(೫) ಪಚ್ಚುಪ್ಪನ್ನಾನಾಗತವಾರೋ

(ಕ) ಅನುಲೋಮಪುಗ್ಗಲೋ

೧೫೪. (ಕ) ಯಸ್ಸ ದುಕ್ಖಸಚ್ಚಂ ಉಪ್ಪಜ್ಜತಿ ತಸ್ಸ ಸಮುದಯಸಚ್ಚಂ ನಿರುಜ್ಝಿಸ್ಸತೀತಿ?

ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಅರಹನ್ತಾನಂ ಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ದುಕ್ಖಸಚ್ಚಂ ಉಪ್ಪಜ್ಜತಿ, ನೋ ಚ ತೇಸಂ ಸಮುದಯಸಚ್ಚಂ ನಿರುಜ್ಝಿಸ್ಸತಿ. ಇತರೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ದುಕ್ಖಸಚ್ಚಞ್ಚ ಉಪ್ಪಜ್ಜತಿ ಸಮುದಯಸಚ್ಚಞ್ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಸಮುದಯಸಚ್ಚಂ ನಿರುಜ್ಝಿಸ್ಸತಿ ತಸ್ಸ ದುಕ್ಖಸಚ್ಚಂ ಉಪ್ಪಜ್ಜತೀತಿ?

ಸಬ್ಬೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ತೇಸಂ ಸಮುದಯಸಚ್ಚಂ ನಿರುಜ್ಝಿಸ್ಸತಿ, ನೋ ಚ ತೇಸಂ ದುಕ್ಖಸಚ್ಚಂ ಉಪ್ಪಜ್ಜತಿ. ಸಬ್ಬೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಸಮುದಯಸಚ್ಚಞ್ಚ ನಿರುಜ್ಝಿಸ್ಸತಿ ದುಕ್ಖಸಚ್ಚಞ್ಚ ಉಪ್ಪಜ್ಜತಿ.

(ಕ) ಯಸ್ಸ ದುಕ್ಖಸಚ್ಚಂ ಉಪ್ಪಜ್ಜತಿ ತಸ್ಸ ಮಗ್ಗಸಚ್ಚಂ ನಿರುಜ್ಝಿಸ್ಸತೀತಿ?

ಅರಹನ್ತಾನಂ ಚಿತ್ತಸ್ಸ ಉಪ್ಪಾದಕ್ಖಣೇ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ದುಕ್ಖಸಚ್ಚಂ ಉಪ್ಪಜ್ಜತಿ, ನೋ ಚ ತೇಸಂ ಮಗ್ಗಸಚ್ಚಂ ನಿರುಜ್ಝಿಸ್ಸತಿ. ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ದುಕ್ಖಸಚ್ಚಞ್ಚ ಉಪ್ಪಜ್ಜತಿ ಮಗ್ಗಸಚ್ಚಞ್ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನಿರುಜ್ಝಿಸ್ಸತಿ ತಸ್ಸ ದುಕ್ಖಸಚ್ಚಂ ಉಪ್ಪಜ್ಜತೀತಿ?

ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ತೇಸಂ ಮಗ್ಗಸಚ್ಚಂ ನಿರುಜ್ಝಿಸ್ಸತಿ, ನೋ ಚ ತೇಸಂ ದುಕ್ಖಸಚ್ಚಂ ಉಪ್ಪಜ್ಜತಿ. ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಮಗ್ಗಸಚ್ಚಞ್ಚ ನಿರುಜ್ಝಿಸ್ಸತಿ ದುಕ್ಖಸಚ್ಚಞ್ಚ ಉಪ್ಪಜ್ಜತಿ.

೧೫೫. (ಕ) ಯಸ್ಸ ಸಮುದಯಸಚ್ಚಂ ಉಪ್ಪಜ್ಜತಿ ತಸ್ಸ ಮಗ್ಗಸಚ್ಚಂ ನಿರುಜ್ಝಿಸ್ಸತೀತಿ?

