೧. ಪುಗ್ಗಲವಾರೋ

(೧) ಉಪ್ಪಾದನಿರೋಧಕಾಲಸಮ್ಭೇದವಾರೋ

೬೩. (ಕ) ಯಸ್ಸ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ ತಸ್ಸ ಚಿತ್ತಂ ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತೀತಿ?

ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ, ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತಿ. ಇತರೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ, ನಿರುಜ್ಝಿಸ್ಸತಿ ಚೇವ ಉಪ್ಪಜ್ಜಿಸ್ಸತಿ ಚ.

(ಖ) ಯಸ್ಸ ವಾ ಪನ ಚಿತ್ತಂ ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತಿ ತಸ್ಸ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತೀತಿ? ಆಮನ್ತಾ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜತಿ ನಿರುಜ್ಝತಿ ತಸ್ಸ ಚಿತ್ತಂ ನ ನಿರುಜ್ಝಿಸ್ಸತಿ ಉಪ್ಪಜ್ಜಿಸ್ಸತೀತಿ? ನೋ.

(ಖ) ಯಸ್ಸ ವಾ ಪನ ಚಿತ್ತಂ ನ ನಿರುಜ್ಝಿಸ್ಸತಿ ಉಪ್ಪಜ್ಜಿಸ್ಸತಿ ತಸ್ಸ ಚಿತ್ತಂ ನ ಉಪ್ಪಜ್ಜತಿ ನಿರುಜ್ಝತೀತಿ? ನತ್ಥಿ.

(೨) ಉಪ್ಪಾದುಪ್ಪನ್ನವಾರೋ

೬೪. (ಕ) ಯಸ್ಸ ಚಿತ್ತಂ ಉಪ್ಪಜ್ಜತಿ ತಸ್ಸ ಚಿತ್ತಂ ಉಪ್ಪನ್ನನ್ತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ಉಪ್ಪನ್ನಂ ತಸ್ಸ ಚಿತ್ತಂ ಉಪ್ಪಜ್ಜತೀತಿ?

ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ಉಪ್ಪನ್ನಂ, ನೋ ಚ ತೇಸಂ ಚಿತ್ತಂ ಉಪ್ಪಜ್ಜತಿ. ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ಉಪ್ಪನ್ನಞ್ಚೇವ ಉಪ್ಪಜ್ಜತಿ ಚ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜತಿ ತಸ್ಸ ಚಿತ್ತಂ ನ ಉಪ್ಪನ್ನನ್ತಿ?

ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತೇಸಂ ಚಿತ್ತಂ ನ ಉಪ್ಪನ್ನಂ. ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ಉಪ್ಪನ್ನಂ.

(ಖ) ಯಸ್ಸ ವಾ ಪನ ಚಿತ್ತಂ ನ ಉಪ್ಪನ್ನಂ ತಸ್ಸ ಚಿತ್ತಂ ನ ಉಪ್ಪಜ್ಜತೀತಿ? ಆಮನ್ತಾ.

(೩) ನಿರೋಧುಪ್ಪನ್ನವಾರೋ

೬೫. (ಕ) ಯಸ್ಸ ಚಿತ್ತಂ ನಿರುಜ್ಝತಿ ತಸ್ಸ ಚಿತ್ತಂ ಉಪ್ಪನ್ನನ್ತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ಉಪ್ಪನ್ನಂ ತಸ್ಸ ಚಿತ್ತಂ ನಿರುಜ್ಝತೀತಿ?

ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ಉಪ್ಪನ್ನಂ, ನೋ ಚ ತೇಸಂ ಚಿತ್ತಂ ನಿರುಜ್ಝತಿ. ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ಉಪ್ಪನ್ನಞ್ಚೇವ ನಿರುಜ್ಝತಿ ಚ.

(ಕ) ಯಸ್ಸ ಚಿತ್ತಂ ನ ನಿರುಜ್ಝತಿ ತಸ್ಸ ಚಿತ್ತಂ ನ ಉಪ್ಪನ್ನನ್ತಿ?

ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ನ ನಿರುಜ್ಝತಿ, ನೋ ಚ ತೇಸಂ ಚಿತ್ತಂ ನ ಉಪ್ಪನ್ನಂ. ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನ ಚೇವ ನಿರುಜ್ಝತಿ ನ ಚ ಉಪ್ಪನ್ನಂ.

