೨. ಧಮ್ಮವಾರೋ

(೧) ಉಪ್ಪಾದನಿರೋಧಕಾಲಸಮ್ಭೇದವಾರೋ

೮೪. (ಕ) ಯಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತಿ ತಂ ಚಿತ್ತಂ ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತೀತಿ? ಆಮನ್ತಾ.

(ಖ) ಯಂ ವಾ ಪನ ಚಿತ್ತಂ ನಿರುಜ್ಝಿಸ್ಸತಿ ನ ಉಪ್ಪಜ್ಜಿಸ್ಸತಿ ತಂ ಚಿತ್ತಂ ಉಪ್ಪಜ್ಜತಿ ನ ನಿರುಜ್ಝತೀತಿ? ಆಮನ್ತಾ.

(ಕ) ಯಂ ಚಿತ್ತಂ ನ ಉಪ್ಪಜ್ಜತಿ ನಿರುಜ್ಝತಿ ತಂ ಚಿತ್ತಂ ನ ನಿರುಜ್ಝಿಸ್ಸತಿ ಉಪ್ಪಜ್ಜಿಸ್ಸತೀತಿ? ನೋ.

(ಖ) ಯಂ ವಾ ಪನ ಚಿತ್ತಂ ನ ನಿರುಜ್ಝಿಸ್ಸತಿ ಉಪ್ಪಜ್ಜಿಸ್ಸತಿ ತಂ ಚಿತ್ತಂ ನ ಉಪ್ಪಜ್ಜತಿ ನಿರುಜ್ಝತೀತಿ? ನತ್ಥಿ.

(೨) ಉಪ್ಪಾದುಪ್ಪನ್ನವಾರೋ

೮೫. (ಕ) ಯಂ ಚಿತ್ತಂ ಉಪ್ಪಜ್ಜತಿ ತಂ ಚಿತ್ತಂ ಉಪ್ಪನ್ನನ್ತಿ? ಆಮನ್ತಾ.

(ಖ) ಯಂ ವಾ ಪನ ಚಿತ್ತಂ ಉಪ್ಪನ್ನಂ ತಂ ಚಿತ್ತಂ ಉಪ್ಪಜ್ಜತೀತಿ?

ಭಙ್ಗಕ್ಖಣೇ ಚಿತ್ತಂ ಉಪ್ಪನ್ನಂ, ನೋ ಚ ತಂ ಚಿತ್ತಂ ಉಪ್ಪಜ್ಜತಿ. ಉಪ್ಪಾದಕ್ಖಣೇ ಚಿತ್ತಂ ಉಪ್ಪನ್ನಞ್ಚೇವ ಉಪ್ಪಜ್ಜತಿ ಚ.

(ಕ) ಯಂ ಚಿತ್ತಂ ನ ಉಪ್ಪಜ್ಜತಿ ತಂ ಚಿತ್ತಂ ನ ಉಪ್ಪನ್ನನ್ತಿ?

ಭಙ್ಗಕ್ಖಣೇ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತಂ ಚಿತ್ತಂ ನ ಉಪ್ಪನ್ನಂ. ಅತೀತಾನಾಗತಂ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ಉಪ್ಪನ್ನಂ.

(ಖ) ಯಂ ವಾ ಪನ ಚಿತ್ತಂ ನ ಉಪ್ಪನ್ನಂ ತಂ ಚಿತ್ತಂ ನ ಉಪ್ಪಜ್ಜತೀತಿ? ಆಮನ್ತಾ.

(೩) ನಿರೋಧುಪ್ಪನ್ನವಾರೋ

೮೬. (ಕ) ಯಂ ಚಿತ್ತಂ ನಿರುಜ್ಝತಿ ತಂ ಚಿತ್ತಂ ಉಪ್ಪನ್ನನ್ತಿ? ಆಮನ್ತಾ.

(ಖ) ಯಂ ವಾ ಪನ ಚಿತ್ತಂ ಉಪ್ಪನ್ನಂ ತಂ ಚಿತ್ತಂ ನಿರುಜ್ಝತೀತಿ?

ಉಪ್ಪಾದಕ್ಖಣೇ ಚಿತ್ತಂ ಉಪ್ಪನ್ನಂ, ನೋ ಚ ತಂ ಚಿತ್ತಂ ನಿರುಜ್ಝತಿ. ಭಙ್ಗಕ್ಖಣೇ ಚಿತ್ತಂ ಉಪ್ಪನ್ನಞ್ಚೇವ ನಿರುಜ್ಝತಿ ಚ.

(ಕ) ಯಂ ಚಿತ್ತಂ ನ ನಿರುಜ್ಝತಿ ತಂ ಚಿತ್ತಂ ನ ಉಪ್ಪನ್ನನ್ತಿ?

ಉಪ್ಪಾದಕ್ಖಣೇ ಚಿತ್ತಂ ನ ನಿರುಜ್ಝತಿ, ನೋ ಚ ತಂ ಚಿತ್ತಂ ನ ಉಪ್ಪನ್ನಂ. ಅತೀತಾನಾಗತಂ ಚಿತ್ತಂ ನ ಚೇವ ನಿರುಜ್ಝತಿ ನ ಚ ಉಪ್ಪನ್ನಂ.

