿ ನಿದ್ದಾಸುಖಂ. ಏತ್ತಕೇನ ಠಾನೇನ ಭಗವಾ ಥೇರಸ್ಸ ಮಿದ್ಧವಿನೋದನಕಮ್ಮಟ್ಠಾನಂ ಕಥೇಸಿ. ಸೋಣ್ಡನ್ತಿ ಮಾನಸೋಣ್ಡಂ. ಕಿಚ್ಚಕರಣೀಯಾನೀತಿ ಏತ್ಥ ಅವಸ್ಸಂ ಕತ್ತಬ್ಬಾನಿ ಕಿಚ್ಚಾನಿ, ಇತರಾನಿ ಕರಣೀಯಾನಿ. ಮಙ್ಕುಭಾವೋತಿ ನಿತ್ತೇಜತಾ ದೋಮನಸ್ಸತಾ. ಏತ್ತಕೇನ ಠಾನೇನ ಸತ್ಥಾರಾ ಥೇರಸ್ಸ ಭಿಕ್ಖಾಚಾರವತ್ತಂ ಕಥಿತಂ.

ಇದಾನಿ ಭಸ್ಸೇ ಪರಿಯನ್ತಕಾರಿತಾಯ ಸಮಾದಪೇತುಂ ತಸ್ಮಾತಿಹಾತಿಆದಿಮಾಹ. ತತ್ಥ ವಿಗ್ಗಾಹಿಕಕಥನ್ತಿ ‘‘ನ ತ್ವಂ ಇಮಂ ಧಮ್ಮವಿನಯಂ ಆಜಾನಾಸೀ’’ತಿಆದಿನಯಪ್ಪವತ್ತಾ ವಿಗ್ಗಾಹಿಕಕಥಾ. ನಾಹಂ ಮೋಗ್ಗಲ್ಲಾನಾತಿಆದಿ ಪಾಪಮಿತ್ತಸಂಸಗ್ಗವಿವಜ್ಜನತ್ಥಂ ವುತ್ತಂ. ಕಿತ್ತಾವತಾ ನು ಖೋತಿ ಕಿತ್ತಕೇನ ನು ಖೋ. ತಣ್ಹಾಸಙ್ಖಯವಿಮುತ್ತೋ ಹೋತೀತಿ ತಣ್ಹಾಸಙ್ಖಯೇ ನಿಬ್ಬಾನೇ ತಂ ಆರಮ್ಮಣಂ ಕತ್ವಾ ವಿಮುತ್ತಚಿತ್ತತಾಯ ತಣ್ಹಾಸಙ್ಖಯವಿಮುತ್ತೋ ನಾಮ ಸಂಖಿತ್ತೇನ ಕಿತ್ತಾವತಾ ಹೋತಿ. ಯಾಯ ಪಟಿಪತ್ತಿಯಾ ತಣ್ಹಾಸಙ್ಖಯವಿಮುತ್ತೋ ಹೋತಿ, ತಮೇವ ಖೀಣಾಸವಸ್ಸ ಭಿಕ್ಖುನೋ ಪುಬ್ಬಭಾಗಪಟಿಪದಂ ಸಂಖಿತ್ತೇನ ದೇಸೇಥಾತಿ ಪುಚ್ಛತಿ. ಅಚ್ಚನ್ತನಿಟ್ಠೋತಿ ಖಯವಯಸಙ್ಖಾತಂ ಅನ್ತಂ ಅತೀತಾತಿ ಅಚ್ಚನ್ತಾ, ಅಚ್ಚನ್ತಾ ನಿಟ್ಠಾ ಅಸ್ಸಾತಿ ಅಚ್ಚನ್ತನಿಟ್ಠೋ, ಏಕನ್ತನಿಟ್ಠೋ ಸತತನಿಟ್ಠೋತಿ ಅತ್ಥೋ. ಅಚ್ಚನ್ತಯೋಗಕ್ಖೇಮೀತಿ ಅಚ್ಚನ್ತಂ ಯೋಗಕ್ಖೇಮೀ, ನಿಚ್ಚಯೋಗಕ್ಖೇಮೀತಿ ಅತ್ಥೋ. ಅಚ್ಚನ್ತಬ್ರಹ್ಮಚಾರೀತಿ ಅಚ್ಚನ್ತಂ ಬ್ರಹ್ಮಚಾರೀ, ನಿಚ್ಚಬ್ರಹ್ಮಚಾರೀತಿ ಅತ್ಥೋ. ಅಚ್ಚನ್ತಂ ಪರಿಯೋಸಾನಮಸ್ಸಾತಿ ಪುರಿಮನಯೇನೇವ ಅಚ್ಚನ್ತಪರಿಯೋಸಾನೋ. ಸೇಟ್ಠೋ ದೇವಮನುಸ್ಸಾನನ್ತಿ ದೇವಾನಞ್ಚ ಮನುಸ್ಸಾನಞ್ಚ ಸೇಟ್ಠೋ ಉತ್ತಮೋ. ಏವರೂಪೋ ಭಿಕ್ಖು ಕಿತ್ತಾವತಾ ಹೋತಿ, ಸಙ್ಖೇಪೇನೇವ ತಸ್ಸ ಪಟಿಪತ್ತಿಂ ಕಥೇಥಾತಿ ಯಾಚತಿ.

