೬. ಉಪ್ಪಾದಕಕಮ್ಮಆಯುಪ್ಪಮಾಣವಾರೋ

೧. ಉಪ್ಪಾದಕಕಮ್ಮಂ

೧೦೨೧. ದೇವಾತಿ. ತಯೋ ದೇವಾ – ಸಮ್ಮುತಿದೇವಾ [ಸಮ್ಮತಿದೇವಾ (ಸ್ಯಾ.)], ಉಪಪತ್ತಿದೇವಾ, ವಿಸುದ್ಧಿದೇವಾ.

ಸಮ್ಮುತಿದೇವಾ ನಾಮ – ರಾಜಾನೋ, ದೇವಿಯೋ, ಕುಮಾರಾ.

ಉಪಪತ್ತಿದೇವಾ ನಾಮ – ಚಾತುಮಹಾರಾಜಿಕೇ [ಚಾತುಮ್ಮಹಾರಾಜಿಕೇ (ಸೀ. ಸ್ಯಾ.)] ದೇವೇ ಉಪಾದಾಯ ತದುಪರಿ ದೇವಾ.

ವಿಸುದ್ಧಿದೇವಾ ನಾಮ – ಅರಹನ್ತೋ ವುಚ್ಚನ್ತಿ.

ದಾನಂ ದತ್ವಾ, ಸೀಲಂ ಸಮಾದಿಯಿತ್ವಾ, ಉಪೋಸಥಕಮ್ಮಂ ಕತ್ವಾ ಕತ್ಥ ಉಪಪಜ್ಜನ್ತಿ? ದಾನಂ ದತ್ವಾ, ಸೀಲಂ ಸಮಾದಿಯಿತ್ವಾ, ಉಪೋಸಥಕಮ್ಮಂ ಕತ್ವಾ ಅಪ್ಪೇಕಚ್ಚೇ ಖತ್ತಿಯಮಹಾಸಾಲಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಬ್ರಾಹ್ಮಣಮಹಾಸಾಲಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಗಹಪತಿಮಹಾಸಾಲಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಚಾತುಮಹಾರಾಜಿಕಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ತಾವತಿಂಸಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಯಾಮಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ತುಸಿತಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ನಿಮ್ಮಾನರತೀನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಪರನಿಮ್ಮಿತವಸವತ್ತೀನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ.

೨. ಆಯುಪ್ಪಮಾಣಂ

೧೦೨೨. ಮನುಸ್ಸಾನಂ ಕಿತ್ತಕಂ ಆಯುಪ್ಪಮಾಣಂ? ವಸ್ಸಸತಂ, ಅಪ್ಪಂ ವಾ ಭಿಯ್ಯೋ [ಅಪ್ಪಂ ವಾ ಭಿಯ್ಯೋ ವಾ (ಸ್ಯಾ. ಕ.) ದೀ. ನಿ. ೨.೭].

೧೦೨೩. ಚಾತುಮಹಾರಾಜಿಕಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಯಾನಿ ಮಾನುಸಕಾನಿ ಪಞ್ಞಾಸ ವಸ್ಸಾನಿ, ಚಾತುಮ್ಮಹಾರಾಜಿಕಾನಂ ದೇವಾನಂ ಏಸೋ ಏಕೋ ರತ್ತಿನ್ದಿವೋ [ರತ್ತಿದಿವೋ (ಕ.) ಅ. ನಿ. ೩.೭೧]. ತಾಯ ರತ್ತಿಯಾ ತಿಂಸ ರತ್ತಿಯೋ ಮಾಸೋ. ತೇನ ಮಾಸೇನ ದ್ವಾದಸಮಾಸಿಯೋ ಸಂವಚ್ಛರೋ. ತೇನ ಸಂವಚ್ಛರೇನ ದಿಬ್ಬಾನಿ ಪಞ್ಚ ವಸ್ಸಸತಾನಿ ಚಾತುಮ್ಮಹಾರಾಜಿಕಾನಂ ದೇವಾನಂ ಆಯುಪ್ಪಮಾಣಂ. ಮನುಸ್ಸಾನಂ ಗಣನಾಯ ಕಿತ್ತಕಂ ಹೋತಿ? ನವುತಿ ವಸ್ಸಸತಸಹಸ್ಸಾನಿ.

ತಾವತಿಂಸಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಯಂ ಮಾನುಸಕಂ ವಸ್ಸಸತಂ, ತಾವತಿಂಸಾನಂ ದೇವಾನಂ ಏಸೋ ಏಕೋ ರತ್ತಿನ್ದಿವೋ. ತಾಯ ರತ್ತಿಯಾ ತಿಂಸ ರತ್ತಿಯೋ ಮಾಸೋ. ತೇನ ಮಾಸೇನ ದ್ವಾದಸಮಾಸಿಯೋ ಸಂವಚ್ಛರೋ. ತೇನ ಸಂವಚ್ಛರೇನ ದಿಬ್ಬಂ ವಸ್ಸಸಹಸ್ಸಂ ತಾವತಿಂಸಾನಂ ದೇವಾನಂ ಆಯುಪ್ಪಮಾಣಂ. ಮನುಸ್ಸಾನಂ ಗಣನಾಯ ಕಿತ್ತಕಂ ಹೋತಿ? ತಿಸ್ಸೋ ಚ ವಸ್ಸಕೋಟಿಯೋ ಸಟ್ಠಿ ಚ ವಸ್ಸಸತಸಹಸ್ಸಾನಿ.

ಯಾಮಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಯಾನಿ ಮಾನುಸಕಾನಿ ದ್ವೇ ವಸ್ಸಸತಾನಿ, ಯಾಮಾನಂ ದೇವಾನಂ ಏಸೋ ಏಕೋ ರತ್ತಿನ್ದಿವೋ. ತಾಯ ರತ್ತಿಯಾ ತಿಂಸರತ್ತಿಯೋ ಮಾಸೋ. ತೇನ ಮಾಸೇನ ದ್ವಾದಸಮಾಸಿಯೋ ಸಂವಚ್ಛರೋ. ತೇನ ಸಂವಚ್ಛರೇನ ದಿಬ್ಬಾನಿ ದ್ವೇ ವಸ್ಸಸಹಸ್ಸಾನಿ ಯಾಮಾನಂ ದೇವಾನಂ ಆಯುಪ್ಪಮಾಣಂ. ಮನುಸ್ಸಾನಂ ಗಣನಾಯ ಕಿತ್ತಕಂ ಹೋತಿ? ಚುದ್ದಸಞ್ಚ ವಸ್ಸಕೋಟಿಯೋ ಚತ್ತಾರೀಸಞ್ಚ ವಸ್ಸಸತಸಹಸ್ಸಾನಿ.

ತುಸಿತಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಯಾನಿ ಮಾನುಸಕಾನಿ ಚತ್ತಾರಿ ವಸ್ಸಸತಾನಿ, ತುಸಿತಾನಂ ದೇವಾನಂ ಏಸೋ ಏಕೋ ರತ್ತಿನ್ದಿವೋ. ತಾಯ ರತ್ತಿಯಾ ತಿಂಸರತ್ತಿಯೋ ಮಾಸೋ. ತೇನ ಮಾಸೇನ ದ್ವಾದಸಮಾಸಿಯೋ ಸಂವಚ್ಛರೋ. ತೇನ ಸಂವಚ್ಛರೇನ ದಿಬ್ಬಾನಿ ಚತ್ತಾರಿ ವಸ್ಸಸಹಸ್ಸಾನಿ ತುಸಿತಾನಂ ದೇವಾನಂ ಆಯುಪ್ಪಮಾಣಂ. ಮನುಸ್ಸಾನಂ ಗಣನಾಯ ಕಿತ್ತಕಂ ಹೋತಿ? ಸತ್ತಪಞ್ಞಾಸ ವಸ್ಸಕೋಟಿಯೋ ಸಟ್ಠಿ ಚ ವಸ್ಸಸತಸಹಸ್ಸಾನಿ.

ನಿಮ್ಮಾನರತೀನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಯಾನಿ ಮಾನುಸಕಾನಿ ಅಟ್ಠ ವಸ್ಸಸತಾನಿ, ನಿಮ್ಮಾನರತೀನಂ ದೇವಾನಂ ಏಸೋ ಏಕೋ ರತ್ತಿನ್ದಿವೋ. ತಾಯ ರತ್ತಿಯಾ ತಿಂಸರತ್ತಿಯೋ ಮಾಸೋ. ತೇನ ಮಾಸೇನ ದ್ವಾದಸಮಾಸಿಯೋ ಸಂವಚ್ಛರೋ. ತೇನ ಸಂವಚ್ಛರೇನ ದಿಬ್ಬಾನಿ ಅಟ್ಠ ವಸ್ಸಸಹಸ್ಸಾನಿ ನಿಮ್ಮಾನರತೀನಂ ದೇವಾನಂ ಆಯುಪ್ಪಮಾಣಂ. ಮನುಸ್ಸಾನಂ ಗಣನಾಯ ಕಿತ್ತಕಂ ಹೋತಿ? ದ್ವೇ ವಸ್ಸಕೋಟಿಸತಾನಿ ತಿಂಸಞ್ಚ ವಸ್ಸಕೋಟಿಯೋ ಚತ್ತಾರೀಸಞ್ಚ ವಸ್ಸಸತಸಹಸ್ಸಾನಿ.

