(೧) ಪಚ್ಚುಪ್ಪನ್ನವಾರೋ

(ಕ) ಅನುಲೋಮಪುಗ್ಗಲೋ

೮೮. (ಕ) ಯಸ್ಸ ದುಕ್ಖಸಚ್ಚಂ ನಿರುಜ್ಝತಿ ತಸ್ಸ ಸಮುದಯಸಚ್ಚಂ ನಿರುಜ್ಝತೀತಿ?

ಸಬ್ಬೇಸಂ ಚವನ್ತಾನಂ ಪವತ್ತೇ ತಣ್ಹಾವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ತೇಸಂ ದುಕ್ಖಸಚ್ಚಂ ನಿರುಜ್ಝತಿ, ನೋ ಚ ತೇಸಂ ಸಮುದಯಸಚ್ಚಂ ನಿರುಜ್ಝತಿ. ತಣ್ಹಾಯ ಭಙ್ಗಕ್ಖಣೇ ತೇಸಂ ದುಕ್ಖಸಚ್ಚಞ್ಚ ನಿರುಜ್ಝತಿ ಸಮುದಯಸಚ್ಚಞ್ಚ ನಿರುಜ್ಝತಿ.

(ಖ) ಯಸ್ಸ ವಾ ಪನ ಸಮುದಯಸಚ್ಚಂ ನಿರುಜ್ಝತಿ ತಸ್ಸ ದುಕ್ಖಸಚ್ಚಂ ನಿರುಜ್ಝತೀತಿ? ಆಮನ್ತಾ.

(ಕ) ಯಸ್ಸ ದುಕ್ಖಸಚ್ಚಂ ನಿರುಜ್ಝತಿ ತಸ್ಸ ಮಗ್ಗಸಚ್ಚಂ ನಿರುಜ್ಝತೀತಿ?

ಸಬ್ಬೇಸಂ ಚವನ್ತಾನಂ ಪವತ್ತೇ ಮಗ್ಗವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ತೇಸಂ ದುಕ್ಖಸಚ್ಚಂ ನಿರುಜ್ಝತಿ, ನೋ ಚ ತೇಸಂ ಮಗ್ಗಸಚ್ಚಂ ನಿರುಜ್ಝತಿ. ಪಞ್ಚವೋಕಾರೇ ಮಗ್ಗಸ್ಸ ಭಙ್ಗಕ್ಖಣೇ ತೇಸಂ ದುಕ್ಖಸಚ್ಚಞ್ಚ ನಿರುಜ್ಝತಿ ಮಗ್ಗಸಚ್ಚಞ್ಚ ನಿರುಜ್ಝತಿ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನಿರುಜ್ಝತಿ ತಸ್ಸ ದುಕ್ಖಸಚ್ಚಂ ನಿರುಜ್ಝತೀತಿ?

ಅರೂಪೇ ಮಗ್ಗಸ್ಸ ಭಙ್ಗಕ್ಖಣೇ ತೇಸಂ ಮಗ್ಗಸಚ್ಚಂ ನಿರುಜ್ಝತಿ, ನೋ ಚ ತೇಸಂ ದುಕ್ಖಸಚ್ಚಂ ನಿರುಜ್ಝತಿ. ಪಞ್ಚವೋಕಾರೇ ಮಗ್ಗಸ್ಸ ಭಙ್ಗಕ್ಖಣೇ ತೇಸಂ ಮಗ್ಗಸಚ್ಚಞ್ಚ ನಿರುಜ್ಝತಿ ದುಕ್ಖಸಚ್ಚಞ್ಚ ನಿರುಜ್ಝತಿ.

೮೯. (ಕ) ಯಸ್ಸ ಸಮುದಯಸಚ್ಚಂ ನಿರುಜ್ಝತಿ ತಸ್ಸ ಮಗ್ಗಸಚ್ಚಂ ನಿರುಜ್ಝತೀತಿ? ನೋ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನಿರುಜ್ಝತಿ ತಸ್ಸ ಸಮುದಯಸಚ್ಚಂ ನಿರುಜ್ಝತೀತಿ? ನೋ.