ಸಬ್ಬೇ ಧಮ್ಮಾ ನಾಲಂ ಅಭಿನಿವೇಸಾಯಾತಿ ಏತ್ಥ ಸಬ್ಬೇ ಧಮ್ಮಾ ನಾಮ ಪಞ್ಚಕ್ಖನ್ಧಾ ದ್ವಾದಸಾಯತನಾನಿ ಅಟ್ಠಾರಸ ಧಾತುಯೋ, ತೇ ಸಬ್ಬೇಪಿ ತಣ್ಹಾದಿಟ್ಠಿವಸೇನ ಅಭಿನಿವೇಸಾಯ ನಾಲಂ ನ ಪರಿಯತ್ತಾ ನ ಸಮತ್ತಾ ನ ಯುತ್ತಾ. ಕಸ್ಮಾ? ಗಹಿತಾಕಾರೇನ ಅತಿಟ್ಠನತೋ. ತೇ ಹಿ ನಿಚ್ಚಾ ಸುಖಾ ಅತ್ತಾತಿ ಗಹಿತಾಪಿ ಅನಿಚ್ಚಾ ದುಕ್ಖಾ ಅನತ್ತಾವ ಸಮ್ಪಜ್ಜನ್ತಿ. ತಸ್ಮಾ ನಾಲಂ ಅಭಿನಿವೇಸಾಯ. ಅಭಿಜಾನಾತೀತಿ ಅನಿಚ್ಚಂ ದುಕ್ಖಂ ಅನತ್ತಾತಿ ಞಾತಪರಿಞ್ಞಾಯ ಅಭಿಜಾನಾತಿ. ಪರಿಜಾನಾತೀತಿ ತಥೇವ ತೀರಣಪರಿಞ್ಞಾಯ ಪರಿಜಾನಾತಿ. ಯಂಕಿಞ್ಚಿ ವೇದನನ್ತಿ ಅನ್ತಮಸೋ ಪಞ್ಚವಿಞ್ಞಾಣಸಮ್ಪಯುತ್ತಂ ಯಂಕಿಞ್ಚಿ ಅಪ್ಪಮತ್ತಕಮ್ಪಿ ವೇದನಂ ಅನುಭವತಿ. ಇಮಿನಾ ಭಗವಾ ಥೇರಸ್ಸ ವೇದನಾವಸೇನ ಚ ವಿನಿವಟ್ಟೇತ್ವಾ ಅರೂಪಪರಿಗ್ಗಹಂ ದಸ್ಸೇಸಿ.