ಪರನಿಮ್ಮಿತವಸವತ್ತೀನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಯಾನಿ ಮಾನುಸಕಾನಿ ಸೋಳಸ ವಸ್ಸಸತಾನಿ, ಪರನಿಮ್ಮಿತವಸವತ್ತೀನಂ ದೇವಾನಂ ಏಸೋ ಏಕೋ ರತ್ತಿನ್ದಿವೋ. ತಾಯ ರತ್ತಿಯಾ ತಿಂಸರತ್ತಿಯೋ ಮಾಸೋ. ತೇನ ಮಾಸೇನ ದ್ವಾದಸಮಾಸಿಯೋ ಸಂವಚ್ಛರೋ. ತೇನ ಸಂವಚ್ಛರೇನ ದಿಬ್ಬಾನಿ ಸೋಳಸ ವಸ್ಸಸಹಸ್ಸಾನಿ ಪರನಿಮ್ಮಿತವಸವತ್ತೀನಂ ದೇವಾನಂ ಆಯುಪ್ಪಮಾಣಂ. ಮನುಸ್ಸಾನಂ ಗಣನಾಯ ಕಿತ್ತಕಂ ಹೋತಿ? ನವ ಚ ವಸ್ಸಕೋಟಿಸತಾನಿ ಏಕವೀಸಞ್ಚ ವಸ್ಸಕೋಟಿಯೋ ಸಟ್ಠಿ ಚ ವಸ್ಸಸತಸಹಸ್ಸಾನೀತಿ.

ಛ ಏತೇ [ಛಪಿ ತೇ (ಸ್ಯಾ.)] ಕಾಮಾವಚರಾ, ಸಬ್ಬಕಾಮಸಮಿದ್ಧಿನೋ;

ಸಬ್ಬೇಸಂ ಏಕಸಙ್ಖಾತೋ, ಆಯು ಭವತಿ ಕಿತ್ತಕೋ.

ದ್ವಾದಸ ಕೋಟಿಸತಂ ತೇಸಂ, ಅಟ್ಠವೀಸಞ್ಚ ಕೋಟಿಯೋ;

ಪಞ್ಞಾಸ ಸತಸಹಸ್ಸಾನಿ, ವಸ್ಸಗ್ಗೇನ ಪಕಾಸಿತಾತಿ.

೧೦೨೪. ಪಠಮಂ ಝಾನಂ ಪರಿತ್ತಂ ಭಾವೇತ್ವಾ ಕತ್ಥ ಉಪಪಜ್ಜನ್ತಿ? ಪಠಮಂ ಝಾನಂ ಪರಿತ್ತಂ ಭಾವೇತ್ವಾ ಬ್ರಹ್ಮಪಾರಿಸಜ್ಜಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ. ತೇಸಂ ಕಿತ್ತಕಂ ಆಯುಪ್ಪಮಾಣಂ? ಕಪ್ಪಸ್ಸ ತತಿಯೋ ಭಾಗೋ.

ಪಠಮಂ ಝಾನಂ ಮಜ್ಝಿಮಂ ಭಾವೇತ್ವಾ ಕತ್ಥ ಉಪಪಜ್ಜನ್ತಿ? ಪಠಮಂ ಝಾನಂ ಮಜ್ಝಿಮಂ ಭಾವೇತ್ವಾ ಬ್ರಹ್ಮಪುರೋಹಿತಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ. ತೇಸಂ ಕಿತ್ತಕಂ ಆಯುಪ್ಪಮಾಣಂ? ಉಪಡ್ಢಕಪ್ಪೋ.

