೫. ಪಚ್ಚುಪ್ಪನ್ನಾನಾಗತವಾರೋ

(ಕ) ಅನುಲೋಮಂ

೪೬೭. (ಕ) ಯೋ ಚಕ್ಖುನ್ದ್ರಿಯಂ ಪರಿಜಾನಾತಿ ಸೋ ದೋಮನಸ್ಸಿನ್ದ್ರಿಯಂ ಪಜಹಿಸ್ಸತೀತಿ? ನೋ.

(ಖ) ಯೋ ವಾ ಪನ ದೋಮನಸ್ಸಿನ್ದ್ರಿಯಂ ಪಜಹಿಸ್ಸತಿ ಸೋ ಚಕ್ಖುನ್ದ್ರಿಯಂ ಪರಿಜಾನಾತೀತಿ? ನೋ.

(ಕ) ಯೋ ಚಕ್ಖುನ್ದ್ರಿಯಂ ಪರಿಜಾನಾತಿ ಸೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಭಾವೇಸ್ಸತೀತಿ? ನೋ.

(ಖ) ಯೋ ವಾ ಪನ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಭಾವೇಸ್ಸತಿ ಸೋ ಚಕ್ಖುನ್ದ್ರಿಯಂ ಪರಿಜಾನಾತೀತಿ? ನೋ.

(ಕ) ಯೋ ಚಕ್ಖುನ್ದ್ರಿಯಂ ಪರಿಜಾನಾತಿ ಸೋ ಅಞ್ಞಿನ್ದ್ರಿಯಂ ಭಾವೇಸ್ಸತೀತಿ? ನೋ.

(ಖ) ಯೋ ವಾ ಪನ ಅಞ್ಞಿನ್ದ್ರಿಯಂ ಭಾವೇಸ್ಸತಿ ಸೋ ಚಕ್ಖುನ್ದ್ರಿಯಂ ಪರಿಜಾನಾತೀತಿ? ನೋ.

(ಕ) ಯೋ ಚಕ್ಖುನ್ದ್ರಿಯಂ ಪರಿಜಾನಾತಿ ಸೋ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸತೀತಿ? ಆಮನ್ತಾ.

(ಖ) ಯೋ ವಾ ಪನ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸತಿ ಸೋ ಚಕ್ಖುನ್ದ್ರಿಯಂ ಪರಿಜಾನಾತೀತಿ?

ಸತ್ತ ಪುಗ್ಗಲಾ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸನ್ತಿ, ನೋ ಚ ಚಕ್ಖುನ್ದ್ರಿಯಂ ಪರಿಜಾನನ್ತಿ. ಅಗ್ಗಮಗ್ಗಸಮಙ್ಗೀ ಅಞ್ಞಾತಾವಿನ್ದ್ರಿಯಞ್ಚ ಸಚ್ಛಿಕರಿಸ್ಸತಿ ಚಕ್ಖುನ್ದ್ರಿಯಞ್ಚ ಪರಿಜಾನಾತಿ. (ಚಕ್ಖುನ್ದ್ರಿಯಮೂಲಕಂ)

೪೬೮. (ಕ) ಯೋ ದೋಮನಸ್ಸಿನ್ದ್ರಿಯಂ ಪಜಹತಿ ಸೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಭಾವೇಸ್ಸತೀತಿ? ನೋ.

(ಖ) ಯೋ ವಾ ಪನ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಭಾವೇಸ್ಸತಿ ಸೋ ದೋಮನಸ್ಸಿನ್ದ್ರಿಯಂ ಪಜಹತೀತಿ? ನೋ.

(ಕ) ಯೋ ದೋಮನಸ್ಸಿನ್ದ್ರಿಯಂ ಪಜಹತಿ ಸೋ ಅಞ್ಞಿನ್ದ್ರಿಯಂ ಭಾವೇಸ್ಸತೀತಿ? ಆಮನ್ತಾ.

