(೧) ಪಚ್ಚುಪ್ಪನ್ನವಾರೋ

(ಕ) ಅನುಲೋಮಪುಗ್ಗಲೋ

೧೯೯. (ಕ) ಯಸ್ಸ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ಸೋತಾಯತನಂ ನಿರುಜ್ಝತೀತಿ? ನೋ.

(ಖ) ಯಸ್ಸ ವಾ ಪನ ಸೋತಾಯತನಂ ನಿರುಜ್ಝತಿ ತಸ್ಸ ಚಕ್ಖಾಯತನಂ ಉಪ್ಪಜ್ಜತೀತಿ? ನೋ.

ಯಸ್ಸ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ಘಾನಾಯತನಂ…ಪೇ… ರೂಪಾಯತನಂ… ಮನಾಯತನಂ… ಧಮ್ಮಾಯತನಂ ನಿರುಜ್ಝತೀತಿ? ನೋ.

ಯಸ್ಸ ವಾ ಪನ ಧಮ್ಮಾಯತನಂ ನಿರುಜ್ಝತಿ ತಸ್ಸ ಚಕ್ಖಾಯತನಂ ಉಪ್ಪಜ್ಜತೀತಿ? ನೋ …ಪೇ….

೨೦೦. (ಕ) ಯಸ್ಸ ಮನಾಯತನಂ ಉಪ್ಪಜ್ಜತಿ ತಸ್ಸ ಧಮ್ಮಾಯತನಂ ನಿರುಜ್ಝತೀತಿ? ನೋ.

(ಖ) ಯಸ್ಸ ವಾ ಪನ ಧಮ್ಮಾಯತನಂ ನಿರುಜ್ಝತಿ ತಸ್ಸ ಮನಾಯತನಂ ಉಪ್ಪಜ್ಜತೀತಿ? ನೋ.

(ಖ) ಅನುಲೋಮಓಕಾಸೋ

೨೦೧. ಯತ್ಥ ಚಕ್ಖಾಯತನಂ ಉಪ್ಪಜ್ಜತಿ…ಪೇ… (ಯತ್ಥಕಂ ನೋತಿ ನ ಕಾತಬ್ಬಂ, ಯತ್ಥಕಂ ಇತರೇಸಂ ಯತ್ಥಕಾನಂ ಸದಿಸಂ ಕಾತಬ್ಬಂ, ಯತ್ಥಕಂ ತೀಸುಪಿ ವಾರೇಸು ಸದಿಸಂ).

(ಗ) ಅನುಲೋಮಪುಗ್ಗಲೋಕಾಸಾ

೨೦೨. ಯಸ್ಸ ಯತ್ಥ ಚಕ್ಖಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಸೋತಾಯತನಂ ನಿರುಜ್ಝತೀತಿ? ನೋ.

ಯಸ್ಸ ವಾ ಪನ ಯತ್ಥ ಸೋತಾಯತನಂ ನಿರುಜ್ಝತಿ ತಸ್ಸ ತತ್ಥ ಚಕ್ಖಾಯತನಂ ಉಪ್ಪಜ್ಜತೀತಿ? ನೋ …ಪೇ….

೨೦೩. (ಕ) ಯಸ್ಸ ಯತ್ಥ ಮನಾಯತನಂ ಉಪ್ಪಜ್ಜತಿ ತಸ್ಸ ತತ್ಥ ಧಮ್ಮಾಯತನಂ ನಿರುಜ್ಝತೀತಿ? ನೋ.

(ಖ) ಯಸ್ಸ ವಾ ಪನ ಯತ್ಥ ಧಮ್ಮಾಯತನಂ ನಿರುಜ್ಝತಿ ತಸ್ಸ ತತ್ಥ ಮನಾಯತನಂ ಉಪ್ಪಜ್ಜತೀತಿ? ನೋ.

(ಘ) ಪಚ್ಚನೀಕಪುಗ್ಗಲೋ

೨೦೪. (ಕ) ಯಸ್ಸ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ಸೋತಾಯತನಂ ನ ನಿರುಜ್ಝತೀತಿ?