(ಖ) ಯಸ್ಸ ವಾ ಪನ ಚಿತ್ತಂ ನ ಉಪ್ಪನ್ನಂ ತಸ್ಸ ಚಿತ್ತಂ ನ ನಿರುಜ್ಝತೀತಿ? ಆಮನ್ತಾ.

(೪) ಉಪ್ಪಾದವಾರೋ

೬೬. (ಕ) ಯಸ್ಸ ಚಿತ್ತಂ ಉಪ್ಪಜ್ಜತಿ ತಸ್ಸ ಚಿತ್ತಂ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ಉಪ್ಪಜ್ಜಿತ್ಥ ತಸ್ಸ ಚಿತ್ತಂ ಉಪ್ಪಜ್ಜತೀತಿ?

ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ಉಪ್ಪಜ್ಜಿತ್ಥ, ನೋ ಚ ತೇಸಂ ಚಿತ್ತಂ ಉಪ್ಪಜ್ಜತಿ. ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ಉಪ್ಪಜ್ಜಿತ್ಥ ಚೇವ ಉಪ್ಪಜ್ಜತಿ ಚ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜತಿ ತಸ್ಸ ಚಿತ್ತಂ ನ ಉಪ್ಪಜ್ಜಿತ್ಥಾತಿ? ಉಪ್ಪಜ್ಜಿತ್ಥ.

(ಖ) ಯಸ್ಸ ವಾ ಪನ ಚಿತ್ತಂ ನ ಉಪ್ಪಜ್ಜಿತ್ಥ ತಸ್ಸ ಚಿತ್ತಂ ನ ಉಪ್ಪಜ್ಜತೀತಿ? ನತ್ಥಿ.

೬೭. (ಕ) ಯಸ್ಸ ಚಿತ್ತಂ ಉಪ್ಪಜ್ಜತಿ ತಸ್ಸ ಚಿತ್ತಂ ಉಪ್ಪಜ್ಜಿಸ್ಸತೀತಿ?

ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ಉಪ್ಪಜ್ಜತಿ, ನೋ ಚ ತೇಸಂ ಚಿತ್ತಂ ಉಪ್ಪಜ್ಜಿಸ್ಸತಿ. ಇತರೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ಉಪ್ಪಜ್ಜತಿ ಚೇವ ಉಪ್ಪಜ್ಜಿಸ್ಸತಿ ಚ.

(ಖ) ಯಸ್ಸ ವಾ ಪನ ಚಿತ್ತಂ ಉಪ್ಪಜ್ಜಿಸ್ಸತಿ ತಸ್ಸ ಚಿತ್ತಂ ಉಪ್ಪಜ್ಜತೀತಿ?

ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ಉಪ್ಪಜ್ಜಿಸ್ಸತಿ, ನೋ ಚ ತೇಸಂ ಚಿತ್ತಂ ಉಪ್ಪಜ್ಜತಿ. ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ಉಪ್ಪಜ್ಜಿಸ್ಸತಿ ಚೇವ ಉಪ್ಪಜ್ಜತಿ ಚ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜತಿ ತಸ್ಸ ಚಿತ್ತಂ ನ ಉಪ್ಪಜ್ಜಿಸ್ಸತೀತಿ?

ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತೇಸಂ ಚಿತ್ತಂ ನ ಉಪ್ಪಜ್ಜಿಸ್ಸತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ಉಪ್ಪಜ್ಜಿಸ್ಸತಿ.

(ಖ) ಯಸ್ಸ ವಾ ಪನ ಚಿತ್ತಂ ನ ಉಪ್ಪಜ್ಜಿಸ್ಸತಿ ತಸ್ಸ ಚಿತ್ತಂ ನ ಉಪ್ಪಜ್ಜತೀತಿ?

ಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ನ ಉಪ್ಪಜ್ಜಿಸ್ಸತಿ, ನೋ ಚ ತೇಸಂ ಚಿತ್ತಂ ನ ಉಪ್ಪಜ್ಜತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನ ಚೇವ ಉಪ್ಪಜ್ಜಿಸ್ಸತಿ ನ ಚ ಉಪ್ಪಜ್ಜತಿ.

೬೮. (ಕ) ಯಸ್ಸ ಚಿತ್ತಂ ಉಪ್ಪಜ್ಜಿತ್ಥ ತಸ್ಸ ಚಿತ್ತಂ ಉಪ್ಪಜ್ಜಿಸ್ಸತೀತಿ?