(ಖ) ಅನುಲೋಮಓಕಾಸೋ

೯೦. ಯತ್ಥ ದುಕ್ಖಸಚ್ಚಂ ನಿರುಜ್ಝತಿ ತತ್ಥ ಸಮುದಯಸಚ್ಚಂ ನಿರುಜ್ಝತೀತಿ?

ಅಸಞ್ಞಸತ್ತೇ ತತ್ಥ ದುಕ್ಖಸಚ್ಚಂ ನಿರುಜ್ಝತಿ…ಪೇ….

(ಯತ್ಥಕಂ ಉಪ್ಪಾದೇಪಿ ನಿರೋಧೇಪಿ ಉಪ್ಪಾದನಿರೋಧೇಪಿ ಸದಿಸಂ, ನತ್ಥಿ ನಾನಾಕರಣಂ).

(ಗ) ಅನುಲೋಮಪುಗ್ಗಲೋಕಾಸಾ

೯೧. ಯಸ್ಸ ಯತ್ಥ ದುಕ್ಖಸಚ್ಚಂ ನಿರುಜ್ಝತಿ…ಪೇ….

(ಯಸ್ಸಯತ್ಥಕಮ್ಪಿ ಸದಿಸಂ ವಿತ್ಥಾರೇತಬ್ಬಂ).

(ಘ) ಪಚ್ಚನೀಕಪುಗ್ಗಲೋ

೯೨. (ಕ) ಯಸ್ಸ ದುಕ್ಖಸಚ್ಚಂ ನ ನಿರುಜ್ಝತಿ ತಸ್ಸ ಸಮುದಯಸಚ್ಚಂ ನ ನಿರುಜ್ಝತೀತಿ? ಆಮನ್ತಾ.

(ಖ) ಯಸ್ಸ ವಾ ಪನ ಸಮುದಯಸಚ್ಚಂ ನ ನಿರುಜ್ಝತಿ ತಸ್ಸ ದುಕ್ಖಸಚ್ಚಂ ನ ನಿರುಜ್ಝತೀತಿ?

ಸಬ್ಬೇಸಂ ಚವನ್ತಾನಂ ಪವತ್ತೇ ತಣ್ಹಾವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಸಮುದಯಸಚ್ಚಂ ನ ನಿರುಜ್ಝತಿ, ನೋ ಚ ತೇಸಂ ದುಕ್ಖಸಚ್ಚಂ ನ ನಿರುಜ್ಝತಿ. ಸಬ್ಬೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅರೂಪೇ ಮಗ್ಗಸ್ಸ ಚ ಫಲಸ್ಸ ಚ ಭಙ್ಗಕ್ಖಣೇ ತೇಸಂ ಸಮುದಯಸಚ್ಚಞ್ಚ ನ ನಿರುಜ್ಝತಿ ದುಕ್ಖಸಚ್ಚಞ್ಚ ನ ನಿರುಜ್ಝತಿ.

(ಕ) ಯಸ್ಸ ದುಕ್ಖಸಚ್ಚಂ ನ ನಿರುಜ್ಝತಿ ತಸ್ಸ ಮಗ್ಗಸಚ್ಚಂ ನ ನಿರುಜ್ಝತೀತಿ?

ಅರೂಪೇ ಮಗ್ಗಸ್ಸ ಭಙ್ಗಕ್ಖಣೇ ತೇಸಂ ದುಕ್ಖಸಚ್ಚಂ ನ ನಿರುಜ್ಝತಿ, ನೋ ಚ ತೇಸಂ ಮಗ್ಗಸಚ್ಚಂ ನ ನಿರುಜ್ಝತಿ. ಸಬ್ಬೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅರೂಪೇ ಫಲಸ್ಸ ಭಙ್ಗಕ್ಖಣೇ ತೇಸಂ ದುಕ್ಖಸಚ್ಚಞ್ಚ ನ ನಿರುಜ್ಝತಿ ಮಗ್ಗಸಚ್ಚಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನ ನಿರುಜ್ಝತಿ ತಸ್ಸ ದುಕ್ಖಸಚ್ಚಂ ನ ನಿರುಜ್ಝತೀತಿ?