(ಖ) ಯಂ ವಾ ಪನ ಚಿತ್ತಂ ನ ಉಪ್ಪನ್ನಂ ತಂ ಚಿತ್ತಂ ನ ನಿರುಜ್ಝತೀತಿ? ಆಮನ್ತಾ.

(೪) ಉಪ್ಪಾದವಾರೋ

೮೭. (ಕ) ಯಂ ಚಿತ್ತಂ ಉಪ್ಪಜ್ಜತಿ ತಂ ಚಿತ್ತಂ ಉಪ್ಪಜ್ಜಿತ್ಥಾತಿ? ನೋ.

(ಖ) ಯಂ ವಾ ಪನ ಚಿತ್ತಂ ಉಪ್ಪಜ್ಜಿತ್ಥ ತಂ ಚಿತ್ತಂ ಉಪ್ಪಜ್ಜತೀತಿ? ನೋ.

(ಕ) ಯಂ ಚಿತ್ತಂ ನ ಉಪ್ಪಜ್ಜತಿ ತಂ ಚಿತ್ತಂ ನ ಉಪ್ಪಜ್ಜಿತ್ಥಾತಿ?

ಅತೀತಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತಂ ಚಿತ್ತಂ ನ ಉಪ್ಪಜ್ಜಿತ್ಥ. ಭಙ್ಗಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ಉಪ್ಪಜ್ಜಿತ್ಥ.

(ಖ) ಯಂ ವಾ ಪನ ಚಿತ್ತಂ ನ ಉಪ್ಪಜ್ಜಿತ್ಥ ತಂ ಚಿತ್ತಂ ನ ಉಪ್ಪಜ್ಜತೀತಿ?

ಉಪ್ಪಾದಕ್ಖಣೇ ಚಿತ್ತಂ ನ ಉಪ್ಪಜ್ಜಿತ್ಥ, ನೋ ಚ ತಂ ಚಿತ್ತಂ ನ ಉಪ್ಪಜ್ಜತಿ. ಭಙ್ಗಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ಉಪ್ಪಜ್ಜಿತ್ಥ ನ ಚ ಉಪ್ಪಜ್ಜತಿ.

೮೮. (ಕ) ಯಂ ಚಿತ್ತಂ ಉಪ್ಪಜ್ಜತಿ ತಂ ಚಿತ್ತಂ ಉಪ್ಪಜ್ಜಿಸ್ಸತೀತಿ? ನೋ.

(ಖ) ಯಂ ವಾ ಪನ ಚಿತ್ತಂ ಉಪ್ಪಜ್ಜಿಸ್ಸತಿ ತಂ ಚಿತ್ತಂ ಉಪ್ಪಜ್ಜತೀತಿ? ನೋ.

(ಕ) ಯಂ ಚಿತ್ತಂ ನ ಉಪ್ಪಜ್ಜತಿ ತಂ ಚಿತ್ತಂ ನ ಉಪ್ಪಜ್ಜಿಸ್ಸತೀತಿ?

ಅನಾಗತಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತಂ ಚಿತ್ತಂ ನ ಉಪ್ಪಜ್ಜಿಸ್ಸತಿ. ಭಙ್ಗಕ್ಖಣೇ ಅತೀತಞ್ಚ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ಉಪ್ಪಜ್ಜಿಸ್ಸತಿ.

(ಖ) ಯಂ ವಾ ಪನ ಚಿತ್ತಂ ನ ಉಪ್ಪಜ್ಜಿಸ್ಸತಿ ತಂ ಚಿತ್ತಂ ನ ಉಪ್ಪಜ್ಜತೀತಿ?

ಉಪ್ಪಾದಕ್ಖಣೇ ಚಿತ್ತಂ ನ ಉಪ್ಪಜ್ಜಿಸ್ಸತಿ, ನೋ ಚ ತಂ ಚಿತ್ತಂ ನ ಉಪ್ಪಜ್ಜತಿ. ಭಙ್ಗಕ್ಖಣೇ ಅತೀತಞ್ಚ ಚಿತ್ತಂ ನ ಚೇವ ಉಪ್ಪಜ್ಜಿಸ್ಸತಿ ನ ಚ ಉಪ್ಪಜ್ಜತಿ.

೮೯. (ಕ) ಯಂ ಚಿತ್ತಂ ಉಪ್ಪಜ್ಜಿತ್ಥ ತಂ ಚಿತ್ತಂ ಉಪ್ಪಜ್ಜಿಸ್ಸತೀತಿ? ನೋ.

(ಖ) ಯಂ ವಾ ಪನ ಚಿತ್ತಂ ಉಪ್ಪಜ್ಜಿಸ್ಸತಿ ತಂ ಚಿತ್ತಂ ಉಪ್ಪಜ್ಜಿತ್ಥಾತಿ? ನೋ.

(ಕ) ಯಂ ಚಿತ್ತಂ ನ ಉಪ್ಪಜ್ಜಿತ್ಥ ತಂ ಚಿತ್ತಂ ನ ಉಪ್ಪಜ್ಜಿಸ್ಸತೀತಿ?