ಪಚ್ಛಿಮಚಿತ್ತಸಮಙ್ಗೀನಂ ತೇಸಂ ಚಿತ್ತಂ ಉಪ್ಪಜ್ಜಿತ್ಥ, ನೋ ಚ ತೇಸಂ ಚಿತ್ತಂ ಉಪ್ಪಜ್ಜಿಸ್ಸತಿ. ಇತರೇಸಂ ತೇಸಂ ಚಿತ್ತಂ ಉಪ್ಪಜ್ಜಿತ್ಥ ಚೇವ ಉಪ್ಪಜ್ಜಿಸ್ಸತಿ ಚ.

(ಖ) ಯಸ್ಸ ವಾ ಪನ ಚಿತ್ತಂ ಉಪ್ಪಜ್ಜಿಸ್ಸತಿ ತಸ್ಸ ಚಿತ್ತಂ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜಿತ್ಥ ತಸ್ಸ ಚಿತ್ತಂ ನ ಉಪ್ಪಜ್ಜಿಸ್ಸತೀತಿ? ನತ್ಥಿ.

(ಖ) ಯಸ್ಸ ವಾ ಪನ ಚಿತ್ತಂ ನ ಉಪ್ಪಜ್ಜಿಸ್ಸತಿ ತಸ್ಸ ಚಿತ್ತಂ ನ ಉಪ್ಪಜ್ಜಿತ್ಥಾತಿ? ಉಪ್ಪಜ್ಜಿತ್ಥ.

(೫) ನಿರೋಧವಾರೋ

೬೯. (ಕ) ಯಸ್ಸ ಚಿತ್ತಂ ನಿರುಜ್ಝತಿ ತಸ್ಸ ಚಿತ್ತಂ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ನಿರುಜ್ಝಿತ್ಥ ತಸ್ಸ ಚಿತ್ತಂ ನಿರುಜ್ಝತೀತಿ?

ಚಿತ್ತಸ್ಸ ಉಪ್ಪಾದಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನಿರುಜ್ಝಿತ್ಥ, ನೋ ಚ ತೇಸಂ ಚಿತ್ತಂ ನಿರುಜ್ಝತಿ. ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನಿರುಜ್ಝಿತ್ಥ ಚೇವ ನಿರುಜ್ಝತಿ ಚ.

(ಕ) ಯಸ್ಸ ಚಿತ್ತಂ ನ ನಿರುಜ್ಝತಿ ತಸ್ಸ ಚಿತ್ತಂ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಚಿತ್ತಂ ನ ನಿರುಜ್ಝಿತ್ಥ ತಸ್ಸ ಚಿತ್ತಂ ನ ನಿರುಜ್ಝತೀತಿ? ನತ್ಥಿ.

೭೦. (ಕ) ಯಸ್ಸ ಚಿತ್ತಂ ನಿರುಜ್ಝತಿ ತಸ್ಸ ಚಿತ್ತಂ ನಿರುಜ್ಝಿಸ್ಸತೀತಿ?

ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನಿರುಜ್ಝತಿ, ನೋ ಚ ತೇಸಂ ಚಿತ್ತಂ ನಿರುಜ್ಝಿಸ್ಸತಿ. ಇತರೇಸಂ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನಿರುಜ್ಝತಿ ಚೇವ ನಿರುಜ್ಝಿಸ್ಸತಿ ಚ.

(ಖ) ಯಸ್ಸ ವಾ ಪನ ಚಿತ್ತಂ ನಿರುಜ್ಝಿಸ್ಸತಿ ತಸ್ಸ ಚಿತ್ತಂ ನಿರುಜ್ಝತೀತಿ?

ಚಿತ್ತಸ್ಸ ಉಪ್ಪಾದಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನಿರುಜ್ಝಿಸ್ಸತಿ, ನೋ ಚ ತೇಸಂ ಚಿತ್ತಂ ನಿರುಜ್ಝತಿ. ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನಿರುಜ್ಝಿಸ್ಸತಿ ಚೇವ ನಿರುಜ್ಝತಿ ಚ.

(ಕ) ಯಸ್ಸ ಚಿತ್ತಂ ನ ನಿರುಜ್ಝತಿ ತಸ್ಸ ಚಿತ್ತಂ ನ ನಿರುಜ್ಝಿಸ್ಸತೀತಿ? ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಚಿತ್ತಂ ನ ನಿರುಜ್ಝಿಸ್ಸತಿ ತಸ್ಸ ಚಿತ್ತಂ ನ ನಿರುಜ್ಝತೀತಿ? ನಿರುಜ್ಝತಿ.

೭೧. (ಕ) ಯಸ್ಸ ಚಿತ್ತಂ ನಿರುಜ್ಝಿತ್ಥ ತಸ್ಸ ಚಿತ್ತಂ ನಿರುಜ್ಝಿಸ್ಸತೀತಿ?

ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನಿರುಜ್ಝಿತ್ಥ, ನೋ ಚ ತೇಸಂ ಚಿತ್ತಂ ನಿರುಜ್ಝಿಸ್ಸತಿ. ಇತರೇಸಂ ತೇಸಂ ಚಿತ್ತಂ ನಿರುಜ್ಝಿತ್ಥ ಚೇವ ನಿರುಜ್ಝಿಸ್ಸತಿ ಚ.

(ಖ) ಯಸ್ಸ ವಾ ಪನ ಚಿತ್ತಂ ನಿರುಜ್ಝಿಸ್ಸತಿ ತಸ್ಸ ಚಿತ್ತಂ ನಿರುಜ್ಝಿತ್ಥಾತಿ? ಆಮನ್ತಾ.

(ಕ) ಯಸ್ಸ ಚಿತ್ತಂ ನ ನಿರುಜ್ಝಿತ್ಥ ತಸ್ಸ ಚಿತ್ತಂ ನ ನಿರುಜ್ಝಿಸ್ಸತೀತಿ? ನತ್ಥಿ.

(ಖ) ಯಸ್ಸ ವಾ ಪನ ಚಿತ್ತಂ ನ ನಿರುಜ್ಝಿಸ್ಸತಿ ತಸ್ಸ ಚಿತ್ತಂ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(೬) ಉಪ್ಪಾದನಿರೋಧವಾರೋ

೭೨. (ಕ) ಯಸ್ಸ ಚಿತ್ತಂ ಉಪ್ಪಜ್ಜತಿ ತಸ್ಸ ಚಿತ್ತಂ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ನಿರುಜ್ಝಿತ್ಥ ತಸ್ಸ ಚಿತ್ತಂ ಉಪ್ಪಜ್ಜತೀತಿ?

ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನಿರುಜ್ಝಿತ್ಥ, ನೋ ಚ ತೇಸಂ ಚಿತ್ತಂ ಉಪ್ಪಜ್ಜತಿ. ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ನಿರುಜ್ಝಿತ್ಥ ಚೇವ ಉಪ್ಪಜ್ಜತಿ ಚ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜತಿ ತಸ್ಸ ಚಿತ್ತಂ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಚಿತ್ತಂ ನ ನಿರುಜ್ಝಿತ್ಥ ತಸ್ಸ ಚಿತ್ತಂ ನ ಉಪ್ಪಜ್ಜತೀತಿ? ನತ್ಥಿ.

೭೩. (ಕ) ಯಸ್ಸ ಚಿತ್ತಂ ಉಪ್ಪಜ್ಜತಿ ತಸ್ಸ ಚಿತ್ತಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ನಿರುಜ್ಝಿಸ್ಸತಿ ತಸ್ಸ ಚಿತ್ತಂ ಉಪ್ಪಜ್ಜತೀತಿ?

ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನಿರುಜ್ಝಿಸ್ಸತಿ, ನೋ ಚ ತೇಸಂ ಚಿತ್ತಂ ಉಪ್ಪಜ್ಜತಿ. ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ನಿರುಜ್ಝಿಸ್ಸತಿ ಚೇವ ಉಪ್ಪಜ್ಜತಿ ಚ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜತಿ ತಸ್ಸ ಚಿತ್ತಂ ನ ನಿರುಜ್ಝಿಸ್ಸತೀತಿ?

ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತೇಸಂ ಚಿತ್ತಂ ನ ನಿರುಜ್ಝಿಸ್ಸತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಚಿತ್ತಂ ನ ನಿರುಜ್ಝಿಸ್ಸತಿ ತಸ್ಸ ಚಿತ್ತಂ ನ ಉಪ್ಪಜ್ಜತೀತಿ? ಆಮನ್ತಾ.

೭೪. (ಕ) ಯಸ್ಸ ಚಿತ್ತಂ ಉಪ್ಪಜ್ಜಿತ್ಥ ತಸ್ಸ ಚಿತ್ತಂ ನಿರುಜ್ಝಿಸ್ಸತೀತಿ?

ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ಉಪ್ಪಜ್ಜಿತ್ಥ, ನೋ ಚ ತೇಸಂ ಚಿತ್ತಂ ನಿರುಜ್ಝಿಸ್ಸತಿ. ಇತರೇಸಂ ತೇಸಂ ಚಿತ್ತಂ ಉಪ್ಪಜ್ಜಿತ್ಥ ಚೇವ ನಿರುಜ್ಝಿಸ್ಸತಿ ಚ.

(ಖ) ಯಸ್ಸ ವಾ ಪನ ಚಿತ್ತಂ ನಿರುಜ್ಝಿಸ್ಸತಿ ತಸ್ಸ ಚಿತ್ತಂ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜಿತ್ಥ ತಸ್ಸ ಚಿತ್ತಂ ನ ನಿರುಜ್ಝಿಸ್ಸತೀತಿ? ನತ್ಥಿ.

(ಖ) ಯಸ್ಸ ವಾ ಪನ ಚಿತ್ತಂ ನ ನಿರುಜ್ಝಿಸ್ಸತಿ ತಸ್ಸ ಚಿತ್ತಂ ನ ಉಪ್ಪಜ್ಜಿತ್ಥಾತಿ? ಉಪ್ಪಜ್ಜಿತ್ಥ.

(೭) ಉಪ್ಪಜ್ಜಮಾನನನಿರೋಧವಾರೋ

೭೫. (ಕ) ಯಸ್ಸ ಚಿತ್ತಂ ಉಪ್ಪಜ್ಜತಿ ತಸ್ಸ ಚಿತ್ತಂ ನ ನಿರುಜ್ಝತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ನ ನಿರುಜ್ಝತಿ ತಸ್ಸ ಚಿತ್ತಂ ಉಪ್ಪಜ್ಜತೀತಿ?

ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನ ನಿರುಜ್ಝತಿ, ನೋ ಚ ತೇಸಂ ಚಿತ್ತಂ ಉಪ್ಪಜ್ಜತಿ. ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ನ ನಿರುಜ್ಝತಿ ಚೇವ ಉಪ್ಪಜ್ಜತಿ ಚ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜತಿ ತಸ್ಸ ಚಿತ್ತಂ ನಿರುಜ್ಝತೀತಿ?

ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತೇಸಂ ಚಿತ್ತಂ ನಿರುಜ್ಝತಿ. ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನ ಉಪ್ಪಜ್ಜತಿ ಚೇವ ನಿರುಜ್ಝತಿ ಚ.

(ಖ) ಯಸ್ಸ ವಾ ಪನ ಚಿತ್ತಂ ನಿರುಜ್ಝತಿ ತಸ್ಸ ಚಿತ್ತಂ ನ ಉಪ್ಪಜ್ಜತೀತಿ? ಆಮನ್ತಾ.

(೮) ಉಪ್ಪಜ್ಜಮಾನುಪ್ಪನ್ನವಾರೋ

೭೬. (ಕ) ಯಸ್ಸ ಚಿತ್ತಂ ಉಪ್ಪಜ್ಜಮಾನಂ ತಸ್ಸ ಚಿತ್ತಂ ಉಪ್ಪನ್ನನ್ತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ಉಪ್ಪನ್ನಂ ತಸ್ಸ ಚಿತ್ತಂ ಉಪ್ಪಜ್ಜಮಾನನ್ತಿ?

ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ಉಪ್ಪನ್ನಂ, ನೋ ಚ ತೇಸಂ ಚಿತ್ತಂ ಉಪ್ಪಜ್ಜಮಾನಂ. ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ಉಪ್ಪನ್ನಞ್ಚೇವ ಉಪ್ಪಜ್ಜಮಾನಞ್ಚ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜಮಾನಂ ತಸ್ಸ ಚಿತ್ತಂ ನ ಉಪ್ಪನ್ನನ್ತಿ?

ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ನ ಉಪ್ಪಜ್ಜಮಾನಂ, ನೋ ಚ ತೇಸಂ ಚಿತ್ತಂ ನ ಉಪ್ಪನ್ನಂ. ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನ ಚೇವ ಉಪ್ಪಜ್ಜಮಾನಂ ನ ಚ ಉಪ್ಪನ್ನಂ.

(ಖ) ಯಸ್ಸ ವಾ ಪನ ಚಿತ್ತಂ ನ ಉಪ್ಪನ್ನಂ ತಸ್ಸ ಚಿತ್ತಂ ನ ಉಪ್ಪಜ್ಜಮಾನನ್ತಿ? ಆಮನ್ತಾ.

