(೪) ಪಚ್ಚುಪ್ಪನ್ನಾತೀತವಾರೋ

(ಕ) ಅನುಲೋಮಪುಗ್ಗಲೋ

೧೦೬. (ಕ) ಯಸ್ಸ ದುಕ್ಖಸಚ್ಚಂ ನಿರುಜ್ಝತಿ ತಸ್ಸ ಸಮುದಯಸಚ್ಚಂ ನಿರುಜ್ಝಿತ್ಥಾತಿ? ಆಮನ್ತಾ.

(ಖ) ಯಸ್ಸ ವಾ ಪನ ಸಮುದಯಸಚ್ಚಂ ನಿರುಜ್ಝಿತ್ಥ ತಸ್ಸ ದುಕ್ಖಸಚ್ಚಂ ನಿರುಜ್ಝತೀತಿ?

ಸಬ್ಬೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಭಙ್ಗಕ್ಖಣೇ ತೇಸಂ ಸಮುದಯಸಚ್ಚಂ ನಿರುಜ್ಝಿತ್ಥ, ನೋ ಚ ತೇಸಂ ದುಕ್ಖಸಚ್ಚಂ ನಿರುಜ್ಝತಿ. ಸಬ್ಬೇಸಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಸಮುದಯಸಚ್ಚಞ್ಚ ನಿರುಜ್ಝಿತ್ಥ ದುಕ್ಖಸಚ್ಚಞ್ಚ ನಿರುಜ್ಝತಿ.

(ಕ) ಯಸ್ಸ ದುಕ್ಖಸಚ್ಚಂ ನಿರುಜ್ಝತಿ ತಸ್ಸ ಮಗ್ಗಸಚ್ಚಂ ನಿರುಜ್ಝಿತ್ಥಾತಿ?

ಅನಭಿಸಮೇತಾವೀನಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ದುಕ್ಖಸಚ್ಚಂ ನಿರುಜ್ಝತಿ, ನೋ ಚ ತೇಸಂ ಮಗ್ಗಸಚ್ಚಂ ನಿರುಜ್ಝಿತ್ಥ. ಅಭಿಸಮೇತಾವೀನಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ದುಕ್ಖಸಚ್ಚಞ್ಚ ನಿರುಜ್ಝತಿ ಮಗ್ಗಸಚ್ಚಞ್ಚ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನಿರುಜ್ಝಿತ್ಥ ತಸ್ಸ ದುಕ್ಖಸಚ್ಚಂ ನಿರುಜ್ಝತೀತಿ?

ಅಭಿಸಮೇತಾವೀನಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಭಙ್ಗಕ್ಖಣೇ ತೇಸಂ ಮಗ್ಗಸಚ್ಚಂ ನಿರುಜ್ಝಿತ್ಥ, ನೋ ಚ ತೇಸಂ ದುಕ್ಖಸಚ್ಚಂ ನಿರುಜ್ಝತಿ. ಅಭಿಸಮೇತಾವೀನಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಮಗ್ಗಸಚ್ಚಞ್ಚ ನಿರುಜ್ಝಿತ್ಥ ದುಕ್ಖಸಚ್ಚಞ್ಚ ನಿರುಜ್ಝತಿ.

೧೦೭. (ಕ) ಯಸ್ಸ ಸಮುದಯಸಚ್ಚಂ ನಿರುಜ್ಝತಿ ತಸ್ಸ ಮಗ್ಗಸಚ್ಚಂ ನಿರುಜ್ಝಿತ್ಥಾತಿ?

ಅನಭಿಸಮೇತಾವೀನಂ ತಣ್ಹಾಯ ಭಙ್ಗಕ್ಖಣೇ ತೇಸಂ ಸಮುದಯಸಚ್ಚಂ ನಿರುಜ್ಝತಿ, ನೋ ಚ ತೇಸಂ ಮಗ್ಗಸಚ್ಚಂ ನಿರುಜ್ಝಿತ್ಥ. ಅಭಿಸಮೇತಾವೀನಂ ತಣ್ಹಾಯ ಭಙ್ಗಕ್ಖಣೇ ತೇಸಂ ಸಮುದಯಸಚ್ಚಞ್ಚ ನಿರುಜ್ಝತಿ ಮಗ್ಗಸಚ್ಚಞ್ಚ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನಿರುಜ್ಝಿತ್ಥ ತಸ್ಸ ಸಮುದಯಸಚ್ಚಂ ನಿರುಜ್ಝತೀತಿ?