ಅನಾಗತಂ ಚಿತ್ತಂ ನ ಉಪ್ಪಜ್ಜಿತ್ಥ, ನೋ ಚ ತಂ ಚಿತ್ತಂ ನ ಉಪ್ಪಜ್ಜಿಸ್ಸತಿ. ಪಚ್ಚುಪ್ಪನ್ನಂ ಚಿತ್ತಂ ನ ಚೇವ ಉಪ್ಪಜ್ಜಿತ್ಥ ನ ಚ ಉಪ್ಪಜ್ಜಿಸ್ಸತಿ.

(ಖ) ಯಂ ವಾ ಪನ ಚಿತ್ತಂ ನ ಉಪ್ಪಜ್ಜಿಸ್ಸತಿ ತಂ ಚಿತ್ತಂ ನ ಉಪ್ಪಜ್ಜಿತ್ಥಾತಿ?

ಅತೀತಂ ಚಿತ್ತಂ ನ ಉಪ್ಪಜ್ಜಿಸ್ಸತಿ, ನೋ ಚ ತಂ ಚಿತ್ತಂ ನ ಉಪ್ಪಜ್ಜಿತ್ಥ. ಪಚ್ಚುಪ್ಪನ್ನಂ ಚಿತ್ತಂ ನ ಚೇವ ಉಪ್ಪಜ್ಜಿಸ್ಸತಿ ನ ಚ ಉಪ್ಪಜ್ಜಿತ್ಥ.

(೫) ನಿರೋಧವಾರೋ

೯೦. (ಕ) ಯಂ ಚಿತ್ತಂ ನಿರುಜ್ಝತಿ ತಂ ಚಿತ್ತಂ ನಿರುಜ್ಝಿತ್ಥಾತಿ? ನೋ.

(ಖ) ಯಂ ವಾ ಪನ ಚಿತ್ತಂ ನಿರುಜ್ಝಿತ್ಥ ತಂ ಚಿತ್ತಂ ನಿರುಜ್ಝತೀತಿ? ನೋ.

(ಕ) ಯಂ ಚಿತ್ತಂ ನ ನಿರುಜ್ಝತಿ ತಂ ಚಿತ್ತಂ ನ ನಿರುಜ್ಝಿತ್ಥಾತಿ?

ಅತೀತಂ ಚಿತ್ತಂ ನ ನಿರುಜ್ಝತಿ, ನೋ ಚ ತಂ ಚಿತ್ತಂ ನ ನಿರುಜ್ಝಿತ್ಥ. ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ನಿರುಜ್ಝತಿ ನ ಚ ನಿರುಜ್ಝಿತ್ಥ.

(ಖ) ಯಂ ವಾ ಪನ ಚಿತ್ತಂ ನ ನಿರುಜ್ಝಿತ್ಥ ತಂ ಚಿತ್ತಂ ನ ನಿರುಜ್ಝತೀತಿ?

ಭಙ್ಗಕ್ಖಣೇ ಚಿತ್ತಂ ನ ನಿರುಜ್ಝಿತ್ಥ, ನೋ ಚ ತಂ ಚಿತ್ತಂ ನ ನಿರುಜ್ಝತಿ. ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ನಿರುಜ್ಝಿತ್ಥ ನ ಚ ನಿರುಜ್ಝತಿ.

೯೧. (ಕ) ಯಂ ಚಿತ್ತಂ ನಿರುಜ್ಝತಿ ತಂ ಚಿತ್ತಂ ನಿರುಜ್ಝಿಸ್ಸತೀತಿ? ನೋ.

(ಖ) ಯಂ ವಾ ಪನ ಚಿತ್ತಂ ನಿರುಜ್ಝಿಸ್ಸತಿ ತಂ ಚಿತ್ತಂ ನಿರುಜ್ಝತೀತಿ? ನೋ.

(ಕ) ಯಂ ಚಿತ್ತಂ ನ ನಿರುಜ್ಝತಿ ತಂ ಚಿತ್ತಂ ನ ನಿರುಜ್ಝಿಸ್ಸತೀತಿ?

ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ನಿರುಜ್ಝತಿ, ನೋ ಚ ತಂ ಚಿತ್ತಂ ನ ನಿರುಜ್ಝಿಸ್ಸತಿ. ಅತೀತಂ ಚಿತ್ತಂ ನ ಚೇವ ನಿರುಜ್ಝತಿ ನ ಚ ನಿರುಜ್ಝಿಸ್ಸತಿ.

(ಖ) ಯಂ ವಾ ಪನ ಚಿತ್ತಂ ನ ನಿರುಜ್ಝಿಸ್ಸತಿ ತಂ ಚಿತ್ತಂ ನ ನಿರುಜ್ಝತೀತಿ?

ಭಙ್ಗಕ್ಖಣೇ ಚಿತ್ತಂ ನ ನಿರುಜ್ಝಿಸ್ಸತಿ, ನೋ ಚ ತಂ ಚಿತ್ತಂ ನ ನಿರುಜ್ಝತಿ. ಅತೀತಂ ಚಿತ್ತಂ ನ ಚೇವ ನಿರುಜ್ಝಿಸ್ಸತಿ ನ ಚ ನಿರುಜ್ಝತಿ.

೯೨. (ಕ) ಯಂ ಚಿತ್ತಂ ನಿರುಜ್ಝಿತ್ಥ ತಂ ಚಿತ್ತಂ ನಿರುಜ್ಝಿಸ್ಸತೀತಿ? ನೋ.

