(೩) ಮೂಲಕನಯೋ

೮೦. (ಕ) ಯೇ ಕೇಚಿ ಅಬ್ಯಾಕತಾ ಧಮ್ಮಾ, ಸಬ್ಬೇ ತೇ ಅಬ್ಯಾಕತಮೂಲಕಾತಿ?

ಅಹೇತುಕಂ ಅಬ್ಯಾಕತಂ ನ ಅಬ್ಯಾಕತಮೂಲಕಂ. ಸಹೇತುಕಂ ಅಬ್ಯಾಕತಂ ಅಬ್ಯಾಕತಮೂಲಕಂ.

(ಖ) ಯೇ ವಾ ಪನ ಅಬ್ಯಾಕತಮೂಲಕಾ, ಸಬ್ಬೇ ತೇ ಧಮ್ಮಾ ಅಬ್ಯಾಕತಾತಿ? ಆಮನ್ತಾ.

೮೧. (ಕ) ಯೇ ಕೇಚಿ ಅಬ್ಯಾಕತಾ ಧಮ್ಮಾ, ಸಬ್ಬೇ ತೇ ಅಬ್ಯಾಕತಮೂಲೇನ ಏಕಮೂಲಕಾತಿ?

ಅಹೇತುಕಂ ಅಬ್ಯಾಕತಂ ಅಬ್ಯಾಕತಮೂಲೇನ ನ ಏಕಮೂಲಕಂ. ಸಹೇತುಕಂ ಅಬ್ಯಾಕತಂ ಅಬ್ಯಾಕತಮೂಲೇನ ಏಕಮೂಲಕಂ.

(ಖ) ಯೇ ವಾ ಪನ ಅಬ್ಯಾಕತಮೂಲೇನ ಏಕಮೂಲಕಾ, ಸಬ್ಬೇ ತೇ ಧಮ್ಮಾ ಅಬ್ಯಾಕತಾತಿ? ಆಮನ್ತಾ.

೮೨. (ಕ) ಯೇ ಕೇಚಿ ಅಬ್ಯಾಕತಮೂಲೇನ ಏಕಮೂಲಕಾ ಧಮ್ಮಾ, ಸಬ್ಬೇ ತೇ ಅಬ್ಯಾಕತಮೂಲೇನ ಅಞ್ಞಮಞ್ಞಮೂಲಕಾತಿ?

ಮೂಲಾನಿ ಯಾನಿ ಏಕತೋ ಉಪ್ಪಜ್ಜನ್ತಿ ಅಬ್ಯಾಕತಮೂಲಾನಿ ಏಕಮೂಲಕಾನಿ ಚೇವ ಅಞ್ಞಮಞ್ಞಮೂಲಕಾನಿ ಚ. ಅವಸೇಸಾ ಅಬ್ಯಾಕತಮೂಲಸಹಜಾತಾ ಧಮ್ಮಾ ಅಬ್ಯಾಕತಮೂಲೇನ ಏಕಮೂಲಕಾ, ನ ಚ ಅಞ್ಞಮಞ್ಞಮೂಲಕಾ.

(ಖ) ಯೇ ವಾ ಪನ ಅಬ್ಯಾಕತಮೂಲೇನ ಅಞ್ಞಮಞ್ಞಮೂಲಕಾ, ಸಬ್ಬೇ ತೇ ಧಮ್ಮಾ ಅಬ್ಯಾಕತಾತಿ? ಆಮನ್ತಾ.