(ಖ) ಅನುಲೋಮಓಕಾಸೋ

೧೧೦. ಯತ್ಥ ಕಾಯಸಙ್ಖಾರೋ ನಿರುಜ್ಝತಿ…ಪೇ….

(ಗ) ಅನುಲೋಮಪುಗ್ಗಲೋಕಾಸಾ

೧೧೧. (ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನಿರುಜ್ಝತಿ ತಸ್ಸ ತತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತೀತಿ?

ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ತತ್ಥ ಕಾಯಸಙ್ಖಾರೋ ನಿರುಜ್ಝತಿ, ನೋ ಚ ತೇಸಂ ತತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತಿ. ಪಠಮಜ್ಝಾನಂ ಸಮಾಪನ್ನಾನಂ ಕಾಮಾವಚರಾನಂ ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ತತ್ಥ ಕಾಯಸಙ್ಖಾರೋ ಚ ನಿರುಜ್ಝತಿ ವಚೀಸಙ್ಖಾರೋ ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ತತ್ಥ ಕಾಯಸಙ್ಖಾರೋ ನಿರುಜ್ಝತೀತಿ?

ಪಠಮಜ್ಝಾನಂ ಸಮಾಪನ್ನಾನಂ ಕಾಮಾವಚರಾನಂ ಅಸ್ಸಾಸಪಸ್ಸಾಸಾನಂ ಉಪ್ಪಾದಕ್ಖಣೇ ತೇಸಂಯೇವ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ವಚೀಸಙ್ಖಾರೋ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಕಾಯಸಙ್ಖಾರೋ ನಿರುಜ್ಝತಿ. ಪಠಮಜ್ಝಾನಂ ಸಮಾಪನ್ನಾನಂ ಕಾಮಾವಚರಾನಂ ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ತತ್ಥ ವಚೀಸಙ್ಖಾರೋ ಚ ನಿರುಜ್ಝಿಸ್ಸತಿ ಕಾಯಸಙ್ಖಾರೋ ಚ ನಿರುಜ್ಝತಿ.

(ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನಿರುಜ್ಝತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ತತ್ಥ ಕಾಯಸಙ್ಖಾರೋ ನಿರುಜ್ಝತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಕಾಯಸಙ್ಖಾರೋ ನಿರುಜ್ಝತಿ. ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ತತ್ಥ ಚಿತ್ತಸಙ್ಖಾರೋ ಚ ನಿರುಜ್ಝಿಸ್ಸತಿ ಕಾಯಸಙ್ಖಾರೋ ಚ ನಿರುಜ್ಝತಿ.

೧೧೨. (ಕ) ಯಸ್ಸ ಯತ್ಥ ವಚೀಸಙ್ಖಾರೋ ನಿರುಜ್ಝತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತೀತಿ?

ಸವಿತಕ್ಕಸವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ವಚೀಸಙ್ಖಾರೋ ನಿರುಜ್ಝತಿ, ನೋ ಚ ತೇಸಂ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ. ಇತರೇಸಂ ವಿತಕ್ಕವಿಚಾರಾನಂ ಭಙ್ಗಕ್ಖಣೇ ತೇಸಂ ತತ್ಥ ವಚೀಸಙ್ಖಾರೋ ಚ ನಿರುಜ್ಝತಿ ಚಿತ್ತಸಙ್ಖಾರೋ ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ ತಸ್ಸ ತತ್ಥ ವಚೀಸಙ್ಖಾರೋ ನಿರುಜ್ಝತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ವಿತಕ್ಕವಿಚಾರೇಹಿ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಚಿತ್ತಸಙ್ಖಾರೋ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ವಚೀಸಙ್ಖಾರೋ ನಿರುಜ್ಝತಿ. ವಿತಕ್ಕವಿಚಾರಾನಂ ಭಙ್ಗಕ್ಖಣೇ ತೇಸಂ ತತ್ಥ ಚಿತ್ತಸಙ್ಖಾರೋ ಚ ನಿರುಜ್ಝಿಸ್ಸತಿ ವಚೀಸಙ್ಖಾರೋ ಚ ನಿರುಜ್ಝತಿ.