(ಖ) ಯೋ ವಾ ಪನ ಅಞ್ಞಿನ್ದ್ರಿಯಂ ಭಾವೇಸ್ಸತಿ ಸೋ ದೋಮನಸ್ಸಿನ್ದ್ರಿಯಂ ಪಜಹತೀತಿ?

ಛ ಪುಗ್ಗಲಾ ಅಞ್ಞಿನ್ದ್ರಿಯಂ ಭಾವೇಸ್ಸನ್ತಿ, ನೋ ಚ ದೋಮನಸ್ಸಿನ್ದ್ರಿಯಂ ಪಜಹನ್ತಿ ಅನಾಗಾಮಿಮಗ್ಗಸಮಙ್ಗಿ ಅಞ್ಞಿನ್ದ್ರಿಯಞ್ಚ ಭಾವೇಸ್ಸನ್ತಿ, ದೋಮನಸ್ಸಿನ್ದ್ರಿಯಞ್ಚ ಪಜಹನ್ತಿ.

(ಕ) ಯೋ ದೋಮನಸ್ಸಿನ್ದ್ರಿಯಂ ಪಜಹತಿ ಸೋ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸತೀತಿ? ಆಮನ್ತಾ.

(ಖ) ಯೋ ವಾ ಪನ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸತಿ ಸೋ ದೋಮನಸ್ಸಿನ್ದ್ರಿಯಂ ಪಜಹತೀತಿ?

ಸತ್ತ ಪುಗ್ಗಲಾ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸನ್ತಿ, ನೋ ಚ ದೋಮನಸ್ಸಿನ್ದ್ರಿಯಂ ಪಜಹನ್ತಿ. ಅನಾಗಾಮಿಮಗ್ಗಸಮಙ್ಗೀ ಅಞ್ಞಾತಾವಿನ್ದ್ರಿಯಞ್ಚ ಸಚ್ಛಿಕರಿಸ್ಸತಿ ದೋಮನಸ್ಸಿನ್ದ್ರಿಯಞ್ಚ ಪಜಹತಿ. (ದೋಮನಸ್ಸಿನ್ದ್ರಿಯಮೂಲಕಂ)

೪೬೯. (ಕ) ಯೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಭಾವೇತಿ ಸೋ ಅಞ್ಞಿನ್ದ್ರಿಯಂ ಭಾವೇಸ್ಸತೀತಿ? ಆಮನ್ತಾ.

(ಖ) ಯೋ ವಾ ಪನ ಅಞ್ಞಿನ್ದ್ರಿಯಂ ಭಾವೇಸ್ಸತಿ ಸೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಭಾವೇತೀತಿ?

ಛ ಪುಗ್ಗಲಾ ಅಞ್ಞಿನ್ದ್ರಿಯಂ ಭಾವೇಸ್ಸನ್ತಿ, ನೋ ಚ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಭಾವೇನ್ತಿ. ಅಟ್ಠಮಕೋ ಅಞ್ಞಿನ್ದ್ರಿಯಞ್ಚ ಭಾವೇಸ್ಸತಿ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಞ್ಚ ಭಾವೇತಿ.

(ಕ) ಯೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಭಾವೇತಿ ಸೋ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸತೀತಿ? ಆಮನ್ತಾ.

(ಖ) ಯೋ ವಾ ಪನ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸತಿ ಸೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಭಾವೇತೀತಿ?

ಸತ್ತ ಪುಗ್ಗಲಾ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸನ್ತಿ, ನೋ ಚ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ಭಾವೇನ್ತಿ. ಅಟ್ಠಮಕೋ ಅಞ್ಞಾತಾವಿನ್ದ್ರಿಯಞ್ಚ ಸಚ್ಛಿಕರಿಸ್ಸತಿ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಞ್ಚ ಭಾವೇತಿ. (ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಮೂಲಕಂ)

೪೭೦. (ಕ) ಯೋ ಅಞ್ಞಿನ್ದ್ರಿಯಂ ಭಾವೇತಿ ಸೋ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸತೀತಿ? ಆಮನ್ತಾ.

