೩. ಪಞ್ಹಾಪುಚ್ಛಕಂ

೪೮೨. ಸತ್ತ ಬೋಜ್ಝಙ್ಗಾ – ಸತಿಸಮ್ಬೋಜ್ಝಙ್ಗೋ, ಧಮ್ಮವಿಚಯಸಮ್ಬೋಜ್ಝಙ್ಗೋ, ವೀರಿಯಸಮ್ಬೋಜ್ಝಙ್ಗೋ, ಪೀತಿಸಮ್ಬೋಜ್ಝಙ್ಗೋ, ಪಸ್ಸದ್ಧಿಸಮ್ಬೋಜ್ಝಙ್ಗೋ, ಸಮಾಧಿಸಮ್ಬೋಜ್ಝಙ್ಗೋ, ಉಪೇಕ್ಖಾಸಮ್ಬೋಜ್ಝಙ್ಗೋ.

೪೮೩. ಸತ್ತನ್ನಂ ಬೋಜ್ಝಙ್ಗಾನಂ ಕತಿ ಕುಸಲಾ, ಕತಿ ಅಕುಸಲಾ, ಕತಿ ಅಬ್ಯಾಕತಾ…ಪೇ… ಕತಿ ಸರಣಾ, ಕತಿ ಅರಣಾ?

೧. ತಿಕಂ

೪೮೪. ಸಿಯಾ ಕುಸಲಾ, ಸಿಯಾ ಅಬ್ಯಾಕತಾ. ಪೀತಿಸಮ್ಬೋಜ್ಝಙ್ಗೋ ಸುಖಾಯ ವೇದನಾಯ ಸಮ್ಪಯುತ್ತೋ; ಛ ಬೋಜ್ಝಙ್ಗಾ ಸಿಯಾ ಸುಖಾಯ ವೇದನಾಯ ಸಮ್ಪಯುತ್ತಾ, ಸಿಯಾ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ. ಸಿಯಾ ವಿಪಾಕಾ, ಸಿಯಾ ವಿಪಾಕಧಮ್ಮಧಮ್ಮಾ. ಅನುಪಾದಿನ್ನಅನುಪಾದಾನಿಯಾ. ಅಸಂಕಿಲಿಟ್ಠಅಸಂಕಿಲೇಸಿಕಾ. ಸಿಯಾ ಸವಿತಕ್ಕಸವಿಚಾರಾ, ಸಿಯಾ ಅವಿತಕ್ಕವಿಚಾರಮತ್ತಾ, ಸಿಯಾ ಅವಿತಕ್ಕಅವಿಚಾರಾ. ಪೀತಿಸಮ್ಬೋಜ್ಝಙ್ಗೋ ನ ಪೀತಿಸಹಗತೋ, ಸುಖಸಹಗತೋ, ನ ಉಪೇಕ್ಖಾಸಹಗತೋ; ಛ ಬೋಜ್ಝಙ್ಗಾ ಸಿಯಾ ಪೀತಿಸಹಗತಾ, ಸಿಯಾ ಸುಖಸಹಗತಾ, ಸಿಯಾ ಉಪೇಕ್ಖಾಸಹಗತಾ. ನೇವ ದಸ್ಸನೇನ ನ ಭಾವನಾಯ ಪಹಾತಬ್ಬಾ. ನೇವ ದಸ್ಸನೇನ ನ ಭಾವನಾಯ ಪಹಾತಬ್ಬಹೇತುಕಾ. ಸಿಯಾ ಅಪಚಯಗಾಮಿನೋ, ಸಿಯಾ ನೇವಾಚಯಗಾಮಿನಾಪಚಯಗಾಮಿನೋ. ಸಿಯಾ ಸೇಕ್ಖಾ, ಸಿಯಾ ಅಸೇಕ್ಖಾ. ಅಪ್ಪಮಾಣಾ. ಅಪ್ಪಮಾಣಾರಮ್ಮಣಾ. ಪಣೀತಾ. ಸಿಯಾ ಸಮ್ಮತ್ತನಿಯತಾ, ಸಿಯಾ ಅನಿಯತಾ. ನ ಮಗ್ಗಾರಮ್ಮಣಾ, ಸಿಯಾ ಮಗ್ಗಹೇತುಕಾ, ಸಿಯಾ ಮಗ್ಗಾಧಿಪತಿನೋ; ಸಿಯಾ ನ ವತ್ತಬ್ಬಾ ಮಗ್ಗಹೇತುಕಾತಿಪಿ, ಮಗ್ಗಾಧಿಪತಿನೋತಿಪಿ. ಸಿಯಾ ಉಪ್ಪನ್ನಾ, ಸಿಯಾ ಅನುಪ್ಪನ್ನಾ, ಸಿಯಾ ಉಪ್ಪಾದಿನೋ. ಸಿಯಾ ಅತೀತಾ, ಸಿಯಾ ಅನಾಗತಾ, ಸಿಯಾ ಪಚ್ಚುಪ್ಪನ್ನಾ. ನ ವತ್ತಬ್ಬಾ ಅತೀತಾರಮ್ಮಣಾತಿಪಿ, ಅನಾಗತಾರಮ್ಮಣಾತಿಪಿ, ಪಚ್ಚುಪ್ಪನ್ನಾರಮ್ಮಣಾತಿಪಿ. ಸಿಯಾ ಅಜ್ಝತ್ತಾ, ಸಿಯಾ ಬಹಿದ್ಧಾ, ಸಿಯಾ ಅಜ್ಝತ್ತಬಹಿದ್ಧಾ. ಬಹಿದ್ಧಾರಮ್ಮಣಾ. ಅನಿದಸ್ಸನಅಪ್ಪಟಿಘಾ.

