೬. ಅತೀತಾನಾಗತವಾರೋ

೨೧೧. (ಕ) ಯೋ ರೂಪಕ್ಖನ್ಧಂ ಪರಿಜಾನಿತ್ಥ ಸೋ ವೇದನಾಕ್ಖನ್ಧಂ ಪರಿಜಾನಿಸ್ಸತೀತಿ? ನೋ.

(ಖ) ಯೋ ವಾ ಪನ ವೇದನಾಕ್ಖನ್ಧಂ ಪರಿಜಾನಿಸ್ಸತಿ ಸೋ ರೂಪಕ್ಖನ್ಧಂ ಪರಿಜಾನಿತ್ಥಾತಿ? ನೋ.

(ಕ) ಯೋ ರೂಪಕ್ಖನ್ಧಂ ನ ಪರಿಜಾನಿತ್ಥ ಸೋ ವೇದನಾಕ್ಖನ್ಧಂ ನ ಪರಿಜಾನಿಸ್ಸತೀತಿ?

ಯೇ ಮಗ್ಗಂ ಪಟಿಲಭಿಸ್ಸನ್ತಿ ತೇ ರೂಪಕ್ಖನ್ಧಂ ನ ಪರಿಜಾನಿತ್ಥ, ನೋ ಚ ವೇದನಾಕ್ಖನ್ಧಂ ನ ಪರಿಜಾನಿಸ್ಸನ್ತಿ. ಅಗ್ಗಮಗ್ಗಸಮಙ್ಗೀ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇ ರೂಪಕ್ಖನ್ಧಞ್ಚ ನ ಪರಿಜಾನಿತ್ಥ ವೇದನಾಕ್ಖನ್ಧಞ್ಚ ನ ಪರಿಜಾನಿಸ್ಸನ್ತಿ.

(ಖ) ಯೋ ವಾ ಪನ ವೇದನಾಕ್ಖನ್ಧಂ ನ ಪರಿಜಾನಿಸ್ಸತಿ ಸೋ ರೂಪಕ್ಖನ್ಧಂ ನ ಪರಿಜಾನಿತ್ಥಾತಿ?

ಅರಹಾ ವೇದನಾಕ್ಖನ್ಧಂ ನ ಪರಿಜಾನಿಸ್ಸತಿ, ನೋ ಚ ರೂಪಕ್ಖನ್ಧಂ ನ ಪರಿಜಾನಿತ್ಥ. ಅಗ್ಗಮಗ್ಗಸಮಙ್ಗೀ ಯೇ ಚ ಪುಥುಜ್ಜನಾ ಮಗ್ಗಂ ನ ಪಟಿಲಭಿಸ್ಸನ್ತಿ ತೇ ವೇದನಾಕ್ಖನ್ಧಞ್ಚ ನ ಪರಿಜಾನಿಸ್ಸನ್ತಿ ರೂಪಕ್ಖನ್ಧಞ್ಚ ನ ಪರಿಜಾನಿತ್ಥ.

ಪರಿಞ್ಞಾವಾರೋ.

ಖನ್ಧಯಮಕಪಾಳಿ ನಿಟ್ಠಿತಾ.

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