(೯) ನಿರುಜ್ಝಮಾನುಪ್ಪನ್ನವಾರೋ

೭೭. (ಕ) ಯಸ್ಸ ಚಿತ್ತಂ ನಿರುಜ್ಝಮಾನಂ ತಸ್ಸ ಚಿತ್ತಂ ಉಪ್ಪನ್ನನ್ತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ಉಪ್ಪನ್ನಂ ತಸ್ಸ ಚಿತ್ತಂ ನಿರುಜ್ಝಮಾನನ್ತಿ?

ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ಉಪ್ಪನ್ನಂ, ನೋ ಚ ತೇಸಂ ಚಿತ್ತಂ ನಿರುಜ್ಝಮಾನಂ. ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಂ ಉಪ್ಪನ್ನಞ್ಚೇವ ನಿರುಜ್ಝಮಾನಞ್ಚ.

(ಕ) ಯಸ್ಸ ಚಿತ್ತಂ ನ ನಿರುಜ್ಝಮಾನಂ ತಸ್ಸ ಚಿತ್ತಂ ನ ಉಪ್ಪನ್ನನ್ತಿ?

ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಚಿತ್ತಂ ನ ನಿರುಜ್ಝಮಾನಂ, ನೋ ಚ ತೇಸಂ ಚಿತ್ತಂ ನ ಉಪ್ಪನ್ನಂ. ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ನ ಚೇವ ನಿರುಜ್ಝಮಾನಂ ನ ಚ ಉಪ್ಪನ್ನಂ.

(ಖ) ಯಸ್ಸ ವಾ ಪನ ಚಿತ್ತಂ ನ ಉಪ್ಪನ್ನಂ ತಸ್ಸ ಚಿತ್ತಂ ನ ನಿರುಜ್ಝಮಾನನ್ತಿ? ಆಮನ್ತಾ.

(೧೦) ಉಪ್ಪನ್ನುಪ್ಪಾದವಾರೋ

೭೮. (ಕ) ಯಸ್ಸ ಚಿತ್ತಂ ಉಪ್ಪನ್ನಂ ತಸ್ಸ ಚಿತ್ತಂ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ಉಪ್ಪಜ್ಜಿತ್ಥ ತಸ್ಸ ಚಿತ್ತಂ ಉಪ್ಪನ್ನನ್ತಿ?

ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ಉಪ್ಪಜ್ಜಿತ್ಥ, ನೋ ಚ ತೇಸಂ ಚಿತ್ತಂ ಉಪ್ಪನ್ನಂ. ಚಿತ್ತಸಮಙ್ಗೀನಂ ತೇಸಂ ಚಿತ್ತಂ ಉಪ್ಪಜ್ಜಿತ್ಥ ಚೇವ ಉಪ್ಪನ್ನಞ್ಚ.

(ಕ) ಯಸ್ಸ ಚಿತ್ತಂ ನ ಉಪ್ಪನ್ನಂ ತಸ್ಸ ಚಿತ್ತಂ ನ ಉಪ್ಪಜ್ಜಿತ್ಥಾತಿ? ಉಪ್ಪಜ್ಜಿತ್ಥ.

(ಖ) ಯಸ್ಸ ವಾ ಪನ ಚಿತ್ತಂ ನ ಉಪ್ಪಜ್ಜಿತ್ಥ ತಸ್ಸ ಚಿತ್ತಂ ನ ಉಪ್ಪನ್ನನ್ತಿ? ನತ್ಥಿ.

೭೯. (ಕ) ಯಸ್ಸ ಚಿತ್ತಂ ಉಪ್ಪನ್ನಂ ತಸ್ಸ ಚಿತ್ತಂ ಉಪ್ಪಜ್ಜಿಸ್ಸತೀತಿ?

ಪಚ್ಛಿಮಚಿತ್ತಸಮಙ್ಗೀನಂ ತೇಸಂ ಚಿತ್ತಂ ಉಪ್ಪನ್ನಂ, ನೋ ಚ ತೇಸಂ ಚಿತ್ತಂ ಉಪ್ಪಜ್ಜಿಸ್ಸತಿ. ಇತರೇಸಂ ಚಿತ್ತಸಮಙ್ಗೀನಂ ತೇಸಂ ಚಿತ್ತಂ ಉಪ್ಪನ್ನಞ್ಚೇವ ಉಪ್ಪಜ್ಜಿಸ್ಸತಿ ಚ.

