೪. ಸಚ್ಚವಿಭಙ್ಗೋ

೧. ಸುತ್ತನ್ತಭಾಜನೀಯಂ

೧೮೯. ಚತ್ತಾರಿ ಅರಿಯಸಚ್ಚಾನಿ – ದುಕ್ಖಂ ಅರಿಯಸಚ್ಚಂ, ದುಕ್ಖಸಮುದಯಂ [ದುಕ್ಖಸಮುದಯೋ (ಸ್ಯಾ.)] ಅರಿಯಸಚ್ಚಂ, ದುಕ್ಖನಿರೋಧಂ [ದುಕ್ಖನಿರೋಧೋ (ಸ್ಯಾ.)] ಅರಿಯಸಚ್ಚಂ, ದುಕ್ಖನಿರೋಧಗಾಮಿನೀ ಪಟಿಪದಾ ಅರಿಯಸಚ್ಚಂ.

೧. ದುಕ್ಖಸಚ್ಚಂ

೧೯೦. ತತ್ಥ ಕತಮಂ ದುಕ್ಖಂ ಅರಿಯಸಚ್ಚಂ? ಜಾತಿಪಿ ದುಕ್ಖಾ, ಜರಾಪಿ ದುಕ್ಖಾ, ಮರಣಮ್ಪಿ ದುಕ್ಖಂ, ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಾಪಿ ದುಕ್ಖಾ, ಅಪ್ಪಿಯೇಹಿ ಸಮ್ಪಯೋಗೋ ದುಕ್ಖೋ, ಪಿಯೇಹಿ ವಿಪ್ಪಯೋಗೋ ದುಕ್ಖೋ, ಯಂ ಪಿಚ್ಛಂ ನ ಲಭತಿ ತಮ್ಪಿ ದುಕ್ಖಂ, ಸಂಖಿತ್ತೇನ ಪಞ್ಚುಪಾದಾನಕ್ಖನ್ಧಾ ದುಕ್ಖಾ.

೧೯೧. ತತ್ಥ ಕತಮಾ ಜಾತಿ? ಯಾ ತೇಸಂ ತೇಸಂ ಸತ್ತಾನಂ ತಮ್ಹಿ ತಮ್ಹಿ ಸತ್ತನಿಕಾಯೇ ಜಾತಿ ಸಞ್ಜಾತಿ ಓಕ್ಕನ್ತಿ ಅಭಿನಿಬ್ಬತ್ತಿ ಖನ್ಧಾನಂ ಪಾತುಭಾವೋ ಆಯತನಾನಂ ಪಟಿಲಾಭೋ – ಅಯಂ ವುಚ್ಚತಿ ‘‘ಜಾತಿ’’.

೧೯೨. ತತ್ಥ ಕತಮಾ ಜರಾ? ಯಾ ತೇಸಂ ತೇಸಂ ಸತ್ತಾನಂ ತಮ್ಹಿ ತಮ್ಹಿ ಸತ್ತನಿಕಾಯೇ ಜರಾ ಜೀರಣತಾ ಖಣ್ಡಿಚ್ಚಂ ಪಾಲಿಚ್ಚಂ ವಲಿತ್ತಚತಾ ಆಯುನೋ ಸಂಹಾನಿ ಇನ್ದ್ರಿಯಾನಂ ಪರಿಪಾಕೋ – ಅಯಂ ವುಚ್ಚತಿ ‘‘ಜರಾ’’.

೧೯೩. ತತ್ಥ ಕತಮಂ ಮರಣಂ? ಯಾ ತೇಸಂ ತೇಸಂ ಸತ್ತಾನಂ ತಮ್ಹಾ ತಮ್ಹಾ ಸತ್ತನಿಕಾಯಾ ಚುತಿ ಚವನತಾ ಭೇದೋ ಅನ್ತರಧಾನಂ ಮಚ್ಚು ಮರಣಂ ಕಾಲಕಿರಿಯಾ ಖನ್ಧಾನಂ ಭೇದೋ ಕಳೇವರಸ್ಸ ನಿಕ್ಖೇಪೋ ಜೀವಿತಿನ್ದ್ರಿಯಸ್ಸುಪಚ್ಛೇದೋ – ಇದಂ ವುಚ್ಚತಿ ‘‘ಮರಣಂ’’.

೧೯೪. ತತ್ಥ ಕತಮೋ ಸೋಕೋ? ಞಾತಿಬ್ಯಸನೇನ ವಾ ಫುಟ್ಠಸ್ಸ ಭೋಗಬ್ಯಸನೇನ ವಾ ಫುಟ್ಠಸ್ಸ ರೋಗಬ್ಯಸನೇನ ವಾ ಫುಟ್ಠಸ್ಸ ಸೀಲಬ್ಯಸನೇನ ವಾ ಫುಟ್ಠಸ್ಸ ದಿಟ್ಠಿಬ್ಯಸನೇನ ವಾ ಫುಟ್ಠಸ್ಸ ಅಞ್ಞತರಞ್ಞತರೇನ ಬ್ಯಸನೇನ ಸಮನ್ನಾಗತಸ್ಸ ಅಞ್ಞತರಞ್ಞತರೇನ ದುಕ್ಖಧಮ್ಮೇನ ಫುಟ್ಠಸ್ಸ ಸೋಕೋ ಸೋಚನಾ ಸೋಚಿತತ್ತಂ ಅನ್ತೋಸೋಕೋ ಅನ್ತೋಪರಿಸೋಕೋ ಚೇತಸೋ ಪರಿಜ್ಝಾಯನಾ ದೋಮನಸ್ಸಂ ಸೋಕಸಲ್ಲಂ – ಅಯಂ ವುಚ್ಚತಿ ‘‘ಸೋಕೋ’’.

೧೯೫. ತತ್ಥ ಕತಮೋ ಪರಿದೇವೋ? ಞಾತಿಬ್ಯಸನೇನ ವಾ ಫುಟ್ಠಸ್ಸ ಭೋಗಬ್ಯಸನೇನ ವಾ ಫುಟ್ಠಸ್ಸ ರೋಗಬ್ಯಸನೇನ ವಾ ಫುಟ್ಠಸ್ಸ ಸೀಲಬ್ಯಸನೇನ ವಾ ಫುಟ್ಠಸ್ಸ ದಿಟ್ಠಿಬ್ಯಸನೇನ ವಾ ಫುಟ್ಠಸ್ಸ ಅಞ್ಞತರಞ್ಞತರೇನ ಬ್ಯಸನೇನ ಸಮನ್ನಾಗತಸ್ಸ ಅಞ್ಞತರಞ್ಞತರೇನ ದುಕ್ಖಧಮ್ಮೇನ ಫುಟ್ಠಸ್ಸ ಆದೇವೋ ಪರಿದೇವೋ ಆದೇವನಾ ಪರಿದೇವನಾ ಆದೇವಿತತ್ತಂ ಪರಿದೇವಿತತ್ತಂ ವಾಚಾ ಪಲಾಪೋ ವಿಪ್ಪಲಾಪೋ ಲಾಲಪ್ಪೋ ಲಾಲಪ್ಪನಾ ಲಾಲಪ್ಪಿತತ್ತಂ [ಲಾಲಪೋ ಲಾಲಪನಾ ಲಾಲಪಿತತ್ತಂ (ಸ್ಯಾ.)] – ಅಯಂ ವುಚ್ಚತಿ ‘‘ಪರಿದೇವೋ’’.

೧೯೬. ತತ್ಥ ಕತಮಂ ದುಕ್ಖಂ? ಯಂ ಕಾಯಿಕಂ ಅಸಾತಂ ಕಾಯಿಕಂ ದುಕ್ಖಂ ಕಾಯಸಮ್ಫಸ್ಸಜಂ ಅಸಾತಂ ದುಕ್ಖಂ ವೇದಯಿತಂ ಕಾಯಸಮ್ಫಸ್ಸಜಾ ಅಸಾತಾ ದುಕ್ಖಾ ವೇದನಾ – ಇದಂ ವುಚ್ಚತಿ ‘‘ದುಕ್ಖಂ’’.

೧೯೭. ತತ್ಥ ಕತಮಂ ದೋಮನಸ್ಸಂ? ಯಂ ಚೇತಸಿಕಂ ಅಸಾತಂ ಚೇತಸಿಕಂ ದುಕ್ಖಂ ಚೇತೋಸಮ್ಫಸ್ಸಜಂ ಅಸಾತಂ ದುಕ್ಖಂ ವೇದಯಿತಂ ಚೇತೋಸಮ್ಫಸ್ಸಜಾ ಅಸಾತಾ ದುಕ್ಖಾ ವೇದನಾ – ಇದಂ ವುಚ್ಚತಿ ‘‘ದೋಮನಸ್ಸಂ’’.

೧೯೮. ತತ್ಥ ಕತಮೋ ಉಪಾಯಾಸೋ? ಞಾತಿಬ್ಯಸನೇನ ವಾ ಫುಟ್ಠಸ್ಸ ಭೋಗಬ್ಯಸನೇನ ವಾ ಫುಟ್ಠಸ್ಸ ರೋಗಬ್ಯಸನೇನ ವಾ ಫುಟ್ಠಸ್ಸ ಸೀಲಬ್ಯಸನೇನ ವಾ ಫುಟ್ಠಸ್ಸ ದಿಟ್ಠಿಬ್ಯಸನೇನ ವಾ ಫುಟ್ಠಸ್ಸ ಅಞ್ಞತರಞ್ಞತರೇನ ಬ್ಯಸನೇನ ಸಮನ್ನಾಗತಸ್ಸ ಅಞ್ಞತರಞ್ಞತರೇನ ದುಕ್ಖಧಮ್ಮೇನ ಫುಟ್ಠಸ್ಸ ಆಯಾಸೋ ಉಪಾಯಾಸೋ ಆಯಾಸಿತತ್ತಂ ಉಪಾಯಾಸಿತತ್ತಂ – ಅಯಂ ವುಚ್ಚತಿ ‘‘ಉಪಾಯಾಸೋ’’.

೧೯೯. ತತ್ಥ ಕತಮೋ ಅಪ್ಪಿಯೇಹಿ ಸಮ್ಪಯೋಗೋ ದುಕ್ಖೋ? ಇಧ ಯಸ್ಸ ತೇ ಹೋನ್ತಿ ಅನಿಟ್ಠಾ ಅಕನ್ತಾ ಅಮನಾಪಾ ರೂಪಾ ಸದ್ದಾ ಗನ್ಧಾ ರಸಾ ಫೋಟ್ಠಬ್ಬಾ, ಯೇ ವಾ ಪನಸ್ಸ ತೇ ಹೋನ್ತಿ ಅನತ್ಥಕಾಮಾ ಅಹಿತಕಾಮಾ ಅಫಾಸುಕಕಾಮಾ ಅಯೋಗಕ್ಖೇಮಕಾಮಾ; ಯಾ ತೇಹಿ ಸಙ್ಗತಿ ಸಮಾಗಮೋ ಸಮೋಧಾನಂ ಮಿಸ್ಸೀಭಾವೋ – ಅಯಂ ವುಚ್ಚತಿ ‘‘ಅಪ್ಪಿಯೇಹಿ ಸಮ್ಪಯೋಗೋ ದುಕ್ಖೋ’’.

೨೦೦. ತತ್ಥ ಕತಮೋ ಪಿಯೇಹಿ ವಿಪ್ಪಯೋಗೋ ದುಕ್ಖೋ? ಇಧ ಯಸ್ಸ ತೇ ಹೋನ್ತಿ ಇಟ್ಠಾ ಕನ್ತಾ ಮನಾಪಾ ರೂಪಾ ಸದ್ದಾ ಗನ್ಧಾ ರಸಾ ಫೋಟ್ಠಬ್ಬಾ, ಯೇ ವಾ ಪನಸ್ಸ ತೇ ಹೋನ್ತಿ ಅತ್ಥಕಾಮಾ ಹಿತಕಾಮಾ ಫಾಸುಕಕಾಮಾ ಯೋಗಕ್ಖೇಮಕಾಮಾ ಮಾತಾ ವಾ ಪಿತಾ ವಾ ಭಾತಾ ವಾ ಭಗಿನೀ ವಾ ಮಿತ್ತಾ ವಾ ಅಮಚ್ಚಾ ವಾ ಞಾತೀ ವಾ ಸಾಲೋಹಿತಾ ವಾ; ಯಾ ತೇಹಿ ಅಸಙ್ಗತಿ ಅಸಮಾಗಮೋ ಅಸಮೋಧಾನಂ ಅಮಿಸ್ಸೀಭಾವೋ – ಅಯಂ ವುಚ್ಚತಿ ‘‘ಪಿಯೇಹಿ ವಿಪ್ಪಯೋಗೋ ದುಕ್ಖೋ’’.

೨೦೧. ತತ್ಥ ಕತಮಂ ಯಮ್ಪಿಚ್ಛಂ ನ ಲಭತಿ ತಮ್ಪಿ ದುಕ್ಖಂ? ಜಾತಿಧಮ್ಮಾನಂ ಸತ್ತಾನಂ ಏವಂ ಇಚ್ಛಾ ಉಪ್ಪಜ್ಜತಿ – ‘‘ಅಹೋ ವತ, ಮಯಂ ನ ಜಾತಿಧಮ್ಮಾ ಅಸ್ಸಾಮ; ನ ಚ, ವತ, ನೋ ಜಾತಿ ಆಗಚ್ಛೇಯ್ಯಾ’’ತಿ! ನ ಖೋ ಪನೇತಂ ಇಚ್ಛಾಯ ಪತ್ತಬ್ಬಂ. ಇದಮ್ಪಿ ‘‘ಯಮ್ಪಿಚ್ಛಂ ನ ಲಭತಿ ತಮ್ಪಿ ದುಕ್ಖಂ’’.

ಜರಾಧಮ್ಮಾನಂ ಸತ್ತಾನಂ…ಪೇ… ಬ್ಯಾಧಿಧಮ್ಮಾನಂ ಸತ್ತಾನಂ…ಪೇ… ಮರಣಧಮ್ಮಾನಂ ಸತ್ತಾನಂ…ಪೇ… ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಧಮ್ಮಾನಂ ಸತ್ತಾನಂ ಏವಂ ಇಚ್ಛಾ ಉಪ್ಪಜ್ಜತಿ – ‘‘ಅಹೋ ವತ, ಮಯಂ ನ ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಧಮ್ಮಾ ಅಸ್ಸಾಮ; ನ ಚ, ವತ, ನೋ ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಾ ಆಗಚ್ಛೇಯ್ಯು’’ನ್ತಿ! ನ ಖೋ ಪನೇತಂ ಇಚ್ಛಾಯ ಪತ್ತಬ್ಬಂ. ಇದಮ್ಪಿ ‘‘ಯಮ್ಪಿಚ್ಛಂ ನ ಲಭತಿ ತಮ್ಪಿ ದುಕ್ಖಂ’’.

೨೦೨. ತತ್ಥ ಕತಮೇ ಸಂಖಿತ್ತೇನ ಪಞ್ಚುಪಾದಾನಕ್ಖನ್ಧಾ ದುಕ್ಖಾ? ಸೇಯ್ಯಥಿದಂ – ರೂಪುಪಾದಾನಕ್ಖನ್ಧೋ, ವೇದನುಪಾದಾನಕ್ಖನ್ಧೋ, ಸಞ್ಞುಪಾದಾನಕ್ಖನ್ಧೋ, ಸಙ್ಖಾರುಪಾದಾನಕ್ಖನ್ಧೋ, ವಿಞ್ಞಾಣುಪಾದಾನಕ್ಖನ್ಧೋ. ಇಮೇ ವುಚ್ಚನ್ತಿ ‘‘ಸಂಖಿತ್ತೇನ ಪಞ್ಚುಪಾದಾನಕ್ಖನ್ಧಾ ದುಕ್ಖಾ’’.

ಇದಂ ವುಚ್ಚತಿ ‘‘ದುಕ್ಖಂ ಅರಿಯಸಚ್ಚಂ’’.

೨. ಸಮುದಯಸಚ್ಚಂ

೨೦೩. ತತ್ಥ ಕತಮಂ ದುಕ್ಖಸಮುದಯಂ ಅರಿಯಸಚ್ಚಂ? ಯಾಯಂ ತಣ್ಹಾ ಪೋನೋಭವಿಕಾ [ಪೋನೋಬ್ಭವಿಕಾ (ಸ್ಯಾ. ಕ.)] ನನ್ದಿರಾಗಸಹಗತಾ ತತ್ರತತ್ರಾಭಿನನ್ದಿನೀ, ಸೇಯ್ಯಥಿದಂ – ಕಾಮತಣ್ಹಾ, ಭವತಣ್ಹಾ, ವಿಭವತಣ್ಹಾ.

