೨. ಅಕುಸಲಾ ಧಮ್ಮಾ (೧) ಮೂಲನಯೋ

೬೨. (ಕ) ಯೇ ಕೇಚಿ ಅಕುಸಲಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲಾತಿ?

ತೀಣೇವ ಅಕುಸಲಮೂಲಾನಿ. ಅವಸೇಸಾ ಅಕುಸಲಾ ಧಮ್ಮಾ ನ ಅಕುಸಲಮೂಲಾ.

(ಖ) ಯೇ ವಾ ಪನ ಅಕುಸಲಮೂಲಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ? ಆಮನ್ತಾ.

೬೩. (ಕ) ಯೇ ಕೇಚಿ ಅಕುಸಲಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲೇನ ಏಕಮೂಲಾತಿ?

ಅಹೇತುಕಂ ಅಕುಸಲಂ ಅಕುಸಲಮೂಲೇನ ನ ಏಕಮೂಲಂ. ಸಹೇತುಕಂ ಅಕುಸಲಂ ಅಕುಸಲಮೂಲೇನ ಏಕಮೂಲಂ.

(ಖ) ಯೇ ವಾ ಪನ ಅಕುಸಲಮೂಲೇನ ಏಕಮೂಲಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ?

ಅಕುಸಲಸಮುಟ್ಠಾನಂ ರೂಪಂ ಅಕುಸಲಮೂಲೇನ ಏಕಮೂಲಂ, ನ ಅಕುಸಲಂ. ಅಕುಸಲಂ ಅಕುಸಲಮೂಲೇನ ಏಕಮೂಲಞ್ಚೇವ ಅಕುಸಲಞ್ಚ.

೬೪. (ಕ) ಯೇ ಕೇಚಿ ಅಕುಸಲಮೂಲೇನ ಏಕಮೂಲಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲೇನ ಅಞ್ಞಮಞ್ಞಮೂಲಾತಿ?

ಮೂಲಾನಿ ಯಾನಿ ಏಕತೋ ಉಪ್ಪಜ್ಜನ್ತಿ ಅಕುಸಲಮೂಲಾನಿ ಏಕಮೂಲಾನಿ ಚೇವ ಅಞ್ಞಮಞ್ಞಮೂಲಾನಿ ಚ. ಅವಸೇಸಾ ಅಕುಸಲಮೂಲಸಹಜಾತಾ ಧಮ್ಮಾ ಅಕುಸಲಮೂಲೇನ ಏಕಮೂಲಾ, ನ ಚ ಅಞ್ಞಮಞ್ಞಮೂಲಾ.

(ಖ) ಯೇ ವಾ ಪನ ಅಕುಸಲಮೂಲೇನ ಅಞ್ಞಮಞ್ಞಮೂಲಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ? ಆಮನ್ತಾ.

(೨) ಮೂಲಮೂಲನಯೋ

೬೫. (ಕ) ಯೇ ಕೇಚಿ ಅಕುಸಲಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲಮೂಲಾತಿ?

ತೀಣೇವ ಅಕುಸಲಮೂಲಮೂಲಾನಿ. ಅವಸೇಸಾ ಅಕುಸಲಾ ಧಮ್ಮಾ ನ ಅಕುಸಲಮೂಲಮೂಲಾ.

(ಖ) ಯೇ ವಾ ಪನ ಅಕುಸಲಮೂಲಮೂಲಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ? ಆಮನ್ತಾ.

೬೬. (ಕ) ಯೇ ಕೇಚಿ ಅಕುಸಲಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲೇನ ಏಕಮೂಲಮೂಲಾತಿ?

ಅಹೇತುಕಂ ಅಕುಸಲಂ ಅಕುಸಲಮೂಲೇನ ನ ಏಕಮೂಲಮೂಲಂ. ಸಹೇತುಕಂ ಅಕುಸಲಂ ಅಕುಸಲಮೂಲೇನ ಏಕಮೂಲಮೂಲಂ.

(ಖ) ಯೇ ವಾ ಪನ ಅಕುಸಲಮೂಲೇನ ಏಕಮೂಲಮೂಲಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ?