ಯೇ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಉಪ್ಪಾದಕ್ಖಣೇ ತೇಸಂ ಸಮುದಯಸಚ್ಚಂ ಉಪ್ಪಜ್ಜತಿ, ನೋ ಚ ತೇಸಂ ಮಗ್ಗಸಚ್ಚಂ ನಿರುಜ್ಝಿಸ್ಸತಿ. ಯೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಉಪ್ಪಾದಕ್ಖಣೇ ತೇಸಂ ಸಮುದಯಸಚ್ಚಞ್ಚ ಉಪ್ಪಜ್ಜತಿ ಮಗ್ಗಸಚ್ಚಞ್ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನಿರುಜ್ಝಿಸ್ಸತಿ ತಸ್ಸ ಸಮುದಯಸಚ್ಚಂ ಉಪ್ಪಜ್ಜತೀತಿ?

ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಭಙ್ಗಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಮಗ್ಗಸಚ್ಚಂ ನಿರುಜ್ಝಿಸ್ಸತಿ, ನೋ ಚ ತೇಸಂ ಸಮುದಯಸಚ್ಚಂ ಉಪ್ಪಜ್ಜತಿ. ಯೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಉಪ್ಪಾದಕ್ಖಣೇ ತೇಸಂ ಮಗ್ಗಸಚ್ಚಞ್ಚ ನಿರುಜ್ಝಿಸ್ಸತಿ ಸಮುದಯಸಚ್ಚಞ್ಚ ಉಪ್ಪಜ್ಜತಿ.

(ಖ) ಅನುಲೋಮಓಕಾಸೋ

೧೫೬. ಯತ್ಥ ದುಕ್ಖಸಚ್ಚಂ ಉಪ್ಪಜ್ಜತಿ…ಪೇ….

(ಗ) ಅನುಲೋಮಪುಗ್ಗಲೋಕಾಸಾ

೧೫೭. (ಕ) ಯಸ್ಸ ಯತ್ಥ ದುಕ್ಖಸಚ್ಚಂ ಉಪ್ಪಜ್ಜತಿ ತಸ್ಸ ತತ್ಥ ಸಮುದಯಸಚ್ಚಂ ನಿರುಜ್ಝಿಸ್ಸತೀತಿ?

ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಅರಹನ್ತಾನಂ ಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ದುಕ್ಖಸಚ್ಚಂ…ಪೇ… ಇತರೇಸಂ ಚತುವೋಕಾರಂ ಪಞ್ಚವೋಕಾರಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ತತ್ಥ ದುಕ್ಖಸಚ್ಚಂ…ಪೇ….

(ಖ) ಯಸ್ಸ ವಾ ಪನ ಯತ್ಥ ಸಮುದಯಸಚ್ಚಂ ನಿರುಜ್ಝಿಸ್ಸತಿ ತಸ್ಸ ತತ್ಥ ದುಕ್ಖಸಚ್ಚಂ ಉಪ್ಪಜ್ಜತೀತಿ?

ಚತುವೋಕಾರಾ ಪಞ್ಚವೋಕಾರಾ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ತೇಸಂ ತತ್ಥ ಸಮುದಯಸಚ್ಚಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ದುಕ್ಖಸಚ್ಚಂ ಉಪ್ಪಜ್ಜತಿ. ಚತುವೋಕಾರಂ ಪಞ್ಚವೋಕಾರಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ತತ್ಥ ಸಮುದಯಸಚ್ಚಞ್ಚ ನಿರುಜ್ಝಿಸ್ಸತಿ ದುಕ್ಖಸಚ್ಚಞ್ಚ ಉಪ್ಪಜ್ಜತಿ.

(ಕ) ಯಸ್ಸ ಯತ್ಥ ದುಕ್ಖಸಚ್ಚಂ ಉಪ್ಪಜ್ಜತಿ ತಸ್ಸ ತತ್ಥ ಮಗ್ಗಸಚ್ಚಂ ನಿರುಜ್ಝಿಸ್ಸತೀತಿ?