(ಖ) ಯಸ್ಸ ವಾ ಪನ ಚಿತ್ತಂ ಉಪ್ಪಜ್ಜಿಸ್ಸತಿ ತಸ್ಸ ಚಿತ್ತಂ ಉಪ್ಪನ್ನನ್ತಿ?

ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಚಿತ್ತಂ ಉಪ್ಪಜ್ಜಿಸ್ಸತಿ, ನೋ ಚ ತೇಸಂ ಚಿತ್ತಂ ಉಪ್ಪನ್ನಂ. ಚಿತ್ತಸಮಙ್ಗೀನಂ ತೇಸಂ ಚಿತ್ತಂ ಉಪ್ಪಜ್ಜಿಸ್ಸತಿ ಚೇವ ಉಪ್ಪನ್ನಞ್ಚ.

(ಕ) ಯಸ್ಸ ಚಿತ್ತಂ ನ ಉಪ್ಪನ್ನಂ ತಸ್ಸ ಚಿತ್ತಂ ನ ಉಪ್ಪಜ್ಜಿಸ್ಸತೀತಿ? ಉಪ್ಪಜ್ಜಿಸ್ಸತಿ.

(ಖ) ಯಸ್ಸ ವಾ ಪನ ಚಿತ್ತಂ ನ ಉಪ್ಪಜ್ಜಿಸ್ಸತಿ ತಸ್ಸ ಚಿತ್ತಂ ನ ಉಪ್ಪನ್ನನ್ತಿ? ಉಪ್ಪನ್ನಂ.

(೧೧) ಅತೀತಾನಾಗತವಾರೋ

೮೦. (ಕ) ಯಸ್ಸ ಚಿತ್ತಂ ಉಪ್ಪಜ್ಜಿತ್ಥ ನೋ ಚ ತಸ್ಸ ಚಿತ್ತಂ ಉಪ್ಪನ್ನಂ, ತಸ್ಸ ಚಿತ್ತಂ ಉಪ್ಪಜ್ಜಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಚಿತ್ತಂ ಉಪ್ಪಜ್ಜಿಸ್ಸತಿ ನೋ ಚ ತಸ್ಸ ಚಿತ್ತಂ ಉಪ್ಪನ್ನಂ, ತಸ್ಸ ಚಿತ್ತಂ ಉಪ್ಪಜ್ಜಿತ್ಥಾತಿ? ಆಮನ್ತಾ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜಿತ್ಥ ನೋ ಚ ತಸ್ಸ ಚಿತ್ತಂ ನ ಉಪ್ಪನ್ನಂ, ತಸ್ಸ ಚಿತ್ತಂ ನ ಉಪ್ಪಜ್ಜಿಸ್ಸತೀತಿ? ನತ್ಥಿ.

(ಖ) ಯಸ್ಸ ವಾ ಪನ ಚಿತ್ತಂ ನ ಉಪ್ಪಜ್ಜಿಸ್ಸತಿ ನೋ ಚ ತಸ್ಸ ಚಿತ್ತಂ ನ ಉಪ್ಪನ್ನಂ, ತಸ್ಸ ಚಿತ್ತಂ ನ ಉಪ್ಪಜ್ಜಿತ್ಥಾತಿ? ಉಪ್ಪಜ್ಜಿತ್ಥ.

(೧೨) ಉಪ್ಪನ್ನುಪ್ಪಜ್ಜಮಾನವಾರೋ

೮೧. (ಕ) ಉಪ್ಪನ್ನಂ ಉಪ್ಪಜ್ಜಮಾನನ್ತಿ?

ಭಙ್ಗಕ್ಖಣೇ ಉಪ್ಪನ್ನಂ, ನೋ ಚ ಉಪ್ಪಜ್ಜಮಾನಂ. ಉಪ್ಪಾದಕ್ಖಣೇ ಉಪ್ಪನ್ನಞ್ಚೇವ ಉಪ್ಪಜ್ಜಮಾನಞ್ಚ.

(ಖ) ಉಪ್ಪಜ್ಜಮಾನಂ ಉಪ್ಪನ್ನನ್ತಿ? ಆಮನ್ತಾ.

(ಕ) ನ ಉಪ್ಪನ್ನಂ ನ ಉಪ್ಪಜ್ಜಮಾನನ್ತಿ? ಆಮನ್ತಾ.

