(೩) ಅನಾಗತವಾರೋ

(ಕ) ಅನುಲೋಮಪುಗ್ಗಲೋ

೫೭. (ಕ) ಯಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ?

ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ. ಇತರೇಸಂ ತೇಸಂ ಕುಸಲಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ ಅಕುಸಲಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ.

(ಖ) ಯಸ್ಸ ವಾ ಪನ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಕ) ಯಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ತೇಸಂ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ. ಇತರೇಸಂ ತೇಸಂ ಅಬ್ಯಾಕತಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ ಕುಸಲಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ.

೫೮. (ಕ) ಯಸ್ಸ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ. ಇತರೇಸಂ ತೇಸಂ ಅಬ್ಯಾಕತಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ ಅಕುಸಲಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ.

(ಖ) ಅನುಲೋಮಓಕಾಸೋ

೫೯. (ಕ) ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಖ) ಯತ್ಥ ವಾ ಪನ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಕ) ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತತ್ಥ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಖ) ಯತ್ಥ ವಾ ಪನ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ?

ಅಸಞ್ಞಸತ್ತೇ ತತ್ಥ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ, ನೋ ಚ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ. ಚತುವೋಕಾರೇ ಪಞ್ಚವೋಕಾರೇ ತತ್ಥ ಅಬ್ಯಾಕತಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ ಕುಸಲಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ.

೬೦. (ಕ) ಯತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತತ್ಥ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಖ) ಯತ್ಥ ವಾ ಪನ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ?

ಅಸಞ್ಞಸತ್ತೇ ತತ್ಥ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ, ನೋ ಚ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ. ಚತುವೋಕಾರೇ ಪಞ್ಚವೋಕಾರೇ ತತ್ಥ ಅಬ್ಯಾಕತಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ ಅಕುಸಲಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ.

(ಗ) ಅನುಲೋಮಪುಗ್ಗಲೋಕಾಸಾ

೬೧. (ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ?

ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಕುಸಲಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ ಅಕುಸಲಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ತತ್ಥ ಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಅಬ್ಯಾಕತಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ ಕುಸಲಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ.

೬೨. (ಕ) ಯಸ್ಸ ಯತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತೀತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ಅಸಞ್ಞಸತ್ತಾನಂ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ತತ್ಥ ಅಕುಸಲಾ ಧಮ್ಮಾ ಉಪ್ಪಜ್ಜಿಸ್ಸನ್ತಿ. ಇತರೇಸಂ ಚತುವೋಕಾರಾನಂ ಪಞ್ಚವೋಕಾರಾನಂ ತೇಸಂ ತತ್ಥ ಅಬ್ಯಾಕತಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ ಅಕುಸಲಾ ಚ ಧಮ್ಮಾ ಉಪ್ಪಜ್ಜಿಸ್ಸನ್ತಿ.

(ಘ) ಪಚ್ಚನೀಕಪುಗ್ಗಲೋ

೬೩. (ಕ) ಯಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ?

ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ. ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ತೇಸಂ ಅಕುಸಲಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ಕುಸಲಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ.

(ಕ) ಯಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ತೇಸಂ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ. ಪಚ್ಛಿಮಚಿತ್ತಸಮಙ್ಗೀನಂ ತೇಸಂ ಕುಸಲಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ಅಬ್ಯಾಕತಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

೬೪. (ಕ) ಯಸ್ಸ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ. ಪಚ್ಛಿಮಚಿತ್ತಸಮಙ್ಗೀನಂ ತೇಸಂ ಅಕುಸಲಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ಅಬ್ಯಾಕತಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ.

(ಖ) ಯಸ್ಸ ವಾ ಪನ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಙ) ಪಚ್ಚನೀಕಓಕಾಸೋ

೬೫. (ಕ) ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಖ) ಯತ್ಥ ವಾ ಪನ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಕ) ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತತ್ಥ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ಉಪ್ಪಜ್ಜಿಸ್ಸನ್ತಿ.

(ಖ) ಯತ್ಥ ವಾ ಪನ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ನತ್ಥಿ.

೬೬. (ಕ) ಯತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತತ್ಥ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ಉಪ್ಪಜ್ಜಿಸ್ಸನ್ತಿ.

(ಖ) ಯತ್ಥ ವಾ ಪನ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ನತ್ಥಿ.

(ಚ) ಪಚ್ಚನೀಕಪುಗ್ಗಲೋಕಾಸಾ

೬೭. (ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ?

ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ. ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ಅಕುಸಲಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ಕುಸಲಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ.

(ಕ) ಯಸ್ಸ ಯತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ. ಪಚ್ಛಿಮಚಿತ್ತಸಮಙ್ಗೀನಂ ತೇಸಂ ತತ್ಥ ಕುಸಲಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ಅಬ್ಯಾಕತಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.

೬೮. (ಕ) ಯಸ್ಸ ಯತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ?

ಅಗ್ಗಮಗ್ಗಸಮಙ್ಗೀನಂ ಅರಹನ್ತಾನಂ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ಅಸಞ್ಞಸತ್ತಾನಂ ತೇಸಂ ತತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ, ನೋ ಚ ತೇಸಂ ತತ್ಥ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ. ಪಚ್ಛಿಮಚಿತ್ತಸಮಙ್ಗೀನಂ ತೇಸಂ ತತ್ಥ ಅಕುಸಲಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ಅಬ್ಯಾಕತಾ ಚ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ.

(ಖ) ಯಸ್ಸ ವಾ ಪನ ಯತ್ಥ ಅಬ್ಯಾಕತಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತಿ ತಸ್ಸ ತತ್ಥ ಅಕುಸಲಾ ಧಮ್ಮಾ ನ ಉಪ್ಪಜ್ಜಿಸ್ಸನ್ತೀತಿ? ಆಮನ್ತಾ.