ಅರಹನ್ತಾನಂ ಚಿತ್ತಸ್ಸ ಉಪ್ಪಾದಕ್ಖಣೇ ಆಪಾಯಿಕಾನಂ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ದುಕ್ಖಸಚ್ಚಂ ಉಪ್ಪಜ್ಜತಿ, ನೋ ಚ ತೇಸಂ ತತ್ಥ ಮಗ್ಗಸಚ್ಚಂ ನಿರುಜ್ಝಿಸ್ಸತಿ. ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ತತ್ಥ ದುಕ್ಖಸಚ್ಚಞ್ಚ ಉಪ್ಪಜ್ಜತಿ ಮಗ್ಗಸಚ್ಚಞ್ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಮಗ್ಗಸಚ್ಚಂ ನಿರುಜ್ಝಿಸ್ಸತಿ ತಸ್ಸ ತತ್ಥ ದುಕ್ಖಸಚ್ಚಂ ಉಪ್ಪಜ್ಜತೀತಿ?

ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ತೇಸಂ ತತ್ಥ ಮಗ್ಗಸಚ್ಚಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ದುಕ್ಖಸಚ್ಚಂ ಉಪ್ಪಜ್ಜತಿ. ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ತತ್ಥ ಮಗ್ಗಸಚ್ಚಞ್ಚ ನಿರುಜ್ಝಿಸ್ಸತಿ ದುಕ್ಖಸಚ್ಚಞ್ಚ ಉಪ್ಪಜ್ಜತಿ.

೧೫೮. (ಕ) ಯಸ್ಸ ಯತ್ಥ ಸಮುದಯಸಚ್ಚಂ ಉಪ್ಪಜ್ಜತಿ ತಸ್ಸ ತತ್ಥ ಮಗ್ಗಸಚ್ಚಂ ನಿರುಜ್ಝಿಸ್ಸತೀತಿ?

ಆಪಾಯಿಕಾನಂ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಉಪ್ಪಾದಕ್ಖಣೇ ತೇಸಂ ತತ್ಥ ಸಮುದಯಸಚ್ಚಂ ಉಪ್ಪಜ್ಜತಿ, ನೋ ಚ ತೇಸಂ ತತ್ಥ ಮಗ್ಗಸಚ್ಚಂ ನಿರುಜ್ಝಿಸ್ಸತಿ. ಯೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಉಪ್ಪಾದಕ್ಖಣೇ ತೇಸಂ ತತ್ಥ ಸಮುದಯಸಚ್ಚಞ್ಚ ಉಪ್ಪಜ್ಜತಿ ಮಗ್ಗಸಚ್ಚಞ್ಚ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಮಗ್ಗಸಚ್ಚಂ ನಿರುಜ್ಝಿಸ್ಸತಿ ತಸ್ಸ ತತ್ಥ ಸಮುದಯಸಚ್ಚಂ ಉಪ್ಪಜ್ಜತೀತಿ?

ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಭಙ್ಗಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ತೇಸಂ ತತ್ಥ ಮಗ್ಗಸಚ್ಚಂ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಸಮುದಯಸಚ್ಚಂ ಉಪ್ಪಜ್ಜತಿ. ಯೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಉಪ್ಪಾದಕ್ಖಣೇ ತೇಸಂ ತತ್ಥ ಮಗ್ಗಸಚ್ಚಞ್ಚ ನಿರುಜ್ಝಿಸ್ಸತಿ ಸಮುದಯಸಚ್ಚಞ್ಚ ಉಪ್ಪಜ್ಜತಿ.

(ಘ) ಪಚ್ಚನೀಕಪುಗ್ಗಲೋ

೧೫೯. (ಕ) ಯಸ್ಸ ದುಕ್ಖಸಚ್ಚಂ ನುಪ್ಪಜ್ಜತಿ ತಸ್ಸ ಸಮುದಯಸಚ್ಚಂ ನ ನಿರುಜ್ಝಿಸ್ಸತೀತಿ?

