೬. ಅತೀತಾನಾಗತವಾರೋ

೧೭೦. (ಕ) ಯೋ ದುಕ್ಖಸಚ್ಚಂ ಪರಿಜಾನಿತ್ಥ ಸೋ ಸಮುದಯಸಚ್ಚಂ ಪಜಹಿಸ್ಸತೀತಿ? ನೋ.

(ಖ) ಯೋ ವಾ ಪನ ಸಮುದಯಸಚ್ಚಂ ಪಜಹಿಸ್ಸತಿ ಸೋ ದುಕ್ಖಸಚ್ಚಂ ಪರಿಜಾನಿತ್ಥಾತಿ? ನೋ.

(ಕ) ಯೋ ದುಕ್ಖಸಚ್ಚಂ ನ ಪರಿಜಾನಿತ್ಥ ಸೋ ಸಮುದಯಸಚ್ಚಂ ನಪ್ಪಜಹಿಸ್ಸತೀತಿ?

ಯೇ ಮಗ್ಗಂ ಪಟಿಲಭಿಸ್ಸನ್ತಿ ತೇ ದುಕ್ಖಸಚ್ಚಂ ನ ಪರಿಜಾನಿತ್ಥ, ನೋ ಚ ತೇ ಸಮುದಯಸಚ್ಚಂ ನಪ್ಪಜಹಿಸ್ಸನ್ತಿ. ಅಗ್ಗಮಗ್ಗಸಮಙ್ಗೀ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇ ದುಕ್ಖಸಚ್ಚಞ್ಚ ನ ಪರಿಜಾನಿತ್ಥ ಸಮುದಯಸಚ್ಚಞ್ಚ ನಪ್ಪಜಹಿಸ್ಸನ್ತಿ.

(ಖ) ಯೋ ವಾ ಪನ ಸಮುದಯಸಚ್ಚಂ ನಪ್ಪಜಹಿಸ್ಸತಿ ಸೋ ದುಕ್ಖಸಚ್ಚಂ ನ ಪರಿಜಾನಿತ್ಥಾತಿ?

ಅರಹಾ ಸಮುದಯಸಚ್ಚಂ ನಪ್ಪಜಹಿಸ್ಸತಿ, ನೋ ಚ ದುಕ್ಖಸಚ್ಚಂ ನ ಪರಿಜಾನಿತ್ಥ. ಅಗ್ಗಮಗ್ಗಸಮಙ್ಗೀ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇ ಸಮುದಯಸಚ್ಚಞ್ಚ ನಪ್ಪಜಹಿಸ್ಸನ್ತಿ ದುಕ್ಖಸಚ್ಚಞ್ಚ ನ ಪರಿಜಾನಿತ್ಥ.

ಪರಿಞ್ಞಾವಾರೋ.

ಸಚ್ಚಯಮಕಂ ನಿಟ್ಠಿತಂ.