ಸಬ್ಬೇಸಂ ಚವನ್ತಾನಂ ಪವತ್ತೇ ಮಗ್ಗವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ತೇಸಂ ಮಗ್ಗಸಚ್ಚಂ ನ ನಿರುಜ್ಝತಿ, ನೋ ಚ ತೇಸಂ ದುಕ್ಖಸಚ್ಚಂ ನ ನಿರುಜ್ಝತಿ. ಸಬ್ಬೇಸಂ ಉಪಪಜ್ಜನ್ತಾನಂ ಪವತ್ತೇ ಚಿತ್ತಸ್ಸ ಉಪ್ಪಾದಕ್ಖಣೇ ಅರೂಪೇ ಫಲಸ್ಸ ಭಙ್ಗಕ್ಖಣೇ ತೇಸಂ ಮಗ್ಗಸಚ್ಚಞ್ಚ ನ ನಿರುಜ್ಝತಿ ದುಕ್ಖಸಚ್ಚಞ್ಚ ನ ನಿರುಜ್ಝತಿ.

೯೩. (ಕ) ಯಸ್ಸ ಸಮುದಯಸಚ್ಚಂ ನ ನಿರುಜ್ಝತಿ ತಸ್ಸ ಮಗ್ಗಸಚ್ಚಂ ನ ನಿರುಜ್ಝತೀತಿ?

ಮಗ್ಗಸ್ಸ ಭಙ್ಗಕ್ಖಣೇ ತೇಸಂ ಸಮುದಯಸಚ್ಚಂ ನ ನಿರುಜ್ಝತಿ, ನೋ ಚ ತೇಸಂ ಮಗ್ಗಸಚ್ಚಂ ನ ನಿರುಜ್ಝತಿ. ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ತಣ್ಹಾವಿಪ್ಪಯುತ್ತಮಗ್ಗವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಸಮುದಯಸಚ್ಚಞ್ಚ ನ ನಿರುಜ್ಝತಿ ಮಗ್ಗಸಚ್ಚಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಮಗ್ಗಸಚ್ಚಂ ನ ನಿರುಜ್ಝತಿ ತಸ್ಸ ಸಮುದಯಸಚ್ಚಂ ನ ನಿರುಜ್ಝತೀತಿ?

ತಣ್ಹಾಯ ಭಙ್ಗಕ್ಖಣೇ ತೇಸಂ ಮಗ್ಗಸಚ್ಚಂ ನ ನಿರುಜ್ಝತಿ, ನೋ ಚ ತೇಸಂ ಸಮುದಯಸಚ್ಚಂ ನ ನಿರುಜ್ಝತಿ. ಸಬ್ಬೇಸಂ ಚಿತ್ತಸ್ಸ ಉಪ್ಪಾದಕ್ಖಣೇ ಮಗ್ಗವಿಪ್ಪಯುತ್ತತಣ್ಹಾವಿಪ್ಪಯುತ್ತಚಿತ್ತಸ್ಸ ಭಙ್ಗಕ್ಖಣೇ ನಿರೋಧಸಮಾಪನ್ನಾನಂ ಅಸಞ್ಞಸತ್ತಾನಂ ತೇಸಂ ಮಗ್ಗಸಚ್ಚಞ್ಚ ನ ನಿರುಜ್ಝತಿ ಸಮುದಯಸಚ್ಚಞ್ಚ ನ ನಿರುಜ್ಝತಿ.

(ಙ) ಪಚ್ಚನೀಕಓಕಾಸೋ

೯೪. ಯತ್ಥ ದುಕ್ಖಸಚ್ಚಂ ನ ನಿರುಜ್ಝತಿ…ಪೇ….

(ಚ) ಪಚ್ಚನೀಕಪುಗ್ಗಲೋಕಾಸಾ

೯೫. ಯಸ್ಸ ಯತ್ಥ ದುಕ್ಖಸಚ್ಚಂ ನ ನಿರುಜ್ಝತಿ…ಪೇ….

(ಯಸ್ಸಕಮ್ಪಿ [ಯಸ್ಸಕಮ್ಪಿ ಯತ್ಥಕಮ್ಪಿ (ಸೀ. ಸ್ಯಾ.)] ಯಸ್ಸಯತ್ಥಕಮ್ಪಿ ಸದಿಸಂ, ಯಸ್ಸಯತ್ಥಕೇಪಿ ನಿರೋಧಸಮಾಪನ್ನಾನನ್ತಿ ಚೇತಂ ನ ಕಾತಬ್ಬಂ).