ಅನಿಚ್ಚಾನುಪಸ್ಸೀತಿ ಅನಿಚ್ಚತೋ ಅನುಪಸ್ಸನ್ತೋ. ವಿರಾಗಾನುಪಸ್ಸೀತಿ ಏತ್ಥ ದ್ವೇ ವಿರಾಗಾ ಖಯವಿರಾಗೋ ಚ ಅಚ್ಚನ್ತವಿರಾಗೋ ಚ. ತತ್ಥ ಸಙ್ಖಾರಾನಂ ಖಯಂ ಖಯತೋ ಪಸ್ಸನಾ ವಿಪಸ್ಸನಾಪಿ, ಅಚ್ಚನ್ತವಿರಾಗಂ ನಿಬ್ಬಾನಂ ವಿರಾಗತೋ ದಸ್ಸನಮಗ್ಗಞಾಣಮ್ಪಿ ವಿರಾಗಾನುಪಸ್ಸನಾ. ತದುಭಯಸಮಙ್ಗಿಪುಗ್ಗಲೋ ವಿರಾಗಾನುಪಸ್ಸೀ ನಾಮ. ತಂ ಸನ್ಧಾಯ ವುತ್ತಂ – ‘‘ವಿರಾಗಾನುಪಸ್ಸೀ’’ತಿ, ವಿರಾಗತೋ ಅನುಪಸ್ಸನ್ತೋತಿ ಅತ್ಥೋ. ನಿರೋಧಾನುಪಸ್ಸಿಮ್ಹಿಪಿ ಏಸೇವ ನಯೋ. ನಿರೋಧೋಪಿ ಹಿ ಖಯನಿರೋಧೋ ಅಚ್ಚನ್ತನಿರೋಧೋತಿ ದುವಿಧೋಯೇವ. ಪಟಿನಿಸ್ಸಗ್ಗಾನುಪಸ್ಸೀತಿ ಏತ್ಥ ಪಟಿನಿಸ್ಸಗ್ಗೋ ವುಚ್ಚತಿ ವೋಸ್ಸಗ್ಗೋ. ಸೋ ಚ ಪರಿಚ್ಚಾಗವೋಸ್ಸಗ್ಗೋ ಪಕ್ಖನ್ದನವೋಸ್ಸಗ್ಗೋತಿ ದುವಿಧೋ ಹೋತಿ. ತತ್ಥ ಪರಿಚ್ಚಾಗವೋಸ್ಸಗ್ಗೋತಿ ವಿಪಸ್ಸನಾ. ಸಾ ಹಿ ತದಙ್ಗವಸೇನ ಕಿಲೇಸೇ ಚ ಖನ್ಧೇ ಚ ವೋಸ್ಸಜತಿ. ಪಕ್ಖನ್ದನವೋಸ್ಸಗ್ಗೋತಿ ಮಗ್ಗೋ. ಸೋ ಹಿ ನಿಬ್ಬಾನಂ ಆರಮ್ಮಣತೋ ಪಕ್ಖನ್ದತಿ. ದ್ವೀಹಿಪಿ ವಾ ಕಾರಣೇಹಿ ಸೋ ವೋಸ್ಸಗ್ಗೋಯೇವ, ಸಮುಚ್ಛೇದವಸೇನ ಖನ್ಧಾನಂ ಕಿಲೇಸಾನಞ್ಚ ವೋಸ್ಸಜನತೋ ನಿಬ್ಬಾನೇ ಚ ಪಕ್ಖನ್ದನತೋ. ತಸ್ಮಾ ಕಿಲೇಸೇ ಚ ಖನ್ಧೇ ಚ ಪರಿಚ್ಚಜತೀತಿ ಪರಿಚ್ಚಾಗವೋಸ್ಸಗ್ಗೋ. ನಿರೋಧಾಯ ನಿಬ್ಬಾನಧಾತುಯಾ ಚಿತ್ತಂ ಪಕ್ಖನ್ದತೀತಿ ಪಕ್ಖನ್ದನವೋಸ್ಸಗ್ಗೋತಿ ಉಭಯಮ್ಪೇತಂ ಮಗ್ಗೇ ಸಮೇತಿ. ತದುಭಯಸಮಙ್ಗೀ ಪುಗ್ಗಲೋ ಇಮಾಯ ಪಟಿನಿಸ್ಸಗ್ಗಾನುಪಸ್ಸನಾಯ ಸಮನ್ನಾಗತತ್ತಾ ಪಟಿನಿಸ್ಸಗ್ಗಾನುಪಸ್ಸೀ ನಾಮ ಹೋತಿ. ತಂ ಸನ್ಧಾಯೇತಂ ವುತ್ತಂ. ನ ಕಿಞ್ಚಿ ಲೋಕೇ ಉಪಾದಿಯತೀತಿ ಕಿಞ್ಚಿ ಏಕಮ್ಪಿ ಸಙ್ಖಾರಗತಂ ತಣ್ಹಾವಸೇನ ನ ಉಪಾದಿಯತಿ ನ ಗಣ್ಹಾತಿ ನ ಪರಾಮಸತಿ. ಅನುಪಾದಿಯಂ ನ ಪರಿತಸ್ಸತೀತಿ ಅಗ್ಗಣ್ಹನ್ತೋ ತಣ್ಹಾಪರಿತಸ್ಸನಾಯ ನ ಪರಿತಸ್ಸತಿ. ಪಚ್ಚತ್ತಂಯೇವ ಪರಿನಿಬ್ಬಾಯತೀತಿ ಸಯಮೇವ ಕಿಲೇಸಪರಿನಿಬ್ಬಾನೇನ ಪರಿನಿಬ್ಬಾಯತಿ. ಖೀಣಾ ಜಾತೀತಿಆದಿನಾ ಪನಸ್ಸ ಪಚ್ಚವೇಕ್ಖಣಾ ದಸ್ಸಿತಾ. ಇತಿ ಭಗವಾ ಸಂಖಿತ್ತೇನ ಖೀಣಾಸವಸ್ಸ ಪುಬ್ಬಭಾಗಪ್ಪಟಿಪದಂ ಪುಚ್ಛಿತೋ ಸಂಖಿತ್ತೇನೇವ ಕಥೇಸಿ. ಇದಂ ಪನ ಸುತ್ತಂ ಥೇರಸ್ಸ ಓವಾದೋಪಿ ಅಹೋಸಿ ವಿಪಸ್ಸನಾಪಿ. ಸೋ ಇಮಸ್ಮಿಂಯೇವ ಸುತ್ತೇ ವಿಪಸ್ಸನಂ ವಡ್ಢೇತ್ವಾ ಅರಹತ್ತಂ ಪತ್ತೋತಿ.

೯. ಮೇತ್ತಸುತ್ತವಣ್ಣನಾ

೬೨. ನವಮೇ ಮಾ, ಭಿಕ್ಖವೇ, ಪುಞ್ಞಾನಂ ಭಾಯಿತ್ಥಾತಿ ಪುಞ್ಞಾನಿ ಕರೋನ್ತಾ ತೇಸಂ ಮಾ ಭಾಯಿತ್ಥ. ಮೇತ್ತಚಿತ್ತಂ ಭಾವೇಸಿನ್ತಿ ತಿಕಚತುಕ್ಕಜ್ಝಾನಿಕಾಯ ಮೇತ್ತಾಯ ಸಮ್ಪಯುತ್ತಂ ಪಣೀತಂ ಕತ್ವಾ ಚಿತ್ತಂ ಭಾವೇಸಿನ್ತಿ ದಸ್ಸೇತಿ. ಸಂವಟ್ಟಮಾನೇ ಸುದಾಹನ್ತಿ ಸಂವಟ್ಟಮಾನೇ ಸುದಂ ಅಹಂ. ಸಂವಟ್ಟಮಾನೇತಿ ಝಾಯಮಾನೇ ವಿಪಜ್ಜಮಾನೇ. ಧಮ್ಮಿಕೋತಿ ದಸಕುಸಲಧಮ್ಮಸಮನ್ನಾಗತೋ. ಧಮ್ಮರಾಜಾತಿ ತಸ್ಸೇವ ವೇವಚನಂ. ಧಮ್ಮೇನ ವಾ ಲದ್ಧರಜ್ಜತ್ತಾ ಧಮ್ಮರಾಜಾ. ಚಾತುರನ್ತೋತಿ ಪುರತ್ಥಿಮಸಮುದ್ದಾದೀನಂ ಚತುನ್ನಂ ಸಮುದ್ದಾನಂ ವಸೇನ ಚಾತುರನ್ತಾಯ ಪಥವಿಯಾ ಇಸ್ಸರೋ. ವಿಜಿತಾವೀತಿ ವಿಜಿತಸಙ್ಗಾಮೋ. ಜನಪದೋ ತಸ್ಮಿಂ ಥಾವರಿಯಂ ಥಿರಭಾವಂ ಪತ್ತೋತಿ ಜನಪದತ್ಥಾವರಿಯಪ್ಪತ್ತೋ. ಪರೋಸಹಸ್ಸನ್ತಿ ಅತಿರೇಕಸಹಸ್ಸಂ. ಸೂರಾತಿ ಅಭೀರುನೋ. ವೀರಙ್ಗರೂಪಾತಿ ವೀರಾನಂ ಅಙ್ಗಂ ವೀರಙ್ಗಂ, ವೀರಿಯಸ್ಸೇತಂ ನಾಮಂ. ವೀರಙ್ಗರೂಪಮೇತೇಸನ್ತಿ ವೀರಙ್ಗರೂಪಾ. ವೀರಿಯಜಾತಿಕಾ ವೀರಿಯಸಭಾವಾ ವೀರಿಯಮಯಾ ವಿಯ ಅಕಿಲಾಸುನೋ ದಿವಸಮ್ಪಿ ಯುಜ್ಝನ್ತಾ ನ ಕಿಲಮನ್ತೀತಿ ವುತ್ತಂ ಹೋತಿ. ಸಾಗರಪರಿಯನ್ತನ್ತಿ ಚಕ್ಕವಾಳಪಬ್ಬತಂ ಸೀಮಂ ಕತ್ವಾ ಠಿತಸಮುದ್ದಪರಿಯನ್ತಂ. ಅದಣ್ಡೇನಾತಿ ಧನದಣ್ಡೇನಪಿ ಛೇಜ್ಜಭೇಜ್ಜಾನುಸಾಸನೇನ ಸತ್ಥದಣ್ಡೇನಪಿ ವಿನಾಯೇವ. ಅಸತ್ಥೇನಾತಿ ಏಕತೋಧಾರಾದಿನಾ ಪರವಿಹೇಠನಸತ್ಥೇನಪಿ ವಿನಾಯೇವ. ಧಮ್ಮೇನ ಅಭಿವಿಜಿಯಾತಿ ಏಹಿ ಖೋ, ಮಹಾರಾಜಾತಿ ಏವಂ ಪಟಿರಾಜೂಹಿ ಸಮ್ಪಟಿಚ್ಛಿತಾಗಮನೋ ‘‘ಪಾಣೋ ನ ಹನ್ತಬ್ಬೋ’’ತಿಆದಿನಾ ಧಮ್ಮೇನೇವ ವುತ್ತಪ್ಪಕಾರಂ ಪಥವಿಂ ಅಭಿವಿಜಿನಿತ್ವಾ.

ಸುಖೇಸಿನೋತಿ ಸುಖಪರಿಯೇಸಕೇ ಸತ್ತೇ ಆಮನ್ತೇತಿ. ಸುಞ್ಞಬ್ರಹ್ಮೂಪಗೋತಿ ಸುಞ್ಞಬ್ರಹ್ಮವಿಮಾನೂಪಗೋ. ಪಥವಿಂ ಇಮನ್ತಿ ಇಮಂ ಸಾಗರಪರಿಯನ್ತಂ ಮಹಾಪಥವಿಂ. ಅಸಾಹಸೇನಾತಿ ನ ಸಾಹಸಿಕಕಮ್ಮೇನ. ಸಮೇನ ಮನುಸಾಸಿತನ್ತಿ ಸಮೇನ ಕಮ್ಮೇನ ಅನುಸಾಸಿಂ. ತೇಹಿ ಏತಂ ಸುದೇಸಿತನ್ತಿ ತೇಹಿ ಸಙ್ಗಾಹಕೇಹಿ ಮಹಾಕಾರುಣಿಕೇಹಿ ಬುದ್ಧೇಹಿ ಏತಂ ಏತ್ತಕಂ ಠಾನಂ ಸುದೇಸಿತಂ ಸುಕಥಿತಂ. ಪಥಬ್ಯೋತಿ ಪುಥವಿಸಾಮಿಕೋ.

