೪. ಸಙ್ಗಣಿಕಾರಾಮಸುತ್ತವಣ್ಣನಾ

೬೮. ಚತುತ್ಥೇ ಸಙ್ಗಣಿಕಾರಾಮೋತಿ ಗಣಸಙ್ಗಣಿಕಾರಾಮೋ. ಸುತ್ತನ್ತಿಕಗಣಾದೀಸು ಪನ ಗಣೇಸು ಅತ್ತನೋ ವಾ ಪರಿಸಾಸಙ್ಖಾತೇ ಗಣೇ ರಮತೀತಿ ಗಣಾರಾಮೋ. ಪವಿವೇಕೇತಿ ಕಾಯವಿವೇಕೇ. ಚಿತ್ತಸ್ಸ ನಿಮಿತ್ತನ್ತಿ ಸಮಾಧಿವಿಪಸ್ಸನಾಚಿತ್ತಸ್ಸ ನಿಮಿತ್ತಂ ಸಮಾಧಿವಿಪಸ್ಸನಾಕಾರಂ. ಸಮ್ಮಾದಿಟ್ಠಿನ್ತಿ ವಿಪಸ್ಸನಾಸಮ್ಮಾದಿಟ್ಠಿಂ. ಸಮಾಧಿನ್ತಿ ಮಗ್ಗಸಮಾಧಿಞ್ಚೇವ ಫಲಸಮಾಧಿಞ್ಚ. ಸಂಯೋಜನಾನೀತಿ ದಸ ಸಂಯೋಜನಾನಿ. ನಿಬ್ಬಾನನ್ತಿ ಅಪಚ್ಚಯಪರಿನಿಬ್ಬಾನಂ.