(ಖ) ಯಂ ವಾ ಪನ ಚಿತ್ತಂ ನಿರುಜ್ಝಿಸ್ಸತಿ ತಂ ಚಿತ್ತಂ ನಿರುಜ್ಝಿತ್ಥಾತಿ? ನೋ.

(ಕ) ಯಂ ಚಿತ್ತಂ ನ ನಿರುಜ್ಝಿತ್ಥ ತಂ ಚಿತ್ತಂ ನ ನಿರುಜ್ಝಿಸ್ಸತೀತಿ?

ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ನಿರುಜ್ಝಿತ್ಥ, ನೋ ಚ ತಂ ಚಿತ್ತಂ ನ ನಿರುಜ್ಝಿಸ್ಸತಿ. ಭಙ್ಗಕ್ಖಣೇ ಚಿತ್ತಂ ನ ಚೇವ ನಿರುಜ್ಝಿತ್ಥ ನ ಚ ನಿರುಜ್ಝಿಸ್ಸತಿ.

(ಖ) ಯಂ ವಾ ಪನ ಚಿತ್ತಂ ನ ನಿರುಜ್ಝಿಸ್ಸತಿ ತಂ ಚಿತ್ತಂ ನ ನಿರುಜ್ಝಿತ್ಥಾತಿ?

ಅತೀತಂ ಚಿತ್ತಂ ನ ನಿರುಜ್ಝಿಸ್ಸತಿ, ನೋ ಚ ತಂ ಚಿತ್ತಂ ನ ನಿರುಜ್ಝಿತ್ಥ. ಭಙ್ಗಕ್ಖಣೇ ಚಿತ್ತಂ ನ ಚೇವ ನಿರುಜ್ಝಿಸ್ಸತಿ ನ ಚ ನಿರುಜ್ಝಿತ್ಥ.

(೬) ಉಪ್ಪಾದನಿರೋಧವಾರೋ

೯೩. (ಕ) ಯಂ ಚಿತ್ತಂ ಉಪ್ಪಜ್ಜತಿ ತಂ ಚಿತ್ತಂ ನಿರುಜ್ಝಿತ್ಥಾತಿ? ನೋ.

(ಖ) ಯಂ ವಾ ಪನ ಚಿತ್ತಂ ನಿರುಜ್ಝಿತ್ಥ ತಂ ಚಿತ್ತಂ ಉಪ್ಪಜ್ಜತೀತಿ? ನೋ.

(ಕ) ಯಂ ಚಿತ್ತಂ ನ ಉಪ್ಪಜ್ಜತಿ ತಂ ಚಿತ್ತಂ ನ ನಿರುಜ್ಝಿತ್ಥಾತಿ?

ಅತೀತಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತಂ ಚಿತ್ತಂ ನ ನಿರುಜ್ಝಿತ್ಥ. ಭಙ್ಗಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ನಿರುಜ್ಝಿತ್ಥ.

(ಖ) ಯಂ ವಾ ಪನ ಚಿತ್ತಂ ನ ನಿರುಜ್ಝಿತ್ಥ ತಂ ಚಿತ್ತಂ ನ ಉಪ್ಪಜ್ಜತೀತಿ?

ಉಪ್ಪಾದಕ್ಖಣೇ ಚಿತ್ತಂ ನ ನಿರುಜ್ಝಿತ್ಥ, ನೋ ಚ ತಂ ಚಿತ್ತಂ ನ ಉಪ್ಪಜ್ಜತಿ. ಭಙ್ಗಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ನಿರುಜ್ಝಿತ್ಥ ನ ಚ ಉಪ್ಪಜ್ಜತಿ.

೯೪. (ಕ) ಯಂ ಚಿತ್ತಂ ಉಪ್ಪಜ್ಜತಿ ತಂ ಚಿತ್ತಂ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಂ ವಾ ಪನ ಚಿತ್ತಂ ನಿರುಜ್ಝಿಸ್ಸತಿ ತಂ ಚಿತ್ತಂ ಉಪ್ಪಜ್ಜತೀತಿ?

ಅನಾಗತಂ ಚಿತ್ತಂ ನಿರುಜ್ಝಿಸ್ಸತಿ, ನೋ ಚ ತಂ ಚಿತ್ತಂ ಉಪ್ಪಜ್ಜತಿ. ಉಪ್ಪಾದಕ್ಖಣೇ ಚಿತ್ತಂ ನಿರುಜ್ಝಿಸ್ಸತಿ ಚೇವ ಉಪ್ಪಜ್ಜತಿ ಚ.

(ಕ) ಯಂ ಚಿತ್ತಂ ನ ಉಪ್ಪಜ್ಜತಿ ತಂ ಚಿತ್ತಂ ನ ನಿರುಜ್ಝಿಸ್ಸತೀತಿ?

ಅನಾಗತಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತಂ ಚಿತ್ತಂ ನ ನಿರುಜ್ಝಿಸ್ಸತಿ. ಭಙ್ಗಕ್ಖಣೇ ಅತೀತಞ್ಚ ಚಿತ್ತಂ ನ ಚೇವ ಉಪ್ಪಜ್ಜತಿ ನ ಚ ನಿರುಜ್ಝಿಸ್ಸತಿ.

