(೫) ಪಚ್ಚುಪ್ಪನ್ನಾನಾಗತವಾರೋ

(ಕ) ಅನುಲೋಮಪುಗ್ಗಲೋ

೧೪೩. (ಕ) ಯಸ್ಸ ಕುಸಲಾ ಧಮ್ಮಾ ನಿರುಜ್ಝನ್ತಿ ತಸ್ಸ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತೀತಿ?

ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಕುಸಲಾ ಧಮ್ಮಾ ನಿರುಜ್ಝನ್ತಿ, ನೋ ಚ ತೇಸಂ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ. ಇತರೇಸಂ ಕುಸಲಾನಂ ಭಙ್ಗಕ್ಖಣೇ ತೇಸಂ ಕುಸಲಾ ಚ ಧಮ್ಮಾ ನಿರುಜ್ಝನ್ತಿ ಅಕುಸಲಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ನಿರುಜ್ಝನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ಕುಸಲಾ ಧಮ್ಮಾ ನಿರುಜ್ಝನ್ತಿ. ಕುಸಲಾನಂ ಭಙ್ಗಕ್ಖಣೇ ತೇಸಂ ಅಕುಸಲಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ ಕುಸಲಾ ಚ ಧಮ್ಮಾ ನಿರುಜ್ಝನ್ತಿ.

(ಕ) ಯಸ್ಸ ಕುಸಲಾ ಧಮ್ಮಾ ನಿರುಜ್ಝನ್ತಿ ತಸ್ಸ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ನಿರುಜ್ಝನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ಕುಸಲಾ ಧಮ್ಮಾ ನಿರುಜ್ಝನ್ತಿ. ಕುಸಲಾನಂ ಭಙ್ಗಕ್ಖಣೇ ತೇಸಂ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ ಕುಸಲಾ ಚ ಧಮ್ಮಾ ನಿರುಜ್ಝನ್ತಿ.

೧೪೪. (ಕ) ಯಸ್ಸ ಅಕುಸಲಾ ಧಮ್ಮಾ ನಿರುಜ್ಝನ್ತಿ ತಸ್ಸ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ಅಕುಸಲಾ ಧಮ್ಮಾ ನಿರುಜ್ಝನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಅಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ಅಕುಸಲಾ ಧಮ್ಮಾ ನಿರುಜ್ಝನ್ತಿ. ಅಕುಸಲಾನಂ ಭಙ್ಗಕ್ಖಣೇ ತೇಸಂ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ ಅಕುಸಲಾ ಚ ಧಮ್ಮಾ ನಿರುಜ್ಝನ್ತಿ.

(ಖ) ಅನುಲೋಮಓಕಾಸೋ

೧೪೫. ಯತ್ಥ ಕುಸಲಾ ಧಮ್ಮಾ ನಿರುಜ್ಝನ್ತಿ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತೀತಿ?…ಪೇ….

(ಗ) ಅನುಲೋಮಪುಗ್ಗಲೋಕಾಸಾ

೧೪೬. (ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ನಿರುಜ್ಝನ್ತಿ ತಸ್ಸ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತೀತಿ?

ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಕುಸಲಾ ಧಮ್ಮಾ ನಿರುಜ್ಝನ್ತಿ, ನೋ ಚ ತೇಸಂ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ. ಇತರೇಸಂ ಕುಸಲಾನಂ ಭಙ್ಗಕ್ಖಣೇ ತೇಸಂ ತತ್ಥ ಕುಸಲಾ ಚ ಧಮ್ಮಾ ನಿರುಜ್ಝನ್ತಿ ಅಕುಸಲಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ನಿರುಜ್ಝನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಅಕುಸಲಾ ಧಮ್ಮಾ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ತತ್ಥ ಕುಸಲಾ ಧಮ್ಮಾ ನಿರುಜ್ಝನ್ತಿ. ಕುಸಲಾನಂ ಭಙ್ಗಕ್ಖಣೇ ತೇಸಂ ತತ್ಥ ಅಕುಸಲಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ ಕುಸಲಾ ಚ ಧಮ್ಮಾ ನಿರುಜ್ಝನ್ತಿ.

(ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ನಿರುಜ್ಝನ್ತಿ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ನಿರುಜ್ಝನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ತತ್ಥ ಕುಸಲಾ ಧಮ್ಮಾ ನಿರುಜ್ಝನ್ತಿ. ಕುಸಲಾನಂ ಭಙ್ಗಕ್ಖಣೇ ತೇಸಂ ತತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ ಕುಸಲಾ ಚ ಧಮ್ಮಾ ನಿರುಜ್ಝನ್ತಿ.

೧೪೭. (ಕ) ಯಸ್ಸ ಯತ್ಥ ಅಕುಸಲಾ ಧಮ್ಮಾ ನಿರುಜ್ಝನ್ತಿ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಅಕುಸಲಾ ಧಮ್ಮಾ ನಿರುಜ್ಝನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಅಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ತತ್ಥ ಅಕುಸಲಾ ಧಮ್ಮಾ ನಿರುಜ್ಝನ್ತಿ. ಅಕುಸಲಾನಂ ಭಙ್ಗಕ್ಖಣೇ ತೇಸಂ ತತ್ಥ ಅಬ್ಯಾಕತಾ ಚ ಧಮ್ಮಾ ನಿರುಜ್ಝಿಸ್ಸನ್ತಿ ಅಕುಸಲಾ ಚ ಧಮ್ಮಾ ನಿರುಜ್ಝನ್ತಿ.