ಸಾ ಖೋ ಪನೇಸಾ ತಣ್ಹಾ ಕತ್ಥ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಕತ್ಥ ನಿವಿಸಮಾನಾ ನಿವಿಸತಿ? ಯಂ ಲೋಕೇ ಪಿಯರೂಪಂ ಸಾತರೂಪಂ, ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ಕಿಞ್ಚ ಲೋಕೇ ಪಿಯರೂಪಂ ಸಾತರೂಪಂ? ಚಕ್ಖುಂ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸೋತಂ ಲೋಕೇ…ಪೇ… ಘಾನಂ ಲೋಕೇ… ಜಿವ್ಹಾ ಲೋಕೇ… ಕಾಯೋ ಲೋಕೇ… ಮನೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ರೂಪಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸದ್ದಾ ಲೋಕೇ…ಪೇ… ಗನ್ಧಾ ಲೋಕೇ… ರಸಾ ಲೋಕೇ… ಫೋಟ್ಠಬ್ಬಾ ಲೋಕೇ… ಧಮ್ಮಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ಚಕ್ಖುವಿಞ್ಞಾಣಂ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸೋತವಿಞ್ಞಾಣಂ ಲೋಕೇ…ಪೇ… ಘಾನವಿಞ್ಞಾಣಂ ಲೋಕೇ… ಜಿವ್ಹಾವಿಞ್ಞಾಣಂ ಲೋಕೇ… ಕಾಯವಿಞ್ಞಾಣಂ ಲೋಕೇ… ಮನೋವಿಞ್ಞಾಣಂ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ಚಕ್ಖುಸಮ್ಫಸ್ಸೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸೋತಸಮ್ಫಸ್ಸೋ ಲೋಕೇ…ಪೇ… ಘಾನಸಮ್ಫಸ್ಸೋ ಲೋಕೇ… ಜಿವ್ಹಾಸಮ್ಫಸ್ಸೋ ಲೋಕೇ… ಕಾಯಸಮ್ಫಸ್ಸೋ ಲೋಕೇ… ಮನೋಸಮ್ಫಸ್ಸೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ಚಕ್ಖುಸಮ್ಫಸ್ಸಜಾ ವೇದನಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸೋತಸಮ್ಫಸ್ಸಜಾ ವೇದನಾ ಲೋಕೇ…ಪೇ… ಘಾನಸಮ್ಫಸ್ಸಜಾ ವೇದನಾ ಲೋಕೇ… ಜಿವ್ಹಾಸಮ್ಫಸ್ಸಜಾ ವೇದನಾ ಲೋಕೇ… ಕಾಯಸಮ್ಫಸ್ಸಜಾ ವೇದನಾ ಲೋಕೇ… ಮನೋಸಮ್ಫಸ್ಸಜಾ ವೇದನಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ರೂಪಸಞ್ಞಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸದ್ದಸಞ್ಞಾ ಲೋಕೇ…ಪೇ… ಗನ್ಧಸಞ್ಞಾ ಲೋಕೇ… ರಸಸಞ್ಞಾ ಲೋಕೇ… ಫೋಟ್ಠಬ್ಬಸಞ್ಞಾ ಲೋಕೇ… ಧಮ್ಮಸಞ್ಞಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ರೂಪಸಞ್ಚೇತನಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸದ್ದಸಞ್ಚೇತನಾ ಲೋಕೇ…ಪೇ… ಗನ್ಧಸಞ್ಚೇತನಾ ಲೋಕೇ… ರಸಸಞ್ಚೇತನಾ ಲೋಕೇ… ಫೋಟ್ಠಬ್ಬಸಞ್ಚೇತನಾ ಲೋಕೇ… ಧಮ್ಮಸಞ್ಚೇತನಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ರೂಪತಣ್ಹಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸದ್ದತಣ್ಹಾ ಲೋಕೇ…ಪೇ… ಗನ್ಧತಣ್ಹಾ ಲೋಕೇ… ರಸತಣ್ಹಾ ಲೋಕೇ… ಫೋಟ್ಠಬ್ಬತಣ್ಹಾ ಲೋಕೇ… ಧಮ್ಮತಣ್ಹಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ರೂಪವಿತಕ್ಕೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸದ್ದವಿತಕ್ಕೋ ಲೋಕೇ…ಪೇ… ಗನ್ಧವಿತಕ್ಕೋ ಲೋಕೇ… ರಸವಿತಕ್ಕೋ ಲೋಕೇ… ಫೋಟ್ಠಬ್ಬವಿತಕ್ಕೋ ಲೋಕೇ… ಧಮ್ಮವಿತಕ್ಕೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ರೂಪವಿಚಾರೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಸದ್ದವಿಚಾರೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಗನ್ಧವಿಚಾರೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ರಸವಿಚಾರೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಫೋಟ್ಠಬ್ಬವಿಚಾರೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ. ಧಮ್ಮವಿಚಾರೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಉಪ್ಪಜ್ಜಮಾನಾ ಉಪ್ಪಜ್ಜತಿ, ಏತ್ಥ ನಿವಿಸಮಾನಾ ನಿವಿಸತಿ.

ಇದಂ ವುಚ್ಚತಿ ‘‘ದುಕ್ಖಸಮುದಯಂ ಅರಿಯಸಚ್ಚಂ’’.

೩. ನಿರೋಧಸಚ್ಚಂ

೨೦೪. ತತ್ಥ ಕತಮಂ ದುಕ್ಖನಿರೋಧಂ ಅರಿಯಸಚ್ಚಂ? ಯೋ ತಸ್ಸಾಯೇವ ತಣ್ಹಾಯ ಅಸೇಸವಿರಾಗನಿರೋಧೋ ಚಾಗೋ ಪಟಿನಿಸ್ಸಗ್ಗೋ ಮುತ್ತಿ ಅನಾಲಯೋ.

ಸಾ ಖೋ ಪನೇಸಾ ತಣ್ಹಾ ಕತ್ಥ ಪಹೀಯಮಾನಾ ಪಹೀಯತಿ, ಕತ್ಥ ನಿರುಜ್ಝಮಾನಾ ನಿರುಜ್ಝತಿ? ಯಂ ಲೋಕೇ ಪಿಯರೂಪಂ ಸಾತರೂಪಂ, ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ಕಿಞ್ಚ ಲೋಕೇ ಪಿಯರೂಪಂ ಸಾತರೂಪಂ? ಚಕ್ಖುಂ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ. ಸೋತಂ ಲೋಕೇ…ಪೇ… ಘಾನಂ ಲೋಕೇ… ಜಿವ್ಹಾ ಲೋಕೇ… ಕಾಯೋ ಲೋಕೇ… ಮನೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ರೂಪಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ. ಸದ್ದಾ ಲೋಕೇ…ಪೇ… ಗನ್ಧಾ ಲೋಕೇ… ರಸಾ ಲೋಕೇ… ಫೋಟ್ಠಬ್ಬಾ ಲೋಕೇ… ಧಮ್ಮಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ಚಕ್ಖುವಿಞ್ಞಾಣಂ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ. ಸೋತವಿಞ್ಞಾಣಂ ಲೋಕೇ…ಪೇ… ಘಾನವಿಞ್ಞಾಣಂ ಲೋಕೇ… ಜಿವ್ಹಾವಿಞ್ಞಾಣಂ ಲೋಕೇ… ಕಾಯವಿಞ್ಞಾಣಂ ಲೋಕೇ… ಮನೋವಿಞ್ಞಾಣಂ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ಚಕ್ಖುಸಮ್ಫಸ್ಸೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ. ಸೋತಸಮ್ಫಸ್ಸೋ ಲೋಕೇ…ಪೇ… ಘಾನಸಮ್ಫಸ್ಸೋ ಲೋಕೇ… ಜಿವ್ಹಾಸಮ್ಫಸ್ಸೋ ಲೋಕೇ… ಕಾಯಸಮ್ಫಸ್ಸೋ ಲೋಕೇ… ಮನೋಸಮ್ಫಸ್ಸೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ಚಕ್ಖುಸಮ್ಫಸ್ಸಜಾ ವೇದನಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ. ಸೋತಸಮ್ಫಸ್ಸಜಾ ವೇದನಾ ಲೋಕೇ…ಪೇ… ಘಾನಸಮ್ಫಸ್ಸಜಾ ವೇದನಾ ಲೋಕೇ… ಜಿವ್ಹಾಸಮ್ಫಸ್ಸಜಾ ವೇದನಾ ಲೋಕೇ… ಕಾಯಸಮ್ಫಸ್ಸಜಾ ವೇದನಾ ಲೋಕೇ… ಮನೋಸಮ್ಫಸ್ಸಜಾ ವೇದನಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ರೂಪಸಞ್ಞಾ ಲೋಕೇ… ಸದ್ದಸಞ್ಞಾ ಲೋಕೇ… ಗನ್ಧಸಞ್ಞಾ ಲೋಕೇ… ರಸಸಞ್ಞಾ ಲೋಕೇ… ಫೋಟ್ಠಬ್ಬಸಞ್ಞಾ ಲೋಕೇ… ಧಮ್ಮಸಞ್ಞಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ರೂಪಸಞ್ಚೇತನಾ ಲೋಕೇ… ಸದ್ದಸಞ್ಚೇತನಾ ಲೋಕೇ… ಗನ್ಧಸಞ್ಚೇತನಾ ಲೋಕೇ… ರಸಸಞ್ಚೇತನಾ ಲೋಕೇ… ಫೋಟ್ಠಬ್ಬಸಞ್ಚೇತನಾ ಲೋಕೇ… ಧಮ್ಮಸಞ್ಚೇತನಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ರೂಪತಣ್ಹಾ ಲೋಕೇ… ಸದ್ದತಣ್ಹಾ ಲೋಕೇ… ಗನ್ಧತಣ್ಹಾ ಲೋಕೇ… ರಸತಣ್ಹಾ ಲೋಕೇ… ಫೋಟ್ಠಬ್ಬತಣ್ಹಾ ಲೋಕೇ… ಧಮ್ಮತಣ್ಹಾ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ರೂಪವಿತಕ್ಕೋ ಲೋಕೇ… ಸದ್ದವಿತಕ್ಕೋ ಲೋಕೇ… ಗನ್ಧವಿತಕ್ಕೋ ಲೋಕೇ… ರಸವಿತಕ್ಕೋ ಲೋಕೇ… ಫೋಟ್ಠಬ್ಬವಿತಕ್ಕೋ ಲೋಕೇ… ಧಮ್ಮವಿತಕ್ಕೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ರೂಪವಿಚಾರೋ ಲೋಕೇ… ಸದ್ದವಿಚಾರೋ ಲೋಕೇ… ಗನ್ಧವಿಚಾರೋ ಲೋಕೇ… ರಸವಿಚಾರೋ ಲೋಕೇ… ಫೋಟ್ಠಬ್ಬವಿಚಾರೋ ಲೋಕೇ… ಧಮ್ಮವಿಚಾರೋ ಲೋಕೇ ಪಿಯರೂಪಂ ಸಾತರೂಪಂ. ಏತ್ಥೇಸಾ ತಣ್ಹಾ ಪಹೀಯಮಾನಾ ಪಹೀಯತಿ, ಏತ್ಥ ನಿರುಜ್ಝಮಾನಾ ನಿರುಜ್ಝತಿ.

ಇದಂ ವುಚ್ಚತಿ ‘‘ದುಕ್ಖನಿರೋಧಂ ಅರಿಯಸಚ್ಚಂ’’.

೪. ಮಗ್ಗಸಚ್ಚಂ

೨೦೫. ತತ್ಥ ಕತಮಂ ದುಕ್ಖನಿರೋಧಗಾಮಿನೀ ಪಟಿಪದಾ ಅರಿಯಸಚ್ಚಂ? ಅಯಮೇವ ಅರಿಯೋ ಅಟ್ಠಙ್ಗಿಕೋ ಮಗ್ಗೋ, ಸೇಯ್ಯಥಿದಂ – ಸಮ್ಮಾದಿಟ್ಠಿ, ಸಮ್ಮಾಸಙ್ಕಪ್ಪೋ, ಸಮ್ಮಾವಾಚಾ, ಸಮ್ಮಾಕಮ್ಮನ್ತೋ, ಸಮ್ಮಾಆಜೀವೋ, ಸಮ್ಮಾವಾಯಾಮೋ, ಸಮ್ಮಾಸತಿ, ಸಮ್ಮಾಸಮಾಧಿ.

ತತ್ಥ ಕತಮಾ ಸಮ್ಮಾದಿಟ್ಠಿ? ದುಕ್ಖೇ ಞಾಣಂ, ದುಕ್ಖಸಮುದಯೇ ಞಾಣಂ, ದುಕ್ಖನಿರೋಧೇ ಞಾಣಂ, ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಞಾಣಂ – ಅಯಂ ವುಚ್ಚತಿ ‘‘ಸಮ್ಮಾದಿಟ್ಠಿ’’.

ತತ್ಥ ಕತಮೋ ಸಮ್ಮಾಸಙ್ಕಪ್ಪೋ? ನೇಕ್ಖಮ್ಮಸಙ್ಕಪ್ಪೋ, ಅಬ್ಯಾಪಾದಸಙ್ಕಪ್ಪೋ, ಅವಿಹಿಂಸಾಸಙ್ಕಪ್ಪೋ – ಅಯಂ ವುಚ್ಚತಿ ‘‘ಸಮ್ಮಾಸಙ್ಕಪ್ಪೋ’’.

ತತ್ಥ ಕತಮಾ ಸಮ್ಮಾವಾಚಾ? ಮುಸಾವಾದಾ ವೇರಮಣೀ, ಪಿಸುಣಾಯ ವಾಚಾಯ ವೇರಮಣೀ, ಫರುಸಾಯ ವಾಚಾಯ ವೇರಮಣೀ, ಸಮ್ಫಪ್ಪಲಾಪಾ ವೇರಮಣೀ – ಅಯಂ ವುಚ್ಚತಿ ‘‘ಸಮ್ಮಾವಾಚಾ’’.

ತತ್ಥ ಕತಮೋ ಸಮ್ಮಾಕಮ್ಮನ್ತೋ? ಪಾಣಾತಿಪಾತಾ ವೇರಮಣೀ, ಅದಿನ್ನಾದಾನಾ ವೇರಮಣೀ, ಕಾಮೇಸುಮಿಚ್ಛಾಚಾರಾ ವೇರಮಣೀ – ಅಯಂ ವುಚ್ಚತಿ ‘‘ಸಮ್ಮಾಕಮ್ಮನ್ತೋ’’.

ತತ್ಥ ಕತಮೋ ಸಮ್ಮಾಆಜೀವೋ? ಇಧ ಅರಿಯಸಾವಕೋ ಮಿಚ್ಛಾಆಜೀವಂ ಪಹಾಯ ಸಮ್ಮಾಆಜೀವೇನ ಜೀವಿಕಂ ಕಪ್ಪೇತಿ – ಅಯಂ ವುಚ್ಚತಿ ‘‘ಸಮ್ಮಾಆಜೀವೋ’’.

ತತ್ಥ ಕತಮೋ ಸಮ್ಮಾವಾಯಾಮೋ? ಇಧ ಭಿಕ್ಖು ಅನುಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಅನುಪ್ಪಾದಾಯ ಛನ್ದಂ ಜನೇತಿ, ವಾಯಮತಿ, ವೀರಿಯಂ ಆರಭತಿ, ಚಿತ್ತಂ ಪಗ್ಗಣ್ಹಾತಿ, ಪದಹತಿ. ಉಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಪಹಾನಾಯ ಛನ್ದಂ ಜನೇತಿ, ವಾಯಮತಿ, ವೀರಿಯಂ ಆರಭತಿ, ಚಿತ್ತಂ ಪಗ್ಗಣ್ಹಾತಿ, ಪದಹತಿ. ಅನುಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಉಪ್ಪಾದಾಯ ಛನ್ದಂ ಜನೇತಿ, ವಾಯಮತಿ, ವೀರಿಯಂ ಆರಭತಿ, ಚಿತ್ತಂ ಪಗ್ಗಣ್ಹಾತಿ, ಪದಹತಿ. ಉಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಠಿತಿಯಾ ಅಸಮ್ಮೋಸಾಯ ಭಿಯ್ಯೋಭಾವಾಯ ವೇಪುಲ್ಲಾಯ ಭಾವನಾಯ ಪಾರಿಪೂರಿಯಾ ಛನ್ದಂ ಜನೇತಿ, ವಾಯಮತಿ, ವೀರಿಯಂ ಆರಭತಿ, ಚಿತ್ತಂ ಪಗ್ಗಣ್ಹಾತಿ, ಪದಹತಿ. ಅಯಂ ವುಚ್ಚತಿ ‘‘ಸಮ್ಮಾವಾಯಾಮೋ’’.

ತತ್ಥ ಕತಮಾ ಸಮ್ಮಾಸತಿ? ಇಧ ಭಿಕ್ಖು ಕಾಯೇ ಕಾಯಾನುಪಸ್ಸೀ ವಿಹರತಿ ಆತಾಪೀ ಸಮ್ಪಜಾನೋ ಸತಿಮಾ, ವಿನೇಯ್ಯ ಲೋಕೇ ಅಭಿಜ್ಝಾದೋಮನಸ್ಸಂ. ವೇದನಾಸು…ಪೇ… ಚಿತ್ತೇ…ಪೇ… ಧಮ್ಮೇಸು ಧಮ್ಮಾನುಪಸ್ಸೀ ವಿಹರತಿ ಆತಾಪೀ ಸಮ್ಪಜಾನೋ ಸತಿಮಾ, ವಿನೇಯ್ಯ ಲೋಕೇ ಅಭಿಜ್ಝಾದೋಮನಸ್ಸಂ. ಅಯಂ ವುಚ್ಚತಿ ‘‘ಸಮ್ಮಾಸತಿ’’.