ಪಠಮಂ ಝಾನಂ ಪಣೀತಂ ಭಾವೇತ್ವಾ ಕತ್ಥ ಉಪಪಜ್ಜನ್ತಿ? ಪಠಮಂ ಝಾನಂ ಪಣೀತಂ ಭಾವೇತ್ವಾ ಮಹಾಬ್ರಹ್ಮಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ. ತೇಸಂ ಕಿತ್ತಕಂ ಆಯುಪ್ಪಮಾಣಂ? ಕಪ್ಪೋ [ಏಕೋ ಕಪ್ಪೋ (ಸ್ಯಾ.)].

೧೦೨೫. ದುತಿಯಂ ಝಾನಂ ಪರಿತ್ತಂ ಭಾವೇತ್ವಾ ಕತ್ಥ ಉಪಪಜ್ಜನ್ತಿ? ದುತಿಯಂ ಝಾನಂ ಪರಿತ್ತಂ ಭಾವೇತ್ವಾ ಪರಿತ್ತಾಭಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ. ತೇಸಂ ಕಿತ್ತಕಂ ಆಯುಪ್ಪಮಾಣಂ? ದ್ವೇ ಕಪ್ಪಾ.

ದುತಿಯಂ ಝಾನಂ ಮಜ್ಝಿಮಂ ಭಾವೇತ್ವಾ ಕತ್ಥ ಉಪಪಜ್ಜನ್ತಿ? ದುತಿಯಂ ಝಾನಂ ಮಜ್ಝಿಮಂ ಭಾವೇತ್ವಾ ಅಪ್ಪಮಾಣಾಭಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ. ತೇಸಂ ಕಿತ್ತಕಂ ಆಯುಪ್ಪಮಾಣಂ? ಚತ್ತಾರೋ ಕಪ್ಪಾ.

ದುತಿಯಂ ಝಾನಂ ಪಣೀತಂ ಭಾವೇತ್ವಾ ಕತ್ಥ ಉಪಪಜ್ಜನ್ತಿ? ದುತಿಯಂ ಝಾನಂ ಪಣೀತಂ ಭಾವೇತ್ವಾ ಆಭಸ್ಸರಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ. ತೇಸಂ ಕಿತ್ತಕಂ ಆಯುಪ್ಪಮಾಣಂ? ಅಟ್ಠ ಕಪ್ಪಾ.

೧೦೨೬. ತತಿಯಂ ಝಾನಂ ಪರಿತ್ತಂ ಭಾವೇತ್ವಾ ಕತ್ಥ ಉಪಪಜ್ಜನ್ತಿ? ತತಿಯಂ ಝಾನಂ ಪರಿತ್ತಂ ಭಾವೇತ್ವಾ ಪರಿತ್ತಸುಭಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ. ತೇಸಂ ಕಿತ್ತಕಂ ಆಯುಪ್ಪಮಾಣಂ? ಸೋಳಸ ಕಪ್ಪಾ.

ತತಿಯಂ ಝಾನಂ ಮಜ್ಝಿಮಂ ಭಾವೇತ್ವಾ ಕತ್ಥ ಉಪಪಜ್ಜನ್ತಿ? ತತಿಯಂ ಝಾನಂ ಮಜ್ಝಿಮಂ ಭಾವೇತ್ವಾ ಅಪ್ಪಮಾಣಸುಭಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ. ತೇಸಂ ಕಿತ್ತಕಂ ಆಯುಪ್ಪಮಾಣಂ? ಬಾತ್ತಿಂಸ ಕಪ್ಪಾ.

ತತಿಯಂ ಝಾನಂ ಪಣೀತಂ ಭಾವೇತ್ವಾ ಕತ್ಥ ಉಪಪಜ್ಜನ್ತಿ? ತತಿಯಂ ಝಾನಂ ಪಣೀತಂ ಭಾವೇತ್ವಾ ಸುಭಕಿಣ್ಹಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ. ತೇಸಂ ಕಿತ್ತಕಂ ಆಯುಪ್ಪಮಾಣಂ? ಚತುಸಟ್ಠಿ ಕಪ್ಪಾ.