ಅಭಿಸಮೇತಾವೀನಂ ತಣ್ಹಾಯ ಉಪ್ಪಾದಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ನಿರೋಧಸಮಾಪನ್ನಾನಂ ತೇಸಂ ಮಗ್ಗಸಚ್ಚಂ ನಿರುಜ್ಝಿತ್ಥ, ನೋ ಚ ತೇಸಂ ಸಮುದಯಸಚ್ಚಂ ನಿರುಜ್ಝತಿ. ಅಭಿಸಮೇತಾವೀನಂ ತಣ್ಹಾಯ ಭಙ್ಗಕ್ಖಣೇ ತೇಸಂ ಮಗ್ಗಸಚ್ಚಞ್ಚ ನಿರುಜ್ಝಿತ್ಥ ಸಮುದಯಸಚ್ಚಞ್ಚ ನಿರುಜ್ಝತಿ.

(ಖ) ಅನುಲೋಮಓಕಾಸೋ

೧೦೮. ಯತ್ಥ ದುಕ್ಖಸಚ್ಚಂ ನಿರುಜ್ಝತಿ…ಪೇ….

(ಗ) ಅನುಲೋಮಪುಗ್ಗಲೋಕಾಸಾ

೧೦೯. (ಕ) ಯಸ್ಸ ಯತ್ಥ ದುಕ್ಖಸಚ್ಚಂ ನಿರುಜ್ಝತಿ ತಸ್ಸ ತತ್ಥ ಸಮುದಯಸಚ್ಚಂ ನಿರುಜ್ಝಿತ್ಥಾತಿ?

ಸುದ್ಧಾವಾಸಾನಂ ಉಪಪತ್ತಿಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ದುಕ್ಖಸಚ್ಚಂ ನಿರುಜ್ಝತಿ, ನೋ ಚ ತೇಸಂ ತತ್ಥ ಸಮುದಯಸಚ್ಚಂ ನಿರುಜ್ಝಿತ್ಥ. ಇತರೇಸಂ ಚತುವೋಕಾರಾ ಪಞ್ಚವೋಕಾರಾ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ದುಕ್ಖಸಚ್ಚಞ್ಚ ನಿರುಜ್ಝತಿ ಸಮುದಯಸಚ್ಚಞ್ಚ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಸಮುದಯಸಚ್ಚಂ ನಿರುಜ್ಝಿತ್ಥ ತಸ್ಸ ತತ್ಥ ದುಕ್ಖಸಚ್ಚಂ ನಿರುಜ್ಝತೀತಿ?

ಚತುವೋಕಾರಂ ಪಞ್ಚವೋಕಾರಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಭಙ್ಗಕ್ಖಣೇ ತೇಸಂ ತತ್ಥ ಸಮುದಯಸಚ್ಚಂ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ದುಕ್ಖಸಚ್ಚಂ ನಿರುಜ್ಝತಿ. ಚತುವೋಕಾರಾ ಪಞ್ಚವೋಕಾರಾ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಸಮುದಯಸಚ್ಚಞ್ಚ ನಿರುಜ್ಝಿತ್ಥ ದುಕ್ಖಸಚ್ಚಞ್ಚ ನಿರುಜ್ಝತಿ.

(ಕ) ಯಸ್ಸ ಯತ್ಥ ದುಕ್ಖಸಚ್ಚಂ ನಿರುಜ್ಝತಿ ತಸ್ಸ ತತ್ಥ ಮಗ್ಗಸಚ್ಚಂ ನಿರುಜ್ಝಿತ್ಥಾತಿ?