ಅಕುಸಲಸಮುಟ್ಠಾನಂ ರೂಪಂ ಅಕುಸಲಮೂಲೇನ ಏಕಮೂಲಮೂಲಂ, ನ ಅಕುಸಲಂ. ಅಕುಸಲಂ ಅಕುಸಲಮೂಲೇನ ಏಕಮೂಲಮೂಲಞ್ಚೇವ ಅಕುಸಲಞ್ಚ.

೬೭. (ಕ) ಯೇ ಕೇಚಿ ಅಕುಸಲಮೂಲೇನ ಏಕಮೂಲಮೂಲಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲೇನ ಅಞ್ಞಮಞ್ಞಮೂಲಮೂಲಾತಿ?

ಮೂಲಾನಿ ಯಾನಿ ಏಕತೋ ಉಪ್ಪಜ್ಜನ್ತಿ ಅಕುಸಲಮೂಲಾನಿ ಏಕಮೂಲಮೂಲಾನಿ ಚೇವ ಅಞ್ಞಮಞ್ಞಮೂಲಮೂಲಾನಿ ಚ. ಅವಸೇಸಾ ಅಕುಸಲಮೂಲಸಹಜಾತಾ ಧಮ್ಮಾ ಅಕುಸಲಮೂಲೇನ ಏಕಮೂಲಮೂಲಾ, ನ ಚ ಅಞ್ಞಮಞ್ಞಮೂಲಮೂಲಾ.

(ಖ) ಯೇ ವಾ ಪನ ಅಕುಸಲಮೂಲೇನ ಅಞ್ಞಮಞ್ಞಮೂಲಮೂಲಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ? ಆಮನ್ತಾ.

(೩) ಮೂಲಕನಯೋ

೬೮. (ಕ) ಯೇ ಕೇಚಿ ಅಕುಸಲಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲಕಾತಿ?

ಅಹೇತುಕಂ ಅಕುಸಲಂ ನ ಅಕುಸಲಮೂಲಕಂ. ಸಹೇತುಕಂ ಅಕುಸಲಂ ಅಕುಸಲಮೂಲಕಂ.

(ಖ) ಯೇ ವಾ ಪನ ಅಕುಸಲಮೂಲಕಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ?

ಅಕುಸಲಸಮುಟ್ಠಾನಂ ರೂಪಂ ಅಕುಸಲಮೂಲಕಂ ನ ಅಕುಸಲಂ. ಅಕುಸಲಂ ಅಕುಸಲಮೂಲಕಞ್ಚೇವ ಅಕುಸಲಞ್ಚ.

೬೯. (ಕ) ಯೇ ಕೇಚಿ ಅಕುಸಲಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲೇನ ಏಕಮೂಲಕಾತಿ?

ಅಹೇತುಕಂ ಅಕುಸಲಂ ಅಕುಸಲಮೂಲೇನ ನ ಏಕಮೂಲಕಂ. ಸಹೇತುಕಂ ಅಕುಸಲಂ ಅಕುಸಲಮೂಲೇನ ಏಕಮೂಲಕಂ.

(ಖ) ಯೇ ವಾ ಪನ ಅಕುಸಲಮೂಲೇನ ಏಕಮೂಲಕಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ?

ಅಕುಸಲಸಮುಟ್ಠಾನಂ ರೂಪಂ ಅಕುಸಲಮೂಲೇನ ಏಕಮೂಲಕಂ, ನ ಅಕುಸಲಂ. ಅಕುಸಲಂ ಅಕುಸಲಮೂಲೇನ ಏಕಮೂಲಕಞ್ಚೇವ ಅಕುಸಲಞ್ಚ.

೭೦. (ಕ) ಯೇ ಕೇಚಿ ಅಕುಸಲಮೂಲೇನ ಏಕಮೂಲಕಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲೇನ ಅಞ್ಞಮಞ್ಞಮೂಲಕಾತಿ?

ಮೂಲಾನಿ ಯಾನಿ ಏಕತೋ ಉಪ್ಪಜ್ಜನ್ತಿ ಅಕುಸಲಮೂಲಾನಿ ಏಕಮೂಲಕಾನಿ ಚೇವ ಅಞ್ಞಮಞ್ಞಮೂಲಕಾನಿ ಚ. ಅವಸೇಸಾ ಅಕುಸಲಮೂಲಸಹಜಾತಾ ಧಮ್ಮಾ ಅಕುಸಲಮೂಲೇನ ಏಕಮೂಲಕಾ ನ ಚ ಅಞ್ಞಮಞ್ಞಮೂಲಕಾ.