(ಖ) ನ ಉಪ್ಪಜ್ಜಮಾನಂ ನ ಉಪ್ಪನ್ನನ್ತಿ?

ಭಙ್ಗಕ್ಖಣೇ ನ ಉಪ್ಪಜ್ಜಮಾನಂ, ನೋ ಚ ನ ಉಪ್ಪನ್ನಂ. ಅತೀತಾನಾಗತಂ ಚಿತ್ತಂ ನ ಚೇವ ಉಪ್ಪಜ್ಜಮಾನಂ ನ ಚ ಉಪ್ಪನ್ನಂ.

(೧೩) ನಿರುದ್ಧನಿರುಜ್ಝಮಾನವಾರೋ

೮೨. (ಕ) ನಿರುದ್ಧಂ ನಿರುಜ್ಝಮಾನನ್ತಿ? ನೋ.

(ಖ) ನಿರುಜ್ಝಮಾನಂ ನಿರುದ್ಧನ್ತಿ? ನೋ.

(ಕ) ನ ನಿರುದ್ಧಂ ನ ನಿರುಜ್ಝಮಾನನ್ತಿ?

ಭಙ್ಗಕ್ಖಣೇ ನ ನಿರುದ್ಧಂ, ನೋ ಚ ನ ನಿರುಜ್ಝಮಾನಂ. ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ನಿರುದ್ಧಂ ನ ಚ ನಿರುಜ್ಝಮಾನಂ.

(ಖ) ನ ನಿರುಜ್ಝಮಾನಂ ನ ನಿರುದ್ಧನ್ತಿ?

ಅತೀತಂ ಚಿತ್ತಂ ನ ನಿರುಜ್ಝಮಾನಂ, ನೋ ಚ ನ ನಿರುದ್ಧಂ. ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ನಿರುಜ್ಝಮಾನಂ ನ ಚ ನಿರುದ್ಧಂ.

(೧೪) ಅತಿಕ್ಕನ್ತಕಾಲವಾರೋ

೮೩. (ಕ) ಯಸ್ಸ ಚಿತ್ತಂ ಉಪ್ಪಜ್ಜಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ, ನಿರುಜ್ಝಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ ತಸ್ಸ ಚಿತ್ತನ್ತಿ?

ಭಙ್ಗಕ್ಖಣೇ ಚಿತ್ತಂ ಉಪ್ಪಾದಕ್ಖಣಂ ವೀತಕ್ಕನ್ತಂ ಭಙ್ಗಕ್ಖಣಂ ಅವೀತಿಕ್ಕನ್ತಂ, ಅತೀತಂ ಚಿತ್ತಂ ಉಪ್ಪಾದಕ್ಖಣಞ್ಚ ವೀತಿಕ್ಕನ್ತಂ ಭಙ್ಗಕ್ಖಣಞ್ಚ ವೀತಿಕ್ಕನ್ತಂ.

(ಖ) ಯಸ್ಸ ವಾ ಪನ ಚಿತ್ತಂ ನಿರುಜ್ಝಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ, ಉಪ್ಪಜ್ಜಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ ತಸ್ಸ ಚಿತ್ತನ್ತಿ?

ಅತೀತಂ ಚಿತ್ತಂ.

(ಕ) ಯಸ್ಸ ಚಿತ್ತಂ ನ ಉಪ್ಪಜ್ಜಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ, ನ ನಿರುಜ್ಝಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ ತಸ್ಸ ಚಿತ್ತನ್ತಿ?

ಉಪ್ಪಾದಕ್ಖಣೇ ಅನಾಗತಂ ಚಿತ್ತಂ.

(ಖ) ಯಸ್ಸ ವಾ ಪನ ಚಿತ್ತಂ ನ ನಿರುಜ್ಝಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ, ನ ಉಪ್ಪಜ್ಜಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ ತಸ್ಸ ಚಿತ್ತನ್ತಿ?

ಭಙ್ಗಕ್ಖಣೇ ಚಿತ್ತಂ ಭಙ್ಗಕ್ಖಣಂ ಅವೀತಿಕ್ಕನ್ತಂ ನೋ ಚ ಉಪ್ಪಾದಕ್ಖಣಂ ಅವೀತಿಕ್ಕನ್ತಂ, ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ಭಙ್ಗಕ್ಖಣಞ್ಚ ಅವೀತಿಕ್ಕನ್ತಂ ಉಪ್ಪಾದಕ್ಖಣಞ್ಚ ಅವೀತಿಕ್ಕನ್ತಂ.