೮. ಅರಹತ್ತವಗ್ಗೋ

೧. ದುಕ್ಖಸುತ್ತವಣ್ಣನಾ

೭೫. ಅಟ್ಠಮಸ್ಸ ಪಠಮೇ ಸವಿಘಾತನ್ತಿ ಸಉಪಘಾತಂ ಸೋಪದ್ದವಂ. ಸಪರಿಳಾಹನ್ತಿ ಕಾಯಿಕಚೇತಸಿಕೇನ ಪರಿಳಾಹೇನ ಸಪರಿಳಾಹಂ. ಪಾಟಿಕಙ್ಖಾತಿ ಇಚ್ಛಿತಬ್ಬಾ ಅವಸ್ಸಂಭಾವಿನೀ.

೨. ಅರಹತ್ತಸುತ್ತವಣ್ಣನಾ

೭೬. ದುತಿಯೇ ಮಾನನ್ತಿ ಜಾತಿಆದೀಹಿ ಮಞ್ಞನಂ. ಓಮಾನನ್ತಿ ಹೀನೋಹಮಸ್ಮೀತಿ ಮಾನಂ. ಅತಿಮಾನನ್ತಿ ಅತಿಕ್ಕಮಿತ್ವಾ ಪವತ್ತಂ ಅಚ್ಚುಣ್ಣತಿಮಾನಂ. ಅಧಿಮಾನನ್ತಿ ಅಧಿಗತಮಾನಂ. ಥಮ್ಭನ್ತಿ ಕೋಧಮಾನೇಹಿ ಥದ್ಧಭಾವಂ. ಅತಿನಿಪಾತನ್ತಿ ಹೀನಸ್ಸ ಹೀನೋಹಮಸ್ಮೀತಿ ಮಾನಂ.

೩. ಉತ್ತರಿಮನುಸ್ಸಧಮ್ಮಸುತ್ತವಣ್ಣನಾ

೭೭. ತತಿಯೇ ಉತ್ತರಿಮನುಸ್ಸಧಮ್ಮಾತಿ ಮನುಸ್ಸಧಮ್ಮತೋ ಉತ್ತರಿ. ಅಲಮರಿಯಞಾಣದಸ್ಸನವಿಸೇಸನ್ತಿ ಅರಿಯಭಾವಂ ಕಾತುಂ ಸಮತ್ಥಂ ಞಾಣದಸ್ಸನವಿಸೇಸಂ, ಚತ್ತಾರೋ ಮಗ್ಗೇ ಚತ್ತಾರಿ ಚ ಫಲಾನೀತಿ ಅತ್ಥೋ. ಕುಹನನ್ತಿ ತಿವಿಧಂ ಕುಹನವತ್ಥುಂ. ಲಪನನ್ತಿ ಲಾಭತ್ಥಿಕತಾಯ ಉಕ್ಖಿಪಿತ್ವಾ ಅವಕ್ಖಿಪಿತ್ವಾ ವಾ ಲಪನಂ.

೪. ಸುಖಸೋಮನಸ್ಸಸುತ್ತವಣ್ಣನಾ

೭೮. ಚತುತ್ಥೇ ಯೋನಿ ಚಸ್ಸ ಆರದ್ಧಾ ಹೋತೀತಿ ಕಾರಣಞ್ಚಸ್ಸ ಪರಿಪುಣ್ಣಂ ಪಗ್ಗಹಿತಂ ಹೋತಿ. ಧಮ್ಮಾರಾಮೋತಿ ಧಮ್ಮೇ ರತಿಂ ವಿನ್ದತಿ. ಭಾವನಾಯ ರಮತಿ, ಭಾವೇನ್ತೋ ವಾ ರಮತೀತಿ ಭಾವನಾರಾಮೋ. ಪಹಾನೇ ರಮತಿ, ಪಜಹನ್ತೋ ವಾ ರಮತೀತಿ ಪಹಾನಾರಾಮೋ. ತಿವಿಧೇ ಪವಿವೇಕೇ ರಮತೀತಿ ಪವಿವೇಕಾರಾಮೋ. ಅಬ್ಯಾಪಜ್ಝೇ ನಿದ್ದುಕ್ಖಭಾವೇ ರಮತೀತಿ ಅಬ್ಯಾಪಜ್ಝಾರಾಮೋ. ನಿಪ್ಪಪಞ್ಚಸಙ್ಖಾತೇ ನಿಬ್ಬಾನೇ ರಮತೀತಿ ನಿಪ್ಪಪಞ್ಚಾರಾಮೋ.

೫. ಅಧಿಗಮಸುತ್ತವಣ್ಣನಾ

೭೯. ಪಞ್ಚಮೇ ನ ಆಯಕುಸಲೋತಿ ನ ಆಗಮನಕುಸಲೋ. ನ ಅಪಾಯಕುಸಲೋತಿ ನ ಅಪಗಮನಕುಸಲೋ. ಛನ್ದನ್ತಿ ಕತ್ತುಕಮ್ಯತಾಛನ್ದಂ. ನ ಆರಕ್ಖತೀತಿ ನ ರಕ್ಖತಿ.

೬. ಮಹನ್ತತ್ತಸುತ್ತವಣ್ಣನಾ

೮೦. ಛಟ್ಠೇ ಆಲೋಕಬಹುಲೋತಿ ಞಾಣಾಲೋಕಬಹುಲೋ. ಯೋಗಬಹುಲೋತಿ ಯೋಗೇ ಬಹುಲಂ ಕರೋತಿ. ವೇದಬಹುಲೋತಿ ಪೀತಿಪಾಮೋಜ್ಜಬಹುಲೋ. ಅಸನ್ತುಟ್ಠಿಬಹುಲೋತಿ ಕುಸಲಧಮ್ಮೇಸು ಅಸನ್ತುಟ್ಠೋ. ಅನಿಕ್ಖಿತ್ತಧುರೋತಿ ಅಟ್ಠಪಿತಧುರೋ ಪಗ್ಗಹಿತವೀರಿಯೋ. ಉತ್ತರಿ ಚ ಪತಾರೇತೀತಿ ಸಮ್ಪತಿ ಚ ಉತ್ತರಿಞ್ಚ ವೀರಿಯಂ ಕರೋತೇವ. ಸತ್ತಮಂ ಉತ್ತಾನಮೇವ.

೮-೧೦. ದುತಿಯನಿರಯಸುತ್ತಾದಿವಣ್ಣನಾ

೮೨-೮೪. ಅಟ್ಠಮೇ ಪಗಬ್ಭೋತಿ ಕಾಯಪಾಗಬ್ಭಿಯಾದೀಹಿ ಸಮನ್ನಾಗತೋ. ನವಮಂ ಉತ್ತಾನತ್ಥಮೇವ. ದಸಮೇ ವಿಘಾತವಾತಿ ಮಹಿಚ್ಛತಂ ನಿಸ್ಸಾಯ ಉಪ್ಪನ್ನೇನ ಲೋಭದುಕ್ಖೇನ ದುಕ್ಖಿತೋ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಅರಹತ್ತವಗ್ಗೋ ಅಟ್ಠಮೋ.