(೨) ಅತೀತವಾರೋ

(ಕ) ಅನುಲೋಮಪುಗ್ಗಲೋ

೧೭೫. (ಕ) ಯಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ಅಕುಸಲಾ ಧಮ್ಮಾ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಅಕುಸಲಾ ಧಮ್ಮಾ ನಿರುಜ್ಝಿತ್ಥ ತಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಕ) ಯಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥ ತಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ? ಆಮನ್ತಾ.

೧೭೬. (ಕ) ಯಸ್ಸ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥ ತಸ್ಸ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಖ) ಅನುಲೋಮಓಕಾಸೋ

೧೭೭. (ಕ) ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯತ್ಥ ವಾ ಪನ ಅಕುಸಲಾ ಧಮ್ಮಾ ನಿರುಜ್ಝಿತ್ಥ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಕ) ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯತ್ಥ ವಾ ಪನ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ?

ಅಸಞ್ಞಸತ್ತೇ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥ, ನೋ ಚ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ. ಚತುವೋಕಾರೇ ಪಞ್ಚವೋಕಾರೇ ತತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿತ್ಥ ಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ.

೧೭೮. (ಕ) ಯತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯತ್ಥ ವಾ ಪನ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ?

ಅಸಞ್ಞಸತ್ತೇ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥ, ನೋ ಚ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥ. ಚತುವೋಕಾರೇ ಪಞ್ಚವೋಕಾರೇ ತತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿತ್ಥ ಅಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ.

(ಗ) ಅನುಲೋಮಪುಗ್ಗಲೋಕಾಸಾ

೧೭೯. (ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಅಕುಸಲಾ ಧಮ್ಮಾ ನಿರುಜ್ಝಿತ್ಥ ತಸ್ಸ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ?

ಸುದ್ಧಾವಾಸಾನಂ ದುತಿಯೇ ಅಕುಸಲೇ ಚಿತ್ತೇ ವತ್ತಮಾನೇ ತೇಸಂ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಅಕುಸಲಾ ಚ ಧಮ್ಮಾ ನಿರುಜ್ಝಿತ್ಥ ಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ.

(ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥ ತಸ್ಸ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ?

ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿತ್ಥ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿತ್ಥ ಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ.

೧೮೦. (ಕ) ಯಸ್ಸ ಯತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥ ತಸ್ಸ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥಾತಿ?

ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿತ್ಥ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿತ್ಥ ಅಕುಸಲಾ ಚ ಧಮ್ಮಾ ಉಪ್ಪಜ್ಜಿತ್ಥ.

(ಘ) ಪಚ್ಚನೀಕಪುಗ್ಗಲೋ

೧೮೧. (ಕ) ಯಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ಅಕುಸಲಾ ಧಮ್ಮಾ ನ ನಿರುಜ್ಝಿತ್ಥಾತಿ? ನತ್ಥಿ.

(ಖ) ಯಸ್ಸ ವಾ ಪನ ಅಕುಸಲಾ ಧಮ್ಮಾ ನ ನಿರುಜ್ಝಿತ್ಥ ತಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ನತ್ಥಿ.

(ಕ) ಯಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥಾತಿ? ನತ್ಥಿ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥ ತಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ನತ್ಥಿ.

೧೮೨. (ಕ) ಯಸ್ಸ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥಾತಿ? ನತ್ಥಿ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥ ತಸ್ಸ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ನತ್ಥಿ.

(ಙ) ಪಚ್ಚನೀಕಓಕಾಸೋ

೧೮೩. (ಕ) ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯತ್ಥ ವಾ ಪನ ಅಕುಸಲಾ ಧಮ್ಮಾ ನ ನಿರುಜ್ಝಿತ್ಥ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಕ) ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(ಖ) ಯತ್ಥ ವಾ ಪನ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ನತ್ಥಿ.

೧೮೪. (ಕ) ಯತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(ಖ) ಯತ್ಥ ವಾ ಪನ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥ ತತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ನತ್ಥಿ.

(ಚ) ಪಚ್ಚನೀಕಪುಗ್ಗಲೋಕಾಸಾ

೧೮೫. (ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿತ್ಥಾತಿ?

ಸುದ್ಧಾವಾಸಾನಂ ದುತಿಯೇ ಅಕುಸಲೇ ಚಿತ್ತೇ ವತ್ತಮಾನೇ ತೇಸಂ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ, ನೋ ಚ ತೇಸಂ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿತ್ಥ. ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಕುಸಲಾ ಚ ಧಮ್ಮಾ ನ ಉಪ್ಪಜ್ಜಿತ್ಥ ಅಕುಸಲಾ ಚ ಧಮ್ಮಾ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿತ್ಥ ತಸ್ಸ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥಾತಿ?

ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ, ನೋ ಚ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥ. ಸುದ್ಧಾವಾಸಂ ಉಪಪಜ್ಜನ್ತಾನಂ ತೇಸಂ ತತ್ಥ ಕುಸಲಾ ಚ ಧಮ್ಮಾ ನ ಉಪ್ಪಜ್ಜಿತ್ಥ ಅಬ್ಯಾಕತಾ ಚ ಧಮ್ಮಾ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥ ತಸ್ಸ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ಆಮನ್ತಾ.

೧೮೬. (ಕ) ಯಸ್ಸ ಯತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥಾತಿ?

ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥ, ನೋ ಚ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥ. ಸುದ್ಧಾವಾಸಂ ಉಪಪಜ್ಜನ್ತಾನಂ ತೇಸಂ ತತ್ಥ ಅಕುಸಲಾ ಚ ಧಮ್ಮಾ ನ ಉಪ್ಪಜ್ಜಿತ್ಥ ಅಬ್ಯಾಕತಾ ಚ ಧಮ್ಮಾ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿತ್ಥ ತಸ್ಸ ತತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿತ್ಥಾತಿ? ಆಮನ್ತಾ.