೭. ಪಞ್ಹಾವಾರೋ

ಪಚ್ಚಯಚತುಕ್ಕಂ

ಹೇತುಪಚ್ಚಯಾದಿ

೨೧. ಅನಿದಸ್ಸನೋ ಅಬ್ಯಾಕತೋ ಧಮ್ಮೋ ಅನಿದಸ್ಸನಸ್ಸ ಅಬ್ಯಾಕತಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ… ತೀಣಿ.

ಸನಿದಸ್ಸನೋ ಅಬ್ಯಾಕತೋ ಧಮ್ಮೋ ಅನಿದಸ್ಸನಸ್ಸ ಅಬ್ಯಾಕತಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ಅನಿದಸ್ಸನೋ ಅಬ್ಯಾಕತೋ ಧಮ್ಮೋ ಅನಿದಸ್ಸನಸ್ಸ ಅಬ್ಯಾಕತಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ಸನಿದಸ್ಸನೋ ಅಬ್ಯಾಕತೋ ಧಮ್ಮೋ ಅನಿದಸ್ಸನಸ್ಸ ಅಬ್ಯಾಕತಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ. (೧)

ಅನಿದಸ್ಸನೋ ಅಬ್ಯಾಕತೋ ಧಮ್ಮೋ ಅನಿದಸ್ಸನಸ್ಸ ಅಬ್ಯಾಕತಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಅನಿದಸ್ಸನೋ ಅಬ್ಯಾಕತೋ ಧಮ್ಮೋ ಸನಿದಸ್ಸನಸ್ಸ ಅಬ್ಯಾಕತಸ್ಸ ಚ ಅನಿದಸ್ಸನಸ್ಸ ಅಬ್ಯಾಕತಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಸಹಜಾತಾಧಿಪತಿ. (೨)

ಸನಿದಸ್ಸನೋ ಅಬ್ಯಾಕತೋ ಧಮ್ಮೋ ಅನಿದಸ್ಸನಸ್ಸ ಅಬ್ಯಾಕತಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಪಕತೂಪನಿಸ್ಸಯೋ. (೧)

ಅನಿದಸ್ಸನೋ ಅಬ್ಯಾಕತೋ ಧಮ್ಮೋ ಅನಿದಸ್ಸನಸ್ಸ ಅಬ್ಯಾಕತಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. (೧) (ಸಂಖಿತ್ತಂ.)

೨೨. ಪುರೇಜಾತೇ ತೀಣಿ, ಪಚ್ಛಾಜಾತೇ ತೀಣಿ, ಆಸೇವನೇ ಏಕಂ, ಕಮ್ಮೇ ತೀಣಿ, ವಿಪಾಕೇ ತೀಣಿ, (ಸಬ್ಬತ್ಥ ತೀಣಿ) ಸಮ್ಪಯುತ್ತೇ ಏಕಂ, ವಿಪ್ಪಯುತ್ತೇ ತೀಣಿ, ಅತ್ಥಿಯಾ ಪಞ್ಚ, ನತ್ಥಿಯಾ ಏಕಂ…ಪೇ… ಅವಿಗತೇ ಪಞ್ಚ. (ಸಂಖಿತ್ತಂ.)

ಸನಿದಸ್ಸನದುಕಕುಸಲತ್ತಿಕಂ ನಿಟ್ಠಿತಂ.

(ಅಪ್ಪಚ್ಚಯಮ್ಪಿ ಅಸಙ್ಖತಮ್ಪಿ ಸನಿದಸ್ಸನಮ್ಪಿ ನ ಲಬ್ಭತಿ.)