ಸಬ್ಬೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ತೇಸಂ ದುಕ್ಖಸಚ್ಚಂ ನುಪ್ಪಜ್ಜತಿ, ನೋ ಚ ತೇಸಂ ಸಮುದಯಸಚ್ಚಂ ನ ನಿರುಜ್ಝಿಸ್ಸತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಚಿತ್ತಸ್ಸ ಭಙ್ಗಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಅಗ್ಗಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ತೇಸಂ ದುಕ್ಖಸಚ್ಚಞ್ಚ ನುಪ್ಪಜ್ಜತಿ ಸಮುದಯಸಚ್ಚಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಸಮುದಯಸಚ್ಚಂ ನ ನಿರುಜ್ಝಿಸ್ಸತಿ ತಸ್ಸ ದುಕ್ಖಸಚ್ಚಂ ನುಪ್ಪಜ್ಜತೀತಿ?

ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಅರಹನ್ತಾನಂ ಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಸಮುದಯಸಚ್ಚಂ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ದುಕ್ಖಸಚ್ಚಂ ನುಪ್ಪಜ್ಜತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಚಿತ್ತಸ್ಸ ಭಙ್ಗಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಅಗ್ಗಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ತೇಸಂ ಸಮುದಯಸಚ್ಚಞ್ಚ ನ ನಿರುಜ್ಝಿಸ್ಸತಿ ದುಕ್ಖಸಚ್ಚಞ್ಚ ನುಪ್ಪಜ್ಜತಿ.

(ಕ) ಯಸ್ಸ ದುಕ್ಖಸಚ್ಚಂ ನುಪ್ಪಜ್ಜತಿ ತಸ್ಸ ಮಗ್ಗಸಚ್ಚಂ ನ ನಿರುಜ್ಝಿಸ್ಸತೀತಿ?

ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ತೇಸಂ ದುಕ್ಖಸಚ್ಚಂ ನುಪ್ಪಜ್ಜತಿ, ನೋ ಚ ತೇಸಂ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಚಿತ್ತಸ್ಸ ಭಙ್ಗಕ್ಖಣೇ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಅಗ್ಗಫಲಸ್ಸ ಉಪ್ಪಾದಕ್ಖಣೇ ತೇಸಂ ದುಕ್ಖಸಚ್ಚಞ್ಚ ನುಪ್ಪಜ್ಜತಿ ಮಗ್ಗಸಚ್ಚಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ ತಸ್ಸ ದುಕ್ಖಸಚ್ಚಂ ನುಪ್ಪಜ್ಜತೀತಿ?

ಅರಹನ್ತಾನಂ ಚಿತ್ತಸ್ಸ ಉಪ್ಪಾದಕ್ಖಣೇ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ದುಕ್ಖಸಚ್ಚಂ ನುಪ್ಪಜ್ಜತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಚಿತ್ತಸ್ಸ ಭಙ್ಗಕ್ಖಣೇ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಅಗ್ಗಫಲಸ್ಸ ಉಪ್ಪಾದಕ್ಖಣೇ ತೇಸಂ ಮಗ್ಗಸಚ್ಚಞ್ಚ ನ ನಿರುಜ್ಝಿಸ್ಸತಿ ದುಕ್ಖಸಚ್ಚಞ್ಚ ನುಪ್ಪಜ್ಜತಿ.

೧೬೦. (ಕ) ಯಸ್ಸ ಸಮುದಯಸಚ್ಚಂ ನುಪ್ಪಜ್ಜತಿ ತಸ್ಸ ಮಗ್ಗಸಚ್ಚಂ ನ ನಿರುಜ್ಝಿಸ್ಸತೀತಿ?

ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಭಙ್ಗಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಸಮುದಯಸಚ್ಚಂ ನುಪ್ಪಜ್ಜತಿ, ನೋ ಚ ತೇಸಂ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಭಙ್ಗಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ತೇಸಂ ಸಮುದಯಸಚ್ಚಞ್ಚ ನುಪ್ಪಜ್ಜತಿ ಮಗ್ಗಸಚ್ಚಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ ತಸ್ಸ ಸಮುದಯಸಚ್ಚಂ ನುಪ್ಪಜ್ಜತೀತಿ?

ಯೇ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಉಪ್ಪಾದಕ್ಖಣೇ ತೇಸಂ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ಸಮುದಯಸಚ್ಚಂ ನುಪ್ಪಜ್ಜತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಭಙ್ಗಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ತೇಸಂ ಮಗ್ಗಸಚ್ಚಞ್ಚ ನ ನಿರುಜ್ಝಿಸ್ಸತಿ ಸಮುದಯಸಚ್ಚಞ್ಚ ನುಪ್ಪಜ್ಜತಿ.

(ಙ) ಪಚ್ಚನೀಕಓಕಾಸೋ

೧೬೧. ಯತ್ಥ ದುಕ್ಖಸಚ್ಚಂ ನುಪ್ಪಜ್ಜತಿ…ಪೇ….

(ಚ) ಪಚ್ಚನೀಕಪುಗ್ಗಲೋಕಾಸಾ

೧೬೨. (ಕ) ಯಸ್ಸ ಯತ್ಥ ದುಕ್ಖಸಚ್ಚಂ ನುಪ್ಪಜ್ಜತಿ ತಸ್ಸ ತತ್ಥ ಸಮುದಯಸಚ್ಚಂ ನ ನಿರುಜ್ಝಿಸ್ಸತೀತಿ?

ಚತುವೋಕಾರಾ ಪಞ್ಚವೋಕಾರಾ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ತೇಸಂ ತತ್ಥ ದುಕ್ಖಸಚ್ಚಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಸಮುದಯಸಚ್ಚಂ ನ ನಿರುಜ್ಝಿಸ್ಸತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಚಿತ್ತಸ್ಸ ಭಙ್ಗಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಅಗ್ಗಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ದುಕ್ಖಸಚ್ಚಞ್ಚ ನುಪ್ಪಜ್ಜತಿ ಸಮುದಯಸಚ್ಚಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಸಮುದಯಸಚ್ಚಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ದುಕ್ಖಸಚ್ಚಂ ನುಪ್ಪಜ್ಜತೀತಿ?

ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಅರಹನ್ತಾನಂ ಚಿತ್ತಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ಸಮುದಯಸಚ್ಚಂ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ದುಕ್ಖಸಚ್ಚಂ ನುಪ್ಪಜ್ಜತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಚಿತ್ತಸ್ಸ ಭಙ್ಗಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಅಗ್ಗಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ಸಮುದಯಸಚ್ಚಞ್ಚ ನ ನಿರುಜ್ಝಿಸ್ಸತಿ ದುಕ್ಖಸಚ್ಚಞ್ಚ ನುಪ್ಪಜ್ಜತಿ.

(ಕ) ಯಸ್ಸ ಯತ್ಥ ದುಕ್ಖಸಚ್ಚಂ ನುಪ್ಪಜ್ಜತಿ ತಸ್ಸ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿಸ್ಸತೀತಿ?

ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ತಸ್ಸ ಚಿತ್ತಸ್ಸ ಭಙ್ಗಕ್ಖಣೇ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಉಪ್ಪಾದಕ್ಖಣೇ ತೇಸಂ ತತ್ಥ ದುಕ್ಖಸಚ್ಚಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಚಿತ್ತಸ್ಸ ಭಙ್ಗಕ್ಖಣೇ ಆಪಾಯಿಕಾನಂ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಅಗ್ಗಫಲಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಾ [ಅಪಾಯಾ ಅಸಞ್ಞಸತ್ತಾ (ಸ್ಯಾ.)] ಚವನ್ತಾನಂ ತೇಸಂ ತತ್ಥ ದುಕ್ಖಸಚ್ಚಞ್ಚ ನುಪ್ಪಜ್ಜತಿ ಮಗ್ಗಸಚ್ಚಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ದುಕ್ಖಸಚ್ಚಂ ನುಪ್ಪಜ್ಜತೀತಿ?