(ಘ) ಪಚ್ಚನೀಕಪುಗ್ಗಲೋ

೧೪೮. (ಕ) ಯಸ್ಸ ಕುಸಲಾ ಧಮ್ಮಾ ನ ನಿರುಜ್ಝನ್ತಿ ತಸ್ಸ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಕುಸಲಾ ಧಮ್ಮಾ ನ ನಿರುಜ್ಝನ್ತಿ, ನೋ ಚ ತೇಸಂ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತಿ. ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಕುಸಲಾ ಚ ಧಮ್ಮಾ ನ ನಿರುಜ್ಝನ್ತಿ ಅಕುಸಲಾ ಚ ಧಮ್ಮಾ ನ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ನ ನಿರುಜ್ಝನ್ತೀತಿ?

ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ಕುಸಲಾ ಧಮ್ಮಾ ನ ನಿರುಜ್ಝನ್ತಿ. ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಅಕುಸಲಾ ಚ ಧಮ್ಮಾ ನ ನಿರುಜ್ಝಿಸ್ಸನ್ತಿ ಕುಸಲಾ ಚ ಧಮ್ಮಾ ನ ನಿರುಜ್ಝನ್ತಿ.

(ಕ) ಯಸ್ಸ ಕುಸಲಾ ಧಮ್ಮಾ ನ ನಿರುಜ್ಝನ್ತಿ ತಸ್ಸ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಕುಸಲಾ ಧಮ್ಮಾ ನ ನಿರುಜ್ಝನ್ತಿ, ನೋ ಚ ತೇಸಂ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಕುಸಲಾ ಚ ಧಮ್ಮಾ ನ ನಿರುಜ್ಝನ್ತಿ ಅಬ್ಯಾಕತಾ ಚ ಧಮ್ಮಾ ನ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ನ ನಿರುಜ್ಝನ್ತೀತಿ? ಆಮನ್ತಾ.

೧೪೯. (ಕ) ಯಸ್ಸ ಅಕುಸಲಾ ಧಮ್ಮಾ ನ ನಿರುಜ್ಝನ್ತಿ ತಸ್ಸ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಅಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಅಕುಸಲಾ ಧಮ್ಮಾ ನ ನಿರುಜ್ಝನ್ತಿ, ನೋ ಚ ತೇಸಂ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಅಕುಸಲಾ ಚ ಧಮ್ಮಾ ನ ನಿರುಜ್ಝನ್ತಿ ಅಬ್ಯಾಕತಾ ಚ ಧಮ್ಮಾ ನ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ಅಕುಸಲಾ ಧಮ್ಮಾ ನ ನಿರುಜ್ಝನ್ತೀತಿ? ಆಮನ್ತಾ.

(ಙ) ಪಚ್ಚನೀಕಓಕಾಸೋ

೧೫೦. ಯತ್ಥ ಕುಸಲಾ ಧಮ್ಮಾ ನ ನಿರುಜ್ಝನ್ತಿ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ?…ಪೇ….

(ಚ) ಪಚ್ಚನೀಕಪುಗ್ಗಲೋಕಾಸಾ

೧೫೧. (ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ನ ನಿರುಜ್ಝನ್ತಿ ತಸ್ಸ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಕುಸಲಾ ಧಮ್ಮಾ ನ ನಿರುಜ್ಝನ್ತಿ, ನೋ ಚ ತೇಸಂ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತಿ. ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ಕುಸಲಾ ಚ ಧಮ್ಮಾ ನ ನಿರುಜ್ಝನ್ತಿ ಅಕುಸಲಾ ಚ ಧಮ್ಮಾ ನ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ನ ನಿರುಜ್ಝನ್ತೀತಿ?

ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝಿಸ್ಸನ್ತಿ, ನೋ ಚ ತೇಸಂ ತತ್ಥ ಕುಸಲಾ ಧಮ್ಮಾ ನ ನಿರುಜ್ಝನ್ತಿ. ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ಅಕುಸಲಾ ಚ ಧಮ್ಮಾ ನ ನಿರುಜ್ಝಿಸ್ಸನ್ತಿ ಕುಸಲಾ ಚ ಧಮ್ಮಾ ನ ನಿರುಜ್ಝನ್ತಿ.

(ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ನ ನಿರುಜ್ಝನ್ತಿ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ಕುಸಲಾ ಧಮ್ಮಾ ನ ನಿರುಜ್ಝನ್ತಿ, ನೋ ಚ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಕುಸಲಾ ಚ ಧಮ್ಮಾ ನ ನಿರುಜ್ಝನ್ತಿ ಅಬ್ಯಾಕತಾ ಚ ಧಮ್ಮಾ ನ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ನ ನಿರುಜ್ಝನ್ತೀತಿ? ಆಮನ್ತಾ.

೧೫೨. (ಕ) ಯಸ್ಸ ಯತ್ಥ ಅಕುಸಲಾ ಧಮ್ಮಾ ನ ನಿರುಜ್ಝನ್ತಿ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಅಕುಸಲವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝನ್ತಿ, ನೋ ಚ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಅಕುಸಲಾ ಚ ಧಮ್ಮಾ ನ ನಿರುಜ್ಝನ್ತಿ ಅಬ್ಯಾಕತಾ ಚ ಧಮ್ಮಾ ನ ನಿರುಜ್ಝಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನ ನಿರುಜ್ಝಿಸ್ಸನ್ತಿ ತಸ್ಸ ತತ್ಥ ಅಕುಸಲಾ ಧಮ್ಮಾ ನ ನಿರುಜ್ಝನ್ತೀತಿ? ಆಮನ್ತಾ.