೩. ಪುಗ್ಗಲಧಮ್ಮವಾರೋ
(೧) ಉಪ್ಪಾದನಿರೋಧಕಾಲಸಮ್ಭೇದವಾರೋ
೧೦೫. (ಕ) ಯಸ್ಸ ಯಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ ತಸ್ಸ ತಂ ಚಿತ್ತಂ ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತೀತಿ? ಆಮನ್ತಾ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತಿ ತಸ್ಸ ತಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತೀತಿ? ಆಮನ್ತಾ.
(ಕ) ಯಸ್ಸ ಯಂ ಚಿತ್ತಂ ನ ಉಪ್ಪಜ್ಜತಿ ನಿರುಜ್ಝತಿ ತಸ್ಸ ತಂ ಚಿತ್ತಂ ನ ನಿರುಜ್ಝಿಸ್ಸತಿ ಉಪ್ಪಜ್ಜಿಸ್ಸತೀತಿ? ನೋ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನ ನಿರುಜ್ಝಿಸ್ಸತಿ ಉಪ್ಪಜ್ಜಿಸ್ಸತಿ ತಸ್ಸ ತಂ ಚಿತ್ತಂ ನ ಉಪ್ಪಜ್ಜತಿ ನಿರುಜ್ಝತೀತಿ? ನತ್ಥಿ.
(೨) ಉಪ್ಪಾದುಪ್ಪನ್ನವಾರೋ
೧೦೬. (ಕ) ಯಸ್ಸ ಯಂ ಚಿತ್ತಂ ಉಪ್ಪಜ್ಜತಿ ತಸ್ಸ ತಂ ಚಿತ್ತಂ ಉಪ್ಪನ್ನನ್ತಿ? ಆಮನ್ತಾ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ಉಪ್ಪನ್ನಂ ತಸ್ಸ ತಂ ಚಿತ್ತಂ ಉಪ್ಪಜ್ಜತೀತಿ?
ಭಙ್ಗಕ್ಖಣೇ ಚಿತ್ತಂ ಉಪ್ಪನ್ನಂ, ನೋ ಚ ತಸ್ಸ ತಂ ಚಿತ್ತಂ ಉಪ್ಪಜ್ಜತಿ. ಉಪ್ಪಾದಕ್ಖಣೇ ಚಿತ್ತಂ ಉಪ್ಪನ್ನಞ್ಚೇವ ಉಪ್ಪಜ್ಜತಿ ಚ.
(ಕ) ಯಸ್ಸ ಯಂ ಚಿತ್ತಂ ನ ಉಪ್ಪಜ್ಜತಿ ತಸ್ಸ ತಂ ಚಿತ್ತಂ ನ ಉಪ್ಪನ್ನನ್ತಿ?
ಭಙ್ಗಕ್ಖಣೇ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತಸ್ಸ ತಂ ಚಿತ್ತಂ ನ ಉಪ್ಪನ್ನಂ. ಅತೀತಾನಾಗತಂ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ಉಪ್ಪನ್ನಂ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನ ಉಪ್ಪನ್ನಂ ತಸ್ಸ ತಂ ಚಿತ್ತಂ ನ ಉಪ್ಪಜ್ಜತೀತಿ? ಆಮನ್ತಾ.
(೩) ನಿರೋಧುಪ್ಪನ್ನವಾರೋ
೧೦೭. (ಕ) ಯಸ್ಸ ಯಂ ಚಿತ್ತಂ ನಿರುಜ್ಝತಿ ತಸ್ಸ ತಂ ಚಿತ್ತಂ ಉಪ್ಪನ್ನನ್ತಿ? ಆಮನ್ತಾ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ಉಪ್ಪನ್ನಂ ತಸ್ಸ ತಂ ಚಿತ್ತಂ ನಿರುಜ್ಝತೀತಿ?