೧೦. ಭರಿಯಾಸುತ್ತವಣ್ಣನಾ

೬೩. ದಸಮೇ ಕೇವಟ್ಟಾ ಮಞ್ಞೇ ಮಚ್ಛವಿಲೋಪೇತಿ ಕೇವಟ್ಟಾನಂ ಮಚ್ಛಪಚ್ಛಿಂ ಓತಾರೇತ್ವಾ ಠಿತಟ್ಠಾನೇ ಜಾಲೇ ವಾ ಉದಕತೋ ಉಕ್ಖಿತ್ತಮತ್ತೇ ಮಚ್ಛಗ್ಗಾಹಕಾನಂ ಮಹಾಸದ್ದೋ ಹೋತಿ, ತಂ ಸನ್ಧಾಯೇತಂ ವುತ್ತಂ. ಸುಜಾತಾತಿ ವಿಸಾಖಾಯ ಕನಿಟ್ಠಾ. ಸಾ ನೇವ ಸಸ್ಸುಂ ಆದಿಯತೀತಿ ಸಸ್ಸುಯಾ ಕತ್ತಬ್ಬವತ್ತಂ ನಾಮ ಅತ್ಥಿ, ತಂ ನ ಕರೋತಿ, ಸಸ್ಸೂತಿಪಿ ನಂ ನ ಗಣೇತಿ. ನ ಸಸುರಂ ಆದಿಯತೀತಿ ವಚನಂ ನ ಗಣ್ಹಾತಿ. ಏವಂ ಅನಾದರತಾಯಪಿ ಅಗ್ಗಹಣೇನಪಿ ನ ಆದಿಯತಿ ನಾಮ. ಸೇಸೇಸುಪಿ ಏಸೇವ ನಯೋ. ಏವಂ ಅನಾಥಪಿಣ್ಡಿಕೋ ಸುಣಿಸಾಯ ಆಚಾರಂ ಗಹೇತ್ವಾ ಸತ್ಥು ಪುರತೋ ನಿಸೀದಿ. ಸಾಪಿ ಸುಜಾತಾ ‘‘ಕಿಂ ನು ಖೋ ಅಯಂ ಸೇಟ್ಠಿ ದಸಬಲಸ್ಸ ಸನ್ತಿಕೇ ಮಯ್ಹಂ ಗುಣಂ ಕಥೇಸ್ಸತಿ ಉದಾಹು ಅಗುಣ’’ನ್ತಿ ಗನ್ತ್ವಾ ಅವಿದೂರೇ ಸದ್ದಂ ಸುಣನ್ತೀ ಅಟ್ಠಾಸಿ. ಅಥ ನಂ ಸತ್ಥಾ ಏಹಿ ಸುಜಾತೇತಿ ಆಮನ್ತೇಸಿ.

ಅಹಿತಾನುಕಮ್ಪಿನೀತಿ ನ ಹಿತಾನುಕಮ್ಪಿನೀ. ಅಞ್ಞೇಸೂತಿ ಪರಪುರಿಸೇಸು. ಅತಿಮಞ್ಞತೇತಿ ಓಮಾನಾತಿ ಮಾನವಸೇನ ಅತಿಮಞ್ಞತಿ. ಧನೇನ ಕೀತಸ್ಸಾತಿ ಧನೇನ ಕೀತಾ ಅಸ್ಸ. ವಧಾಯ ಉಸ್ಸುಕಾ ವಧಿತುಂ ಉಸ್ಸುಕ್ಕಮಾಪನ್ನಾ. ಯಂ ಇತ್ಥಿಯಾ ವಿನ್ದತಿ ಸಾಮಿಕೋ ಧನನ್ತಿ ಇತ್ಥಿಯಾ ಸಾಮಿಕೋ ಯಂ ಧನಂ ಲಭತಿ. ಅಪ್ಪಮ್ಪಿ ತಸ್ಸ ಅಪಹಾತುಮಿಚ್ಛತೀತಿ ಥೋಕತೋಪಿ ಅಸ್ಸ ಹರಿತುಂ ಇಚ್ಛತಿ, ಉದ್ಧನೇ ಆರೋಪಿತಉಕ್ಖಲಿಯಂ ಪಕ್ಖಿಪಿತಬ್ಬತಣ್ಡುಲತೋಪಿ ಥೋಕಂ ಹರಿತುಮೇವ ವಾಯಮತಿ. ಅಲಸಾತಿ ನಿಸಿನ್ನಟ್ಠಾನೇ ನಿಸಿನ್ನಾವ ಠಿತಟ್ಠಾನೇ ಠಿತಾವ ಹೋತಿ. ಫರುಸಾತಿ ಖರಾ. ದುರುತ್ತವಾದಿನೀತಿ ದುಬ್ಭಾಸಿತಭಾಸಿನೀ, ಕಕ್ಖಳಂ ವಾಳಕಥಮೇವ ಕಥೇತಿ. ಉಟ್ಠಾಯಕಾನಂ ಅಭಿಭುಯ್ಯ ವತ್ತತೀತಿ ಏತ್ಥ ಉಟ್ಠಾಯಕಾನನ್ತಿ ಬಹುವಚನವಸೇನ ವಿರಿಯುಟ್ಠಾನಸಮ್ಪನ್ನೋ ಸಾಮಿಕೋ ವುತ್ತೋ, ತಸ್ಸ ತಂ ಉಟ್ಠಾನಸಮ್ಪತ್ತಿಂ ಅಭಿಭವಿತ್ವಾ ಹೇಟ್ಠಾ ಕತ್ವಾ ವತ್ತತಿ. ಪಮೋದತೀತಿ ಆಮೋದಿತಪಮೋದಿತಾ ಹೋತಿ. ಕೋಲೇಯ್ಯಕಾತಿ ಕುಲಸಮ್ಪನ್ನಾ. ಪತಿಬ್ಬತಾತಿ ಪತಿದೇವತಾ. ವಧದಣ್ಡತಜ್ಜಿತಾತಿ ದಣ್ಡಕಂ ಗಹೇತ್ವಾ ವಧೇನ ತಜ್ಜಿತಾ, ‘‘ಘಾತೇಸ್ಸಾಮಿ ನ’’ನ್ತಿ ವುತ್ತಾ. ದಾಸೀಸಮನ್ತಿ ಸಾಮಿಕಸ್ಸ ವತ್ತಪೂರಿಕಾ ದಾಸೀತಿ ಮಂ ಭಗವಾ ಧಾರೇತೂತಿ ವತ್ವಾ ಸರಣೇಸು ಪತಿಟ್ಠಾಸಿ.

