(೬) ಅತೀತಾನಾಗತವಾರೋ

(ಕ) ಅನುಲೋಮಪುಗ್ಗಲೋ

೨೧೯. (ಕ) ಯಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತೀತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ, ನೋ ಚ ತೇಸಂ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ. ಇತರೇಸಂ ತೇಸಂ ಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ ಅಕುಸಲಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಕ) ಯಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತೀತಿ?

ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ, ನೋ ಚ ತೇಸಂ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ. ಇತರೇಸಂ ತೇಸಂ ಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ? ಆಮನ್ತಾ.

೨೨೦. (ಕ) ಯಸ್ಸ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತೀತಿ?

ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥ, ನೋ ಚ ತೇಸಂ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ. ಇತರೇಸಂ ತೇಸಂ ಅಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಖ) ಅನುಲೋಮಓಕಾಸೋ

೨೨೧. ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತೀತಿ?…ಪೇ….

(ಗ) ಅನುಲೋಮಪುಗ್ಗಲೋಕಾಸಾ

೨೨೨. (ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತೀತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ, ನೋ ಚ ತೇಸಂ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ ಅಕುಸಲಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ?

ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ತೇಸಂ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಅಕುಸಲಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ ಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ.

(ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತೀತಿ?

ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ, ನೋ ಚ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ?

ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ ಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ.

೨೨೩. (ಕ) ಯಸ್ಸ ಯತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತೀತಿ?

ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥ, ನೋ ಚ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಅಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ?

ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ ಅಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ.

(ಘ) ಪಚ್ಚನೀಕಪುಗ್ಗಲೋ

೨೨೪. (ಕ) ಯಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ? ನತ್ಥಿ.

(ಖ) ಯಸ್ಸ ವಾ ಪನ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ಉಪ್ಪಜ್ಜಿತ್ಥ.

(ಕ) ಯಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ? ನತ್ಥಿ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ಉಪ್ಪಜ್ಜಿತ್ಥ.

೨೨೫. (ಕ) ಯಸ್ಸ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ? ನತ್ಥಿ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ಉಪ್ಪಜ್ಜಿತ್ಥ.

(ಙ) ಪಚ್ಚನೀಕಓಕಾಸೋ

೨೨೬. ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ?…ಪೇ….

(ಚ) ಪಚ್ಚನೀಕಪುಗ್ಗಲೋಕಾಸಾ

೨೨೭. (ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ?

ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ತೇಸಂ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ, ನೋ ಚ ತೇಸಂ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತಿ. ಅಸಞ್ಞಸತ್ತಾನಂ ತೇಸಂ ತತ್ಥ ಕುಸಲಾ ಚ ಧಮ್ಮಾ ನ ಉಪ್ಪಜ್ಜಿತ್ಥ ಅಕುಸಲಾ ಚ ಧಮ್ಮಾ ನ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ. ಅಸಞ್ಞಸತ್ತಾನಂ ತೇಸಂ ತತ್ಥ ಅಕುಸಲಾ ಚ ಧಮ್ಮಾ ನ ನಿರುಜ್ಝಿಸ್ಸನ್ತಿ ಕುಸಲಾ ಚ ಧಮ್ಮಾ ನ ಉಪ್ಪಜ್ಜಿತ್ಥ.

(ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ? ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ಉಪ್ಪಜ್ಜಿತ್ಥ.

೨೨೮. (ಕ) ಯಸ್ಸ ಯತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ? ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ಉಪ್ಪಜ್ಜಿತ್ಥ.

ಉಪ್ಪಾದನಿರೋಧವಾರೋ.

ಪವತ್ತಿವಾರೋ ನಿಟ್ಠಿತೋ.