(ಖ) ಯೋ ವಾ ಪನ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸತಿ ಸೋ ಅಞ್ಞಿನ್ದ್ರಿಯಂ ಭಾವೇತೀತಿ?

ಪಞ್ಚ ಪುಗ್ಗಲಾ ಅಞ್ಞಾತಾವಿನ್ದ್ರಿಯಂ ಸಚ್ಛಿಕರಿಸ್ಸನ್ತಿ, ನೋ ಚ ಅಞ್ಞಿನ್ದ್ರಿಯಂ ಭಾವೇನ್ತಿ. ತಯೋ ಮಗ್ಗಸಮಙ್ಗಿನೋ ಅಞ್ಞಾತಾವಿನ್ದ್ರಿಯಞ್ಚ ಸಚ್ಛಿಕರಿಸ್ಸನ್ತಿ ಅಞ್ಞಿನ್ದ್ರಿಯಞ್ಚ ಭಾವೇನ್ತಿ. (ಅಞ್ಞಿನ್ದ್ರಿಯಮೂಲಕಂ)

(ಖ) ಪಚ್ಚನೀಕಂ

೪೭೧. (ಕ) ಯೋ ಚಕ್ಖುನ್ದ್ರಿಯಂ ನ ಪರಿಜಾನಾತಿ ಸೋ ದೋಮನಸ್ಸಿನ್ದ್ರಿಯಂ ನಪ್ಪಜಹಿಸ್ಸತೀತಿ?

ಪಞ್ಚ ಪುಗ್ಗಲಾ ಚಕ್ಖುನ್ದ್ರಿಯಂ ನ ಪರಿಜಾನನ್ತಿ, ನೋ ಚ ದೋಮನಸ್ಸಿನ್ದ್ರಿಯಂ ನಪ್ಪಜಹಿಸ್ಸನ್ತಿ. ಚತ್ತಾರೋ ಪುಗ್ಗಲಾ ಚಕ್ಖುನ್ದ್ರಿಯಞ್ಚ ನ ಪರಿಜಾನನ್ತಿ ದೋಮನಸ್ಸಿನ್ದ್ರಿಯಞ್ಚ ನಪ್ಪಜಹಿಸ್ಸನ್ತಿ.

(ಖ) ಯೋ ವಾ ಪನ ದೋಮನಸ್ಸಿನ್ದ್ರಿಯಂ ನಪ್ಪಜಹಿಸ್ಸತಿ ಸೋ ಚಕ್ಖುನ್ದ್ರಿಯಂ ನ ಪರಿಜಾನಾತೀತಿ?

ಅಗ್ಗಮಗ್ಗಸಮಙ್ಗೀ ದೋಮನಸ್ಸಿನ್ದ್ರಿಯಂ ನಪ್ಪಜಹಿಸ್ಸತಿ, ನೋ ಚ ಚಕ್ಖುನ್ದ್ರಿಯಂ ನ ಪರಿಜಾನಾತಿ. ಚತ್ತಾರೋ ಪುಗ್ಗಲಾ ದೋಮನಸ್ಸಿನ್ದ್ರಿಯಞ್ಚ ನಪ್ಪಜಹಿಸ್ಸನ್ತಿ ಚಕ್ಖುನ್ದ್ರಿಯಞ್ಚ ನ ಪರಿಜಾನನ್ತಿ.

(ಕ) ಯೋ ಚಕ್ಖುನ್ದ್ರಿಯಂ ನ ಪರಿಜಾನಾತಿ ಸೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇಸ್ಸತೀತಿ?

ಯೇ ಪುಥುಜ್ಜನಾ ಮಗ್ಗಂ ಪಟಿಲಭಿಸ್ಸನ್ತಿ ತೇ ಚಕ್ಖುನ್ದ್ರಿಯಂ ನ ಪರಿಜಾನನ್ತಿ, ನೋ ಚ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇಸ್ಸನ್ತಿ. ಅಟ್ಠ ಪುಗ್ಗಲಾ ಚಕ್ಖುನ್ದ್ರಿಯಞ್ಚ ನ ಪರಿಜಾನನ್ತಿ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಞ್ಚ ನ ಭಾವೇಸ್ಸನ್ತಿ.