(ಖ) ಯಂ ವಾ ಪನ ಚಿತ್ತಂ ನ ನಿರುಜ್ಝಿಸ್ಸತಿ ತಂ ಚಿತ್ತಂ ನ ಉಪ್ಪಜ್ಜತೀತಿ? ಆಮನ್ತಾ.

೯೫. (ಕ) ಯಂ ಚಿತ್ತಂ ಉಪ್ಪಜ್ಜಿತ್ಥ ತಂ ಚಿತ್ತಂ ನಿರುಜ್ಝಿಸ್ಸತೀತಿ? ನೋ.

(ಖ) ಯಂ ವಾ ಪನ ಚಿತ್ತಂ ನಿರುಜ್ಝಿಸ್ಸತಿ ತಂ ಚಿತ್ತಂ ಉಪ್ಪಜ್ಜಿತ್ಥಾತಿ? ನೋ.

(ಕ) ಯಂ ಚಿತ್ತಂ ನ ಉಪ್ಪಜ್ಜಿತ್ಥ ತಂ ಚಿತ್ತಂ ನ ನಿರುಜ್ಝಿಸ್ಸತೀತಿ?

ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ಉಪ್ಪಜ್ಜಿತ್ಥ, ನೋ ಚ ತಂ ಚಿತ್ತಂ ನ ನಿರುಜ್ಝಿಸ್ಸತಿ. ಭಙ್ಗಕ್ಖಣೇ ಚಿತ್ತಂ ನ ಚೇವ ಉಪ್ಪಜ್ಜಿತ್ಥ ನ ಚ ನಿರುಜ್ಝಿಸ್ಸತಿ.

(ಖ) ಯಂ ವಾ ಪನ ಚಿತ್ತಂ ನ ನಿರುಜ್ಝಿಸ್ಸತಿ ತಂ ಚಿತ್ತಂ ನ ಉಪ್ಪಜ್ಜಿತ್ಥಾತಿ?

ಅತೀತಂ ಚಿತ್ತಂ ನ ನಿರುಜ್ಝಿಸ್ಸತಿ, ನೋ ಚ ತಂ ಚಿತ್ತಂ ನ ಉಪ್ಪಜ್ಜಿತ್ಥ. ಭಙ್ಗಕ್ಖಣೇ ಚಿತ್ತಂ ನ ಚೇವ ನಿರುಜ್ಝಿಸ್ಸತಿ ನ ಚ ಉಪ್ಪಜ್ಜಿತ್ಥ.

(೭) ಉಪ್ಪಜ್ಜಮಾನ-ನನಿರೋಧವಾರೋ

೯೬. (ಕ) ಯಂ ಚಿತ್ತಂ ಉಪ್ಪಜ್ಜತಿ ತಂ ಚಿತ್ತಂ ನ ನಿರುಜ್ಝತೀತಿ? ಆಮನ್ತಾ.

(ಖ) ಯಂ ವಾ ಪನ ಚಿತ್ತಂ ನ ನಿರುಜ್ಝತಿ ತಂ ಚಿತ್ತಂ ಉಪ್ಪಜ್ಜತೀತಿ?

ಅತೀತಾನಾಗತಂ ಚಿತ್ತಂ ನ ನಿರುಜ್ಝತಿ, ನೋ ಚ ತಂ ಚಿತ್ತಂ ಉಪ್ಪಜ್ಜತಿ. ಉಪ್ಪಾದಕ್ಖಣೇ ಚಿತ್ತಂ ನ ನಿರುಜ್ಝತಿ ಚೇವ ಉಪ್ಪಜ್ಜತಿ ಚ.

(ಕ) ಯಂ ಚಿತ್ತಂ ನ ಉಪ್ಪಜ್ಜತಿ ತಂ ಚಿತ್ತಂ ನಿರುಜ್ಝತೀತಿ?

ಅತೀತಾನಾಗತಂ ಚಿತ್ತಂ ನ ಉಪ್ಪಜ್ಜತಿ, ನೋ ಚ ತಂ ಚಿತ್ತಂ ನಿರುಜ್ಝತಿ. ಭಙ್ಗಕ್ಖಣೇ ಚಿತ್ತಂ ನ ಉಪ್ಪಜ್ಜತಿ ಚೇವ ನಿರುಜ್ಝತಿ ಚ.

(ಖ) ಯಂ ವಾ ಪನ ಚಿತ್ತಂ ನಿರುಜ್ಝತಿ ತಂ ಚಿತ್ತಂ ನ ಉಪ್ಪಜ್ಜತೀತಿ? ಆಮನ್ತಾ.

(೮) ಉಪ್ಪಜ್ಜಮಾನುಪ್ಪನ್ನವಾರೋ

೯೭. (ಕ) ಯಂ ಚಿತ್ತಂ ಉಪ್ಪಜ್ಜಮಾನಂ ತಂ ಚಿತ್ತಂ ಉಪ್ಪನ್ನನ್ತಿ? ಆಮನ್ತಾ.

(ಖ) ಯಂ ವಾ ಪನ ಚಿತ್ತಂ ಉಪ್ಪನ್ನಂ ತಂ ಚಿತ್ತಂ ಉಪ್ಪಜ್ಜಮಾನನ್ತಿ?