(ಖ) ಯೇ ವಾ ಪನ ಅಕುಸಲಮೂಲೇನ ಅಞ್ಞಮಞ್ಞಮೂಲಕಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ? ಆಮನ್ತಾ.

(೪) ಮೂಲಮೂಲಕನಯೋ

೭೧. (ಕ) ಯೇ ಕೇಚಿ ಅಕುಸಲಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲಮೂಲಕಾತಿ?

ಅಹೇತುಕಂ ಅಕುಸಲಂ ನ ಅಕುಸಲಮೂಲಮೂಲಕಂ. ಸಹೇತುಕಂ ಅಕುಸಲಂ ಅಕುಸಲಮೂಲಮೂಲಕಂ.

(ಖ) ಯೇ ವಾ ಪನ ಅಕುಸಲಮೂಲಮೂಲಕಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ?

ಅಕುಸಲಸಮುಟ್ಠಾನಂ ರೂಪಂ ಅಕುಸಲಮೂಲಮೂಲಕಂ ನ ಅಕುಸಲಂ. ಅಕುಸಲಂ ಅಕುಸಲಮೂಲಮೂಲಕಞ್ಚೇವ ಅಕುಸಲಞ್ಚ.

೭೨. (ಕ) ಯೇ ಕೇಚಿ ಅಕುಸಲಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲೇನ ಏಕಮೂಲಮೂಲಕಾತಿ?

ಅಹೇತುಕಂ ಅಕುಸಲಂ ಅಕುಸಲಮೂಲೇನ ನ ಏಕಮೂಲಮೂಲಕಂ. ಸಹೇತುಕಂ ಅಕುಸಲಂ ಅಕುಸಲಮೂಲೇನ ಏಕಮೂಲಮೂಲಕಂ.

(ಖ) ಯೇ ವಾ ಪನ ಅಕುಸಲಮೂಲೇನ ಏಕಮೂಲಮೂಲಕಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ?

ಅಕುಸಲಸಮುಟ್ಠಾನಂ ರೂಪಂ ಅಕುಸಲಮೂಲೇನ ಏಕಮೂಲಮೂಲಕಂ, ನ ಅಕುಸಲಂ. ಅಕುಸಲಂ ಅಕುಸಲಮೂಲೇನ ಏಕಮೂಲಮೂಲಕಞ್ಚೇವ ಅಕುಸಲಞ್ಚ.

೭೩. (ಕ) ಯೇ ಕೇಚಿ ಅಕುಸಲಮೂಲೇನ ಏಕಮೂಲಮೂಲಕಾ ಧಮ್ಮಾ, ಸಬ್ಬೇ ತೇ ಅಕುಸಲಮೂಲೇನ ಅಞ್ಞಮಞ್ಞಮೂಲಮೂಲಕಾತಿ?

ಮೂಲಾನಿ ಯಾನಿ ಏಕತೋ ಉಪ್ಪಜ್ಜನ್ತಿ ಅಕುಸಲಮೂಲಾನಿ ಏಕಮೂಲಮೂಲಕಾನಿ ಚೇವ ಅಞ್ಞಮಞ್ಞಮೂಲಮೂಲಕಾನಿ ಚ. ಅವಸೇಸಾ ಅಕುಸಲಮೂಲಸಹಜಾತಾ ಧಮ್ಮಾ ಅಕುಸಲಮೂಲೇನ ಏಕಮೂಲಮೂಲಕಾ, ನ ಚ ಅಞ್ಞಮಞ್ಞಮೂಲಮೂಲಕಾ.

(ಖ) ಯೇ ವಾ ಪನ ಅಕುಸಲಮೂಲೇನ ಅಞ್ಞಮಞ್ಞಮೂಲಮೂಲಕಾ, ಸಬ್ಬೇ ತೇ ಧಮ್ಮಾ ಅಕುಸಲಾತಿ? ಆಮನ್ತಾ.