೧-೭. ಪಟಿಚ್ಚವಾರಾದಿ

ಪಚ್ಚಯಚತುಕ್ಕಂ

ಹೇತುಪಚ್ಚಯೋ

೧೬. ಗನ್ಥವಿಪ್ಪಯುತ್ತಂ ಕುಸಲಂ ಧಮ್ಮಂ ಪಟಿಚ್ಚ ಗನ್ಥವಿಪ್ಪಯುತ್ತೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ (ಸಂಖಿತ್ತಂ).

೧೭. ಹೇತುಯಾ ಏಕಂ, ಆರಮ್ಮಣೇ ಏಕಂ…ಪೇ… ಅವಿಗತೇ ಏಕಂ (ಸಂಖಿತ್ತಂ).

(ಸಹಜಾತವಾರೇಪಿ…ಪೇ… ಪಞ್ಹಾವಾರೇಪಿ ಸಬ್ಬತ್ಥ ಏಕಂ.)

೧೮. ಗನ್ಥಸಮ್ಪಯುತ್ತಂ ಅಕುಸಲಂ ಧಮ್ಮಂ ಪಟಿಚ್ಚ ಗನ್ಥಸಮ್ಪಯುತ್ತೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ಗನ್ಥವಿಪ್ಪಯುತ್ತಂ ಅಕುಸಲಂ ಧಮ್ಮಂ ಪಟಿಚ್ಚ ಗನ್ಥವಿಪ್ಪಯುತ್ತೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ದ್ವೇ.

ಗನ್ಥಸಮ್ಪಯುತ್ತಂ ಅಕುಸಲಞ್ಚ ಗನ್ಥವಿಪ್ಪಯುತ್ತಂ ಅಕುಸಲಞ್ಚ ಧಮ್ಮಂ ಪಟಿಚ್ಚ ಗನ್ಥಸಮ್ಪಯುತ್ತೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧) (ಸಂಖಿತ್ತಂ.)

೧೯. ಹೇತುಯಾ ಛ, ಆರಮ್ಮಣೇ ಛ, ಅಧಿಪತಿಯಾ ಪಞ್ಚ…ಪೇ… ಅವಿಗತೇ ಛ (ಸಂಖಿತ್ತಂ).

ನಹೇತುಯಾ ಏಕಂ, ನಅಧಿಪತಿಯಾ ಛ, ನಪುರೇಜಾತೇ ಛ…ಪೇ… ನಕಮ್ಮೇ ಚತ್ತಾರಿ, ನವಿಪ್ಪಯುತ್ತೇ ಛ (ಸಂಖಿತ್ತಂ).

(ಸಹಜಾತವಾರೋಪಿ…ಪೇ… ಸಮ್ಪಯುತ್ತವಾರೋಪಿ ವಿತ್ಥಾರೇತಬ್ಬಾ.)

೨೦. ಗನ್ಥಸಮ್ಪಯುತ್ತೋ ಅಕುಸಲೋ ಧಮ್ಮೋ ಗನ್ಥಸಮ್ಪಯುತ್ತಸ್ಸ ಅಕುಸಲಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ (ಸಂಖಿತ್ತಂ).

೨೧. ಹೇತುಯಾ ಛ, ಆರಮ್ಮಣೇ ನವ, ಅಧಿಪತಿಯಾ ನವ, ಅನನ್ತರೇ ನವ, ಸಹಜಾತೇ ಛ…ಪೇ… ನಿಸ್ಸಯೇ ಛ, ಉಪನಿಸ್ಸಯೇ ನವ, ಆಸೇವನೇ ನವ, ಕಮ್ಮೇ ಚತ್ತಾರಿ…ಪೇ… ಮಗ್ಗೇ ಚತ್ತಾರಿ, ಸಮ್ಪಯುತ್ತೇ ಛ…ಪೇ… ಅವಿಗತೇ ಛ (ಸಂಖಿತ್ತಂ).

೨೨. ಗನ್ಥವಿಪ್ಪಯುತ್ತಂ ಅಬ್ಯಾಕತಂ ಧಮ್ಮಂ ಪಟಿಚ್ಚ ಗನ್ಥವಿಪ್ಪಯುತ್ತೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ (ಸಂಖಿತ್ತಂ).

೨೩. ಹೇತುಯಾ ಏಕಂ, ಆರಮ್ಮಣೇ ಏಕಂ…ಪೇ… ಅವಿಗತೇ ಏಕಂ (ಸಂಖಿತ್ತಂ).

(ಸಹಜಾತವಾರೇಪಿ…ಪೇ… ಪಞ್ಹಾವಾರೇಪಿ ಸಬ್ಬತ್ಥ ಏಕಂ.)