ಸಸೋತಕಾನಂ ಚವನ್ತಾನಂ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಸೋತಾಯತನಂ ನ ನಿರುಜ್ಝತಿ. ಅಚಕ್ಖುಕಾನಂ ಉಪಪಜ್ಜನ್ತಾನಂ ಅಸೋತಕಾನಂ ಚವನ್ತಾನಂ ತೇಸಂ ಚಕ್ಖಾಯತನಞ್ಚ ನುಪ್ಪಜ್ಜತಿ ಸೋತಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಸೋತಾಯತನಂ ನ ನಿರುಜ್ಝತಿ ತಸ್ಸ ಚಕ್ಖಾಯತನಂ ನುಪ್ಪಜ್ಜತೀತಿ?

ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಸೋತಾಯತನಂ ನ ನಿರುಜ್ಝತಿ, ನೋ ಚ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ. ಅಸೋತಕಾನಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಸೋತಾಯತನಞ್ಚ ನ ನಿರುಜ್ಝತಿ ಚಕ್ಖಾಯತನಞ್ಚ ನುಪ್ಪಜ್ಜತಿ.

(ಕ) ಯಸ್ಸ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ಘಾನಾಯತನಂ ನ ನಿರುಜ್ಝತೀತಿ?

ಸಘಾನಕಾನಂ ಚವನ್ತಾನಂ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಘಾನಾಯತನಂ ನ ನಿರುಜ್ಝತಿ. ಅಚಕ್ಖುಕಾನಂ ಉಪಪಜ್ಜನ್ತಾನಂ ಅಘಾನಕಾನಂ ಚವನ್ತಾನಂ ತೇಸಂ ಚಕ್ಖಾಯತನಞ್ಚ ನುಪ್ಪಜ್ಜತಿ ಘಾನಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಘಾನಾಯತನಂ ನ ನಿರುಜ್ಝತಿ ತಸ್ಸ ಚಕ್ಖಾಯತನಂ ನುಪ್ಪಜ್ಜತೀತಿ?

ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಘಾನಾಯತನಂ ನ ನಿರುಜ್ಝತಿ, ನೋ ಚ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ. ಅಘಾನಕಾನಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಘಾನಾಯತನಞ್ಚ ನ ನಿರುಜ್ಝತಿ ಚಕ್ಖಾಯತನಞ್ಚ ನುಪ್ಪಜ್ಜತಿ.

(ಕ) ಯಸ್ಸ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ರೂಪಾಯತನಂ ನ ನಿರುಜ್ಝತೀತಿ?

ಸರೂಪಕಾನಂ ಚವನ್ತಾನಂ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ರೂಪಾಯತನಂ ನ ನಿರುಜ್ಝತಿ. ಅಚಕ್ಖುಕಾನಂ ಉಪಪಜ್ಜನ್ತಾನಂ ಅರೂಪಕಾನಂ ಚವನ್ತಾನಂ ತೇಸಂ ಚಕ್ಖಾಯತನಞ್ಚ ನುಪ್ಪಜ್ಜತಿ ರೂಪಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ರೂಪಾಯತನಂ ನ ನಿರುಜ್ಝತಿ ತಸ್ಸ ಚಕ್ಖಾಯತನಂ ನುಪ್ಪಜ್ಜತೀತಿ?

ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ರೂಪಾಯತನಂ ನ ನಿರುಜ್ಝತಿ, ನೋ ಚ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ. ಅರೂಪಕಾನಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ರೂಪಾಯತನಞ್ಚ ನ ನಿರುಜ್ಝತಿ ಚಕ್ಖಾಯತನಞ್ಚ ನುಪ್ಪಜ್ಜತಿ.

(ಕ) ಯಸ್ಸ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ಮನಾಯತನಂ ನ ನಿರುಜ್ಝತೀತಿ?

ಸಚಿತ್ತಕಾನಂ ಚವನ್ತಾನಂ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಮನಾಯತನಂ ನ ನಿರುಜ್ಝತಿ. ಅಚಕ್ಖುಕಾನಂ ಉಪಪಜ್ಜನ್ತಾನಂ ಅಚಿತ್ತಕಾನಂ ಚವನ್ತಾನಂ ತೇಸಂ ಚಕ್ಖಾಯತನಞ್ಚ ನುಪ್ಪಜ್ಜತಿ ಮನಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಮನಾಯತನಂ ನ ನಿರುಜ್ಝತಿ ತಸ್ಸ ಚಕ್ಖಾಯತನಂ ನುಪ್ಪಜ್ಜತೀತಿ?

ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಮನಾಯತನಂ ನ ನಿರುಜ್ಝತಿ, ನೋ ಚ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ. ಅಚಿತ್ತಕಾನಂ ಚವನ್ತಾನಂ ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಮನಾಯತನಞ್ಚ ನ ನಿರುಜ್ಝತಿ ಚಕ್ಖಾಯತನಞ್ಚ ನುಪ್ಪಜ್ಜತಿ.

(ಕ) ಯಸ್ಸ ಚಕ್ಖಾಯತನಂ ನುಪ್ಪಜ್ಜತಿ ತಸ್ಸ ಧಮ್ಮಾಯತನಂ ನ ನಿರುಜ್ಝತೀತಿ?

ಸಬ್ಬೇಸಂ ಚವನ್ತಾನಂ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಧಮ್ಮಾಯತನಂ ನ ನಿರುಜ್ಝತಿ. ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಚಕ್ಖಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಧಮ್ಮಾಯತನಂ ನ ನಿರುಜ್ಝತಿ ತಸ್ಸ ಚಕ್ಖಾಯತನಂ ನುಪ್ಪಜ್ಜತೀತಿ?

ಸಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಂ ನ ನಿರುಜ್ಝತಿ, ನೋ ಚ ತೇಸಂ ಚಕ್ಖಾಯತನಂ ನುಪ್ಪಜ್ಜತಿ. ಅಚಕ್ಖುಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಞ್ಚ ನ ನಿರುಜ್ಝತಿ ಚಕ್ಖಾಯತನಞ್ಚ ನುಪ್ಪಜ್ಜತಿ. (ಚಕ್ಖಾಯತನಮೂಲಕಂ)

೨೦೫. (ಕ) ಯಸ್ಸ ಘಾನಾಯತನಂ ನುಪ್ಪಜ್ಜತಿ ತಸ್ಸ ರೂಪಾಯತನಂ ನ ನಿರುಜ್ಝತೀತಿ?

ಸರೂಪಕಾನಂ ಚವನ್ತಾನಂ ತೇಸಂ ಘಾನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ರೂಪಾಯತನಂ ನ ನಿರುಜ್ಝತಿ. ಅಘಾನಕಾನಂ ಉಪಪಜ್ಜನ್ತಾನಂ ಅರೂಪಕಾನಂ ಚವನ್ತಾನಂ ತೇಸಂ ಘಾನಾಯತನಞ್ಚ ನುಪ್ಪಜ್ಜತಿ ರೂಪಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ರೂಪಾಯತನಂ ನ ನಿರುಜ್ಝತಿ ತಸ್ಸ ಘಾನಾಯತನಂ ನುಪ್ಪಜ್ಜತೀತಿ?

ಸಘಾನಕಾನಂ ಉಪಪಜ್ಜನ್ತಾನಂ ತೇಸಂ ರೂಪಾಯತನಂ ನ ನಿರುಜ್ಝತಿ, ನೋ ಚ ತೇಸಂ ಘಾನಾಯತನಂ ನುಪ್ಪಜ್ಜತಿ. ಅರೂಪಕಾನಂ ಚವನ್ತಾನಂ ಅಘಾನಕಾನಂ ಉಪಪಜ್ಜನ್ತಾನಂ ತೇಸಂ ರೂಪಾಯತನಞ್ಚ ನ ನಿರುಜ್ಝತಿ ಘಾನಾಯತನಞ್ಚ ನುಪ್ಪಜ್ಜತಿ.

(ಕ) ಯಸ್ಸ ಘಾನಾಯತನಂ ನುಪ್ಪಜ್ಜತಿ ತಸ್ಸ ಮನಾಯತನಂ ನ ನಿರುಜ್ಝತೀತಿ?