ತತ್ಥ ಕತಮೋ ಸಮ್ಮಾಸಮಾಧಿ? ಇಧ ಭಿಕ್ಖು ವಿವಿಚ್ಚೇವ ಕಾಮೇಹಿ, ವಿವಿಚ್ಚ ಅಕುಸಲೇಹಿ ಧಮ್ಮೇಹಿ, ಸವಿತಕ್ಕಂ ಸವಿಚಾರಂ ವಿವೇಕಜಂ ಪೀತಿಸುಖಂ ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ. ವಿತಕ್ಕವಿಚಾರಾನಂ ವೂಪಸಮಾ, ಅಜ್ಝತ್ತಂ ಸಮ್ಪಸಾದನಂ, ಚೇತಸೋ ಏಕೋದಿಭಾವಂ ಅವಿತಕ್ಕಂ ಅವಿಚಾರಂ ಸಮಾಧಿಜಂ ಪೀತಿಸುಖಂ ದುತಿಯಂ ಝಾನಂ ಉಪಸಮ್ಪಜ್ಜ ವಿಹರತಿ. ಪೀತಿಯಾ ಚ ವಿರಾಗಾ, ಉಪೇಕ್ಖಕೋ ಚ ವಿಹರತಿ, ಸತೋ ಚ ಸಮ್ಪಜಾನೋ, ಸುಖಞ್ಚ ಕಾಯೇನ ಪಟಿಸಂವೇದೇತಿ, ಯಂ ತಂ ಅರಿಯಾ ಆಚಿಕ್ಖನ್ತಿ – ‘‘ಉಪೇಕ್ಖಕೋ ಸತಿಮಾ ಸುಖವಿಹಾರೀ’’ತಿ, ತತಿಯಂ ಝಾನಂ ಉಪಸಮ್ಪಜ್ಜ ವಿಹರತಿ. ಸುಖಸ್ಸ ಚ ಪಹಾನಾ, ದುಕ್ಖಸ್ಸ ಚ ಪಹಾನಾ, ಪುಬ್ಬೇವ ಸೋಮನಸ್ಸದೋಮನಸ್ಸಾನಂ ಅತ್ಥಙ್ಗಮಾ, ಅದುಕ್ಖಮಸುಖಂ ಉಪೇಕ್ಖಾಸತಿಪಾರಿಸುದ್ಧಿಂ ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರತಿ. ಅಯಂ ವುಚ್ಚತಿ ‘‘ಸಮ್ಮಾಸಮಾಧಿ’’.

ಇದಂ ವುಚ್ಚತಿ ‘‘ದುಕ್ಖನಿರೋಧಗಾಮಿನೀ ಪಟಿಪದಾ ಅರಿಯಸಚ್ಚಂ’’.

ಸುತ್ತನ್ತಭಾಜನೀಯಂ.

೨. ಅಭಿಧಮ್ಮಭಾಜನೀಯಂ

೨೦೬. ಚತ್ತಾರಿ ಸಚ್ಚಾನಿ – ದುಕ್ಖಂ, ದುಕ್ಖಸಮುದಯೋ, ದುಕ್ಖನಿರೋಧೋ, ದುಕ್ಖನಿರೋಧಗಾಮಿನೀ ಪಟಿಪದಾ.

ತತ್ಥ ಕತಮೋ ದುಕ್ಖಸಮುದಯೋ? ತಣ್ಹಾ – ಅಯಂ ವುಚ್ಚತಿ ‘‘ದುಕ್ಖಸಮುದಯೋ’’.

ತತ್ಥ ಕತಮಂ ದುಕ್ಖಂ? ಅವಸೇಸಾ ಚ ಕಿಲೇಸಾ, ಅವಸೇಸಾ ಚ ಅಕುಸಲಾ ಧಮ್ಮಾ, ತೀಣಿ ಚ ಕುಸಲಮೂಲಾನಿ ಸಾಸವಾನಿ, ಅವಸೇಸಾ ಚ ಸಾಸವಾ ಕುಸಲಾ ಧಮ್ಮಾ, ಸಾಸವಾ ಚ ಕುಸಲಾಕುಸಲಾನಂ ಧಮ್ಮಾನಂ ವಿಪಾಕಾ, ಯೇ ಚ ಧಮ್ಮಾ ಕಿರಿಯಾ ನೇವ ಕುಸಲಾ ನಾಕುಸಲಾ ನ ಚ ಕಮ್ಮವಿಪಾಕಾ, ಸಬ್ಬಞ್ಚ ರೂಪಂ – ಇದಂ ವುಚ್ಚತಿ ‘‘ದುಕ್ಖಂ’’.

ತತ್ಥ ಕತಮೋ ದುಕ್ಖನಿರೋಧೋ? ತಣ್ಹಾಯ ಪಹಾನಂ – ಅಯಂ ವುಚ್ಚತಿ ‘‘ದುಕ್ಖನಿರೋಧೋ’’.

ತತ್ಥ ಕತಮಾ ಸಮ್ಮಾದಿಟ್ಠಿ? ಯಾ ಪಞ್ಞಾ ಪಜಾನನಾ…ಪೇ… ಅಮೋಹೋ ಧಮ್ಮವಿಚಯೋ ಸಮ್ಮಾದಿಟ್ಠಿ ಧಮ್ಮವಿಚಯಸಮ್ಬೋಜ್ಝಙ್ಗೋ ಮಗ್ಗಙ್ಗಂ ಮಗ್ಗಪರಿಯಾಪನ್ನಂ – ಅಯಂ ವುಚ್ಚತಿ ‘‘ಸಮ್ಮಾದಿಟ್ಠಿ’’.

ತತ್ಥ ಕತಮೋ ಸಮ್ಮಾಸಙ್ಕಪ್ಪೋ? ಯೋ ತಕ್ಕೋ ವಿತಕ್ಕೋ…ಪೇ… ಸಮ್ಮಾಸಙ್ಕಪ್ಪೋ ಮಗ್ಗಙ್ಗಂ ಮಗ್ಗಪರಿಯಾಪನ್ನಂ – ಅಯಂ ವುಚ್ಚತಿ ‘‘ಸಮ್ಮಾಸಙ್ಕಪ್ಪೋ’’.

ತತ್ಥ ಕತಮಾ ಸಮ್ಮಾವಾಚಾ? ಯಾ ಚತೂಹಿ ವಚೀದುಚ್ಚರಿತೇಹಿ ಆರತಿ ವಿರತಿ ಪಟಿವಿರತಿ ವೇರಮಣೀ [ವೇರಮಣಿ (ಕ.) ಏವಮುಪರಿಪಿ] ಅಕಿರಿಯಾ ಅಕರಣಂ ಅನಜ್ಝಾಪತ್ತಿ ವೇಲಾಅನತಿಕ್ಕಮೋ ಸೇತುಘಾತೋ ಸಮ್ಮಾವಾಚಾ ಮಗ್ಗಙ್ಗಂ ಮಗ್ಗಪರಿಯಾಪನ್ನಂ – ಅಯಂ ವುಚ್ಚತಿ ‘‘ಸಮ್ಮಾವಾಚಾ’’.

ತತ್ಥ ಕತಮೋ ಸಮ್ಮಾಕಮ್ಮನ್ತೋ? ಯಾ ತೀಹಿ ಕಾಯದುಚ್ಚರಿತೇಹಿ ಆರತಿ ವಿರತಿ ಪಟಿವಿರತಿ ವೇರಮಣೀ ಅಕಿರಿಯಾ ಅಕರಣಂ ಅನಜ್ಝಾಪತ್ತಿ ವೇಲಾಅನತಿಕ್ಕಮೋ ಸೇತುಘಾತೋ ಸಮ್ಮಾಕಮ್ಮನ್ತೋ ಮಗ್ಗಙ್ಗಂ ಮಗ್ಗಪರಿಯಾಪನ್ನಂ – ಅಯಂ ವುಚ್ಚತಿ ‘‘ಸಮ್ಮಾಕಮ್ಮನ್ತೋ’’.

ತತ್ಥ ಕತಮೋ ಸಮ್ಮಾಆಜೀವೋ? ಯಾ ಮಿಚ್ಛಾ ಆಜೀವಾ ಆರತಿ ವಿರತಿ ಪಟಿವಿರತಿ ವೇರಮಣೀ ಅಕಿರಿಯಾ ಅಕರಣಂ ಅನಜ್ಝಾಪತ್ತಿ ವೇಲಾಅನತಿಕ್ಕಮೋ ಸೇತುಘಾತೋ ಸಮ್ಮಾಆಜೀವೋ ಮಗ್ಗಙ್ಗಂ ಮಗ್ಗಪರಿಯಾಪನ್ನಂ – ಅಯಂ ವುಚ್ಚತಿ ‘‘ಸಮ್ಮಾಆಜೀವೋ’’.

ತತ್ಥ ಕತಮೋ ಸಮ್ಮಾವಾಯಾಮೋ? ಯೋ ಚೇತಸಿಕೋ ವೀರಿಯಾರಮ್ಭೋ [ವಿರಿಯಾರಮ್ಭೋ (ಸೀ. ಸ್ಯಾ.)] …ಪೇ… ಸಮ್ಮಾವಾಯಾಮೋ ವೀರಿಯಸಮ್ಬೋಜ್ಝಙ್ಗೋ ಮಗ್ಗಙ್ಗಂ ಮಗ್ಗಪರಿಯಾಪನ್ನಂ – ಅಯಂ ವುಚ್ಚತಿ ‘‘ಸಮ್ಮಾವಾಯಾಮೋ’’.

ತತ್ಥ ಕತಮಾ ಸಮ್ಮಾಸತಿ? ಯಾ ಸತಿ ಅನುಸ್ಸತಿ…ಪೇ… ಸಮ್ಮಾಸತಿ ಸತಿಸಮ್ಬೋಜ್ಝಙ್ಗೋ ಮಗ್ಗಙ್ಗಂ ಮಗ್ಗಪರಿಯಾಪನ್ನಂ – ಅಯಂ ವುಚ್ಚತಿ ‘‘ಸಮ್ಮಾಸತಿ’’.

ತತ್ಥ ಕತಮೋ ಸಮ್ಮಾಸಮಾಧಿ? ಯಾ ಚಿತ್ತಸ್ಸ ಠಿತಿ ಸಣ್ಠಿತಿ…ಪೇ… ಸಮ್ಮಾಸಮಾಧಿ ಸಮಾಧಿಸಮ್ಬೋಜ್ಝಙ್ಗೋ ಮಗ್ಗಙ್ಗಂ ಮಗ್ಗಪರಿಯಾಪನ್ನಂ – ಅಯಂ ವುಚ್ಚತಿ ‘‘ಸಮ್ಮಾಸಮಾಧಿ’’. ಅಯಂ ವುಚ್ಚತಿ ‘‘ದುಕ್ಖನಿರೋಧಗಾಮಿನೀ ಪಟಿಪದಾ’’. ಅವಸೇಸಾ ಧಮ್ಮಾ ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಸಮ್ಪಯುತ್ತಾ.

೨೦೭. ತತ್ಥ ಕತಮೋ ದುಕ್ಖಸಮುದಯೋ? ತಣ್ಹಾ ಚ ಅವಸೇಸಾ ಚ ಕಿಲೇಸಾ – ಅಯಂ ವುಚ್ಚತಿ ‘‘ದುಕ್ಖಸಮುದಯೋ’’.

ತತ್ಥ ಕತಮಂ ದುಕ್ಖಂ? ಅವಸೇಸಾ ಚ ಅಕುಸಲಾ ಧಮ್ಮಾ, ತೀಣಿ ಚ ಕುಸಲಮೂಲಾನಿ ಸಾಸವಾನಿ, ಅವಸೇಸಾ ಚ ಸಾಸವಾ ಕುಸಲಾ ಧಮ್ಮಾ, ಸಾಸವಾ ಚ ಕುಸಲಾಕುಸಲಾನಂ ಧಮ್ಮಾನಂ ವಿಪಾಕಾ, ಯೇ ಚ ಧಮ್ಮಾ ಕಿರಿಯಾ ನೇವ ಕುಸಲಾ ನಾಕುಸಲಾ ನ ಚ ಕಮ್ಮವಿಪಾಕಾ, ಸಬ್ಬಞ್ಚ ರೂಪಂ – ಇದಂ ವುಚ್ಚತಿ ‘‘ದುಕ್ಖಂ’’.

ತತ್ಥ ಕತಮೋ ದುಕ್ಖನಿರೋಧೋ? ತಣ್ಹಾಯ ಚ, ಅವಸೇಸಾನಞ್ಚ ಕಿಲೇಸಾನಂ ಪಹಾನಂ – ಅಯಂ ವುಚ್ಚತಿ ‘‘ದುಕ್ಖನಿರೋಧೋ’’.

ತತ್ಥ ಕತಮಾ ದುಕ್ಖನಿರೋಧಗಾಮಿನೀ ಪಟಿಪದಾ? ಇಧ ಭಿಕ್ಖು ಯಸ್ಮಿಂ ಸಮಯೇ ಲೋಕುತ್ತರಂ ಝಾನಂ ಭಾವೇತಿ ನಿಯ್ಯಾನಿಕಂ ಅಪಚಯಗಾಮಿಂ ದಿಟ್ಠಿಗತಾನಂ ಪಹಾನಾಯ ಪಠಮಾಯ ಭೂಮಿಯಾ ಪತ್ತಿಯಾ, ವಿವಿಚ್ಚೇವ ಕಾಮೇಹಿ…ಪೇ… ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ ದುಕ್ಖಪಟಿಪದಂ ದನ್ಧಾಭಿಞ್ಞಂ, ತಸ್ಮಿಂ ಸಮಯೇ ಅಟ್ಠಙ್ಗಿಕೋ ಮಗ್ಗೋ ಹೋತಿ – ಸಮ್ಮಾದಿಟ್ಠಿ…ಪೇ… ಸಮ್ಮಾಸಮಾಧಿ. ಅಯಂ ವುಚ್ಚತಿ – ‘‘ದುಕ್ಖನಿರೋಧಗಾಮಿನೀ ಪಟಿಪದಾ’’. ಅವಸೇಸಾ ಧಮ್ಮಾ ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಸಮ್ಪಯುತ್ತಾ.

೨೦೮. ತತ್ಥ ಕತಮೋ ದುಕ್ಖಸಮುದಯೋ? ತಣ್ಹಾ ಚ ಅವಸೇಸಾ ಚ ಕಿಲೇಸಾ, ಅವಸೇಸಾ ಚ ಅಕುಸಲಾ ಧಮ್ಮಾ – ಅಯಂ ವುಚ್ಚತಿ ‘‘ದುಕ್ಖಸಮುದಯೋ’’.

ತತ್ಥ ಕತಮಂ ದುಕ್ಖಂ? ತೀಣಿ ಚ ಕುಸಲಮೂಲಾನಿ ಸಾಸವಾನಿ, ಅವಸೇಸಾ ಚ ಸಾಸವಾ ಕುಸಲಾ ಧಮ್ಮಾ, ಸಾಸವಾ ಚ ಕುಸಲಾಕುಸಲಾನಂ ಧಮ್ಮಾನಂ ವಿಪಾಕಾ, ಯೇ ಚ ಧಮ್ಮಾ ಕಿರಿಯಾ ನೇವ ಕುಸಲಾ ನಾಕುಸಲಾ ನ ಚ ಕಮ್ಮವಿಪಾಕಾ, ಸಬ್ಬಞ್ಚ ರೂಪಂ – ಇದಂ ವುಚ್ಚತಿ ‘‘ದುಕ್ಖಂ’’.

ತತ್ಥ ಕತಮೋ ದುಕ್ಖನಿರೋಧೋ? ತಣ್ಹಾಯ ಚ, ಅವಸೇಸಾನಞ್ಚ ಕಿಲೇಸಾನಂ, ಅವಸೇಸಾನಞ್ಚ ಅಕುಸಲಾನಂ ಧಮ್ಮಾನಂ ಪಹಾನಂ – ಅಯಂ ವುಚ್ಚತಿ ‘‘ದುಕ್ಖನಿರೋಧೋ’’.

ತತ್ಥ ಕತಮಾ ದುಕ್ಖನಿರೋಧಗಾಮಿನೀ ಪಟಿಪದಾ? ಇಧ ಭಿಕ್ಖು ಯಸ್ಮಿಂ ಸಮಯೇ ಲೋಕುತ್ತರಂ ಝಾನಂ ಭಾವೇತಿ ನಿಯ್ಯಾನಿಕಂ ಅಪಚಯಗಾಮಿಂ ದಿಟ್ಠಿಗತಾನಂ ಪಹಾನಾಯ ಪಠಮಾಯ ಭೂಮಿಯಾ ಪತ್ತಿಯಾ ವಿವಿಚ್ಚೇವ ಕಾಮೇಹಿ…ಪೇ… ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ ದುಕ್ಖಪಟಿಪದಂ ದನ್ಧಾಭಿಞ್ಞಂ, ತಸ್ಮಿಂ ಸಮಯೇ ಅಟ್ಠಙ್ಗಿಕೋ ಮಗ್ಗೋ ಹೋತಿ – ಸಮ್ಮಾದಿಟ್ಠಿ…ಪೇ… ಸಮ್ಮಾಸಮಾಧಿ. ಅಯಂ ವುಚ್ಚತಿ ‘‘ದುಕ್ಖನಿರೋಧಗಾಮಿನೀ ಪಟಿಪದಾ’’. ಅವಸೇಸಾ ಧಮ್ಮಾ ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಸಮ್ಪಯುತ್ತಾ.