(ಖ) ಯೋ ವಾ ಪನ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇಸ್ಸತಿ ಸೋ ಚಕ್ಖುನ್ದ್ರಿಯಂ ನ ಪರಿಜಾನಾತೀತಿ?

ಅಗ್ಗಮಗ್ಗಸಮಙ್ಗೀ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇಸ್ಸತಿ, ನೋ ಚ ಚಕ್ಖುನ್ದ್ರಿಯಂ ನ ಪರಿಜಾನಾತಿ. ಅಟ್ಠ ಪುಗ್ಗಲಾ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಞ್ಚ ನ ಭಾವೇಸ್ಸನ್ತಿ ಚಕ್ಖುನ್ದ್ರಿಯಞ್ಚ ನ ಪರಿಜಾನನ್ತಿ.

(ಕ) ಯೋ ಚಕ್ಖುನ್ದ್ರಿಯಂ ನ ಪರಿಜಾನಾತಿ ಸೋ ಅಞ್ಞಿನ್ದ್ರಿಯಂ ನ ಭಾವೇಸ್ಸತೀತಿ?

ಸತ್ತ ಪುಗ್ಗಲಾ ಚಕ್ಖುನ್ದ್ರಿಯಂ ನ ಪರಿಜಾನನ್ತಿ, ನೋ ಚ ಅಞ್ಞಿನ್ದ್ರಿಯಂ ನ ಭಾವೇಸ್ಸನ್ತಿ. ದ್ವೇ ಪುಗ್ಗಲಾ ಚಕ್ಖುನ್ದ್ರಿಯಞ್ಚ ನ ಪರಿಜಾನನ್ತಿ ಅಞ್ಞಿನ್ದ್ರಿಯಞ್ಚ ನ ಭಾವೇಸ್ಸನ್ತಿ.

(ಖ) ಯೋ ವಾ ಪನ ಅಞ್ಞಿನ್ದ್ರಿಯಂ ನ ಭಾವೇಸ್ಸತಿ ಸೋ ಚಕ್ಖುನ್ದ್ರಿಯಂ ನ ಪರಿಜಾನಾತೀತಿ?

ಅಗ್ಗಮಗ್ಗಸಮಙ್ಗೀ ಅಞ್ಞಿನ್ದ್ರಿಯಂ ನ ಭಾವೇಸ್ಸತಿ, ನೋ ಚ ಚಕ್ಖುನ್ದ್ರಿಯಂ ನ ಪರಿಜಾನಾತಿ. ದ್ವೇ ಪುಗ್ಗಲಾ ಅಞ್ಞಿನ್ದ್ರಿಯಞ್ಚ ನ ಭಾವೇಸ್ಸನ್ತಿ ಚಕ್ಖುನ್ದ್ರಿಯಞ್ಚ ನ ಪರಿಜಾನನ್ತಿ.

(ಕ) ಯೋ ಚಕ್ಖುನ್ದ್ರಿಯಂ ನ ಪರಿಜಾನಾತಿ ಸೋ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸತೀತಿ?

ಸತ್ತ ಪುಗ್ಗಲಾ ಚಕ್ಖುನ್ದ್ರಿಯಂ ನ ಪರಿಜಾನನ್ತಿ, ನೋ ಚ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸನ್ತಿ. ದ್ವೇ ಪುಗ್ಗಲಾ ಚಕ್ಖುನ್ದ್ರಿಯಞ್ಚ ನ ಪರಿಜಾನನ್ತಿ ಅಞ್ಞಾತಾವಿನ್ದ್ರಿಯಞ್ಚ ನ ಸಚ್ಛಿಕರಿಸ್ಸನ್ತಿ.