ಸಚಿತ್ತಕಾನಂ ಚವನ್ತಾನಂ ತೇಸಂ ಘಾನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಮನಾಯತನಂ ನ ನಿರುಜ್ಝತಿ. ಅಘಾನಕಾನಂ ಉಪಪಜ್ಜನ್ತಾನಂ ಅಚಿತ್ತಕಾನಂ ಚವನ್ತಾನಂ ತೇಸಂ ಘಾನಾಯತನಞ್ಚ ನುಪ್ಪಜ್ಜತಿ ಮನಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಮನಾಯತನಂ ನ ನಿರುಜ್ಝತಿ ತಸ್ಸ ಘಾನಾಯತನಂ ನುಪ್ಪಜ್ಜತೀತಿ?

ಸಘಾನಕಾನಂ ಉಪಪಜ್ಜನ್ತಾನಂ ತೇಸಂ ಮನಾಯತನಂ ನ ನಿರುಜ್ಝತಿ, ನೋ ಚ ತೇಸಂ ಘಾನಾಯತನಂ ನುಪ್ಪಜ್ಜತಿ. ಅಚಿತ್ತಕಾನಂ ಚವನ್ತಾನಂ ಅಘಾನಕಾನಂ ಉಪಪಜ್ಜನ್ತಾನಂ ತೇಸಂ ಮನಾಯತನಞ್ಚ ನ ನಿರುಜ್ಝತಿ ಘಾನಾಯತನಞ್ಚ ನುಪ್ಪಜ್ಜತಿ.

(ಕ) ಯಸ್ಸ ಘಾನಾಯತನಂ ನುಪ್ಪಜ್ಜತಿ ತಸ್ಸ ಧಮ್ಮಾಯತನಂ ನ ನಿರುಜ್ಝತೀತಿ?

ಸಬ್ಬೇಸಂ ಚವನ್ತಾನಂ ತೇಸಂ ಘಾನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಧಮ್ಮಾಯತನಂ ನ ನಿರುಜ್ಝತಿ. ಅಘಾನಕಾನಂ ಉಪಪಜ್ಜನ್ತಾನಂ ತೇಸಂ ಘಾನಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಧಮ್ಮಾಯತನಂ ನ ನಿರುಜ್ಝತಿ ತಸ್ಸ ಘಾನಾಯತನಂ ನುಪ್ಪಜ್ಜತೀತಿ?

ಸಘಾನಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಂ ನ ನಿರುಜ್ಝತಿ, ನೋ ಚ ತೇಸಂ ಘಾನಾಯತನಂ ನುಪ್ಪಜ್ಜತಿ. ಅಘಾನಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಞ್ಚ ನ ನಿರುಜ್ಝತಿ ಘಾನಾಯತನಞ್ಚ ನುಪ್ಪಜ್ಜತಿ. (ಘಾನಾಯತನಮೂಲಕಂ)

೨೦೬. (ಕ) ಯಸ್ಸ ರೂಪಾಯತನಂ ನುಪ್ಪಜ್ಜತಿ ತಸ್ಸ ಮನಾಯತನಂ ನ ನಿರುಜ್ಝತೀತಿ?

ಸಚಿತ್ತಕಾನಂ ಚವನ್ತಾನಂ ತೇಸಂ ರೂಪಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಮನಾಯತನಂ ನ ನಿರುಜ್ಝತಿ. ಅರೂಪಕಾನಂ ಉಪಪಜ್ಜನ್ತಾನಂ ಅಚಿತ್ತಕಾನಂ ಚವನ್ತಾನಂ ತೇಸಂ ರೂಪಾಯತನಞ್ಚ ನುಪ್ಪಜ್ಜತಿ ಮನಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಮನಾಯತನಂ ನ ನಿರುಜ್ಝತಿ ತಸ್ಸ ರೂಪಾಯತನಂ ನುಪ್ಪಜ್ಜತೀತಿ?

ಸರೂಪಕಾನಂ ಉಪಪಜ್ಜನ್ತಾನಂ ತೇಸಂ ಮನಾಯತನಂ ನ ನಿರುಜ್ಝತಿ, ನೋ ಚ ತೇಸಂ ರೂಪಾಯತನಂ ನುಪ್ಪಜ್ಜತಿ. ಅಚಿತ್ತಕಾನಂ ಚವನ್ತಾನಂ ಅರೂಪಕಾನಂ ಉಪಪಜ್ಜನ್ತಾನಂ ತೇಸಂ ಮನಾಯತನಞ್ಚ ನ ನಿರುಜ್ಝತಿ ರೂಪಾಯತನಞ್ಚ ನುಪ್ಪಜ್ಜತಿ.