ಉಪ್ಪಾದಕ್ಖಣೇ ಚಿತ್ತಂ ಉಪ್ಪನ್ನಂ, ನೋ ಚ ತಸ್ಸ ತಂ ಚಿತ್ತಂ ನಿರುಜ್ಝತಿ. ಭಙ್ಗಕ್ಖಣೇ ಚಿತ್ತಂ ಉಪ್ಪನ್ನಞ್ಚೇವ ನಿರುಜ್ಝತಿ ಚ.
(ಕ) ಯಸ್ಸ ಯಂ ಚಿತ್ತಂ ನ ನಿರುಜ್ಝತಿ ತಸ್ಸ ತಂ ಚಿತ್ತಂ ನ ಉಪ್ಪನ್ನನ್ತಿ?
ಉಪ್ಪಾದಕ್ಖಣೇ ಚಿತ್ತಂ ನ ನಿರುಜ್ಝತಿ, ನೋ ಚ ತಸ್ಸ ತಂ ಚಿತ್ತಂ ನ ಉಪ್ಪನ್ನಂ. ಅತೀತಾನಾಗತಂ ಚಿತ್ತಂ ನ ಚೇವ ನಿರುಜ್ಝತಿ ನ ಚ ಉಪ್ಪನ್ನಂ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನ ಉಪ್ಪನ್ನಂ ತಸ್ಸ ತಂ ಚಿತ್ತಂ ನ ನಿರುಜ್ಝತೀತಿ? ಆಮನ್ತಾ.
(೪) ಉಪ್ಪಾದವಾರೋ
೧೦೮. (ಕ) ಯಸ್ಸ ಯಂ ಚಿತ್ತಂ ಉಪ್ಪಜ್ಜತಿ ತಸ್ಸ ತಂ ಚಿತ್ತಂ ಉಪ್ಪಜ್ಜಿತ್ಥಾತಿ? ನೋ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ಉಪ್ಪಜ್ಜಿತ್ಥ ತಸ್ಸ ತಂ ಚಿತ್ತಂ ಉಪ್ಪಜ್ಜತೀತಿ? ನೋ.
(ಕ) ಯಸ್ಸ ಯಂ ಚಿತ್ತಂ ನ ಉಪ್ಪಜ್ಜತಿ ತಸ್ಸ ತಂ ಚಿತ್ತಂ ನ ಉಪ್ಪಜ್ಜಿತ್ಥಾತಿ?
ಅತೀತಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತಸ್ಸ ತಂ ಚಿತ್ತಂ ನ ಉಪ್ಪಜ್ಜಿತ್ಥ. ಭಙ್ಗಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ಉಪ್ಪಜ್ಜಿತ್ಥ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನ ಉಪ್ಪಜ್ಜಿತ್ಥ ತಸ್ಸ ತಂ ಚಿತ್ತಂ ನ ಉಪ್ಪಜ್ಜತೀತಿ?
ಉಪ್ಪಾದಕ್ಖಣೇ ಚಿತ್ತಂ ನ ಉಪ್ಪಜ್ಜಿತ್ಥ, ನೋ ಚ ತಸ್ಸ ತಂ ಚಿತ್ತಂ ನ ಉಪ್ಪಜ್ಜತಿ. ಭಙ್ಗಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ಉಪ್ಪಜ್ಜಿತ್ಥ ನ ಚ ಉಪ್ಪಜ್ಜತಿ.
೧೦೯. (ಕ) ಯಸ್ಸ ಯಂ ಚಿತ್ತಂ ಉಪ್ಪಜ್ಜತಿ ತಸ್ಸ ತಂ ಚಿತ್ತಂ ಉಪ್ಪಜ್ಜಿಸ್ಸತೀತಿ? ನೋ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ಉಪ್ಪಜ್ಜಿಸ್ಸತಿ ತಸ್ಸ ತಂ ಚಿತ್ತಂ ಉಪ್ಪಜ್ಜತೀತಿ? ನೋ.
(ಕ) ಯಸ್ಸ ಯಂ ಚಿತ್ತಂ ನ ಉಪ್ಪಜ್ಜತಿ ತಸ್ಸ ತಂ ಚಿತ್ತಂ ನ ಉಪ್ಪಜ್ಜಿಸ್ಸತೀತಿ?
ಅನಾಗತಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತಸ್ಸ ತಂ ಚಿತ್ತಂ ನ ಉಪ್ಪಜ್ಜಿಸ್ಸತಿ. ಭಙ್ಗಕ್ಖಣೇ ಅತೀತಞ್ಚ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ಉಪ್ಪಜ್ಜಿಸ್ಸತಿ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನ ಉಪ್ಪಜ್ಜಿಸ್ಸತಿ ತಸ್ಸ ತಂ ಚಿತ್ತಂ ನ ಉಪ್ಪಜ್ಜತೀತಿ?
ಉಪ್ಪಾದಕ್ಖಣೇ ಚಿತ್ತಂ ನ ಉಪ್ಪಜ್ಜಿಸ್ಸತಿ, ನೋ ಚ ತಸ್ಸ ತಂ ಚಿತ್ತಂ ನ ಉಪ್ಪಜ್ಜತಿ. ಭಙ್ಗಕ್ಖಣೇ ಅತೀತಞ್ಚ ಚಿತ್ತಂ ನ ಚೇವ ಉಪ್ಪಜ್ಜಿಸ್ಸತಿ ನ ಚ ಉಪ್ಪಜ್ಜತಿ.
೧೧೦. (ಕ) ಯಸ್ಸ ಯಂ ಚಿತ್ತಂ ಉಪ್ಪಜ್ಜಿತ್ಥ ತಸ್ಸ ತಂ ಚಿತ್ತಂ ಉಪ್ಪಜ್ಜಿಸ್ಸತೀತಿ? ನೋ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ಉಪ್ಪಜ್ಜಿಸ್ಸತಿ ತಸ್ಸ ತಂ ಚಿತ್ತಂ ಉಪ್ಪಜ್ಜಿತ್ಥಾತಿ? ನೋ.
(ಕ) ಯಸ್ಸ ಯಂ ಚಿತ್ತಂ ನ ಉಪ್ಪಜ್ಜಿತ್ಥ ತಸ್ಸ ತಂ ಚಿತ್ತಂ ನ ಉಪ್ಪಜ್ಜಿಸ್ಸತೀತಿ?
ಅನಾಗತಂ ಚಿತ್ತಂ ನ ಉಪ್ಪಜ್ಜಿತ್ಥ, ನೋ ಚ ತಸ್ಸ ತಂ ಚಿತ್ತಂ ನ ಉಪ್ಪಜ್ಜಿಸ್ಸತಿ. ಪಚ್ಚುಪ್ಪನ್ನಂ ಚಿತ್ತಂ ನ ಚೇವ ಉಪ್ಪಜ್ಜಿತ್ಥ ನ ಚ ಉಪ್ಪಜ್ಜಿಸ್ಸತಿ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನ ಉಪ್ಪಜ್ಜಿಸ್ಸತಿ ತಸ್ಸ ತಂ ಚಿತ್ತಂ ನ ಉಪ್ಪಜ್ಜಿತ್ಥಾತಿ?
ಅತೀತಂ ಚಿತ್ತಂ ನ ಉಪ್ಪಜ್ಜಿಸ್ಸತಿ, ನೋ ಚ ತಸ್ಸ ತಂ ಚಿತ್ತಂ ನ ಉಪ್ಪಜ್ಜಿತ್ಥ. ಪಚ್ಚುಪ್ಪನ್ನಂ ಚಿತ್ತಂ ನ ಚೇವ ಉಪ್ಪಜ್ಜಿಸ್ಸತಿ ನ ಚ ಉಪ್ಪಜ್ಜಿತ್ಥ.