೧೧. ಕೋಧನಸುತ್ತವಣ್ಣನಾ

೬೪. ಏಕಾದಸಮೇ ಸಪತ್ತಕನ್ತಾತಿ ಸಪತ್ತಾನಂ ವೇರೀನಂ ಕನ್ತಾ ಪಿಯಾ ತೇಹಿ ಇಚ್ಛಿತಪತ್ಥಿತಾ. ಸಪತ್ತಕರಣಾತಿ ಸಪತ್ತಾನಂ ವೇರೀನಂ ಅತ್ಥಕರಣಾ. ಕೋಧಪರೇತೋತಿ ಕೋಧಾನುಗತೋ. ಪಚುರತ್ಥತಾಯಾತಿ ಬಹುಅತ್ಥತಾಯ ಬಹುಹಿತತಾಯ. ಅನತ್ಥಮ್ಪೀತಿ ಅವುದ್ಧಿಮ್ಪಿ. ಅತ್ಥೋ ಮೇ ಗಹಿತೋತಿ ವುಡ್ಢಿ ಮೇ ಗಹಿತಾ.

ಅಥೋ ಅತ್ಥಂ ಗಹೇತ್ವಾನಾತಿ ಅಥೋ ವುದ್ಧಿಂ ಗಹೇತ್ವಾ. ಅನತ್ಥಂ ಅಧಿಪಜ್ಜತೀತಿ ಅನತ್ಥೋ ಮೇ ಗಹಿತೋತಿ ಸಲ್ಲಕ್ಖೇತಿ. ವಧಂ ಕತ್ವಾನಾತಿ ಪಾಣಾತಿಪಾತಕಮ್ಮಂ ಕತ್ವಾ. ಕೋಧಸಮ್ಮದಸಮ್ಮತ್ತೋತಿ ಕೋಧಮದೇನ ಮತ್ತೋ, ಆದಿನ್ನಗಹಿತಪರಾಮಟ್ಠೋತಿ ಅತ್ಥೋ. ಆಯಸಕ್ಯನ್ತಿ ಅಯಸಭಾವಂ, ಅಯಸೋ ನಿಯಸೋ ಹೋತೀತಿ ಅತ್ಥೋ. ಅನ್ತರತೋ ಜಾತನ್ತಿ ಅಬ್ಭನ್ತರೇ ಉಪ್ಪನ್ನಂ. ಅತ್ಥಂ ನ ಜಾನಾತೀತಿ ವುದ್ಧಿಅತ್ಥಂ ನ ಜಾನಾತಿ. ಧಮ್ಮಂ ನ ಪಸ್ಸತೀತಿ ಸಮಥವಿಪಸ್ಸನಾಧಮ್ಮಂ ನ ಪಸ್ಸತಿ. ಅನ್ಧತಮನ್ತಿ ಅನ್ಧಭಾವಕರಂ ತಮಂ ಬಹಲತಮಂ. ಸಹತೇತಿ ಅಭಿಭವತಿ.