೨೦೯. ತತ್ಥ ಕತಮೋ ದುಕ್ಖಸಮುದಯೋ? ತಣ್ಹಾ ಚ ಅವಸೇಸಾ ಚ ಕಿಲೇಸಾ, ಅವಸೇಸಾ ಚ ಅಕುಸಲಾ ಧಮ್ಮಾ, ತೀಣಿ ಚ ಕುಸಲಮೂಲಾನಿ ಸಾಸವಾನಿ – ಅಯಂ ವುಚ್ಚತಿ ‘‘ದುಕ್ಖಸಮುದಯೋ’’.

ತತ್ಥ ಕತಮಂ ದುಕ್ಖಂ? ಅವಸೇಸಾ ಚ ಸಾಸವಾ ಕುಸಲಾ ಧಮ್ಮಾ, ಸಾಸವಾ ಚ ಕುಸಲಾಕುಸಲಾನಂ ಧಮ್ಮಾನಂ ವಿಪಾಕಾ, ಯೇ ಚ ಧಮ್ಮಾ ಕಿರಿಯಾ ನೇವ ಕುಸಲಾ ನಾಕುಸಲಾ ನ ಚ ಕಮ್ಮವಿಪಾಕಾ, ಸಬ್ಬಞ್ಚ ರೂಪಂ – ಇದಂ ವುಚ್ಚತಿ ‘‘ದುಕ್ಖಂ’’.

ತತ್ಥ ಕತಮೋ ದುಕ್ಖನಿರೋಧೋ? ತಣ್ಹಾಯ ಚ, ಅವಸೇಸಾನಞ್ಚ ಕಿಲೇಸಾನಂ, ಅವಸೇಸಾನಞ್ಚ ಅಕುಸಲಾನಂ ಧಮ್ಮಾನಂ, ತಿಣ್ಣಞ್ಚ ಕುಸಲಮೂಲಾನಂ ಸಾಸವಾನಂ ಪಹಾನಂ – ಅಯಂ ವುಚ್ಚತಿ ‘‘ದುಕ್ಖನಿರೋಧೋ’’.

೨೧೦. ತತ್ಥ ಕತಮೋ ದುಕ್ಖಸಮುದಯೋ? ತಣ್ಹಾ ಚ, ಅವಸೇಸಾ ಚ ಕಿಲೇಸಾ, ಅವಸೇಸಾ ಚ ಅಕುಸಲಾ ಧಮ್ಮಾ, ತೀಣಿ ಚ ಕುಸಲಮೂಲಾನಿ ಸಾಸವಾನಿ, ಅವಸೇಸಾ ಚ ಸಾಸವಾ ಕುಸಲಾ ಧಮ್ಮಾ – ಅಯಂ ವುಚ್ಚತಿ ‘‘ದುಕ್ಖಸಮುದಯೋ’’.

ತತ್ಥ ಕತಮಂ ದುಕ್ಖಂ? ಸಾಸವಾ ಕುಸಲಾಕುಸಲಾನಂ ಧಮ್ಮಾನಂ ವಿಪಾಕಾ, ಯೇ ಚ ಧಮ್ಮಾ ಕಿರಿಯಾ ನೇವ ಕುಸಲಾ ನಾಕುಸಲಾ ನ ಚ ಕಮ್ಮವಿಪಾಕಾ, ಸಬ್ಬಞ್ಚ ರೂಪಂ – ಇದಂ ವುಚ್ಚತಿ ‘‘ದುಕ್ಖಂ’’.

ತತ್ಥ ಕತಮೋ ದುಕ್ಖನಿರೋಧೋ? ತಣ್ಹಾಯ ಚ, ಅವಸೇಸಾನಞ್ಚ ಕಿಲೇಸಾನಂ, ಅವಸೇಸಾನಞ್ಚ ಅಕುಸಲಾನಂ ಧಮ್ಮಾನಂ, ತಿಣ್ಣಞ್ಚ ಕುಸಲಮೂಲಾನಂ ಸಾಸವಾನಂ, ಅವಸೇಸಾನಞ್ಚ ಸಾಸವಾನಂ ಕುಸಲಾನಂ ಧಮ್ಮಾನಂ ಪಹಾನಂ – ಅಯಂ ವುಚ್ಚತಿ ‘‘ದುಕ್ಖನಿರೋಧೋ’’.

ತತ್ಥ ಕತಮಾ ದುಕ್ಖನಿರೋಧಗಾಮಿನೀ ಪಟಿಪದಾ? ಇಧ ಭಿಕ್ಖು ಯಸ್ಮಿಂ ಸಮಯೇ ಲೋಕುತ್ತರಂ ಝಾನಂ ಭಾವೇತಿ ನಿಯ್ಯಾನಿಕಂ ಅಪಚಯಗಾಮಿಂ ದಿಟ್ಠಿಗತಾನಂ ಪಹಾನಾಯ ಪಠಮಾಯ ಭೂಮಿಯಾ ಪತ್ತಿಯಾ, ವಿವಿಚ್ಚೇವ ಕಾಮೇಹಿ…ಪೇ… ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ ದುಕ್ಖಪಟಿಪದಂ ದನ್ಧಾಭಿಞ್ಞಂ, ತಸ್ಮಿಂ ಸಮಯೇ ಅಟ್ಠಙ್ಗಿಕೋ ಮಗ್ಗೋ ಹೋತಿ – ಸಮ್ಮಾದಿಟ್ಠಿ…ಪೇ… ಸಮ್ಮಾಸಮಾಧಿ. ಅಯಂ ವುಚ್ಚತಿ ‘‘ದುಕ್ಖನಿರೋಧಗಾಮಿನೀ ಪಟಿಪದಾ’’. ಅವಸೇಸಾ ಧಮ್ಮಾ ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಸಮ್ಪಯುತ್ತಾ.

೨೧೧. ಚತ್ತಾರಿ ಸಚ್ಚಾನಿ – ದುಕ್ಖಂ, ದುಕ್ಖಸಮುದಯೋ, ದುಕ್ಖನಿರೋಧೋ, ದುಕ್ಖನಿರೋಧಗಾಮಿನೀ ಪಟಿಪದಾ.

ತತ್ಥ ಕತಮೋ ದುಕ್ಖಸಮುದಯೋ? ತಣ್ಹಾ – ಅಯಂ ವುಚ್ಚತಿ ‘‘ದುಕ್ಖಸಮುದಯೋ’’.

ತತ್ಥ ಕತಮೋ ದುಕ್ಖನಿರೋಧೋ? ತಣ್ಹಾಯ ಪಹಾನಂ – ಅಯಂ ವುಚ್ಚತಿ ‘‘ದುಕ್ಖನಿರೋಧೋ’’.

ತತ್ಥ ಕತಮಾ ದುಕ್ಖನಿರೋಧಗಾಮಿನೀ ಪಟಿಪದಾ? ಇಧ ಭಿಕ್ಖು ಯಸ್ಮಿಂ ಸಮಯೇ ಲೋಕುತ್ತರಂ ಝಾನಂ ಭಾವೇತಿ ನಿಯ್ಯಾನಿಕಂ ಅಪಚಯಗಾಮಿಂ ದಿಟ್ಠಿಗತಾನಂ ಪಹಾನಾಯ ಪಠಮಾಯ ಭೂಮಿಯಾ ಪತ್ತಿಯಾ, ವಿವಿಚ್ಚೇವ ಕಾಮೇಹಿ…ಪೇ… ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ ದುಕ್ಖಪಟಿಪದಂ ದನ್ಧಾಭಿಞ್ಞಂ, ತಸ್ಮಿಂ ಸಮಯೇ ಪಞ್ಚಙ್ಗಿಕೋ ಮಗ್ಗೋ ಹೋತಿ – ಸಮ್ಮಾದಿಟ್ಠಿ, ಸಮ್ಮಾಸಙ್ಕಪ್ಪೋ, ಸಮ್ಮಾವಾಯಾಮೋ, ಸಮ್ಮಾಸತಿ, ಸಮ್ಮಾಸಮಾಧಿ.

ತತ್ಥ ಕತಮೋ ಸಮ್ಮಾವಾಯಾಮೋ? ಯೋ ಚೇತಸಿಕೋ ವೀರಿಯಾರಮ್ಭೋ…ಪೇ… ಸಮ್ಮಾವಾಯಾಮೋ ವೀರಿಯಸಮ್ಬೋಜ್ಝಙ್ಗೋ ಮಗ್ಗಙ್ಗಂ ಮಗ್ಗಪರಿಯಾಪನ್ನಂ – ಅಯಂ ವುಚ್ಚತಿ ‘‘ಸಮ್ಮಾವಾಯಾಮೋ’’.

ತತ್ಥ ಕತಮೋ ಸಮ್ಮಾಸಮಾಧಿ? ಯಾ ಚಿತ್ತಸ್ಸ ಠಿತಿ…ಪೇ… ಸಮ್ಮಾಸಮಾಧಿ ಸಮಾಧಿಸಮ್ಬೋಜ್ಝಙ್ಗೋ ಮಗ್ಗಙ್ಗಂ ಮಗ್ಗಪರಿಯಾಪನ್ನಂ – ಅಯಂ ವುಚ್ಚತಿ ‘‘ಸಮ್ಮಾಸಮಾಧಿ’’. ಅಯಂ ವುಚ್ಚತಿ ‘‘ದುಕ್ಖನಿರೋಧಗಾಮಿನೀ ಪಟಿಪದಾ’’. ಅವಸೇಸಾ ಧಮ್ಮಾ ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಸಮ್ಪಯುತ್ತಾ.

೨೧೨. ತತ್ಥ ಕತಮೋ ದುಕ್ಖಸಮುದಯೋ? ತಣ್ಹಾ ಚ, ಅವಸೇಸಾ ಚ ಕಿಲೇಸಾ, ಅವಸೇಸಾ ಚ ಅಕುಸಲಾ ಧಮ್ಮಾ, ತೀಣಿ ಚ ಕುಸಲಮೂಲಾನಿ ಸಾಸವಾನಿ, ಅವಸೇಸಾ ಚ ಸಾಸವಾ ಕುಸಲಾ ಧಮ್ಮಾ – ಅಯಂ ವುಚ್ಚತಿ ‘‘ದುಕ್ಖಸಮುದಯೋ’’.

ತತ್ಥ ಕತಮಾ ದುಕ್ಖನಿರೋಧಗಾಮಿನೀ ಪಟಿಪದಾ? ಇಧ ಭಿಕ್ಖು ಯಸ್ಮಿಂ ಸಮಯೇ ಲೋಕುತ್ತರಂ ಝಾನಂ ಭಾವೇತಿ ನಿಯ್ಯಾನಿಕಂ ಅಪಚಯಗಾಮಿಂ ದಿಟ್ಠಿಗತಾನಂ ಪಹಾನಾಯ ಪಠಮಾಯ ಭೂಮಿಯಾ ಪತ್ತಿಯಾ, ವಿವಿಚ್ಚೇವ ಕಾಮೇಹಿ…ಪೇ… ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ ದುಕ್ಖಪಟಿಪದಂ ದನ್ಧಾಭಿಞ್ಞಂ, ತಸ್ಮಿಂ ಸಮಯೇ ಪಞ್ಚಙ್ಗಿಕೋ ಮಗ್ಗೋ ಹೋತಿ – ಸಮ್ಮಾದಿಟ್ಠಿ, ಸಮ್ಮಾಸಙ್ಕಪ್ಪೋ, ಸಮ್ಮಾವಾಯಾಮೋ, ಸಮ್ಮಾಸತಿ, ಸಮ್ಮಾಸಮಾಧಿ. ಅಯಂ ವುಚ್ಚತಿ ‘‘ದುಕ್ಖನಿರೋಧಗಾಮಿನೀ ಪಟಿಪದಾ’’. ಅವಸೇಸಾ ಧಮ್ಮಾ ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಸಮ್ಪಯುತ್ತಾ.

೨೧೩. ಚತ್ತಾರಿ ಸಚ್ಚಾನಿ – ದುಕ್ಖಂ, ದುಕ್ಖಸಮುದಯೋ, ದುಕ್ಖನಿರೋಧೋ, ದುಕ್ಖನಿರೋಧಗಾಮಿನೀ ಪಟಿಪದಾ.

ತತ್ಥ ಕತಮೋ ದುಕ್ಖಸಮುದಯೋ? ತಣ್ಹಾ – ಅಯಂ ವುಚ್ಚತಿ ‘‘ದುಕ್ಖಸಮುದಯೋ’’.

ತತ್ಥ ಕತಮೋ ದುಕ್ಖನಿರೋಧೋ? ತಣ್ಹಾಯ ಪಹಾನಂ – ಅಯಂ ವುಚ್ಚತಿ ‘‘ದುಕ್ಖನಿರೋಧೋ’’.

ತತ್ಥ ಕತಮಾ ದುಕ್ಖನಿರೋಧಗಾಮಿನೀ ಪಟಿಪದಾ? ಇಧ ಭಿಕ್ಖು ಯಸ್ಮಿಂ ಸಮಯೇ ಲೋಕುತ್ತರಂ ಝಾನಂ ಭಾವೇತಿ ನಿಯ್ಯಾನಿಕಂ ಅಪಚಯಗಾಮಿಂ ದಿಟ್ಠಿಗತಾನಂ ಪಹಾನಾಯ ಪಠಮಾಯ ಭೂಮಿಯಾ ಪತ್ತಿಯಾ ವಿವಿಚ್ಚೇವ ಕಾಮೇಹಿ…ಪೇ… ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ ದುಕ್ಖಪಟಿಪದಂ ದನ್ಧಾಭಿಞ್ಞಂ, ತಸ್ಮಿಂ ಸಮಯೇ ಫಸ್ಸೋ ಹೋತಿ…ಪೇ… ಅವಿಕ್ಖೇಪೋ ಹೋತಿ. ಅಯಂ ವುಚ್ಚತಿ ‘‘ದುಕ್ಖನಿರೋಧಗಾಮಿನೀ ಪಟಿಪದಾ’’.

೨೧೪. ತತ್ಥ ಕತಮೋ ದುಕ್ಖಸಮುದಯೋ? ತಣ್ಹಾ ಚ, ಅವಸೇಸಾ ಚ ಕಿಲೇಸಾ, ಅವಸೇಸಾ ಚ ಅಕುಸಲಾ ಧಮ್ಮಾ, ತೀಣಿ ಚ ಕುಸಲಮೂಲಾನಿ ಸಾಸವಾನಿ, ಅವಸೇಸಾ ಚ ಸಾಸವಾ ಕುಸಲಾ ಧಮ್ಮಾ – ಅಯಂ ವುಚ್ಚತಿ ‘‘ದುಕ್ಖಸಮುದಯೋ’’.

ತತ್ಥ ಕತಮಾ ದುಕ್ಖನಿರೋಧಗಾಮಿನೀ ಪಟಿಪದಾ? ಇಧ ಭಿಕ್ಖು ಯಸ್ಮಿಂ ಸಮಯೇ ಲೋಕುತ್ತರಂ ಝಾನಂ ಭಾವೇತಿ ನಿಯ್ಯಾನಿಕಂ ಅಪಚಯಗಾಮಿಂ ದಿಟ್ಠಿಗತಾನಂ ಪಹಾನಾಯ ಪಠಮಾಯ ಭೂಮಿಯಾ ಪತ್ತಿಯಾ ವಿವಿಚ್ಚೇವ ಕಾಮೇಹಿ…ಪೇ… ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ ದುಕ್ಖಪಟಿಪದಂ ದನ್ಧಾಭಿಞ್ಞಂ, ತಸ್ಮಿಂ ಸಮಯೇ ಫಸ್ಸೋ ಹೋತಿ…ಪೇ… ಅವಿಕ್ಖೇಪೋ ಹೋತಿ. ಅಯಂ ವುಚ್ಚತಿ ‘‘ದುಕ್ಖನಿರೋಧಗಾಮಿನೀ ಪಟಿಪದಾ’’.

ಅಭಿಧಮ್ಮಭಾಜನೀಯಂ.

೩. ಪಞ್ಹಾಪುಚ್ಛಕಂ

೨೧೫. ಚತ್ತಾರಿ ಅರಿಯಸಚ್ಚಾನಿ – ದುಕ್ಖಂ ಅರಿಯಸಚ್ಚಂ, ದುಕ್ಖಸಮುದಯಂ ಅರಿಯಸಚ್ಚಂ, ದುಕ್ಖನಿರೋಧಂ ಅರಿಯಸಚ್ಚಂ, ದುಕ್ಖನಿರೋಧಗಾಮಿನೀ ಪಟಿಪದಾ ಅರಿಯಸಚ್ಚಂ.

೨೧೬. ಚತುನ್ನಂ ಅರಿಯಸಚ್ಚಾನಂ ಕತಿ ಕುಸಲಾ, ಕತಿ ಅಕುಸಲಾ, ಕತಿ ಅಬ್ಯಾಕತಾ…ಪೇ… ಕತಿ ಸರಣಾ, ಕತಿ ಅರಣಾ?