ಅರಹನ್ತಾನಂ ಚಿತ್ತಸ್ಸ ಉಪ್ಪಾದಕ್ಖಣೇ ಆಪಾಯಿಕಾನಂ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಂ [ಅಪಾಯಂ ಅಸಞ್ಞಸತ್ತಂ (ಸ್ಯಾ.)] ಉಪಪಜ್ಜನ್ತಾನಂ ತೇಸಂ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ದುಕ್ಖಸಚ್ಚಂ ನುಪ್ಪಜ್ಜತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಚಿತ್ತಸ್ಸ ಭಙ್ಗಕ್ಖಣೇ ಆಪಾಯಿಕಾನಂ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅರೂಪೇ ಅಗ್ಗಫಲಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ಮಗ್ಗಸಚ್ಚಞ್ಚ ನ ನಿರುಜ್ಝಿಸ್ಸತಿ ದುಕ್ಖಸಚ್ಚಞ್ಚ ನುಪ್ಪಜ್ಜತಿ.

೧೬೩. (ಕ) ಯಸ್ಸ ಯತ್ಥ ಸಮುದಯಸಚ್ಚಂ ನುಪ್ಪಜ್ಜತಿ ತಸ್ಸ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿಸ್ಸತೀತಿ?

ಅಗ್ಗಮಗ್ಗಸ್ಸ ಉಪ್ಪಾದಕ್ಖಣೇ ಯಸ್ಸ ಚಿತ್ತಸ್ಸ ಅನನ್ತರಾ ಅಗ್ಗಮಗ್ಗಂ ಪಟಿಲಭಿಸ್ಸನ್ತಿ ಯೇ ಚಞ್ಞೇ ಮಗ್ಗಂ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಭಙ್ಗಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ತೇಸಂ ತತ್ಥ ಸಮುದಯಸಚ್ಚಂ ನುಪ್ಪಜ್ಜತಿ, ನೋ ಚ ತೇಸಂ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಆಪಾಯಿಕಾನಂ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಭಙ್ಗಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಸಮುದಯಸಚ್ಚಞ್ಚ ನುಪ್ಪಜ್ಜತಿ ಮಗ್ಗಸಚ್ಚಞ್ಚ ನ ನಿರುಜ್ಝಿಸ್ಸತಿ.

(ಖ) ಯಸ್ಸ ವಾ ಪನ ಯತ್ಥ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ ತಸ್ಸ ತತ್ಥ ಸಮುದಯಸಚ್ಚಂ ನುಪ್ಪಜ್ಜತೀತಿ?

ಆಪಾಯಿಕಾನಂ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಉಪ್ಪಾದಕ್ಖಣೇ ತೇಸಂ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿಸ್ಸತಿ, ನೋ ಚ ತೇಸಂ ತತ್ಥ ಸಮುದಯಸಚ್ಚಂ ನುಪ್ಪಜ್ಜತಿ. ಅಗ್ಗಮಗ್ಗಸ್ಸ ಭಙ್ಗಕ್ಖಣೇ ಅರಹನ್ತಾನಂ ಆಪಾಯಿಕಾನಂ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇಸಂ ತಣ್ಹಾಯ ಭಙ್ಗಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಮಗ್ಗಸಚ್ಚಞ್ಚ ನ ನಿರುಜ್ಝಿಸ್ಸತಿ ಸಮುದಯಸಚ್ಚಞ್ಚ ನುಪ್ಪಜ್ಜತಿ.