ದುಮ್ಮಙ್ಕುಯನ್ತಿ ದುಮ್ಮಙ್ಕುಭಾವಂ ನಿತ್ತೇಜತಂ ದುಬ್ಬಣ್ಣಮುಖತಂ. ಯತೋ ಪತಾಯತೀತಿ ಯದಾ ನಿಬ್ಬತ್ತತಿ. ನ ವಾಚೋ ಹೋತಿ ಗಾರವೋತಿ ವಚನಸ್ಸಪಿ ಗರುಭಾವೋ ನ ಹೋತಿ. ನ ದೀಪಂ ಹೋತಿ ಕಿಞ್ಚನನ್ತಿ ಕಾಚಿ ಪತಿಟ್ಠಾ ನಾಮ ನ ಹೋತಿ. ತಪನೀಯಾನೀತಿ ತಾಪಜನಕಾನಿ. ಧಮ್ಮೇಹೀತಿ ಸಮಥವಿಪಸ್ಸನಾಧಮ್ಮೇಹಿ. ಆರಕಾತಿ ದೂರೇ. ಬ್ರಾಹ್ಮಣನ್ತಿ ಖೀಣಾಸವಬ್ರಾಹ್ಮಣಂ. ಯಾಯ ಮಾತು ಭತೋತಿ ಯಾಯ ಮಾತರಾ ಭತೋ ಪೋಸಿತೋ. ಪಾಣದದಿಂ ಸನ್ತಿನ್ತಿ ಜೀವಿತದಾಯಿಕಂ ಸಮಾನಂ. ಹನ್ತಿ ಕುದ್ಧೋ ಪುಥುತ್ತಾನನ್ತಿ ಕುದ್ಧೋ ಪುಗ್ಗಲೋ ಪುಥು ನಾನಾಕಾರಣೇಹಿ ಅತ್ತಾನಂ ಹನ್ತಿ. ನಾನಾರೂಪೇಸು ಮುಚ್ಛಿತೋತಿ ನಾನಾರಮ್ಮಣೇಸು ಅಧಿಮುಚ್ಛಿತೋ ಹುತ್ವಾ. ರಜ್ಜುಯಾ ಬಜ್ಝ ಮೀಯನ್ತೀತಿ ರಜ್ಜುಯಾ ಬನ್ಧಿತ್ವಾ ಮರನ್ತಿ. ಪಬ್ಬತಾಮಪಿ ಕನ್ದರೇತಿ ಪಬ್ಬತಕನ್ದರೇಪಿ ಪತಿತ್ವಾ ಮರನ್ತಿ.

ಭೂನಹಚ್ಚಾನೀತಿ ಹತವುದ್ಧೀನಿ. ಇತಾಯನ್ತಿ ಇತಿ ಅಯಂ. ತಂ ದಮೇನ ಸಮುಚ್ಛಿನ್ದೇತಿ ತಂ ಕೋಧಂ ದಮೇನ ಛಿನ್ದೇಯ್ಯ. ಕತರೇನ ದಮೇನಾತಿ? ಪಞ್ಞಾವೀರಿಯೇನ ದಿಟ್ಠಿಯಾತಿ ವಿಪಸ್ಸನಾಪಞ್ಞಾಯ ಚೇವ ವಿಪಸ್ಸನಾಸಮ್ಪಯುತ್ತೇನ ಕಾಯಿಕಚೇತಸಿಕವೀರಿಯೇನ ಚ ಮಗ್ಗಸಮ್ಮಾದಿಟ್ಠಿಯಾ ಚ. ತಥೇವ ಧಮ್ಮೇ ಸಿಕ್ಖೇಥಾತಿ ಯಥಾ ಅಕುಸಲಂ ಸಮುಚ್ಛಿನ್ದೇಯ್ಯ, ಸಮಥವಿಪಸ್ಸನಾಧಮ್ಮೇಪಿ ತಥೇವ ಸಿಕ್ಖೇಯ್ಯ. ಮಾ ನೋ ದುಮ್ಮಙ್ಕುಯಂ ಅಹೂತಿ ಮಾ ಅಮ್ಹಾಕಂ ದುಮ್ಮಙ್ಕುಭಾವೋ ಅಹೋಸೀತಿ ಇಮಮತ್ಥಂ ಪತ್ಥಯಮಾನಾ. ಅನಾಯಾಸಾತಿ ಅನುಪಾಯಾಸಾ. ಅನುಸ್ಸುಕಾತಿ ಕತ್ಥಚಿ ಉಸ್ಸುಕ್ಕಂ ಅನಾಪನ್ನಾ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಅಬ್ಯಾಕತವಗ್ಗೋ ಛಟ್ಠೋ.