(೫) ನಿರೋಧವಾರೋ
೧೧೧. (ಕ) ಯಸ್ಸ ಯಂ ಚಿತ್ತಂ ನಿರುಜ್ಝತಿ ತಸ್ಸ ತಂ ಚಿತ್ತಂ ನಿರುಜ್ಝಿತ್ಥಾತಿ? ನೋ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನಿರುಜ್ಝಿತ್ಥ ತಸ್ಸ ತಂ ಚಿತ್ತಂ ನಿರುಜ್ಝತೀತಿ? ನೋ.
(ಕ) ಯಸ್ಸ ಯಂ ಚಿತ್ತಂ ನ ನಿರುಜ್ಝತಿ ತಸ್ಸ ತಂ ಚಿತ್ತಂ ನ ನಿರುಜ್ಝಿತ್ಥಾತಿ?
ಅತೀತಂ ಚಿತ್ತಂ ನ ನಿರುಜ್ಝತಿ, ನೋ ಚ ತಸ್ಸ ತಂ ಚಿತ್ತಂ ನ ನಿರುಜ್ಝಿತ್ಥ. ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ನಿರುಜ್ಝತಿ ನ ಚ ನಿರುಜ್ಝಿತ್ಥ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನ ನಿರುಜ್ಝಿತ್ಥ ತಸ್ಸ ತಂ ಚಿತ್ತಂ ನ ನಿರುಜ್ಝತೀತಿ?
ಭಙ್ಗಕ್ಖಣೇ ಚಿತ್ತಂ ನ ನಿರುಜ್ಝಿತ್ಥ, ನೋ ಚ ತಸ್ಸ ತಂ ಚಿತ್ತಂ ನ ನಿರುಜ್ಝತಿ. ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ನಿರುಜ್ಝಿತ್ಥ ನ ಚ ನಿರುಜ್ಝತಿ.
೧೧೨. (ಕ) ಯಸ್ಸ ಯಂ ಚಿತ್ತಂ ನಿರುಜ್ಝತಿ ತಸ್ಸ ತಂ ಚಿತ್ತಂ ನಿರುಜ್ಝಿಸ್ಸತೀತಿ? ನೋ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನಿರುಜ್ಝಿಸ್ಸತಿ ತಸ್ಸ ತಂ ಚಿತ್ತಂ ನಿರುಜ್ಝತೀತಿ? ನೋ.
(ಕ) ಯಸ್ಸ ಯಂ ಚಿತ್ತಂ ನ ನಿರುಜ್ಝತಿ ತಸ್ಸ ತಂ ಚಿತ್ತಂ ನ ನಿರುಜ್ಝಿಸ್ಸತೀತಿ?
ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ನಿರುಜ್ಝತಿ, ನೋ ಚ ತಸ್ಸ ತಂ ಚಿತ್ತಂ ನ ನಿರುಜ್ಝಿಸ್ಸತಿ. ಅತೀತಂ ಚಿತ್ತಂ ನ ಚೇವ ನಿರುಜ್ಝತಿ ನ ಚ ನಿರುಜ್ಝಿಸ್ಸತಿ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನ ನಿರುಜ್ಝಿಸ್ಸತಿ ತಸ್ಸ ತಂ ಚಿತ್ತಂ ನ ನಿರುಜ್ಝತೀತಿ?
ಭಙ್ಗಕ್ಖಣೇ ಚಿತ್ತಂ ನ ನಿರುಜ್ಝಿಸ್ಸತಿ, ನೋ ಚ ತಸ್ಸ ತಂ ಚಿತ್ತಂ ನ ನಿರುಜ್ಝತಿ. ಅತೀತಂ ಚಿತ್ತಂ ನ ಚೇವ ನಿರುಜ್ಝಿಸ್ಸತಿ ನ ಚ ನಿರುಜ್ಝತಿ.
೧೧೩. (ಕ) ಯಸ್ಸ ಯಂ ಚಿತ್ತಂ ನಿರುಜ್ಝಿತ್ಥ ತಸ್ಸ ತಂ ಚಿತ್ತಂ ನಿರುಜ್ಝಿಸ್ಸತೀತಿ? ನೋ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನಿರುಜ್ಝಿಸ್ಸತಿ ತಸ್ಸ ತಂ ಚಿತ್ತಂ ನಿರುಜ್ಝಿತ್ಥಾತಿ? ನೋ.