ಸುದ್ಧಾವಾಸಾನಂ ಉಪಪತ್ತಿಚಿತ್ತಸ್ಸ ಭಙ್ಗಕ್ಖಣೇ ಅನಭಿಸಮೇತಾವೀನಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ದುಕ್ಖಸಚ್ಚಂ ನಿರುಜ್ಝತಿ, ನೋ ಚ ತೇಸಂ ತತ್ಥ ಮಗ್ಗಸಚ್ಚಂ ನಿರುಜ್ಝಿತ್ಥ. ಅಭಿಸಮೇತಾವೀನಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ದುಕ್ಖಸಚ್ಚಞ್ಚ ನಿರುಜ್ಝತಿ ಮಗ್ಗಸಚ್ಚಞ್ಚ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಮಗ್ಗಸಚ್ಚಂ ನಿರುಜ್ಝಿತ್ಥ ತಸ್ಸ ತತ್ಥ ದುಕ್ಖಸಚ್ಚಂ ನಿರುಜ್ಝತೀತಿ?

ಅಭಿಸಮೇತಾವೀನಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಭಙ್ಗಕ್ಖಣೇ ತೇಸಂ ತತ್ಥ ಮಗ್ಗಸಚ್ಚಂ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ದುಕ್ಖಸಚ್ಚಂ ನಿರುಜ್ಝತಿ. ಅಭಿಸಮೇತಾವೀನಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ತತ್ಥ ಮಗ್ಗಸಚ್ಚಞ್ಚ ನಿರುಜ್ಝಿತ್ಥ ದುಕ್ಖಸಚ್ಚಞ್ಚ ನಿರುಜ್ಝತಿ.

೧೧೦. (ಕ) ಯಸ್ಸ ಯತ್ಥ ಸಮುದಯಸಚ್ಚಂ ನಿರುಜ್ಝತಿ ತಸ್ಸ ತತ್ಥ ಮಗ್ಗಸಚ್ಚಂ ನಿರುಜ್ಝಿತ್ಥಾತಿ?

ಅನಭಿಸಮೇತಾವೀನಂ ತಣ್ಹಾಯ ಭಙ್ಗಕ್ಖಣೇ ತೇಸಂ ತತ್ಥ ಸಮುದಯಸಚ್ಚಂ ನಿರುಜ್ಝತಿ, ನೋ ಚ ತೇಸಂ ತತ್ಥ ಮಗ್ಗಸಚ್ಚಂ ನಿರುಜ್ಝಿತ್ಥ. ಅಭಿಸಮೇತಾವೀನಂ ತಣ್ಹಾಯ ಭಙ್ಗಕ್ಖಣೇ ತೇಸಂ ತತ್ಥ ಸಮುದಯಸಚ್ಚಞ್ಚ ನಿರುಜ್ಝತಿ ಮಗ್ಗಸಚ್ಚಞ್ಚ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಮಗ್ಗಸಚ್ಚಂ ನಿರುಜ್ಝಿತ್ಥ ತಸ್ಸ ತತ್ಥ ಸಮುದಯಸಚ್ಚಂ ನಿರುಜ್ಝತೀತಿ?

ಅಭಿಸಮೇತಾವೀನಂ ತಣ್ಹಾಯ ಉಪ್ಪಾದಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ತೇಸಂ ತತ್ಥ ಮಗ್ಗಸಚ್ಚಂ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ಸಮುದಯಸಚ್ಚಂ ನಿರುಜ್ಝತಿ. ಅಭಿಸಮೇತಾವೀನಂ ತಣ್ಹಾಯ ಭಙ್ಗಕ್ಖಣೇ ತೇಸಂ ತತ್ಥ ಮಗ್ಗಸಚ್ಚಞ್ಚ ನಿರುಜ್ಝಿತ್ಥ ಸಮುದಯಸಚ್ಚಞ್ಚ ನಿರುಜ್ಝತಿ.