೨. ದುಕಂ

೪೮೫. ಧಮ್ಮವಿಚಯಸಮ್ಬೋಜ್ಝಙ್ಗೋ ಹೇತು, ಛ ಬೋಜ್ಝಙ್ಗಾ ಹೇತುಸಮ್ಪಯುತ್ತಾ. ಧಮ್ಮವಿಚಯಸಮ್ಬೋಜ್ಝಙ್ಗೋ ಹೇತು ಚೇವ ಸಹೇತುಕೋ ಚ, ಛ ಬೋಜ್ಝಙ್ಗಾ ನ ವತ್ತಬ್ಬಾ ಹೇತೂ ಚೇವ ಸಹೇತುಕಾ ಚಾತಿ, ಸಹೇತುಕಾ ಚೇವ ನ ಚ ಹೇತೂ. ಧಮ್ಮವಿಚಯಸಮ್ಬೋಜ್ಝಙ್ಗೋ ಹೇತು ಚೇವ ಹೇತುಸಮ್ಪಯುತ್ತೋ ಚ, ಛ ಬೋಜ್ಝಙ್ಗಾ ನ ವತ್ತಬ್ಬಾ ಹೇತೂ ಚೇವ ಹೇತುಸಮ್ಪಯುತ್ತಾ ಚಾತಿ, ಹೇತುಸಮ್ಪಯುತ್ತಾ ಚೇವ ನ ಚ ಹೇತೂ. ಛ ಬೋಜ್ಝಙ್ಗಾ ನ ಹೇತೂ ಸಹೇತುಕಾ, ಧಮ್ಮವಿಚಯಸಮ್ಬೋಜ್ಝಙ್ಗೋ ನ ವತ್ತಬ್ಬೋ ನ ಹೇತುಸಹೇತುಕೋತಿಪಿ, ನ ಹೇತುಅಹೇತುಕೋತಿಪಿ. ಸಪ್ಪಚ್ಚಯಾ. ಸಙ್ಖತಾ. ಅನಿದಸ್ಸನಾ. ಅಪ್ಪಟಿಘಾ. ಅರೂಪಾ. ಲೋಕುತ್ತರಾ. ಕೇನಚಿ ವಿಞ್ಞೇಯ್ಯಾ, ಕೇನಚಿ ನ ವಿಞ್ಞೇಯ್ಯಾ. ನೋ ಆಸವಾ. ಅನಾಸವಾ ಆಸವವಿಪ್ಪಯುತ್ತಾ. ನ ವತ್ತಬ್ಬಾ ಆಸವಾ ಚೇವ ಸಾಸವಾ ಚಾತಿಪಿ, ಸಾಸವಾ ಚೇವ ನೋ ಚ ಆಸವಾತಿಪಿ. ಆಸವಾ ಚೇವ ಆಸವಸಮ್ಪಯುತ್ತಾ ಚಾತಿಪಿ, ಆಸವಸಮ್ಪಯುತ್ತಾ ಚೇವ ನೋ ಚ ಆಸವಾತಿಪಿ. ಆಸವವಿಪ್ಪಯುತ್ತಾ. ಅನಾಸವಾ. ನೋ ಸಂಯೋಜನಾ…ಪೇ… ನೋ ಗನ್ಥಾ…ಪೇ… ನೋ ಓಘಾ…ಪೇ… ನೋ ಯೋಗಾ…ಪೇ… ನೋ ನೀವರಣಾ…ಪೇ… ನೋ ಪರಾಮಾಸಾ…ಪೇ… ಸಾರಮ್ಮಣಾ. ನೋ ಚಿತ್ತಾ. ಚೇತಸಿಕಾ. ಚಿತ್ತಸಮ್ಪಯುತ್ತಾ. ಚಿತ್ತಸಂಸಟ್ಠಾ. ಚಿತ್ತಸಮುಟ್ಠಾನಾ. ಚಿತ್ತಸಹಭುನೋ. ಚಿತ್ತಾನುಪರಿವತ್ತಿನೋ. ಚಿತ್ತಸಂಸಟ್ಠಸಮುಟ್ಠಾನಾ. ಚಿತ್ತಸಂಸಟ್ಠಸಮುಟ್ಠಾನಸಹಭುನೋ. ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ. ಬಾಹಿರಾ. ನೋ ಉಪಾದಾ. ಅನುಪಾದಿನ್ನಾ. ನೋ ಉಪಾದಾನಾ…ಪೇ… ನೋ ಕಿಲೇಸಾ…ಪೇ… ನ ದಸ್ಸನೇನ ಪಹಾತಬ್ಬಾ. ನ ಭಾವನಾಯ ಪಹಾತಬ್ಬಾ. ನ ದಸ್ಸನೇನ ಪಹಾತಬ್ಬಹೇತುಕಾ. ನ ಭಾವನಾಯ ಪಹಾತಬ್ಬಹೇತುಕಾ. ಸಿಯಾ ಸವಿತಕ್ಕಾ, ಸಿಯಾ ಅವಿತಕ್ಕಾ. ಸಿಯಾ ಸವಿಚಾರಾ, ಸಿಯಾ ಅವಿಚಾರಾ.