ಭಙ್ಗಕ್ಖಣೇ ಚಿತ್ತಂ ಉಪ್ಪನ್ನಂ, ನೋ ಚ ತಂ ಚಿತ್ತಂ ಉಪ್ಪಜ್ಜಮಾನಂ. ಉಪ್ಪಾದಕ್ಖಣೇ ಚಿತ್ತಂ ಉಪ್ಪನ್ನಞ್ಚೇವ ಉಪ್ಪಜ್ಜಮಾನಞ್ಚ.

(ಕ) ಯಂ ಚಿತ್ತಂ ನ ಉಪ್ಪಜ್ಜಮಾನಂ ತಂ ಚಿತ್ತಂ ನ ಉಪ್ಪನ್ನನ್ತಿ?

ಭಙ್ಗಕ್ಖಣೇ ಚಿತ್ತಂ ನ ಉಪ್ಪಜ್ಜಮಾನಂ, ನೋ ಚ ತಂ ಚಿತ್ತಂ ನ ಉಪ್ಪನ್ನಂ. ಅತೀತಾನಾಗತಂ ಚಿತ್ತಂ ನ ಚೇವ ಉಪ್ಪಜ್ಜಮಾನಂ ನ ಚ ಉಪ್ಪನ್ನಂ.

(ಖ) ಯಂ ವಾ ಪನ ಚಿತ್ತಂ ನ ಉಪ್ಪನ್ನಂ ತಂ ಚಿತ್ತಂ ನ ಉಪ್ಪಜ್ಜಮಾನನ್ತಿ? ಆಮನ್ತಾ.

(೯) ನಿರುಜ್ಝಮಾನುಪ್ಪನ್ನವಾರೋ

೯೮. (ಕ) ಯಂ ಚಿತ್ತಂ ನಿರುಜ್ಝಮಾನಂ ತಂ ಚಿತ್ತಂ ಉಪ್ಪನ್ನನ್ತಿ? ಆಮನ್ತಾ.

(ಖ) ಯಂ ವಾ ಪನ ಚಿತ್ತಂ ಉಪ್ಪನ್ನಂ ತಂ ಚಿತ್ತಂ ನಿರುಜ್ಝಮಾನನ್ತಿ?

ಉಪ್ಪಾದಕ್ಖಣೇ ಚಿತ್ತಂ ಉಪ್ಪನ್ನಂ, ನೋ ಚ ತಂ ಚಿತ್ತಂ ನಿರುಜ್ಝಮಾನಂ. ಭಙ್ಗಕ್ಖಣೇ ಚಿತ್ತಂ ಉಪ್ಪನ್ನಞ್ಚೇವ ನಿರುಜ್ಝಮಾನಞ್ಚ.

(ಕ) ಯಂ ಚಿತ್ತಂ ನ ನಿರುಜ್ಝಮಾನಂ ತಂ ಚಿತ್ತಂ ನ ಉಪ್ಪನ್ನನ್ತಿ?

ಉಪ್ಪಾದಕ್ಖಣೇ ಚಿತ್ತಂ ನ ನಿರುಜ್ಝಮಾನಂ, ನೋ ಚ ತಂ ಚಿತ್ತಂ ನ ಉಪ್ಪನ್ನಂ. ಅತೀತಾನಾಗತಂ ಚಿತ್ತಂ ನ ಚೇವ ನಿರುಜ್ಝಮಾನಂ ನ ಚ ಉಪ್ಪನ್ನಂ.

(ಖ) ಯಂ ವಾ ಪನ ಚಿತ್ತಂ ನ ಉಪ್ಪನ್ನಂ ತಂ ಚಿತ್ತಂ ನ ನಿರುಜ್ಝಮಾನನ್ತಿ? ಆಮನ್ತಾ.

(೧೦) ಉಪ್ಪನ್ನುಪ್ಪಾದವಾರೋ

೯೯. (ಕ) ಯಂ ಚಿತ್ತಂ ಉಪ್ಪನ್ನಂ ತಂ ಚಿತ್ತಂ ಉಪ್ಪಜ್ಜಿತ್ಥಾತಿ? ನೋ.

(ಖ) ಯಂ ವಾ ಪನ ಚಿತ್ತಂ ಉಪ್ಪಜ್ಜಿತ್ಥ ತಂ ಚಿತ್ತಂ ಉಪ್ಪನ್ನನ್ತಿ? ನೋ.

(ಕ) ಯಂ ಚಿತ್ತಂ ನ ಉಪ್ಪನ್ನಂ ತಂ ಚಿತ್ತಂ ನ ಉಪ್ಪಜ್ಜಿತ್ಥಾತಿ?

ಅತೀತಂ ಚಿತ್ತಂ ನ ಉಪ್ಪನ್ನಂ, ನೋ ಚ ತಂ ಚಿತ್ತಂ ನ ಉಪ್ಪಜ್ಜಿತ್ಥ. ಅನಾಗತಂ ಚಿತ್ತಂ ನ ಚೇವ ಉಪ್ಪನ್ನಂ ನ ಚ ಉಪ್ಪಜ್ಜಿತ್ಥ.