(ಘ) ಪಚ್ಚನೀಕಪುಗ್ಗಲೋ

೧೧೧. (ಕ) ಯಸ್ಸ ದುಕ್ಖಸಚ್ಚಂ ನ ನಿರುಜ್ಝತಿ ತಸ್ಸ ಸಮುದಯಸಚ್ಚಂ ನ ನಿರುಜ್ಝಿತ್ಥಾತಿ? ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಸಮುದಯಸಚ್ಚಂ ನ ನಿರುಜ್ಝಿತ್ಥ ತಸ್ಸ ದುಕ್ಖಸಚ್ಚಂ ನ ನಿರುಜ್ಝತೀತಿ? ನತ್ಥಿ.

(ಕ) ಯಸ್ಸ ದುಕ್ಖಸಚ್ಚಂ ನ ನಿರುಜ್ಝತಿ ತಸ್ಸ ಮಗ್ಗಸಚ್ಚಂ ನ ನಿರುಜ್ಝಿತ್ಥಾತಿ?

ಅಭಿಸಮೇತಾವೀನಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಭಙ್ಗಕ್ಖಣೇ ತೇಸಂ ದುಕ್ಖಸಚ್ಚಂ ನ ನಿರುಜ್ಝತಿ, ನೋ ಚ ತೇಸಂ ಮಗ್ಗಸಚ್ಚಂ ನ ನಿರುಜ್ಝಿತ್ಥ. ಅನಭಿಸಮೇತಾವೀನಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ದುಕ್ಖಸಚ್ಚಞ್ಚ ನ ನಿರುಜ್ಝತಿ ಮಗ್ಗಸಚ್ಚಞ್ಚ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನ ನಿರುಜ್ಝಿತ್ಥ ತಸ್ಸ ದುಕ್ಖಸಚ್ಚಂ ನ ನಿರುಜ್ಝತೀತಿ?

ಅನಭಿಸಮೇತಾವೀನಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಮಗ್ಗಸಚ್ಚಂ ನ ನಿರುಜ್ಝಿತ್ಥ, ನೋ ಚ ತೇಸಂ ದುಕ್ಖಸಚ್ಚಂ ನ ನಿರುಜ್ಝತಿ. ಅನಭಿಸಮೇತಾವೀನಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ತೇಸಂ ಮಗ್ಗಸಚ್ಚಞ್ಚ ನ ನಿರುಜ್ಝಿತ್ಥ ದುಕ್ಖಸಚ್ಚಞ್ಚ ನ ನಿರುಜ್ಝತಿ.

೧೧೨. (ಕ) ಯಸ್ಸ ಸಮುದಯಸಚ್ಚಂ ನ ನಿರುಜ್ಝತಿ ತಸ್ಸ ಮಗ್ಗಸಚ್ಚಂ ನ ನಿರುಜ್ಝಿತ್ಥಾತಿ?

ಅಭಿಸಮೇತಾವೀನಂ ತಣ್ಹಾಯ ಉಪ್ಪಾದಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ನಿರೋಧಸಮಾಪನ್ನಾನಂ ತೇಸಂ ಸಮುದಯಸಚ್ಚಂ ನ ನಿರುಜ್ಝತಿ, ನೋ ಚ ತೇಸಂ ಮಗ್ಗಸಚ್ಚಂ ನ ನಿರುಜ್ಝಿತ್ಥ. ಅನಭಿಸಮೇತಾವೀನಂ ತಣ್ಹಾಯ ಉಪ್ಪಾದಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ಸಮುದಯಸಚ್ಚಞ್ಚ ನ ನಿರುಜ್ಝತಿ ಮಗ್ಗಸಚ್ಚಞ್ಚ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನ ನಿರುಜ್ಝಿತ್ಥ ತಸ್ಸ ಸಮುದಯಸಚ್ಚಂ ನ ನಿರುಜ್ಝತೀತಿ?