(ಖ) ಯೋ ವಾ ಪನ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸತಿ ಸೋ ಚಕ್ಖುನ್ದ್ರಿಯಂ ನ ಪರಿಜಾನಾತೀತಿ? ಆಮನ್ತಾ. (ಚಕ್ಖುನ್ದ್ರಿಯಮೂಲಕಂ)

೪೭೨. (ಕ) ಯೋ ದೋಮನಸ್ಸಿನ್ದ್ರಿಯಂ ನಪ್ಪಜಹತಿ ಸೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇಸ್ಸತೀತಿ?

ಯೇ ಪುಥುಜ್ಜನಾ ಮಗ್ಗಂ ಪಟಿಲಭಿಸ್ಸನ್ತಿ ತೇ ದೋಮನಸ್ಸಿನ್ದ್ರಿಯಂ ನಪ್ಪಜಹನ್ತಿ, ನೋ ಚ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇಸ್ಸನ್ತಿ. ಅಟ್ಠ ಪುಗ್ಗಲಾ ದೋಮನಸ್ಸಿನ್ದ್ರಿಯಞ್ಚ ನಪ್ಪಜಹನ್ತಿ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಞ್ಚ ನ ಭಾವೇಸ್ಸನ್ತಿ.

(ಖ) ಯೋ ವಾ ಪನ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇಸ್ಸತಿ ಸೋ ದೋಮನಸ್ಸಿನ್ದ್ರಿಯಂ ನಪ್ಪಜಹತೀತಿ?

ಅನಾಗಾಮಿಮಗ್ಗಸಮಙ್ಗೀ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇಸ್ಸತಿ, ನೋ ಚ ದೋಮನಸ್ಸಿನ್ದ್ರಿಯಂ ನಪ್ಪಜಹತಿ. ಅಟ್ಠ ಪುಗ್ಗಲಾ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಞ್ಚ ನ ಭಾವೇಸ್ಸನ್ತಿ ದೋಮನಸ್ಸಿನ್ದ್ರಿಯಞ್ಚ ನಪ್ಪಜಹನ್ತಿ.

(ಕ) ಯೋ ದೋಮನಸ್ಸಿನ್ದ್ರಿಯಂ ನಪ್ಪಜಹತಿ ಸೋ ಅಞ್ಞಿನ್ದ್ರಿಯಂ ನ ಭಾವೇಸ್ಸತೀತಿ?

ಛ ಪುಗ್ಗಲಾ ದೋಮನಸ್ಸಿನ್ದ್ರಿಯಂ ನಪ್ಪಜಹನ್ತಿ, ನೋ ಚ ಅಞ್ಞಿನ್ದ್ರಿಯಂ ನ ಭಾವೇಸ್ಸನ್ತಿ. ತಯೋ ಪುಗ್ಗಲಾ ದೋಮನಸ್ಸಿನ್ದ್ರಿಯಞ್ಚ ನಪ್ಪಜಹನ್ತಿ ಅಞ್ಞಿನ್ದ್ರಿಯಞ್ಚ ನ ಭಾವೇಸ್ಸನ್ತಿ.

(ಖ) ಯೋ ವಾ ಪನ ಅಞ್ಞಿನ್ದ್ರಿಯಂ ನ ಭಾವೇಸ್ಸತಿ ಸೋ ದೋಮನಸ್ಸಿನ್ದ್ರಿಯಂ ನಪ್ಪಜಹತೀತಿ? ಆಮನ್ತಾ.

(ಕ) ಯೋ ದೋಮನಸ್ಸಿನ್ದ್ರಿಯಂ ನಪ್ಪಜಹತಿ ಸೋ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸತೀತಿ?

