(೩) ಮೂಲಕನಯೋ

೫೬. (ಕ) ಯೇ ಕೇಚಿ ಕುಸಲಾ ಧಮ್ಮಾ, ಸಬ್ಬೇ ತೇ ಕುಸಲಮೂಲಕಾತಿ? ಆಮನ್ತಾ.

(ಖ) ಯೇ ವಾ ಪನ ಕುಸಲಮೂಲಕಾ, ಸಬ್ಬೇ ತೇ ಧಮ್ಮಾ ಕುಸಲಾತಿ?

ಕುಸಲಸಮುಟ್ಠಾನಂ ರೂಪಂ ಕುಸಲಮೂಲಕಂ ನ ಕುಸಲಂ. ಕುಸಲಂ ಕುಸಲಮೂಲಕಞ್ಚೇವ ಕುಸಲಞ್ಚ.

೫೭. (ಕ) ಯೇ ಕೇಚಿ ಕುಸಲಾ ಧಮ್ಮಾ, ಸಬ್ಬೇ ತೇ ಕುಸಲಮೂಲೇನ ಏಕಮೂಲಕಾತಿ? ಆಮನ್ತಾ.

(ಖ) ಯೇ ವಾ ಪನ ಕುಸಲಮೂಲೇನ ಏಕಮೂಲಕಾ, ಸಬ್ಬೇ ತೇ ಧಮ್ಮಾ ಕುಸಲಾತಿ?

ಕುಸಲಸಮುಟ್ಠಾನಂ ರೂಪಂ ಕುಸಲಮೂಲೇನ ಏಕಮೂಲಕಂ, ನ ಕುಸಲಂ. ಕುಸಲಂ ಕುಸಲಮೂಲೇನ ಏಕಮೂಲಕಞ್ಚೇವ ಕುಸಲಞ್ಚ.

೫೮. (ಕ) ಯೇ ಕೇಚಿ ಕುಸಲಮೂಲೇನ ಏಕಮೂಲಕಾ ಧಮ್ಮಾ, ಸಬ್ಬೇ ತೇ ಕುಸಲಮೂಲೇನ ಅಞ್ಞಮಞ್ಞಮೂಲಕಾತಿ?

ಮೂಲಾನಿ ಯಾನಿ ಏಕತೋ ಉಪ್ಪಜ್ಜನ್ತಿ ಕುಸಲಮೂಲಾನಿ ಏಕಮೂಲಕಾನಿ ಚೇವ ಅಞ್ಞಮಞ್ಞಮೂಲಕಾನಿ ಚ. ಅವಸೇಸಾ ಕುಸಲಮೂಲಸಹಜಾತಾ ಧಮ್ಮಾ ಕುಸಲಮೂಲೇನ ಏಕಮೂಲಕಾ, ನ ಚ ಅಞ್ಞಮಞ್ಞಮೂಲಕಾ.

(ಖ) ಯೇ ವಾ ಪನ ಕುಸಲಮೂಲೇನ ಅಞ್ಞಮಞ್ಞಮೂಲಕಾ, ಸಬ್ಬೇ ತೇ ಧಮ್ಮಾ ಕುಸಲಾತಿ? ಆಮನ್ತಾ.