(ಕ) ಯಸ್ಸ ಯಂ ಚಿತ್ತಂ ನ ನಿರುಜ್ಝಿತ್ಥ ತಸ್ಸ ತಂ ಚಿತ್ತಂ ನ ನಿರುಜ್ಝಿಸ್ಸತೀತಿ?
ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ನಿರುಜ್ಝಿತ್ಥ, ನೋ ಚ ತಸ್ಸ ತಂ ಚಿತ್ತಂ ನ ನಿರುಜ್ಝಿಸ್ಸತಿ. ಭಙ್ಗಕ್ಖಣೇ ಚಿತ್ತಂ ನ ಚೇವ ನಿರುಜ್ಝಿತ್ಥ ನ ಚ ನಿರುಜ್ಝಿಸ್ಸತಿ.
(ಖ) ಯಸ್ಸ ವಾ ಪನ ಯಂ ಚಿತ್ತಂ ನ ನಿರುಜ್ಝಿಸ್ಸತಿ ತಸ್ಸ ತಂ ಚಿತ್ತಂ ನ ನಿರುಜ್ಝಿತ್ಥಾತಿ?
ಅತೀತಂ ಚಿತ್ತಂ ನ ನಿರುಜ್ಝಿಸ್ಸತಿ, ನೋ ಚ ತಸ್ಸ ತಂ ಚಿತ್ತಂ ನ ನಿರುಜ್ಝಿತ್ಥ. ಭಙ್ಗಕ್ಖಣೇ ಚಿತ್ತಂ ನ ಚೇವ ನಿರುಜ್ಝಿಸ್ಸತಿ ನ ಚ ನಿರುಜ್ಝಿತ್ಥ.
(ಯಸ್ಸ ಚಿತ್ತಕೇ ಸಕಭಾವೇನ ನಿದ್ದಿಟ್ಠೇ, ಯಂ ಚಿತ್ತಕೇ ಚ ಯಸ್ಸ ಯಂ ಚಿತ್ತಕೇ ಚ ಏಕತ್ತೇನ ನಿದ್ದಿಟ್ಠೇ.)
೨. ಸುತ್ತನ್ತಚಿತ್ತಮಿಸ್ಸಕವಿಸೇಸೋ
೧೧೪. ಯಸ್ಸ ಸರಾಗಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ ತಸ್ಸ ಸರಾಗಂ ಚಿತ್ತಂ ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತೀತಿ?
ಸರಾಗಪಚ್ಛಿಮಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಸರಾಗಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ, ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತಿ. ಇತರೇಸಂ ಸರಾಗಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ…ಪೇ….
೩. ಅಭಿಧಮ್ಮಚಿತ್ತಮಿಸ್ಸಕವಿಸೇಸೋ
೧೧೫. ಯಸ್ಸ ಕುಸಲಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ ತಸ್ಸ ಕುಸಲಂ ಚಿತ್ತಂ ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತೀತಿ?
ಪಚ್ಛಿಮಕುಸಲಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಕುಸಲಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ, ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತಿ. ಇತರೇಸಂ ಕುಸಲಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ…ಪೇ….
ಯಸ್ಸ ವಾ ಪನ…ಪೇ…? ಆಮನ್ತಾ …ಪೇ….
೧೧೬. ಯಸ್ಸ ಅಕುಸಲಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ…ಪೇ…. ಯಸ್ಸ ಅಬ್ಯಾಕತಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ…ಪೇ….
(ಮೂಲಯಮಕಂ ಚಿತ್ತಯಮಕಂ ಧಮ್ಮಯಮಕನ್ತಿ ತೀಣಿ ಯಮಕಾನಿ ಯಾವ ಸರಣಅರಣಾ ಗಚ್ಛನ್ತಿ.)
ಚಿತ್ತಯಮಕಂ ನಿಟ್ಠಿತಂ.