ಅನಭಿಸಮೇತಾವೀನಂ ತಣ್ಹಾಯ ಭಙ್ಗಕ್ಖಣೇ ತೇಸಂ ಮಗ್ಗಸಚ್ಚಂ ನ ನಿರುಜ್ಝಿತ್ಥ, ನೋ ಚ ತೇಸಂ ಸಮುದಯಸಚ್ಚಂ ನ ನಿರುಜ್ಝತಿ. ಅನಭಿಸಮೇತಾವೀನಂ ತಣ್ಹಾಯ ಉಪ್ಪಾದಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ಮಗ್ಗಸಚ್ಚಞ್ಚ ನ ನಿರುಜ್ಝಿತ್ಥ ಸಮುದಯಸಚ್ಚಞ್ಚ ನ ನಿರುಜ್ಝತಿ.

(ಙ) ಪಚ್ಚನೀಕಓಕಾಸೋ

೧೧೩. ಯತ್ಥ ದುಕ್ಖಸಚ್ಚಂ ನ ನಿರುಜ್ಝತಿ…ಪೇ….

(ಚ) ಪಚ್ಚನೀಕಪುಗ್ಗಲೋಕಾಸಾ

೧೧೪. (ಕ) ಯಸ್ಸ ಯತ್ಥ ದುಕ್ಖಸಚ್ಚಂ ನ ನಿರುಜ್ಝತಿ ತಸ್ಸ ತತ್ಥ ಸಮುದಯಸಚ್ಚಂ ನ ನಿರುಜ್ಝಿತ್ಥಾತಿ?

ಚತುವೋಕಾರಂ ಪಞ್ಚವೋಕಾರಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಭಙ್ಗಕ್ಖಣೇ ತೇಸಂ ತತ್ಥ ದುಕ್ಖಸಚ್ಚಂ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ಸಮುದಯಸಚ್ಚಂ ನ ನಿರುಜ್ಝಿತ್ಥ. ಸುದ್ಧಾವಾಸಾನಂ ಉಪಪತ್ತಿಚಿತ್ತಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ದುಕ್ಖಸಚ್ಚಞ್ಚ ನ ನಿರುಜ್ಝತಿ ಸಮುದಯಸಚ್ಚಞ್ಚ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಸಮುದಯಸಚ್ಚಂ ನ ನಿರುಜ್ಝಿತ್ಥ ತಸ್ಸ ತತ್ಥ ದುಕ್ಖಸಚ್ಚಂ ನ ನಿರುಜ್ಝತೀತಿ?

ಸುದ್ಧಾವಾಸಾನಂ ಉಪಪತ್ತಿಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ಸಮುದಯಸಚ್ಚಂ ನ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ದುಕ್ಖಸಚ್ಚಂ ನ ನಿರುಜ್ಝತಿ. ಸುದ್ಧಾವಾಸಾನಂ ಉಪಪತ್ತಿಚಿತ್ತಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ಸಮುದಯಸಚ್ಚಞ್ಚ ನ ನಿರುಜ್ಝಿತ್ಥ ದುಕ್ಖಸಚ್ಚಞ್ಚ ನ ನಿರುಜ್ಝತಿ.

(ಕ) ಯಸ್ಸ ಯತ್ಥ ದುಕ್ಖಸಚ್ಚಂ ನ ನಿರುಜ್ಝತಿ ತಸ್ಸ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿತ್ಥಾತಿ?

ಅಭಿಸಮೇತಾವೀನಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಭಙ್ಗಕ್ಖಣೇ ತೇಸಂ ತತ್ಥ ದುಕ್ಖಸಚ್ಚಂ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿತ್ಥ. ಸುದ್ಧಾವಾಸಾನಂ ಉಪಪತ್ತಿಚಿತ್ತಸ್ಸ ಉಪ್ಪಾದಕ್ಖಣೇ ಅನಭಿಸಮೇತಾವೀನಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ದುಕ್ಖಸಚ್ಚಞ್ಚ ನ ನಿರುಜ್ಝತಿ ಮಗ್ಗಸಚ್ಚಞ್ಚ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಮಗ್ಗಸಚ್ಚಂ ನ ನಿರುಜ್ಝಿತ್ಥ ತಸ್ಸ ತತ್ಥ ದುಕ್ಖಸಚ್ಚಂ ನ ನಿರುಜ್ಝತೀತಿ?