೧. ತಿಕಂ

೨೧೭. ಸಮುದಯಸಚ್ಚಂ ಅಕುಸಲಂ. ಮಗ್ಗಸಚ್ಚಂ ಕುಸಲಂ. ನಿರೋಧಸಚ್ಚಂ ಅಬ್ಯಾಕತಂ. ದುಕ್ಖಸಚ್ಚಂ ಸಿಯಾ ಕುಸಲಂ, ಸಿಯಾ ಅಕುಸಲಂ, ಸಿಯಾ ಅಬ್ಯಾಕತಂ. ದ್ವೇ ಸಚ್ಚಾ ಸಿಯಾ ಸುಖಾಯ ವೇದನಾಯ ಸಮ್ಪಯುತ್ತಾ, ಸಿಯಾ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ. ನಿರೋಧಸಚ್ಚಂ ನ ವತ್ತಬ್ಬಂ – ‘‘ಸುಖಾಯ ವೇದನಾಯ ಸಮ್ಪಯುತ್ತ’’ನ್ತಿಪಿ, ‘‘ದುಕ್ಖಾಯ ವೇದನಾಯ ಸಮ್ಪಯುತ್ತ’’ನ್ತಿಪಿ, ‘‘ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತ’’ನ್ತಿಪಿ. ದುಕ್ಖಸಚ್ಚಂ ಸಿಯಾ ಸುಖಾಯ ವೇದನಾಯ ಸಮ್ಪಯುತ್ತಂ, ಸಿಯಾ ದುಕ್ಖಾಯ ವೇದನಾಯ ಸಮ್ಪಯುತ್ತಂ, ಸಿಯಾ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಂ, ಸಿಯಾ ನ ವತ್ತಬ್ಬಂ – ‘‘ಸುಖಾಯ ವೇದನಾಯ ಸಮ್ಪಯುತ್ತ’’ನ್ತಿಪಿ, ‘‘ದುಕ್ಖಾಯ ವೇದನಾಯ ಸಮ್ಪಯುತ್ತ’’ನ್ತಿಪಿ, ‘‘ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತ’’ನ್ತಿಪಿ. ದ್ವೇ ಸಚ್ಚಾ ವಿಪಾಕಧಮ್ಮಧಮ್ಮಾ. ನಿರೋಧಸಚ್ಚಂ ನೇವವಿಪಾಕನವಿಪಾಕಧಮ್ಮಧಮ್ಮಂ. ದುಕ್ಖಸಚ್ಚಂ ಸಿಯಾ ವಿಪಾಕಂ, ಸಿಯಾ ವಿಪಾಕಧಮ್ಮಧಮ್ಮಂ, ಸಿಯಾ ನೇವವಿಪಾಕನವಿಪಾಕಧಮ್ಮಧಮ್ಮಂ. ಸಮುದಯಸಚ್ಚಂ ಅನುಪಾದಿನ್ನುಪಾದಾನಿಯಂ. ದ್ವೇ ಸಚ್ಚಾ ಅನುಪಾದಿನ್ನಅನುಪಾದಾನಿಯಾ. ದುಕ್ಖಸಚ್ಚಂ ಸಿಯಾ ಉಪಾದಿನ್ನುಪಾದಾನಿಯಂ, ಸಿಯಾ ಅನುಪಾದಿನ್ನುಪಾದಾನಿಯಂ.

ಸಮುದಯಸಚ್ಚಂ ಸಂಕಿಲಿಟ್ಠಸಂಕಿಲೇಸಿಕಂ. ದ್ವೇ ಸಚ್ಚಾ ಅಸಂಕಿಲಿಟ್ಠಅಸಂಕಿಲೇಸಿಕಾ. ದುಕ್ಖಸಚ್ಚಂ ಸಿಯಾ ಸಂಕಿಲಿಟ್ಠಸಂಕಿಲೇಸಿಕಂ, ಸಿಯಾ ಅಸಂಕಿಲಿಟ್ಠಸಂಕಿಲೇಸಿಕಂ. ಸಮುದಯಸಚ್ಚಂ ಸವಿತಕ್ಕಸವಿಚಾರಂ. ನಿರೋಧಸಚ್ಚಂ ಅವಿತಕ್ಕಅವಿಚಾರಂ. ಮಗ್ಗಸಚ್ಚಂ ಸಿಯಾ ಸವಿತಕ್ಕಸವಿಚಾರಂ, ಸಿಯಾ ಅವಿತಕ್ಕವಿಚಾರಮತ್ತಂ, ಸಿಯಾ ಅವಿತಕ್ಕಅವಿಚಾರಂ. ದುಕ್ಖಸಚ್ಚಂ ಸಿಯಾ ಸವಿತಕ್ಕಸವಿಚಾರಂ, ಸಿಯಾ ಅವಿತಕ್ಕವಿಚಾರಮತ್ತಂ, ಸಿಯಾ ಅವಿತಕ್ಕಅವಿಚಾರಂ, ಸಿಯಾ ನ ವತ್ತಬ್ಬಂ – ‘‘ಸವಿತಕ್ಕಸವಿಚಾರ’’ನ್ತಿಪಿ, ‘‘ಅವಿತಕ್ಕವಿಚಾರಮತ್ತ’’ನ್ತಿಪಿ, ‘‘ಅವಿತಕ್ಕಅವಿಚಾರ’’ನ್ತಿಪಿ. ದ್ವೇ ಸಚ್ಚಾ ಸಿಯಾ ಪೀತಿಸಹಗತಾ, ಸಿಯಾ ಸುಖಸಹಗತಾ, ಸಿಯಾ ಉಪೇಕ್ಖಾಸಹಗತಾ. ನಿರೋಧಸಚ್ಚಂ ನ ವತ್ತಬ್ಬಂ – ‘‘ಪೀತಿಸಹಗತ’’ನ್ತಿಪಿ, ‘‘ಸುಖಸಹಗತ’’ನ್ತಿಪಿ, ‘‘ಉಪೇಕ್ಖಾಸಹಗತ’’ನ್ತಿಪಿ. ದುಕ್ಖಸಚ್ಚಂ ಸಿಯಾ ಪೀತಿಸಹಗತಂ, ಸಿಯಾ ಸುಖಸಹಗತಂ, ಸಿಯಾ ಉಪೇಕ್ಖಾಸಹಗತಂ, ಸಿಯಾ ನ ವತ್ತಬ್ಬಂ – ‘‘ಪೀತಿಸಹಗತ’’ನ್ತಿಪಿ, ‘‘ಸುಖಸಹಗತ’’ನ್ತಿಪಿ, ‘‘ಉಪೇಕ್ಖಾಸಹಗತ’’ನ್ತಿಪಿ.

ದ್ವೇ ಸಚ್ಚಾ ನೇವ ದಸ್ಸನೇನ ನ ಭಾವನಾಯ ಪಹಾತಬ್ಬಾ. ಸಮುದಯಸಚ್ಚಂ ಸಿಯಾ ದಸ್ಸನೇನ ಪಹಾತಬ್ಬಂ, ಸಿಯಾ ಭಾವನಾಯ ಪಹಾತಬ್ಬಂ. ದುಕ್ಖಸಚ್ಚಂ ಸಿಯಾ ದಸ್ಸನೇನ ಪಹಾತಬ್ಬಂ, ಸಿಯಾ ಭಾವನಾಯ ಪಹಾತಬ್ಬಂ, ಸಿಯಾ ನೇವ ದಸ್ಸನೇನ ನ ಭಾವನಾಯ ಪಹಾತಬ್ಬಂ. ದ್ವೇ ಸಚ್ಚಾ ನೇವ ದಸ್ಸನೇನ ನ ಭಾವನಾಯ ಪಹಾತಬ್ಬಹೇತುಕಾ. ಸಮುದಯಸಚ್ಚಂ ಸಿಯಾ ದಸ್ಸನೇನ ಪಹಾತಬ್ಬಹೇತುಕಂ, ಸಿಯಾ ಭಾವನಾಯ ಪಹಾತಬ್ಬಹೇತುಕಂ. ದುಕ್ಖಸಚ್ಚಂ ಸಿಯಾ ದಸ್ಸನೇನ ಪಹಾತಬ್ಬಹೇತುಕಂ, ಸಿಯಾ ಭಾವನಾಯ ಪಹಾತಬ್ಬಹೇತುಕಂ, ಸಿಯಾ ನೇವ ದಸ್ಸನೇನ ನ ಭಾವನಾಯ ಪಹಾತಬ್ಬಹೇತುಕಂ. ಸಮುದಯಸಚ್ಚಂ ಆಚಯಗಾಮಿ. ಮಗ್ಗಸಚ್ಚಂ ಅಪಚಯಗಾಮಿ. ನಿರೋಧಸಚ್ಚಂ ನೇವಾಚಯಗಾಮಿನಾಪಚಯಗಾಮಿ. ದುಕ್ಖಸಚ್ಚಂ ಸಿಯಾ ಆಚಯಗಾಮಿ, ಸಿಯಾ ನೇವಾಚಯಗಾಮಿನಾಪಚಯಗಾಮಿ. ಮಗ್ಗಸಚ್ಚಂ ಸೇಕ್ಖಂ. ತೀಣಿ ಸಚ್ಚಾನಿ ನೇವಸೇಕ್ಖನಾಸೇಕ್ಖಾ. ಸಮುದಯಸಚ್ಚಂ ಪರಿತ್ತಂ. ದ್ವೇ ಸಚ್ಚಾ ಅಪ್ಪಮಾಣಾ. ದುಕ್ಖಸಚ್ಚಂ ಸಿಯಾ ಪರಿತ್ತಂ, ಸಿಯಾ ಮಹಗ್ಗತಂ. ನಿರೋಧಸಚ್ಚಂ ಅನಾರಮ್ಮಣಂ. ಮಗ್ಗಸಚ್ಚಂ ಅಪ್ಪಮಾಣಾರಮ್ಮಣಂ. ಸಮುದಯಸಚ್ಚಂ ಸಿಯಾ ಪರಿತ್ತಾರಮ್ಮಣಂ, ಸಿಯಾ ಮಹಗ್ಗತಾರಮ್ಮಣಂ ನ ಅಪ್ಪಮಾಣಾರಮ್ಮಣಂ, ಸಿಯಾ ನ ವತ್ತಬ್ಬಂ – ‘‘ಪರಿತ್ತಾರಮ್ಮಣ’’ನ್ತಿಪಿ, ‘‘ಮಹಗ್ಗತಾರಮ್ಮಣ’’ನ್ತಿಪಿ. ದುಕ್ಖಸಚ್ಚಂ ಸಿಯಾ ಪರಿತ್ತಾರಮ್ಮಣಂ, ಸಿಯಾ ಮಹಗ್ಗತಾರಮ್ಮಣಂ, ಸಿಯಾ ಅಪ್ಪಮಾಣಾರಮ್ಮಣಂ, ಸಿಯಾ ನ ವತ್ತಬ್ಬಂ – ‘‘ಪರಿತ್ತಾರಮ್ಮಣ’’ನ್ತಿಪಿ, ‘‘ಮಹಗ್ಗತಾರಮ್ಮಣ’’ನ್ತಿಪಿ, ‘‘ಅಪ್ಪಮಾಣಾರಮ್ಮಣ’’ನ್ತಿಪಿ.

ಸಮುದಯಸಚ್ಚಂ ಹೀನಂ. ದ್ವೇ ಸಚ್ಚಾ ಪಣೀತಾ. ದುಕ್ಖಸಚ್ಚಂ ಸಿಯಾ ಹೀನಂ, ಸಿಯಾ ಮಜ್ಝಿಮಂ. ನಿರೋಧಸಚ್ಚಂ ಅನಿಯತಂ. ಮಗ್ಗಸಚ್ಚಂ ಸಮ್ಮತ್ತನಿಯತಂ. ದ್ವೇ ಸಚ್ಚಾ ಸಿಯಾ ಮಿಚ್ಛತ್ತನಿಯತಾ, ಸಿಯಾ ಅನಿಯತಾ. ನಿರೋಧಸಚ್ಚಂ ಅನಾರಮ್ಮಣಂ. ಸಮುದಯಸಚ್ಚಂ ನ ವತ್ತಬ್ಬಂ – ‘‘ಮಗ್ಗಾರಮ್ಮಣ’’ನ್ತಿಪಿ, ‘‘ಮಗ್ಗಹೇತುಕ’’ನ್ತಿಪಿ, ‘‘ಮಗ್ಗಾಧಿಪತೀ’’ತಿಪಿ. ಮಗ್ಗಸಚ್ಚಂ ನ ಮಗ್ಗಾರಮ್ಮಣಂ ಮಗ್ಗಹೇತುಕಂ, ಸಿಯಾ ಮಗ್ಗಾಧಿಪತಿ, ಸಿಯಾ ನ ವತ್ತಬ್ಬಂ – ‘‘ಮಗ್ಗಾಧಿಪತೀ’’ತಿ. ದುಕ್ಖಸಚ್ಚಂ ಸಿಯಾ ಮಗ್ಗಾರಮ್ಮಣಂ ನ ಮಗ್ಗಹೇತುಕಂ, ಸಿಯಾ ಮಗ್ಗಾಧಿಪತಿ, ಸಿಯಾ ನ ವತ್ತಬ್ಬಂ – ‘‘ಮಗ್ಗಾರಮ್ಮಣ’’ನ್ತಿಪಿ, ‘‘ಮಗ್ಗಾಧಿಪತೀ’’ತಿಪಿ. ದ್ವೇ ಸಚ್ಚಾ ಸಿಯಾ ಉಪ್ಪನ್ನಾ, ಸಿಯಾ ಅನುಪ್ಪನ್ನಾ, ನ ವತ್ತಬ್ಬಾ – ‘‘ಉಪ್ಪಾದಿನೋ’’ತಿ. ನಿರೋಧಸಚ್ಚಂ ನ ವತ್ತಬ್ಬಂ – ‘‘ಉಪ್ಪನ್ನ’’ನ್ತಿಪಿ, ‘‘ಅನುಪ್ಪನ್ನ’’ನ್ತಿಪಿ, ‘‘ಉಪ್ಪಾದೀ’’ತಿಪಿ. ದುಕ್ಖಸಚ್ಚಂ ಸಿಯಾ ಉಪ್ಪನ್ನಂ, ಸಿಯಾ ಅನುಪ್ಪನ್ನಂ, ಸಿಯಾ ಉಪ್ಪಾದಿ. ತೀಣಿ ಸಚ್ಚಾನಿ ಸಿಯಾ ಅತೀತಾ, ಸಿಯಾ ಅನಾಗತಾ, ಸಿಯಾ ಪಚ್ಚುಪ್ಪನ್ನಾ. ನಿರೋಧಸಚ್ಚಂ ನ ವತ್ತಬ್ಬಂ – ‘‘ಅತೀತ’’ನ್ತಿಪಿ, ‘‘ಅನಾಗತ’’ನ್ತಿಪಿ, ‘‘ಪಚ್ಚುಪ್ಪನ್ನ’’ನ್ತಿಪಿ. ನಿರೋಧಸಚ್ಚಂ ಅನಾರಮ್ಮಣಂ. ಮಗ್ಗಸಚ್ಚಂ ನ ವತ್ತಬ್ಬಂ – ‘‘ಅತೀತಾರಮ್ಮಣ’’ನ್ತಿಪಿ, ‘‘ಅನಾಗತಾರಮ್ಮಣ’’ನ್ತಿಪಿ, ‘‘ಪಚ್ಚುಪ್ಪನ್ನಾರಮ್ಮಣ’’ನ್ತಿಪಿ. ದ್ವೇ ಸಚ್ಚಾ ಸಿಯಾ ಅತೀತಾರಮ್ಮಣಾ, ಸಿಯಾ ಅನಾಗತಾರಮ್ಮಣಾ, ಸಿಯಾ ಪಚ್ಚುಪ್ಪನ್ನಾರಮ್ಮಣಾ, ಸಿಯಾ ನ ವತ್ತಬ್ಬಾ – ‘‘ಅತೀತಾರಮ್ಮಣಾ’’ತಿಪಿ, ‘‘ಅನಾಗತಾರಮ್ಮಣಾ’’ತಿಪಿ, ‘‘ಪಚ್ಚುಪ್ಪನ್ನಾರಮ್ಮಣಾ’’ತಿಪಿ. ನಿರೋಧಸಚ್ಚಂ ಬಹಿದ್ಧಾ. ತೀಣಿ ಸಚ್ಚಾನಿ ಸಿಯಾ ಅಜ್ಝತ್ತಾ, ಸಿಯಾ ಬಹಿದ್ಧಾ, ಸಿಯಾ ಅಜ್ಝತ್ತಬಹಿದ್ಧಾ. ನಿರೋಧಸಚ್ಚಂ ಅನಾರಮ್ಮಣಂ. ಮಗ್ಗಸಚ್ಚಂ ಬಹಿದ್ಧಾರಮ್ಮಣಂ. ಸಮುದಯಸಚ್ಚಂ ಸಿಯಾ ಅಜ್ಝತ್ತಾರಮ್ಮಣಂ, ಸಿಯಾ ಬಹಿದ್ಧಾರಮ್ಮಣಂ, ಸಿಯಾ ಅಜ್ಝತ್ತಬಹಿದ್ಧಾರಮ್ಮಣಂ. ದುಕ್ಖಸಚ್ಚಂ ಸಿಯಾ ಅಜ್ಝತ್ತಾರಮ್ಮಣಂ, ಸಿಯಾ ಬಹಿದ್ಧಾರಮ್ಮಣಂ, ಸಿಯಾ ಅಜ್ಝತ್ತಬಹಿದ್ಧಾರಮ್ಮಣಂ, ಸಿಯಾ ನ ವತ್ತಬ್ಬಂ – ‘‘ಅಜ್ಝತ್ತಾರಮ್ಮಣ’’ನ್ತಿಪಿ, ‘‘ಬಹಿದ್ಧಾರಮ್ಮಣ’’ನ್ತಿಪಿ, ‘‘ಅಜ್ಝತ್ತಬಹಿದ್ಧಾರಮ್ಮಣ’’ನ್ತಿಪಿ. ತೀಣಿ ಸಚ್ಚಾನಿ ಅನಿದಸ್ಸನಅಪ್ಪಟಿಘಾ. ದುಕ್ಖಸಚ್ಚಂ ಸಿಯಾ ಸನಿದಸ್ಸನಸಪ್ಪಟಿಘಂ, ಸಿಯಾ ಅನಿದಸ್ಸನಸಪ್ಪಟಿಘಂ, ಸಿಯಾ ಅನಿದಸ್ಸನಅಪ್ಪಟಿಘಂ.