(ಘ) ಪಚ್ಚನೀಕಪುಗ್ಗಲೋ

೧೧೩. (ಕ) ಯಸ್ಸ ಕಾಯಸಙ್ಖಾರೋ ನ ನಿರುಜ್ಝತಿ ತಸ್ಸ ವಚೀಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಕಾಯಸಙ್ಖಾರೋ ನ ನಿರುಜ್ಝತಿ, ನೋ ಚ ತೇಸಂ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ. ಸವಿತಕ್ಕಸವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅವಿತಕ್ಕಅವಿಚಾರಪಚ್ಛಿಮಚಿತ್ತಸಮಙ್ಗೀನಂ ಯಸ್ಸ ಚಿತ್ತಸ್ಸ ಅನನ್ತರಾ ಅವಿತಕ್ಕಅವಿಚಾರಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ತೇಸಂ ಕಾಯಸಙ್ಖಾರೋ ಚ ನ ನಿರುಜ್ಝತಿ ವಚೀಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ಕಾಯಸಙ್ಖಾರೋ ನ ನಿರುಜ್ಝತೀತಿ? ಆಮನ್ತಾ.

(ಕ) ಯಸ್ಸ ಕಾಯಸಙ್ಖಾರೋ ನ ನಿರುಜ್ಝತಿ ತಸ್ಸ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಕಾಯಸಙ್ಖಾರೋ ನ ನಿರುಜ್ಝತಿ, ನೋ ಚ ತೇಸಂ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಕಾಯಸಙ್ಖಾರೋ ಚ ನ ನಿರುಜ್ಝತಿ ಚಿತ್ತಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ…ಪೇ…? ಆಮನ್ತಾ.

೧೧೪. (ಕ) ಯಸ್ಸ ವಚೀಸಙ್ಖಾರೋ ನ ನಿರುಜ್ಝತಿ ತಸ್ಸ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ವಿತಕ್ಕವಿಚಾರೇಹಿ ಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ವಚೀಸಙ್ಖಾರೋ ನ ನಿರುಜ್ಝತಿ, ನೋ ಚ ತೇಸಂ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ. ಅವಿತಕ್ಕಅವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ವಚೀಸಙ್ಖಾರೋ ಚ ನ ನಿರುಜ್ಝತಿ ಚಿತ್ತಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ವಚೀಸಙ್ಖಾರೋ ನ ನಿರುಜ್ಝತೀತಿ?

ಸವಿತಕ್ಕಸವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ವಚೀಸಙ್ಖಾರೋ ನ ನಿರುಜ್ಝತಿ. ಅವಿತಕ್ಕಅವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಚಿತ್ತಸಙ್ಖಾರೋ ಚ ನ ನಿರುಜ್ಝಿಸ್ಸತಿ ವಚೀಸಙ್ಖಾರೋ ಚ ನ ನಿರುಜ್ಝತಿ.

(ಙ) ಪಚ್ಚನೀಕಓಕಾಸೋ

೧೧೫. ಯತ್ಥ ಕಾಯಸಙ್ಖಾರೋ ನ ನಿರುಜ್ಝತಿ…ಪೇ….

(ಚ) ಪಚ್ಚನೀಕಪುಗ್ಗಲೋಕಾಸಾ

೧೧೬. (ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನ ನಿರುಜ್ಝತಿ ತಸ್ಸ ತತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಪಠಮಜ್ಝಾನಂ ಸಮಾಪನ್ನಾನಂ ಕಾಮಾವಚರಾನಂ ಅಸ್ಸಾಸಪಸ್ಸಾಸಾನಂ ಉಪ್ಪಾದಕ್ಖಣೇ ತೇಸಂಯೇವ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ರೂಪಾವಚರಾನಂ ಅರೂಪಾವಚರಾನಂ ತೇಸಂ ತತ್ಥ ಕಾಯಸಙ್ಖಾರೋ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ. ಸವಿತಕ್ಕಸವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅವಿತಕ್ಕಅವಿಚಾರಪಚ್ಛಿಮಚಿತ್ತಸಮಙ್ಗೀನಂ ಯಸ್ಸ ಚಿತ್ತಸ್ಸ ಅನನ್ತರಾ ಅವಿತಕ್ಕಅವಿಚಾರಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ಅಸ್ಸಾಸಪಸ್ಸಾಸಾನಂ ಉಪ್ಪಾದಕ್ಖಣೇ ತೇಸಂಯೇವ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ಚತುತ್ಥಜ್ಝಾನಂ ಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ಕಾಯಸಙ್ಖಾರೋ ಚ ನ ನಿರುಜ್ಝತಿ ವಚೀಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಕಾಯಸಙ್ಖಾರೋ ನ ನಿರುಜ್ಝತೀತಿ?

ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ಅಸ್ಸಾಸಪಸ್ಸಾಸಾನಂ ಭಙ್ಗಕ್ಖಣೇ ತೇಸಂ ತತ್ಥ ವಚೀಸಙ್ಖಾರೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಕಾಯಸಙ್ಖಾರೋ ನ ನಿರುಜ್ಝತಿ. ಸವಿತಕ್ಕಸವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅವಿತಕ್ಕಅವಿಚಾರಪಚ್ಛಿಮಚಿತ್ತಸಮಙ್ಗೀನಂ ಯಸ್ಸ ಚಿತ್ತಸ್ಸ ಅನನ್ತರಾ ಅವಿತಕ್ಕಅವಿಚಾರಂ ಪಚ್ಛಿಮಚಿತ್ತಂ ಉಪ್ಪಜ್ಜಿಸ್ಸತಿ ದುತಿಯಜ್ಝಾನಂ ತತಿಯಜ್ಝಾನಂ ಸಮಾಪನ್ನಾನಂ ಅಸ್ಸಾಸಪಸ್ಸಾಸಾನಂ ಉಪ್ಪಾದಕ್ಖಣೇ ತೇಸಂಯೇವ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ಚತುತ್ಥಜ್ಝಾನಂ ಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ತತ್ಥ ವಚೀಸಙ್ಖಾರೋ ಚ ನ ನಿರುಜ್ಝಿಸ್ಸತಿ ಕಾಯಸಙ್ಖಾರೋ ಚ ನ ನಿರುಜ್ಝತಿ.

(ಕ) ಯಸ್ಸ ಯತ್ಥ ಕಾಯಸಙ್ಖಾರೋ ನ ನಿರುಜ್ಝತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ಅಸ್ಸಾಸಪಸ್ಸಾಸೇಹಿ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಕಾಯಸಙ್ಖಾರೋ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ. ಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ಕಾಯಸಙ್ಖಾರೋ ಚ ನ ನಿರುಜ್ಝತಿ ಚಿತ್ತಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ…ಪೇ…? ಆಮನ್ತಾ.

೧೧೭. (ಕ) ಯಸ್ಸ ಯತ್ಥ ವಚೀಸಙ್ಖಾರೋ ನ ನಿರುಜ್ಝತಿ ತಸ್ಸ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ವಿನಾ ವಿತಕ್ಕವಿಚಾರೇಹಿ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ವಚೀಸಙ್ಖಾರೋ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ. ಅವಿತಕ್ಕಅವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ವಚೀಸಙ್ಖಾರೋ ಚ ನ ನಿರುಜ್ಝತಿ ಚಿತ್ತಸಙ್ಖಾರೋ ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ವಚೀಸಙ್ಖಾರೋ ನ ನಿರುಜ್ಝತೀತಿ?

ಸವಿತಕ್ಕಸವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಚಿತ್ತಸಙ್ಖಾರೋ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ವಚೀಸಙ್ಖಾರೋ ನ ನಿರುಜ್ಝತಿ. ಅವಿತಕ್ಕಅವಿಚಾರಪಚ್ಛಿಮಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾನಂ ತೇಸಂ ತತ್ಥ ಚಿತ್ತಸಙ್ಖಾರೋ ಚ ನ ನಿರುಜ್ಝಿಸ್ಸತಿ ವಚೀಸಙ್ಖಾರೋ ಚ ನ ನಿರುಜ್ಝತಿ.