ಪೀತಿಸಮ್ಬೋಜ್ಝಙ್ಗೋ ಅಪ್ಪೀತಿಕೋ, ಛ ಬೋಜ್ಝಙ್ಗಾ ಸಿಯಾ ಸಪ್ಪೀತಿಕಾ, ಸಿಯಾ ಅಪ್ಪೀತಿಕಾ. ಪೀತಿಸಮ್ಬೋಜ್ಝಙ್ಗೋ ನ ಪೀತಿಸಹಗತೋ, ಛ ಬೋಜ್ಝಙ್ಗಾ ಸಿಯಾ ಪೀತಿಸಹಗತಾ, ಸಿಯಾ ನ ಪೀತಿಸಹಗತಾ. ಪೀತಿಸಮ್ಬೋಜ್ಝಙ್ಗೋ ಸುಖಸಹಗತೋ, ಛ ಬೋಜ್ಝಙ್ಗಾ ಸಿಯಾ ಸುಖಸಹಗತಾ, ಸಿಯಾ ನ ಸುಖಸಹಗತಾ. ಪೀತಿಸಮ್ಬೋಜ್ಝಙ್ಗೋ ನ ಉಪೇಕ್ಖಾಸಹಗತೋ, ಛ ಬೋಜ್ಝಙ್ಗಾ ಸಿಯಾ ಉಪೇಕ್ಖಾಸಹಗತಾ, ಸಿಯಾ ನ ಉಪೇಕ್ಖಾಸಹಗತಾ. ನ ಕಾಮಾವಚರಾ. ನ ರೂಪಾವಚರಾ. ನ ಅರೂಪಾವಚರಾ. ಅಪರಿಯಾಪನ್ನಾ. ಸಿಯಾ ನಿಯ್ಯಾನಿಕಾ, ಸಿಯಾ ಅನಿಯ್ಯಾನಿಕಾ. ಸಿಯಾ ನಿಯತಾ, ಸಿಯಾ ಅನಿಯತಾ. ಅನುತ್ತರಾ. ಅರಣಾತಿ.

ಪಞ್ಹಾಪುಚ್ಛಕಂ.

ಬೋಜ್ಝಙ್ಗವಿಭಙ್ಗೋ ನಿಟ್ಠಿತೋ.