೨. ದುಕಂ

೨೧೮. ಸಮುದಯಸಚ್ಚಂ ಹೇತು. ನಿರೋಧಸಚ್ಚಂ ನ ಹೇತು. ದ್ವೇ ಸಚ್ಚಾ ಸಿಯಾ ಹೇತೂ, ಸಿಯಾ ನ ಹೇತೂ. ದ್ವೇ ಸಚ್ಚಾ ಸಹೇತುಕಾ. ನಿರೋಧಸಚ್ಚಂ ಅಹೇತುಕಂ. ದುಕ್ಖಸಚ್ಚಂ ಸಿಯಾ ಸಹೇತುಕಂ, ಸಿಯಾ ಅಹೇತುಕಂ. ದ್ವೇ ಸಚ್ಚಾ ಹೇತುಸಮ್ಪಯುತ್ತಾ. ನಿರೋಧಸಚ್ಚಂ ಹೇತುವಿಪ್ಪಯುತ್ತಂ. ದುಕ್ಖಸಚ್ಚಂ ಸಿಯಾ ಹೇತುಸಮ್ಪಯುತ್ತಂ, ಸಿಯಾ ಹೇತುವಿಪ್ಪಯುತ್ತಂ. ಸಮುದಯಸಚ್ಚಂ ಹೇತು ಚೇವ ಸಹೇತುಕಞ್ಚ. ನಿರೋಧಸಚ್ಚಂ ನ ವತ್ತಬ್ಬಂ – ‘‘ಹೇತು ಚೇವ ಸಹೇತುಕಞ್ಚಾ’’ತಿಪಿ, ‘‘ಸಹೇತುಕಞ್ಚೇವ ನ ಚ ಹೇತೂ’’ತಿಪಿ. ಮಗ್ಗಸಚ್ಚಂ ಸಿಯಾ ಹೇತು ಚೇವ ಸಹೇತುಕಞ್ಚ, ಸಿಯಾ ಸಹೇತುಕಞ್ಚೇವ ನ ಚ ಹೇತು. ದುಕ್ಖಸಚ್ಚಂ ಸಿಯಾ ಹೇತು ಚೇವ ಸಹೇತುಕಞ್ಚ, ಸಿಯಾ ಸಹೇತುಕಞ್ಚೇವ ನ ಚ ಹೇತು, ಸಿಯಾ ನ ವತ್ತಬ್ಬಂ – ‘‘ಹೇತು ಚೇವ ಸಹೇತುಕಞ್ಚಾ’’ತಿಪಿ, ‘‘ಸಹೇತುಕಞ್ಚೇವ ನ ಚ ಹೇತೂ’’ತಿಪಿ. ಸಮುದಯಸಚ್ಚಂ ಹೇತು ಚೇವ ಹೇತುಸಮ್ಪಯುತ್ತಞ್ಚ. ನಿರೋಧಸಚ್ಚಂ ನ ವತ್ತಬ್ಬಂ – ‘‘ಹೇತು ಚೇವ ಹೇತುಸಮ್ಪಯುತ್ತಞ್ಚಾ’’ತಿಪಿ, ‘‘ಹೇತುಸಮ್ಪಯುತ್ತಞ್ಚೇವ ನ ಚ ಹೇತೂ’’ತಿಪಿ. ಮಗ್ಗಸಚ್ಚಂ ಸಿಯಾ ಹೇತು ಚೇವ ಹೇತುಸಮ್ಪಯುತ್ತಞ್ಚ, ಸಿಯಾ ಹೇತುಸಮ್ಪಯುತ್ತಞ್ಚೇವ ನ ಚ ಹೇತು. ದುಕ್ಖಸಚ್ಚಂ ಸಿಯಾ ಹೇತು ಚೇವ ಹೇತುಸಮ್ಪಯುತ್ತಞ್ಚ, ಸಿಯಾ ಹೇತುಸಮ್ಪಯುತ್ತಞ್ಚೇವ ನ ಚ ಹೇತು, ಸಿಯಾ ನ ವತ್ತಬ್ಬಂ – ‘‘ಹೇತು ಚೇವ ಹೇತುಸಮ್ಪಯುತ್ತಞ್ಚಾ’’ತಿಪಿ, ‘‘ಹೇತುಸಮ್ಪಯುತ್ತಞ್ಚೇವ ನ ಚ ಹೇತೂ’’ತಿಪಿ. ನಿರೋಧಸಚ್ಚಂ ನ ಹೇತುಅಹೇತುಕಂ. ಸಮುದಯಸಚ್ಚಂ ನ ವತ್ತಬ್ಬಂ – ‘‘ನ ಹೇತುಸಹೇತುಕ’’ನ್ತಿಪಿ, ‘‘ನ ಹೇತುಅಹೇತುಕ’’ನ್ತಿಪಿ. ಮಗ್ಗಸಚ್ಚಂ ಸಿಯಾ ನ ಹೇತುಸಹೇತುಕಂ, ಸಿಯಾ ನ ವತ್ತಬ್ಬಂ – ‘‘ನ ಹೇತುಸಹೇತುಕ’’ನ್ತಿಪಿ, ‘‘ನ ಹೇತುಅಹೇತುಕ’’ನ್ತಿಪಿ. ದುಕ್ಖಸಚ್ಚಂ ಸಿಯಾ ನ ಹೇತುಸಹೇತುಕಂ, ಸಿಯಾ ನ ಹೇತುಅಹೇತುಕಂ, ಸಿಯಾ ನ ವತ್ತಬ್ಬಂ – ‘‘ನ ಹೇತುಸಹೇತುಕ’’ನ್ತಿಪಿ, ‘‘ನ ಹೇತುಅಹೇತುಕ’’ನ್ತಿಪಿ.

ತೀಣಿ ಸಚ್ಚಾನಿ ಸಪ್ಪಚ್ಚಯಾ. ನಿರೋಧಸಚ್ಚಂ ಅಪ್ಪಚ್ಚಯಂ. ತೀಣಿ ಸಚ್ಚಾನಿ ಸಙ್ಖತಾ. ನಿರೋಧಸಚ್ಚಂ ಅಸಙ್ಖತಂ. ತೀಣಿ ಸಚ್ಚಾನಿ ಅನಿದಸ್ಸನಾ. ದುಕ್ಖಸಚ್ಚಂ ಸಿಯಾ ಸನಿದಸ್ಸನಂ, ಸಿಯಾ ಅನಿದಸ್ಸನಂ. ತೀಣಿ ಸಚ್ಚಾನಿ ಅಪ್ಪಟಿಘಾ. ದುಕ್ಖಸಚ್ಚಂ ಸಿಯಾ ಸಪ್ಪಟಿಘಂ, ಸಿಯಾ ಅಪ್ಪಟಿಘಂ. ತೀಣಿ ಸಚ್ಚಾನಿ ಅರೂಪಾನಿ. ದುಕ್ಖಸಚ್ಚಂ ಸಿಯಾ ರೂಪಂ, ಸಿಯಾ ಅರೂಪಂ. ದ್ವೇ ಸಚ್ಚಾ ಲೋಕಿಯಾ. ದ್ವೇ ಸಚ್ಚಾ ಲೋಕುತ್ತರಾ; ಕೇನಚಿ ವಿಞ್ಞೇಯ್ಯಾ, ಕೇನಚಿ ನ ವಿಞ್ಞೇಯ್ಯಾ.

ಸಮುದಯಸಚ್ಚಂ ಆಸವೋ. ದ್ವೇ ಸಚ್ಚಾ ನೋ ಆಸವಾ. ದುಕ್ಖಸಚ್ಚಂ ಸಿಯಾ ಆಸವೋ, ಸಿಯಾ ನೋ ಆಸವೋ. ದ್ವೇ ಸಚ್ಚಾ ಸಾಸವಾ. ದ್ವೇ ಸಚ್ಚಾ ಅನಾಸವಾ. ಸಮುದಯಸಚ್ಚಂ ಆಸವಸಮ್ಪಯುತ್ತಂ. ದ್ವೇ ಸಚ್ಚಾ ಆಸವವಿಪ್ಪಯುತ್ತಾ. ದುಕ್ಖಸಚ್ಚಂ ಸಿಯಾ ಆಸವಸಮ್ಪಯುತ್ತಂ, ಸಿಯಾ ಆಸವವಿಪ್ಪಯುತ್ತಂ. ಸಮುದಯಸಚ್ಚಂ ಆಸವೋ ಚೇವ ಸಾಸವಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಆಸವಾ ಚೇವ ಸಾಸವಾ ಚಾ’’ತಿಪಿ, ‘‘ಸಾಸವಾ ಚೇವ ನೋ ಚ ಆಸವಾ’’ತಿಪಿ. ದುಕ್ಖಸಚ್ಚಂ ಸಿಯಾ ಆಸವೋ ಚೇವ ಸಾಸವಞ್ಚ, ಸಿಯಾ ಸಾಸವಞ್ಚೇವ ನೋ ಚ ಆಸವೋ. ಸಮುದಯಸಚ್ಚಂ ಆಸವೋ ಚೇವ ಆಸವಸಮ್ಪಯುತ್ತಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಆಸವಾ ಚೇವ ಆಸವಸಮ್ಪಯುತ್ತಾ ಚಾ’’ತಿಪಿ, ‘‘ಆಸವಸಮ್ಪಯುತ್ತಾ ಚೇವ ನೋ ಚ ಆಸವಾ’’ತಿಪಿ. ದುಕ್ಖಸಚ್ಚಂ ಸಿಯಾ ಆಸವೋ ಚೇವ ಆಸವಸಮ್ಪಯುತ್ತಞ್ಚ, ಸಿಯಾ ಆಸವಸಮ್ಪಯುತ್ತಞ್ಚೇವ ನೋ ಚ ಆಸವೋ, ಸಿಯಾ ನ ವತ್ತಬ್ಬಂ – ‘‘ಆಸವೋ ಚೇವ ಆಸವಸಮ್ಪಯುತ್ತಞ್ಚಾ’’ತಿಪಿ, ‘‘ಆಸವಸಮ್ಪಯುತ್ತಞ್ಚೇವ ನೋ ಚ ಆಸವೋ’’ತಿಪಿ. ದ್ವೇ ಸಚ್ಚಾ ಆಸವವಿಪ್ಪಯುತ್ತಅನಾಸವಾ. ಸಮುದಯಸಚ್ಚಂ ನ ವತ್ತಬ್ಬಂ – ‘‘ಆಸವವಿಪ್ಪಯುತ್ತಸಾಸವ’’ನ್ತಿಪಿ, ‘‘ಆಸವವಿಪ್ಪಯುತ್ತಅನಾಸವ’’ನ್ತಿಪಿ. ದುಕ್ಖಸಚ್ಚಂ ಸಿಯಾ ಆಸವವಿಪ್ಪಯುತ್ತಸಾಸವಂ, ಸಿಯಾ ನ ವತ್ತಬ್ಬಂ – ‘‘ಆಸವವಿಪ್ಪಯುತ್ತಸಾಸವ’’ನ್ತಿಪಿ, ‘‘ಆಸವವಿಪ್ಪಯುತ್ತಅನಾಸವ’’ನ್ತಿಪಿ.

ಸಮುದಯಸಚ್ಚಂ ಸಂಯೋಜನಂ. ದ್ವೇ ಸಚ್ಚಾ ನೋ ಸಂಯೋಜನಾ. ದುಕ್ಖಸಚ್ಚಂ ಸಿಯಾ ಸಂಯೋಜನಂ, ಸಿಯಾ ನೋ ಸಂಯೋಜನಂ. ದ್ವೇ ಸಚ್ಚಾ ಸಂಯೋಜನಿಯಾ. ದ್ವೇ ಸಚ್ಚಾ ಅಸಂಯೋಜನಿಯಾ. ಸಮುದಯಸಚ್ಚಂ ಸಂಯೋಜನಸಮ್ಪಯುತ್ತಂ. ದ್ವೇ ಸಚ್ಚಾ ಸಂಯೋಜನವಿಪ್ಪಯುತ್ತಾ. ದುಕ್ಖಸಚ್ಚಂ ಸಿಯಾ ಸಂಯೋಜನಸಮ್ಪಯುತ್ತಂ, ಸಿಯಾ ಸಂಯೋಜನವಿಪ್ಪಯುತ್ತಂ. ಸಮುದಯಸಚ್ಚಂ ಸಂಯೋಜನಞ್ಚೇವ ಸಂಯೋಜನಿಯಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಸಂಯೋಜನಾ ಚೇವ ಸಂಯೋಜನಿಯಾ ಚಾ’’ತಿಪಿ, ‘‘ಸಂಯೋಜನಿಯಾ ಚೇವ ನೋ ಚ ಸಂಯೋಜನಾ’’ತಿಪಿ. ದುಕ್ಖಸಚ್ಚಂ ಸಿಯಾ ಸಂಯೋಜನಞ್ಚೇವ ಸಂಯೋಜನಿಯಞ್ಚ, ಸಿಯಾ ಸಂಯೋಜನಿಯಞ್ಚೇವ ನೋ ಚ ಸಂಯೋಜನಂ. ಸಮುದಯಸಚ್ಚಂ ಸಂಯೋಜನಞ್ಚೇವ ಸಂಯೋಜನಸಮ್ಪಯುತ್ತಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಸಂಯೋಜನಾ ಚೇವ ಸಂಯೋಜನಸಮ್ಪಯುತ್ತಾ ಚಾ’’ತಿಪಿ, ‘‘ಸಂಯೋಜನಸಮ್ಪಯುತ್ತಾ ಚೇವ ನೋ ಚ ಸಂಯೋಜನಾ’’ತಿಪಿ. ದುಕ್ಖಸಚ್ಚಂ ಸಿಯಾ ಸಂಯೋಜನಞ್ಚೇವ ಸಂಯೋಜನಸಮ್ಪಯುತ್ತಞ್ಚ, ಸಿಯಾ ಸಂಯೋಜನಸಮ್ಪಯುತ್ತಞ್ಚೇವ ನೋ ಚ ಸಂಯೋಜನಂ, ಸಿಯಾ ನ ವತ್ತಬ್ಬಂ – ‘‘ಸಂಯೋಜನಞ್ಚೇವ ಸಂಯೋಜನಸಮ್ಪಯುತ್ತಞ್ಚಾ’’ತಿಪಿ, ‘‘ಸಂಯೋಜನಸಮ್ಪಯುತ್ತಞ್ಚೇವ ನೋ ಚ ಸಂಯೋಜನ’’ನ್ತಿಪಿ. ದ್ವೇ ಸಚ್ಚಾ ಸಂಯೋಜನವಿಪ್ಪಯುತ್ತಅಸಂಯೋಜನಿಯಾ. ಸಮುದಯಸಚ್ಚಂ ನ ವತ್ತಬ್ಬಂ – ‘‘ಸಂಯೋಜನವಿಪ್ಪಯುತ್ತಸಂಯೋಜನಿಯ’’ನ್ತಿಪಿ, ‘‘ಸಂಯೋಜನವಿಪ್ಪಯುತ್ತಅಸಂಯೋಜನಿಯ’’ನ್ತಿಪಿ. ದುಕ್ಖಸಚ್ಚಂ ಸಿಯಾ ಸಂಯೋಜನವಿಪ್ಪಯುತ್ತಸಂಯೋಜನಿಯಂ, ಸಿಯಾ ನ ವತ್ತಬ್ಬಂ – ‘‘ಸಂಯೋಜನವಿಪ್ಪಯುತ್ತಸಂಯೋಜನಿಯ’’ನ್ತಿಪಿ, ‘‘ಸಂಯೋಜನವಿಪ್ಪಯುತ್ತಅಸಂಯೋಜನಿಯ’’ನ್ತಿಪಿ.