ಸುದ್ಧಾವಾಸಾನಂ ಉಪಪತ್ತಿಚಿತ್ತಸ್ಸ ಭಙ್ಗಕ್ಖಣೇ ಅನಭಿಸಮೇತಾವೀನಂ ಚವನ್ತಾನಂ ಪವತ್ತೇ ಚಿತ್ತಸ್ಸ ಭಙ್ಗಕ್ಖಣೇ ಅಸಞ್ಞಸತ್ತಾ ಚವನ್ತಾನಂ ತೇಸಂ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ದುಕ್ಖಸಚ್ಚಂ ನ ನಿರುಜ್ಝತಿ. ಸುದ್ಧಾವಾಸಾನಂ ಉಪಪತ್ತಿಚಿತ್ತಸ್ಸ ಉಪ್ಪಾದಕ್ಖಣೇ ಅನಭಿಸಮೇತಾವೀನಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅಸಞ್ಞಸತ್ತಂ ಉಪಪಜ್ಜನ್ತಾನಂ ತೇಸಂ ತತ್ಥ ಮಗ್ಗಸಚ್ಚಞ್ಚ ನ ನಿರುಜ್ಝಿತ್ಥ ದುಕ್ಖಸಚ್ಚಞ್ಚ ನ ನಿರುಜ್ಝತಿ.

೧೧೫. (ಕ) ಯಸ್ಸ ಯತ್ಥ ಸಮುದಯಸಚ್ಚಂ ನ ನಿರುಜ್ಝತಿ ತಸ್ಸ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿತ್ಥಾತಿ?

ಅಭಿಸಮೇತಾವೀನಂ ತಣ್ಹಾಯ ಉಪ್ಪಾದಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ತೇಸಂ ತತ್ಥ ಸಮುದಯಸಚ್ಚಂ ನ ನಿರುಜ್ಝತಿ, ನೋ ಚ ತೇಸಂ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿತ್ಥ. ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅನಭಿಸಮೇತಾವೀನಂ ತಣ್ಹಾಯ ಉಪ್ಪಾದಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಸಮುದಯಸಚ್ಚಞ್ಚ ನ ನಿರುಜ್ಝತಿ ಮಗ್ಗಸಚ್ಚಞ್ಚ ನ ನಿರುಜ್ಝಿತ್ಥ.

(ಖ) ಯಸ್ಸ ವಾ ಪನ ಯತ್ಥ ಮಗ್ಗಸಚ್ಚಂ ನ ನಿರುಜ್ಝಿತ್ಥ ತಸ್ಸ ತತ್ಥ ಸಮುದಯಸಚ್ಚಂ ನ ನಿರುಜ್ಝತೀತಿ?

ಅನಭಿಸಮೇತಾವೀನಂ ತಣ್ಹಾಯ ಭಙ್ಗಕ್ಖಣೇ ತೇಸಂ ತತ್ಥ ಮಗ್ಗಸಚ್ಚಂ ನ ನಿರುಜ್ಝಿತ್ಥ, ನೋ ಚ ತೇಸಂ ತತ್ಥ ಸಮುದಯಸಚ್ಚಂ ನ ನಿರುಜ್ಝತಿ. ಸುದ್ಧಾವಾಸಾನಂ ದುತಿಯೇ ಚಿತ್ತೇ ವತ್ತಮಾನೇ ಅನಭಿಸಮೇತಾವೀನಂ ತಣ್ಹಾಯ ಉಪ್ಪಾದಕ್ಖಣೇ ತಣ್ಹಾವಿಪ್ಪಯುತ್ತಚಿತ್ತೇ ವತ್ತಮಾನೇ ಅಸಞ್ಞಸತ್ತಾನಂ ತೇಸಂ ತತ್ಥ ಮಗ್ಗಸಚ್ಚಞ್ಚ ನ ನಿರುಜ್ಝಿತ್ಥ ಸಮುದಯಸಚ್ಚಞ್ಚ ನ ನಿರುಜ್ಝತಿ.