(ಕ) ಯಸ್ಸ ರೂಪಾಯತನಂ ನುಪ್ಪಜ್ಜತಿ ತಸ್ಸ ಧಮ್ಮಾಯತನಂ ನ ನಿರುಜ್ಝತೀತಿ?

ಸಬ್ಬೇಸಂ ಚವನ್ತಾನಂ ತೇಸಂ ರೂಪಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಧಮ್ಮಾಯತನಂ ನ ನಿರುಜ್ಝತಿ. ಅರೂಪಕಾನಂ ಉಪಪಜ್ಜನ್ತಾನಂ ತೇಸಂ ರೂಪಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಧಮ್ಮಾಯತನಂ ನ ನಿರುಜ್ಝತಿ ತಸ್ಸ ರೂಪಾಯತನಂ ನುಪ್ಪಜ್ಜತೀತಿ?

ಸರೂಪಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಂ ನ ನಿರುಜ್ಝತಿ, ನೋ ಚ ತೇಸಂ ರೂಪಾಯತನಂ ನುಪ್ಪಜ್ಜತಿ. ಅರೂಪಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಞ್ಚ ನ ನಿರುಜ್ಝತಿ ರೂಪಾಯತನಞ್ಚ ನುಪ್ಪಜ್ಜತಿ. (ರೂಪಾಯತನಮೂಲಕಂ)

೨೦೭. (ಕ) ಯಸ್ಸ ಮನಾಯತನಂ ನುಪ್ಪಜ್ಜತಿ ತಸ್ಸ ಧಮ್ಮಾಯತನಂ ನ ನಿರುಜ್ಝತೀತಿ?

ಸಬ್ಬೇಸಂ ಚವನ್ತಾನಂ ತೇಸಂ ಮನಾಯತನಂ ನುಪ್ಪಜ್ಜತಿ, ನೋ ಚ ತೇಸಂ ಧಮ್ಮಾಯತನಂ ನ ನಿರುಜ್ಝತಿ. ಅಚಿತ್ತಕಾನಂ ಉಪಪಜ್ಜನ್ತಾನಂ ತೇಸಂ ಮನಾಯತನಞ್ಚ ನುಪ್ಪಜ್ಜತಿ ಧಮ್ಮಾಯತನಞ್ಚ ನ ನಿರುಜ್ಝತಿ.

(ಖ) ಯಸ್ಸ ವಾ ಪನ ಧಮ್ಮಾಯತನಂ ನ ನಿರುಜ್ಝತಿ ತಸ್ಸ ಮನಾಯತನಂ ನುಪ್ಪಜ್ಜತೀತಿ?

ಸಚಿತ್ತಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಂ ನ ನಿರುಜ್ಝತಿ, ನೋ ಚ ತೇಸಂ ಮನಾಯತನಂ ನುಪ್ಪಜ್ಜತಿ. ಅಚಿತ್ತಕಾನಂ ಉಪಪಜ್ಜನ್ತಾನಂ ತೇಸಂ ಧಮ್ಮಾಯತನಞ್ಚ ನ ನಿರುಜ್ಝತಿ ಮನಾಯತನಞ್ಚ ನುಪ್ಪಜ್ಜತಿ.

(ಙ) ಪಚ್ಚನೀಕಓಕಾಸೋ

೨೦೮. ಯತ್ಥ ಚಕ್ಖಾಯತನಂ ನುಪ್ಪಜ್ಜತಿ…ಪೇ….

(ಚ) ಪಚ್ಚನೀಕಪುಗ್ಗಲೋಕಾಸಾ

೨೦೯. ಯಸ್ಸ ಯತ್ಥ ಚಕ್ಖಾಯತನಂ ನುಪ್ಪಜ್ಜತಿ…ಪೇ….

(ಯಸ್ಸಕಮ್ಪಿ ಯಸ್ಸಯತ್ಥಕಮ್ಪಿ ಸದಿಸಂ).