ಸಮುದಯಸಚ್ಚಂ ಗನ್ಥೋ. ದ್ವೇ ಸಚ್ಚಾ ನೋ ಗನ್ಥಾ. ದುಕ್ಖಸಚ್ಚಂ ಸಿಯಾ ಗನ್ಥೋ, ಸಿಯಾ ನೋ ಗನ್ಥೋ. ದ್ವೇ ಸಚ್ಚಾ ಗನ್ಥನಿಯಾ. ದ್ವೇ ಸಚ್ಚಾ ಅಗನ್ಥನಿಯಾ. ದ್ವೇ ಸಚ್ಚಾ ಗನ್ಥವಿಪ್ಪಯುತ್ತಾ. ದ್ವೇ ಸಚ್ಚಾ ಸಿಯಾ ಗನ್ಥಸಮ್ಪಯುತ್ತಾ, ಸಿಯಾ ಗನ್ಥವಿಪ್ಪಯುತ್ತಾ. ಸಮುದಯಸಚ್ಚಂ ಗನ್ಥೋ ಚೇವ ಗನ್ಥನಿಯಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಗನ್ಥಾ ಚೇವ ಗನ್ಥನಿಯಾ ಚಾ’’ತಿಪಿ, ‘‘ಗನ್ಥನಿಯಾ ಚೇವ ನೋ ಚ ಗನ್ಥಾ’’ತಿಪಿ. ದುಕ್ಖಸಚ್ಚಂ ಸಿಯಾ ಗನ್ಥೋ ಚೇವ ಗನ್ಥನಿಯಞ್ಚ, ಸಿಯಾ ಗನ್ಥನಿಯಞ್ಚೇವ ನೋ ಚ ಗನ್ಥೋ. ಸಮುದಯಸಚ್ಚಂ ಗನ್ಥೋ ಚೇವ ಗನ್ಥಸಮ್ಪಯುತ್ತಞ್ಚ, ಸಿಯಾ ನ ವತ್ತಬ್ಬಂ – ‘‘ಗನ್ಥೋ ಚೇವ ಗನ್ಥಸಮ್ಪಯುತ್ತಞ್ಚಾ’’ತಿಪಿ, ‘‘ಗನ್ಥಸಮ್ಪಯುತ್ತಞ್ಚೇವ ನೋ ಚ ಗನ್ಥೋ’’ತಿಪಿ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಗನ್ಥಾ ಚೇವ ಗನ್ಥಸಮ್ಪಯುತ್ತಾ ಚಾ’’ತಿಪಿ, ‘‘ಗನ್ಥಸಮ್ಪಯುತ್ತಾ ಚೇವ ನೋ ಚ ಗನ್ಥಾ’’ತಿಪಿ. ದುಕ್ಖಸಚ್ಚಂ ಸಿಯಾ ಗನ್ಥೋ ಚೇವ ಗನ್ಥಸಮ್ಪಯುತ್ತಞ್ಚ, ಸಿಯಾ ಗನ್ಥಸಮ್ಪಯುತ್ತಞ್ಚೇವ ನೋ ಚ ಗನ್ಥೋ, ಸಿಯಾ ನ ವತ್ತಬ್ಬಂ – ‘‘ಗನ್ಥೋ ಚೇವ ಗನ್ಥಸಮ್ಪಯುತ್ತಞ್ಚಾ’’ತಿಪಿ, ‘‘ಗನ್ಥಸಮ್ಪಯುತ್ತಞ್ಚೇವ ನೋ ಚ ಗನ್ಥೋ’’ತಿಪಿ. ದ್ವೇ ಸಚ್ಚಾ ಗನ್ಥವಿಪ್ಪಯುತ್ತಅಗನ್ಥನಿಯಾ. ದ್ವೇ ಸಚ್ಚಾ ಸಿಯಾ ಗನ್ಥವಿಪ್ಪಯುತ್ತಗನ್ಥನಿಯಾ, ಸಿಯಾ ನ ವತ್ತಬ್ಬಾ – ‘‘ಗನ್ಥವಿಪ್ಪಯುತ್ತಗನ್ಥನಿಯಾ’’ತಿಪಿ, ‘‘ಗನ್ಥವಿಪ್ಪಯುತ್ತಅಗನ್ಥನಿಯಾ’’ತಿಪಿ.

ಸಮುದಯಸಚ್ಚಂ ಓಘೋ…ಪೇ… ಯೋಗೋ…ಪೇ… ನೀವರಣಂ. ದ್ವೇ ಸಚ್ಚಾ ನೋ ನೀವರಣಾ. ದುಕ್ಖಸಚ್ಚಂ ಸಿಯಾ ನೀವರಣಂ, ಸಿಯಾ ನೋ ನೀವರಣಂ. ದ್ವೇ ಸಚ್ಚಾ ನೀವರಣಿಯಾ ದ್ವೇ ಸಚ್ಚಾ ಅನೀವರಣಿಯಾ. ಸಮುದಯಸಚ್ಚಂ ನೀವರಣಸಮ್ಪಯುತ್ತಂ. ದ್ವೇ ಸಚ್ಚಾ ನೀವರಣವಿಪ್ಪಯುತ್ತಾ. ದುಕ್ಖಸಚ್ಚಂ ಸಿಯಾ ನೀವರಣಸಮ್ಪಯುತ್ತಂ, ಸಿಯಾ ನೀವರಣವಿಪ್ಪಯುತ್ತಂ. ಸಮುದಯಸಚ್ಚಂ ನೀವರಣಞ್ಚೇವ ನೀವರಣಿಯಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ನೀವರಣಾ ಚೇವ ನೀವರಣಿಯಾ ಚಾ’’ತಿಪಿ, ‘‘ನೀವರಣಿಯಾ ಚೇವ ನೋ ಚ ನೀವರಣಾ’’ತಿಪಿ. ದುಕ್ಖಸಚ್ಚಂ ಸಿಯಾ ನೀವರಣಞ್ಚೇವ ನೀವರಣಿಯಞ್ಚ, ಸಿಯಾ ನೀವರಣಿಯಞ್ಚೇವ ನೋ ಚ ನೀವರಣಂ. ಸಮುದಯಸಚ್ಚಂ ನೀವರಣಞ್ಚೇವ ನೀವರಣಸಮ್ಪಯುತ್ತಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ನೀವರಣಾ ಚೇವ ನೀವರಣಸಮ್ಪಯುತ್ತಾ ಚಾ’’ತಿಪಿ, ‘‘ನೀವರಣಸಮ್ಪಯುತ್ತಾ ಚೇವ ನೋ ಚ ನೀವರಣಾ’’ತಿಪಿ. ದುಕ್ಖಸಚ್ಚಂ ಸಿಯಾ ನೀವರಣಞ್ಚೇವ ನೀವರಣಸಮ್ಪಯುತ್ತಞ್ಚ, ಸಿಯಾ ನೀವರಣಸಮ್ಪಯುತ್ತಞ್ಚೇವ ನೋ ಚ ನೀವರಣಂ, ಸಿಯಾ ನ ವತ್ತಬ್ಬಂ – ‘‘ನೀವರಣಞ್ಚೇವ ನೀವರಣಸಮ್ಪಯುತ್ತಞ್ಚಾ’’ತಿಪಿ, ‘‘ನೀವರಣಸಮ್ಪಯುತ್ತಞ್ಚೇವ ನೋ ಚ ನೀವರಣ’’ನ್ತಿಪಿ. ದ್ವೇ ಸಚ್ಚಾ ನೀವರಣವಿಪ್ಪಯುತ್ತಅನೀವರಣಿಯಾ. ಸಮುದಯಸಚ್ಚಂ ನ ವತ್ತಬ್ಬಂ – ‘‘ನೀವರಣವಿಪ್ಪಯುತ್ತನೀವರಣಿಯ’’ನ್ತಿಪಿ, ‘‘ನೀವರಣವಿಪ್ಪಯುತ್ತಅನೀವರಣಿಯ’’ನ್ತಿಪಿ. ದುಕ್ಖಸಚ್ಚಂ ಸಿಯಾ ನೀವರಣವಿಪ್ಪಯುತ್ತನೀವರಣಿಯಂ, ಸಿಯಾ ನ ವತ್ತಬ್ಬಂ – ‘‘ನೀವರಣವಿಪ್ಪಯುತ್ತನೀವರಣಿಯ’’ನ್ತಿಪಿ, ‘‘ನೀವರಣವಿಪ್ಪಯುತ್ತಅನೀವರಣಿಯ’’ನ್ತಿಪಿ.

ತೀಣಿ ಸಚ್ಚಾನಿ ನೋ ಪರಾಮಾಸಾ. ದುಕ್ಖಸಚ್ಚಂ ಸಿಯಾ ಪರಾಮಾಸೋ, ಸಿಯಾ ನೋ ಪರಾಮಾಸೋ. ದ್ವೇ ಸಚ್ಚಾ ಪರಾಮಟ್ಠಾ. ದ್ವೇ ಸಚ್ಚಾ ಅಪರಾಮಟ್ಠಾ. ದ್ವೇ ಸಚ್ಚಾ ಪರಾಮಾಸವಿಪ್ಪಯುತ್ತಾ. ಸಮುದಯಸಚ್ಚಂ ಸಿಯಾ ಪರಾಮಾಸಸಮ್ಪಯುತ್ತಂ, ಸಿಯಾ ಪರಾಮಾಸವಿಪ್ಪಯುತ್ತಂ. ದುಕ್ಖಸಚ್ಚಂ ಸಿಯಾ ಪರಾಮಾಸಸಮ್ಪಯುತ್ತಂ, ಸಿಯಾ ಪರಾಮಾಸವಿಪ್ಪಯುತ್ತಂ, ಸಿಯಾ ನ ವತ್ತಬ್ಬಂ – ‘‘ಪರಾಮಾಸಸಮ್ಪಯುತ್ತ’’ನ್ತಿಪಿ, ‘‘ಪರಾಮಾಸವಿಪ್ಪಯುತ್ತ’’ನ್ತಿಪಿ. ಸಮುದಯಸಚ್ಚಂ ನ ವತ್ತಬ್ಬಂ – ‘‘ಪರಾಮಾಸೋ ಚೇವ ಪರಾಮಟ್ಠಞ್ಚಾ’’ತಿ, ಪರಾಮಟ್ಠಞ್ಚೇವ ನೋ ಚ ಪರಾಮಾಸೋ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಪರಾಮಾಸಾ ಚೇವ ಪರಾಮಟ್ಠಾ ಚಾ’’ತಿಪಿ, ‘‘ಪರಾಮಟ್ಠಾ ಚೇವ ನೋ ಚ ಪರಾಮಾಸಾ’’ತಿಪಿ. ದುಕ್ಖಸಚ್ಚಂ ಸಿಯಾ ಪರಾಮಾಸೋ ಚೇವ ಪರಾಮಟ್ಠಞ್ಚ, ಸಿಯಾ ಪರಾಮಟ್ಠಞ್ಚೇವ ನೋ ಚ ಪರಾಮಾಸೋ. ದ್ವೇ ಸಚ್ಚಾ ಪರಾಮಾಸವಿಪ್ಪಯುತ್ತಅಪರಾಮಟ್ಠಾ. ದ್ವೇ ಸಚ್ಚಾ ಸಿಯಾ ಪರಾಮಾಸವಿಪ್ಪಯುತ್ತಪರಾಮಟ್ಠಾ, ಸಿಯಾ ನ ವತ್ತಬ್ಬಾ – ‘‘ಪರಾಮಾಸವಿಪ್ಪಯುತ್ತಪರಾಮಟ್ಠಾ’’ತಿಪಿ, ‘‘ಪರಾಮಾಸವಿಪ್ಪಯುತ್ತಅಪರಾಮಟ್ಠಾ’’ತಿಪಿ.

ದ್ವೇ ಸಚ್ಚಾ ಸಾರಮ್ಮಣಾ. ನಿರೋಧಸಚ್ಚಂ ಅನಾರಮ್ಮಣಂ. ದುಕ್ಖಸಚ್ಚಂ ಸಿಯಾ ಸಾರಮ್ಮಣಂ, ಸಿಯಾ ಅನಾರಮ್ಮಣಂ. ತೀಣಿ ಸಚ್ಚಾನಿ ನೋ ಚಿತ್ತಾ. ದುಕ್ಖಸಚ್ಚಂ ಸಿಯಾ ಚಿತ್ತಂ, ಸಿಯಾ ನೋ ಚಿತ್ತಂ. ದ್ವೇ ಸಚ್ಚಾ ಚೇತಸಿಕಾ. ನಿರೋಧಸಚ್ಚಂ ಅಚೇತಸಿಕಂ. ದುಕ್ಖಸಚ್ಚಂ ಸಿಯಾ ಚೇತಸಿಕಂ, ಸಿಯಾ ಅಚೇತಸಿಕಂ. ದ್ವೇ ಸಚ್ಚಾ ಚಿತ್ತಸಮ್ಪಯುತ್ತಾ. ನಿರೋಧಸಚ್ಚಂ ಚಿತ್ತವಿಪ್ಪಯುತ್ತಂ. ದುಕ್ಖಸಚ್ಚಂ ಸಿಯಾ ಚಿತ್ತಸಮ್ಪಯುತ್ತಂ, ಸಿಯಾ ಚಿತ್ತವಿಪ್ಪಯುತ್ತಂ, ಸಿಯಾ ನ ವತ್ತಬ್ಬಂ – ‘‘ಚಿತ್ತೇನ ಸಮ್ಪಯುತ್ತ’’ನ್ತಿಪಿ, ‘‘ಚಿತ್ತೇನ ವಿಪ್ಪಯುತ್ತ’’ನ್ತಿಪಿ. ದ್ವೇ ಸಚ್ಚಾ ಚಿತ್ತಸಂಸಟ್ಠಾ. ನಿರೋಧಸಚ್ಚಂ ಚಿತ್ತವಿಸಂಸಟ್ಠಂ. ದುಕ್ಖಸಚ್ಚಂ ಸಿಯಾ ಚಿತ್ತಸಂಸಟ್ಠಂ, ಸಿಯಾ ಚಿತ್ತವಿಸಂಸಟ್ಠಂ, ಸಿಯಾ ನ ವತ್ತಬ್ಬಂ – ‘‘ಚಿತ್ತೇನ ಸಂಸಟ್ಠ’’ನ್ತಿಪಿ, ‘‘ಚಿತ್ತೇನ ವಿಸಂಸಟ್ಠ’’ನ್ತಿಪಿ. ದ್ವೇ ಸಚ್ಚಾ ಚಿತ್ತಸಮುಟ್ಠಾನಾ. ನಿರೋಧಸಚ್ಚಂ ನೋ ಚಿತ್ತಸಮುಟ್ಠಾನಂ. ದುಕ್ಖಸಚ್ಚಂ ಸಿಯಾ ಚಿತ್ತಸಮುಟ್ಠಾನಂ, ಸಿಯಾ ನೋ ಚಿತ್ತಸಮುಟ್ಠಾನಂ. ದ್ವೇ ಸಚ್ಚಾ ಚಿತ್ತಸಹಭುನೋ. ನಿರೋಧಸಚ್ಚಂ ನೋ ಚಿತ್ತಸಹಭೂ. ದುಕ್ಖಸಚ್ಚಂ ಸಿಯಾ ಚಿತ್ತಸಹಭೂ, ಸಿಯಾ ನೋ ಚಿತ್ತಸಹಭೂ. ದ್ವೇ ಸಚ್ಚಾ ಚಿತ್ತಾನುಪರಿವತ್ತಿನೋ. ನಿರೋಧಸಚ್ಚಂ ನೋ ಚಿತ್ತಾನುಪರಿವತ್ತಿ. ದುಕ್ಖಸಚ್ಚಂ ಸಿಯಾ ಚಿತ್ತಾನುಪರಿವತ್ತಿ, ಸಿಯಾ ನೋ ಚಿತ್ತಾನುಪರಿವತ್ತಿ. ದ್ವೇ ಸಚ್ಚಾ ಚಿತ್ತಸಂಸಟ್ಠಸಮುಟ್ಠಾನಾ. ನಿರೋಧಸಚ್ಚಂ ನೋ ಚಿತ್ತಸಂಸಟ್ಠಸಮುಟ್ಠಾನಂ. ದುಕ್ಖಸಚ್ಚಂ ಸಿಯಾ ಚಿತ್ತಸಂಸಟ್ಠಸಮುಟ್ಠಾನಂ, ಸಿಯಾ ನೋ ಚಿತ್ತಸಂಸಟ್ಠಸಮುಟ್ಠಾನಂ. ದ್ವೇ ಸಚ್ಚಾ ಚಿತ್ತಸಂಸಟ್ಠಸಮುಟ್ಠಾನಸಹಭುನೋ. ನಿರೋಧಸಚ್ಚಂ ನೋ ಚಿತ್ತಸಂಸಟ್ಠಸಮುಟ್ಠಾನಸಹಭೂ. ದುಕ್ಖಸಚ್ಚಂ ಸಿಯಾ ಚಿತ್ತಸಂಸಟ್ಠಸಮುಟ್ಠಾನಸಹಭೂ, ಸಿಯಾ ನೋ ಚಿತ್ತಸಂಸಟ್ಠಸಮುಟ್ಠಾನಸಹಭೂ. ದ್ವೇ ಸಚ್ಚಾ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ. ನಿರೋಧಸಚ್ಚಂ ನೋ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿ. ದುಕ್ಖಸಚ್ಚಂ ಸಿಯಾ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿ, ಸಿಯಾ ನೋ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿ. ತೀಣಿ ಸಚ್ಚಾನಿ ಬಾಹಿರಾ. ದುಕ್ಖಸಚ್ಚಂ ಸಿಯಾ ಅಜ್ಝತ್ತಂ, ಸಿಯಾ ಬಾಹಿರಂ.