(ಖ) ಯಂ ವಾ ಪನ ಚಿತ್ತಂ ನ ಉಪ್ಪಜ್ಜಿತ್ಥ ತಂ ಚಿತ್ತಂ ನ ಉಪ್ಪನ್ನನ್ತಿ?

ಪಚ್ಚುಪ್ಪನ್ನಂ ಚಿತ್ತಂ ನ ಉಪ್ಪಜ್ಜಿತ್ಥ, ನೋ ಚ ತಂ ಚಿತ್ತಂ ನ ಉಪ್ಪನ್ನಂ. ಅನಾಗತಂ ಚಿತ್ತಂ ನ ಚೇವ ಉಪ್ಪಜ್ಜಿತ್ಥ ನ ಚ ಉಪ್ಪನ್ನಂ.

೧೦೦. (ಕ) ಯಂ ಚಿತ್ತಂ ಉಪ್ಪನ್ನಂ ತಂ ಚಿತ್ತಂ ಉಪ್ಪಜ್ಜಿಸ್ಸತೀತಿ? ನೋ.

(ಖ) ಯಂ ವಾ ಪನ ಚಿತ್ತಂ ಉಪ್ಪಜ್ಜಿಸ್ಸತಿ ತಂ ಚಿತ್ತಂ ಉಪ್ಪನ್ನನ್ತಿ? ನೋ.

(ಕ) ಯಂ ಚಿತ್ತಂ ನ ಉಪ್ಪನ್ನಂ ತಂ ಚಿತ್ತಂ ನ ಉಪ್ಪಜ್ಜಿಸ್ಸತೀತಿ?

ಅನಾಗತಂ ಚಿತ್ತಂ ನ ಉಪ್ಪನ್ನಂ, ನೋ ಚ ತಂ ಚಿತ್ತಂ ನ ಉಪ್ಪಜ್ಜಿಸ್ಸತಿ. ಅತೀತಂ ಚಿತ್ತಂ ನ ಚೇವ ಉಪ್ಪನ್ನಂ ನ ಚ ಉಪ್ಪಜ್ಜಿಸ್ಸತಿ.

(ಖ) ಯಂ ವಾ ಪನ ಚಿತ್ತಂ ನ ಉಪ್ಪಜ್ಜಿಸ್ಸತಿ ತಂ ಚಿತ್ತಂ ನ ಉಪ್ಪನ್ನನ್ತಿ?

ಪಚ್ಚುಪ್ಪನ್ನಂ ಚಿತ್ತಂ ನ ಉಪ್ಪಜ್ಜಿಸ್ಸತಿ, ನೋ ಚ ತಂ ಚಿತ್ತಂ ನ ಉಪ್ಪನ್ನಂ. ಅತೀತಂ ಚಿತ್ತಂ ನ ಚೇವ ಉಪ್ಪಜ್ಜಿಸ್ಸತಿ ನ ಚ ಉಪ್ಪನ್ನಂ.

(೧೧) ಅತೀತಾನಾಗತವಾರೋ

೧೦೧. (ಕ) ಯಂ ಚಿತ್ತಂ ಉಪ್ಪಜ್ಜಿತ್ಥ ನೋ ಚ ತಂ ಚಿತ್ತಂ ಉಪ್ಪನ್ನಂ, ತಂ ಚಿತ್ತಂ ಉಪ್ಪಜ್ಜಿಸ್ಸತೀತಿ? ನೋ.

(ಖ) ಯಂ ವಾ ಪನ ಚಿತ್ತಂ ಉಪ್ಪಜ್ಜಿಸ್ಸತಿ ನೋ ಚ ತಂ ಚಿತ್ತಂ ಉಪ್ಪನ್ನಂ, ತಂ ಚಿತ್ತಂ ಉಪ್ಪಜ್ಜಿತ್ಥಾತಿ? ನೋ.

(ಕ) ಯಂ ಚಿತ್ತಂ ನ ಉಪ್ಪಜ್ಜಿತ್ಥ ನೋ ಚ ತಂ ಚಿತ್ತಂ ನ ಉಪ್ಪನ್ನಂ, ತಂ ಚಿತ್ತಂ ನ ಉಪ್ಪಜ್ಜಿಸ್ಸತೀತಿ? ಆಮನ್ತಾ.

(ಖ) ಯಂ ವಾ ಪನ ಚಿತ್ತಂ ನ ಉಪ್ಪಜ್ಜಿಸ್ಸತಿ ನೋ ಚ ತಂ ಚಿತ್ತಂ ನ ಉಪ್ಪನ್ನಂ, ತಂ ಚಿತ್ತಂ ನ ಉಪ್ಪಜ್ಜಿತ್ಥಾತಿ? ಆಮನ್ತಾ.

(೧೨) ಉಪ್ಪನ್ನುಪ್ಪಜ್ಜಮಾನವಾರೋ

೧೦೨. (ಕ) ಉಪ್ಪನ್ನಂ ಉಪ್ಪಜ್ಜಮಾನನ್ತಿ?

ಭಙ್ಗಕ್ಖಣೇ ಉಪ್ಪನ್ನಂ, ನೋ ಚ ಉಪ್ಪಜ್ಜಮಾನಂ. ಉಪ್ಪಾದಕ್ಖಣೇ ಉಪ್ಪನ್ನಞ್ಚೇವ ಉಪ್ಪಜ್ಜಮಾನಞ್ಚ.