೧೦೨೭. ಚತುತ್ಥಂ ಝಾನಂ ಭಾವೇತ್ವಾ ಆರಮ್ಮಣನಾನತ್ತತಾ ಮನಸಿಕಾರನಾನತ್ತತಾ ಛನ್ದನಾನತ್ತತಾ ಪಣಿಧಿನಾನತ್ತತಾ ಅಧಿಮೋಕ್ಖನಾನತ್ತತಾ ಅಭಿನೀಹಾರನಾನತ್ತತಾ ಪಞ್ಞಾನಾನತ್ತತಾ ಅಪ್ಪೇಕಚ್ಚೇ ಅಸಞ್ಞಸತ್ತಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ವೇಹಪ್ಫಲಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಅವಿಹಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಅತಪ್ಪಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಸುದಸ್ಸಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಸುದಸ್ಸೀನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಅಕನಿಟ್ಠಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಆಕಾಸಾನಞ್ಚಾಯತನೂಪಗಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ವಿಞ್ಞಾಣಞ್ಚಾಯತನೂಪಗಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ಆಕಿಞ್ಚಞ್ಞಾಯತನೂಪಗಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ, ಅಪ್ಪೇಕಚ್ಚೇ ನೇವಸಞ್ಞಾನಾಸಞ್ಞಾಯತನೂಪಗಾನಂ ದೇವಾನಂ ಸಹಬ್ಯತಂ ಉಪಪಜ್ಜನ್ತಿ.

ಅಸಞ್ಞಸತ್ತಾನಞ್ಚ ವೇಹಪ್ಫಲಾನಞ್ಚ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಪಞ್ಚಕಪ್ಪಸತಾನಿ.

ಅವಿಹಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಕಪ್ಪಸಹಸ್ಸಂ.

ಅತಪ್ಪಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ದ್ವೇ ಕಪ್ಪಸಹಸ್ಸಾನಿ.

ಸುದಸ್ಸಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಚತ್ತಾರಿ ಕಪ್ಪಸಹಸ್ಸಾನಿ.

ಸುದಸ್ಸೀನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಅಟ್ಠ ಕಪ್ಪಸಹಸ್ಸಾನಿ.

ಅಕನಿಟ್ಠಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಸೋಳಸ ಕಪ್ಪಸಹಸ್ಸಾನಿ.

೧೦೨೮. ಆಕಾಸಾನಞ್ಚಾಯತನೂಪಗಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ವೀಸತಿ ಕಪ್ಪಸಹಸ್ಸಾನಿ.

ವಿಞ್ಞಾಣಞ್ಚಾಯತನೂಪಗಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಚತ್ತಾರೀಸ ಕಪ್ಪಸಹಸ್ಸಾನಿ.

ಆಕಿಞ್ಚಞ್ಞಾಯತನೂಪಗಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಸಟ್ಠಿ ಕಪ್ಪಸಹಸ್ಸಾನಿ.

ನೇವಸಞ್ಞಾನಾಸಞ್ಞಾಯತನೂಪಗಾನಂ ದೇವಾನಂ ಕಿತ್ತಕಂ ಆಯುಪ್ಪಮಾಣಂ? ಚತುರಾಸೀತಿ ಕಪ್ಪಸಹಸ್ಸಾನೀತಿ.

೧೦೨೯. ಉಕ್ಖಿತ್ತಾ ಪುಞ್ಞತೇಜೇನ, ಕಾಮರೂಪಗತಿಂ ಗತಾ.

ಭವಗ್ಗತಮ್ಪಿ [ಭವಗ್ಗಂ ವಾಪಿ (ಸ್ಯಾ.)] ಸಮ್ಪತ್ತಾ, ಪುನಾಗಚ್ಛನ್ತಿ [ಪುನ ಗಚ್ಛನ್ತಿ (ಸ್ಯಾ.)] ದುಗ್ಗತಿಂ.

ತಾವ ದೀಘಾಯುಕಾ ಸತ್ತಾ, ಚವನ್ತಿ ಆಯುಸಙ್ಖಯಾ;

ನತ್ಥಿ ಕೋಚಿ ಭವೋ ನಿಚ್ಚೋ, ಇತಿ ವುತ್ತಂ ಮಹೇಸಿನಾ.

ತಸ್ಮಾ ಹಿ ಧೀರಾ ನಿಪಕಾ, ನಿಪುಣಾ ಅತ್ಥಚಿನ್ತಕಾ;

ಜರಾಮರಣಮೋಕ್ಖಾಯ, ಭಾವೇನ್ತಿ ಮಗ್ಗಮುತ್ತಮಂ.

ಭಾವಯಿತ್ವಾ ಸುಚಿಂ ಮಗ್ಗಂ, ನಿಬ್ಬಾನೋಗಧಗಾಮಿನಂ;

ಸಬ್ಬಾಸವೇ ಪರಿಞ್ಞಾಯ, ಪರಿನಿಬ್ಬನ್ತಿ ಅನಾಸವಾತಿ.