ತೀಣಿ ಸಚ್ಚಾನಿ ನೋ ಉಪಾದಾ. ದುಕ್ಖಸಚ್ಚಂ ಸಿಯಾ ಉಪಾದಾ, ಸಿಯಾ ನೋ ಉಪಾದಾ. ತೀಣಿ ಸಚ್ಚಾನಿ ಅನುಪಾದಿನ್ನಾ. ದುಕ್ಖಸಚ್ಚಂ ಸಿಯಾ ಉಪಾದಿನ್ನಂ, ಸಿಯಾ ಅನುಪಾದಿನ್ನಂ. ಸಮುದಯಸಚ್ಚಂ ಉಪಾದಾನಂ. ದ್ವೇ ಸಚ್ಚಾ ನೋ ಉಪಾದಾನಾ. ದುಕ್ಖಸಚ್ಚಂ ಸಿಯಾ ಉಪಾದಾನಂ, ಸಿಯಾ ನೋ ಉಪಾದಾನಂ. ದ್ವೇ ಸಚ್ಚಾ ಉಪಾದಾನಿಯಾ. ದ್ವೇ ಸಚ್ಚಾ ಅನುಪಾದಾನಿಯಾ. ದ್ವೇ ಸಚ್ಚಾ ಉಪಾದಾನವಿಪ್ಪಯುತ್ತಾ. ದ್ವೇ ಸಚ್ಚಾ ಸಿಯಾ ಉಪಾದಾನಸಮ್ಪಯುತ್ತಾ, ಸಿಯಾ ಉಪಾದಾನವಿಪ್ಪಯುತ್ತಾ. ಸಮುದಯಸಚ್ಚಂ ಉಪಾದಾನಞ್ಚೇವ ಉಪಾದಾನಿಯಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಉಪಾದಾನಾ ಚೇವ ಉಪಾದಾನಿಯಾ ಚಾ’’ತಿಪಿ, ‘‘ಉಪಾದಾನಿಯಾ ಚೇವ ನೋ ಚ ಉಪಾದಾನಾ’’ತಿಪಿ. ದುಕ್ಖಸಚ್ಚಂ ಸಿಯಾ ಉಪಾದಾನಞ್ಚೇವ ಉಪಾದಾನಿಯಞ್ಚ, ಸಿಯಾ ಉಪಾದಾನಿಯಞ್ಚೇವ ನೋ ಚ ಉಪಾದಾನಂ. ಸಮುದಯಸಚ್ಚಂ ಸಿಯಾ ಉಪಾದಾನಞ್ಚೇವ ಉಪಾದಾನಸಮ್ಪಯುತ್ತಞ್ಚ, ಸಿಯಾ ನ ವತ್ತಬ್ಬಂ – ‘‘ಉಪಾದಾನಞ್ಚೇವ ಉಪಾದಾನಸಮ್ಪಯುತ್ತಞ್ಚಾ’’ತಿಪಿ, ‘‘ಉಪಾದಾನಸಮ್ಪಯುತ್ತಞ್ಚೇವ ನೋ ಚ ಉಪಾದಾನ’’ನ್ತಿಪಿ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಉಪಾದಾನಾ ಚೇವ ಉಪಾದಾನಸಮ್ಪಯುತ್ತಾ ಚಾ’’ತಿಪಿ, ‘‘ಉಪಾದಾನಸಮ್ಪಯುತ್ತಾ ಚೇವ ನೋ ಚ ಉಪಾದಾನಾ’’ತಿಪಿ. ದುಕ್ಖಸಚ್ಚಂ ಸಿಯಾ ಉಪಾದಾನಞ್ಚೇವ ಉಪಾದಾನಸಮ್ಪಯುತ್ತಞ್ಚ, ಸಿಯಾ ಉಪಾದಾನಸಮ್ಪಯುತ್ತಞ್ಚೇವ ನೋ ಚ ಉಪಾದಾನಂ, ಸಿಯಾ ನ ವತ್ತಬ್ಬಂ – ‘‘ಉಪಾದಾನಞ್ಚೇವ ಉಪಾದಾನಸಮ್ಪಯುತ್ತಞ್ಚಾ’’ ತಿಪಿ, ‘‘ಉಪಾದಾನಸಮ್ಪಯುತ್ತಞ್ಚೇವ ನೋ ಚ ಉಪಾದಾನ’’ನ್ತಿಪಿ. ದ್ವೇ ಸಚ್ಚಾ ಉಪಾದಾನವಿಪ್ಪಯುತ್ತಅನುಪಾದಾನಿಯಾ. ದ್ವೇ ಸಚ್ಚಾ ಸಿಯಾ ಉಪಾದಾನವಿಪ್ಪಯುತ್ತಉಪಾದಾನಿಯಾ, ಸಿಯಾ ನ ವತ್ತಬ್ಬಾ – ‘‘ಉಪಾದಾನವಿಪ್ಪಯುತ್ತಉಪಾದಾನಿಯಾ’’ತಿಪಿ, ‘‘ಉಪಾದಾನವಿಪ್ಪಯುತ್ತಅನುಪಾದಾನಿಯಾ’’ತಿಪಿ.

ಸಮುದಯಸಚ್ಚಂ ಕಿಲೇಸೋ. ದ್ವೇ ಸಚ್ಚಾ ನೋ ಕಿಲೇಸಾ. ದುಕ್ಖಸಚ್ಚಂ ಸಿಯಾ ಕಿಲೇಸೋ, ಸಿಯಾ ನೋ ಕಿಲೇಸೋ. ದ್ವೇ ಸಚ್ಚಾ ಸಂಕಿಲೇಸಿಕಾ. ದ್ವೇ ಸಚ್ಚಾ ಅಸಂಕಿಲೇಸಿಕಾ. ಸಮುದಯಸಚ್ಚಂ ಸಂಕಿಲಿಟ್ಠಂ. ದ್ವೇ ಸಚ್ಚಾ ಅಸಂಕಿಲಿಟ್ಠಾ. ದುಕ್ಖಸಚ್ಚಂ ಸಿಯಾ ಸಂಕಿಲಿಟ್ಠಂ, ಸಿಯಾ ಅಸಂಕಿಲಿಟ್ಠಂ. ಸಮುದಯಸಚ್ಚಂ ಕಿಲೇಸಸಮ್ಪಯುತ್ತಂ. ದ್ವೇ ಸಚ್ಚಾ ಕಿಲೇಸವಿಪ್ಪಯುತ್ತಾ. ದುಕ್ಖಸಚ್ಚಂ ಸಿಯಾ ಕಿಲೇಸಸಮ್ಪಯುತ್ತಂ, ಸಿಯಾ ಕಿಲೇಸವಿಪ್ಪಯುತ್ತಂ. ಸಮುದಯಸಚ್ಚಂ ಕಿಲೇಸೋ ಚೇವ ಸಂಕಿಲೇಸಿಕಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಕಿಲೇಸಾ ಚೇವ ಸಂಕಿಲೇಸಿಕಾ ಚಾ’’ತಿಪಿ, ‘‘ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾ’’ತಿಪಿ. ದುಕ್ಖಸಚ್ಚಂ ಸಿಯಾ ಕಿಲೇಸೋ ಚೇವ ಸಂಕಿಲೇಸಿಕಞ್ಚ, ಸಿಯಾ ಸಂಕಿಲೇಸಿಕಞ್ಚೇವ ನೋ ಚ ಕಿಲೇಸೋ. ಸಮುದಯಸಚ್ಚಂ ಕಿಲೇಸೋ ಚೇವ ಸಂಕಿಲಿಟ್ಠಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಕಿಲೇಸಾ ಚೇವ ಸಂಕಿಲಿಟ್ಠಾ ಚಾ’’ತಿಪಿ, ‘‘ಸಂಕಿಲಿಟ್ಠಾ ಚೇವ ನೋ ಚ ಕಿಲೇಸಾ’’ತಿಪಿ. ದುಕ್ಖಸಚ್ಚಂ ಸಿಯಾ ಕಿಲೇಸೋ ಚೇವ ಸಂಕಿಲಿಟ್ಠಞ್ಚ, ಸಿಯಾ ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸೋ, ಸಿಯಾ ನ ವತ್ತಬ್ಬಂ – ‘‘ಕಿಲೇಸೋ ಚೇವ ಸಂಕಿಲಿಟ್ಠಞ್ಚಾ’’ತಿಪಿ, ‘‘ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸೋ’’ತಿಪಿ. ಸಮುದಯಸಚ್ಚಂ ಕಿಲೇಸೋ ಚೇವ ಕಿಲೇಸಸಮ್ಪಯುತ್ತಞ್ಚ. ದ್ವೇ ಸಚ್ಚಾ ನ ವತ್ತಬ್ಬಾ – ‘‘ಕಿಲೇಸಾ ಚೇವ ಕಿಲೇಸಸಮ್ಪಯುತ್ತಾ ಚಾ’’ತಿಪಿ, ‘‘ಕಿಲೇಸಸಮ್ಪಯುತ್ತಾ ಚೇವ ನೋ ಚ ಕಿಲೇಸಾ’’ತಿಪಿ. ದುಕ್ಖಸಚ್ಚಂ ಸಿಯಾ ಕಿಲೇಸೋ ಚೇವ ಕಿಲೇಸಸಮ್ಪಯುತ್ತಞ್ಚ, ಸಿಯಾ ಕಿಲೇಸಸಮ್ಪಯುತ್ತಞ್ಚೇವ ನೋ ಚ ಕಿಲೇಸೋ, ಸಿಯಾ ನ ವತ್ತಬ್ಬಂ – ‘‘ಕಿಲೇಸೋ ಚೇವ ಕಿಲೇಸಸಮ್ಪಯುತ್ತಞ್ಚಾ’’ ತಿಪಿ, ‘‘ಕಿಲೇಸಸಮ್ಪಯುತ್ತಞ್ಚೇವ ನೋ ಚ ಕಿಲೇಸೋ’’ತಿಪಿ. ದ್ವೇ ಸಚ್ಚಾ ಕಿಲೇಸವಿಪ್ಪಯುತ್ತಅಸಂಕಿಲೇಸಿಕಾ. ಸಮುದಯಸಚ್ಚಂ ನ ವತ್ತಬ್ಬಂ – ‘‘ಕಿಲೇಸವಿಪ್ಪಯುತ್ತಸಂಕಿಲೇಸಿಕ’’ನ್ತಿಪಿ, ‘‘ಕಿಲೇಸವಿಪ್ಪಯುತ್ತಅಸಂಕಿಲೇಸಿಕ’’ನ್ತಿಪಿ. ದುಕ್ಖಸಚ್ಚಂ ಸಿಯಾ ಕಿಲೇಸವಿಪ್ಪಯುತ್ತಸಂಕಿಲೇಸಿಕಂ, ಸಿಯಾ ನ ವತ್ತಬ್ಬಂ – ‘‘ಕಿಲೇಸವಿಪ್ಪಯುತ್ತಸಂಕಿಲೇಸಿಕ’’ನ್ತಿಪಿ, ‘‘ಕಿಲೇಸವಿಪ್ಪಯುತ್ತಅಸಂಕಿಲೇಸಿಕ’’ನ್ತಿಪಿ.

ದ್ವೇ ಸಚ್ಚಾ ನ ದಸ್ಸನೇನ ಪಹಾತಬ್ಬಾ. ದ್ವೇ ಸಚ್ಚಾ ಸಿಯಾ ದಸ್ಸನೇನ ಪಹಾತಬ್ಬಾ, ಸಿಯಾ ನ ದಸ್ಸನೇನ ಪಹಾತಬ್ಬಾ. ದ್ವೇ ಸಚ್ಚಾ ನ ಭಾವನಾಯ ಪಹಾತಬ್ಬಾ. ದ್ವೇ ಸಚ್ಚಾ ಸಿಯಾ ಭಾವನಾಯ ಪಹಾತಬ್ಬಾ, ಸಿಯಾ ನ ಭಾವನಾಯ ಪಹಾತಬ್ಬಾ. ದ್ವೇ ಸಚ್ಚಾ ನ ದಸ್ಸನೇನ ಪಹಾತಬ್ಬಹೇತುಕಾ. ದ್ವೇ ಸಚ್ಚಾ ಸಿಯಾ ದಸ್ಸನೇನ ಪಹಾತಬ್ಬಹೇತುಕಾ, ಸಿಯಾ ನ ದಸ್ಸನೇನ ಪಹಾತಬ್ಬಹೇತುಕಾ. ದ್ವೇ ಸಚ್ಚಾ ನ ಭಾವನಾಯ ಪಹಾತಬ್ಬಹೇತುಕಾ. ದ್ವೇ ಸಚ್ಚಾ ಸಿಯಾ ಭಾವನಾಯ ಪಹಾತಬ್ಬಹೇತುಕಾ, ಸಿಯಾ ನ ಭಾವನಾಯ ಪಹಾತಬ್ಬಹೇತುಕಾ. ಸಮುದಯಸಚ್ಚಂ ಸವಿತಕ್ಕಂ. ನಿರೋಧಸಚ್ಚಂ ಅವಿತಕ್ಕಂ. ದ್ವೇ ಸಚ್ಚಾ ಸಿಯಾ ಸವಿತಕ್ಕಾ, ಸಿಯಾ ಅವಿತಕ್ಕಾ. ಸಮುದಯಸಚ್ಚಂ ಸವಿಚಾರಂ. ನಿರೋಧಸಚ್ಚಂ ಅವಿಚಾರಂ. ದ್ವೇ ಸಚ್ಚಾ ಸಿಯಾ ಸವಿಚಾರಾ, ಸಿಯಾ ಅವಿಚಾರಾ. ನಿರೋಧಸಚ್ಚಂ ಅಪ್ಪೀತಿಕಂ. ತೀಣಿ ಸಚ್ಚಾನಿ ಸಿಯಾ ಸಪ್ಪೀತಿಕಾ, ಸಿಯಾ ಅಪ್ಪೀತಿಕಾ. ನಿರೋಧಸಚ್ಚಂ ನ ಪೀತಿಸಹಗತಂ. ತೀಣಿ ಸಚ್ಚಾನಿ ಸಿಯಾ ಪೀತಿಸಹಗತಾ, ಸಿಯಾ ನ ಪೀತಿಸಹಗತಾ. ನಿರೋಧಸಚ್ಚಂ ನ ಸುಖಸಹಗತಂ. ತೀಣಿ ಸಚ್ಚಾನಿ ಸಿಯಾ ಸುಖಸಹಗತಾ, ಸಿಯಾ ನ ಸುಖಸಹಗತಾ. ನಿರೋಧಸಚ್ಚಂ ನ ಉಪೇಕ್ಖಾಸಹಗತಂ. ತೀಣಿ ಸಚ್ಚಾನಿ ಸಿಯಾ ಉಪೇಕ್ಖಾಸಹಗತಾ, ಸಿಯಾ ನ ಉಪೇಕ್ಖಾಸಹಗತಾ.

ಸಮುದಯಸಚ್ಚಂ ಕಾಮಾವಚರಂ. ದ್ವೇ ಸಚ್ಚಾ ನ ಕಾಮಾವಚರಾ. ದುಕ್ಖಸಚ್ಚಂ ಸಿಯಾ ಕಾಮಾವಚರಂ, ಸಿಯಾ ನ ಕಾಮಾವಚರಂ. ತೀಣಿ ಸಚ್ಚಾನಿ ನ ರೂಪಾವಚರಾ. ದುಕ್ಖಸಚ್ಚಂ ಸಿಯಾ ರೂಪಾವಚರಂ, ಸಿಯಾ ನ ರೂಪಾವಚರಂ. ತೀಣಿ ಸಚ್ಚಾನಿ ನ ಅರೂಪಾವಚರಾ. ದುಕ್ಖಸಚ್ಚಂ ಸಿಯಾ ಅರೂಪಾವಚರಂ, ಸಿಯಾ ನ ಅರೂಪಾವಚರಂ. ದ್ವೇ ಸಚ್ಚಾ ಪರಿಯಾಪನ್ನಾ. ದ್ವೇ ಸಚ್ಚಾ ಅಪರಿಯಾಪನ್ನಾ. ಮಗ್ಗಸಚ್ಚಂ ನಿಯ್ಯಾನಿಕಂ. ತೀಣಿ ಸಚ್ಚಾನಿ ಅನಿಯ್ಯಾನಿಕಾ. ಮಗ್ಗಸಚ್ಚಂ ನಿಯತಂ. ನಿರೋಧಸಚ್ಚಂ ಅನಿಯತಂ. ದ್ವೇ ಸಚ್ಚಾ ಸಿಯಾ ನಿಯತಾ, ಸಿಯಾ ಅನಿಯತಾ. ದ್ವೇ ಸಚ್ಚಾ ಸಉತ್ತರಾ. ದ್ವೇ ಸಚ್ಚಾ ಅನುತ್ತರಾ. ಸಮುದಯಸಚ್ಚಂ ಸರಣಂ. ದ್ವೇ ಸಚ್ಚಾ ಅರಣಾ. ದುಕ್ಖಸಚ್ಚಂ ಸಿಯಾ ಸರಣಂ, ಸಿಯಾ ಅರಣನ್ತಿ.

ಪಞ್ಹಾಪುಚ್ಛಕಂ.

ಸಚ್ಚವಿಭಙ್ಗೋ ನಿಟ್ಠಿತೋ.