(ಖ) ಉಪ್ಪಜ್ಜಮಾನಂ ಉಪ್ಪನ್ನನ್ತಿ? ಆಮನ್ತಾ.

(ಕ) ನ ಉಪ್ಪನ್ನಂ ನ ಉಪ್ಪಜ್ಜಮಾನನ್ತಿ? ಆಮನ್ತಾ.

(ಖ) ನ ಉಪ್ಪಜ್ಜಮಾನಂ ನ ಉಪ್ಪನ್ನನ್ತಿ?

ಭಙ್ಗಕ್ಖಣೇ ನ ಉಪ್ಪಜ್ಜಮಾನಂ, ನೋ ಚ ನ ಉಪ್ಪನ್ನಂ. ಅತೀತಾನಾಗತಂ ಚಿತ್ತಂ ನ ಚೇವ ಉಪ್ಪಜ್ಜಮಾನಂ ನ ಚ ಉಪ್ಪನ್ನಂ.

(೧೩) ನಿರುದ್ಧನಿರುಜ್ಝಮಾನವಾರೋ

೧೦೩. (ಕ) ನಿರುದ್ಧಂ ನಿರುಜ್ಝಮಾನನ್ತಿ? ನೋ.

(ಖ) ನಿರುಜ್ಝಮಾನಂ ನಿರುದ್ಧನ್ತಿ? ನೋ.

(ಕ) ನ ನಿರುದ್ಧಂ ನ ನಿರುಜ್ಝಮಾನನ್ತಿ?

ಭಙ್ಗಕ್ಖಣೇ ನ ನಿರುದ್ಧಂ, ನೋ ಚ ನ ನಿರುಜ್ಝಮಾನಂ. ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ನಿರುದ್ಧಂ ನ ಚ ನಿರುಜ್ಝಮಾನಂ.

(ಖ) ನ ನಿರುಜ್ಝಮಾನಂ ನ ನಿರುದ್ಧನ್ತಿ?

ಅತೀತಂ ಚಿತ್ತಂ ನ ನಿರುಜ್ಝಮಾನಂ, ನೋ ಚ ನ ನಿರುದ್ಧಂ. ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ನ ಚೇವ ನಿರುಜ್ಝಮಾನಂ ನ ಚ ನಿರುದ್ಧಂ.

(೧೪) ಅತಿಕ್ಕನ್ತಕಾಲವಾರೋ

೧೦೪. (ಕ) ಯಂ ಚಿತ್ತಂ ಉಪ್ಪಜ್ಜಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ, ನಿರುಜ್ಝಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ ತಂ ಚಿತ್ತನ್ತಿ?

ಭಙ್ಗಕ್ಖಣೇ ಚಿತ್ತಂ ಉಪ್ಪಾದಕ್ಖಣಂ ವೀತಿಕ್ಕನ್ತಂ ಭಙ್ಗಕ್ಖಣಂ ಅವೀತಿಕ್ಕನ್ತಂ, ಅತೀತಂ ಚಿತ್ತಂ ಉಪ್ಪಾದಕ್ಖಣಞ್ಚ ವೀತಿಕ್ಕನ್ತಂ ಭಙ್ಗಕ್ಖಣಞ್ಚ ವೀತಿಕ್ಕನ್ತಂ.

(ಖ) ಯಂ ವಾ ಪನ ಚಿತ್ತಂ ನಿರುಜ್ಝಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ, ಉಪ್ಪಜ್ಜಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ ತಂ ಚಿತ್ತನ್ತಿ?

ಅತೀತಂ ಚಿತ್ತಂ.

(ಕ) ಯಂ ಚಿತ್ತಂ ನ ಉಪ್ಪಜ್ಜಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ, ನ ನಿರುಜ್ಝಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ ತಂ ಚಿತ್ತನ್ತಿ?

ಉಪ್ಪಾದಕ್ಖಣೇ ಅನಾಗತಂ ಚಿತ್ತಂ.

(ಖ) ಯಂ ವಾ ಪನ ಚಿತ್ತಂ ನ ನಿರುಜ್ಝಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ, ನ ಉಪ್ಪಜ್ಜಮಾನಂ ಖಣಂ ಖಣಂ ವೀತಿಕ್ಕನ್ತಂ ಅತಿಕ್ಕನ್ತಕಾಲಂ ತಂ ಚಿತ್ತನ್ತಿ?

ಭಙ್ಗಕ್ಖಣೇ ಚಿತ್ತಂ ಭಙ್ಗಕ್ಖಣಂ ಅವೀತಿಕ್ಕನ್ತಂ ನೋ ಚ ಉಪ್ಪಾದಕ್ಖಣಂ ಅವೀತಿಕ್ಕನ್ತಂ, ಉಪ್ಪಾದಕ್ಖಣೇ ಅನಾಗತಞ್ಚ ಚಿತ್ತಂ ಭಙ್ಗಕ್ಖಣಞ್ಚ ಅವೀತಿಕ್ಕನ್ತಂ ಉಪ್ಪಾದಕ್ಖಣಞ್ಚ ಅವೀತಿಕ್ಕನ್ತಂ.