ಸತ್ತ ಪುಗ್ಗಲಾ ದೋಮನಸ್ಸಿನ್ದ್ರಿಯಂ ನಪ್ಪಜಹನ್ತಿ, ನೋ ಚ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸನ್ತಿ. ದ್ವೇ ಪುಗ್ಗಲಾ ದೋಮನಸ್ಸಿನ್ದ್ರಿಯಞ್ಚ ನಪ್ಪಜಹನ್ತಿ ಅಞ್ಞಾತಾವಿನ್ದ್ರಿಯಞ್ಚ ನ ಸಚ್ಛಿಕರಿಸ್ಸನ್ತಿ.

(ಖ) ಯೋ ವಾ ಪನ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸತಿ ಸೋ ದೋಮನಸ್ಸಿನ್ದ್ರಿಯಂ ನಪ್ಪಜಹತೀತಿ? ಆಮನ್ತಾ. (ದೋಮನಸ್ಸಿನ್ದ್ರಿಯಮೂಲಕಂ)

೪೭೩. (ಕ) ಯೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇತಿ ಸೋ ಅಞ್ಞಿನ್ದ್ರಿಯಂ ನ ಭಾವೇಸ್ಸತೀತಿ?

ಛ ಪುಗ್ಗಲಾ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇನ್ತಿ, ನೋ ಚ ಅಞ್ಞಿನ್ದ್ರಿಯಂ ನ ಭಾವೇಸ್ಸನ್ತಿ. ತಯೋ ಪುಗ್ಗಲಾ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಞ್ಚ ನ ಭಾವೇನ್ತಿ ಅಞ್ಞಿನ್ದ್ರಿಯಞ್ಚ ನ ಭಾವೇಸ್ಸನ್ತಿ.

(ಖ) ಯೋ ವಾ ಪನ ಅಞ್ಞಿನ್ದ್ರಿಯಂ ನ ಭಾವೇಸ್ಸತಿ ಸೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇತೀತಿ? ಆಮನ್ತಾ.

(ಕ) ಯೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇತಿ ಸೋ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸತೀತಿ?

ಸತ್ತ ಪುಗ್ಗಲಾ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇನ್ತಿ, ನೋ ಚ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸನ್ತಿ. ದ್ವೇ ಪುಗ್ಗಲಾ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಞ್ಚ ನ ಭಾವೇನ್ತಿ ಅಞ್ಞಾತಾವಿನ್ದ್ರಿಯಞ್ಚ ನ ಸಚ್ಛಿಕರಿಸ್ಸನ್ತಿ.

(ಖ) ಯೋ ವಾ ಪನ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸತಿ ಸೋ ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಂ ನ ಭಾವೇತೀತಿ? ಆಮನ್ತಾ. (ಅನಞ್ಞಾತಞ್ಞಸ್ಸಾಮೀತಿನ್ದ್ರಿಯಮೂಲಕಂ)

೪೭೪. (ಕ) ಯೋ ಅಞ್ಞಿನ್ದ್ರಿಯಂ ನ ಭಾವೇತಿ ಸೋ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸತೀತಿ?

ಪಞ್ಚ ಪುಗ್ಗಲಾ ಅಞ್ಞಿನ್ದ್ರಿಯಂ ನ ಭಾವೇನ್ತಿ, ನೋ ಚ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸನ್ತಿ. ದ್ವೇ ಪುಗ್ಗಲಾ ಅಞ್ಞಿನ್ದ್ರಿಯಞ್ಚ ನ ಭಾವೇನ್ತಿ ಅಞ್ಞಾತಾವಿನ್ದ್ರಿಯಞ್ಚ ನ ಸಚ್ಛಿಕರಿಸ್ಸನ್ತಿ.

(ಖ) ಯೋ ವಾ ಪನ ಅಞ್ಞಾತಾವಿನ್ದ್ರಿಯಂ ನ ಸಚ್ಛಿಕರಿಸ್ಸತಿ ಸೋ ಅಞ್ಞಿನ್ದ್ರಿಯಂ ನ ಭಾವೇತೀತಿ? ಆಮನ್ತಾ. (ಅಞ್ಞಿನ್ದ್ರಿಯಮೂಲಕಂ)