೧. ವಿಭಙ್ಗವಾರೋ

ಹೇತುಪಚ್ಚಯೋ

೮೦. ಕಿಲೇಸಞ್ಚೇವ ಸಂಕಿಲಿಟ್ಠಞ್ಚ ಧಮ್ಮಂ ಪಟಿಚ್ಚ ಕಿಲೇಸೋ ಚೇವ ಸಂಕಿಲಿಟ್ಠೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಲೋಭಂ ಪಟಿಚ್ಚ ಮೋಹೋ ದಿಟ್ಠಿ ಥಿನಂ ಉದ್ಧಚ್ಚಂ ಅಹಿರಿಕಂ ಅನೋತ್ತಪ್ಪಂ (ಚಕ್ಕಂ). (೧)

ಕಿಲೇಸಞ್ಚೇವ ಸಂಕಿಲಿಟ್ಠಞ್ಚ ಧಮ್ಮಂ ಪಟಿಚ್ಚ ಸಂಕಿಲಿಟ್ಠೋ ಚೇವ ನೋ ಚ ಕಿಲೇಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕಿಲೇಸೇ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ. (೨)

ಕಿಲೇಸಞ್ಚೇವ ಸಂಕಿಲಿಟ್ಠಞ್ಚ ಧಮ್ಮಂ ಪಟಿಚ್ಚ ಕಿಲೇಸೋ ಚೇವ ಸಂಕಿಲಿಟ್ಠೋ ಚ ಸಂಕಿಲಿಟ್ಠೋ ಚೇವ ನೋ ಚ ಕಿಲೇಸೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಲೋಭಂ ಪಟಿಚ್ಚ ಮೋಹೋ ದಿಟ್ಠಿ ಥಿನಂ ಉದ್ಧಚ್ಚಂ ಅಹಿರಿಕಂ ಅನೋತ್ತಪ್ಪಂ ಸಮ್ಪಯುತ್ತಕಾ ಚ ಖನ್ಧಾ (ಚಕ್ಕಂ). (೩)

೮೧. ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸಂ ಧಮ್ಮಂ ಪಟಿಚ್ಚ ಸಂಕಿಲಿಟ್ಠೋ ಚೇವ ನೋ ಚ ಕಿಲೇಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ…. (೧)

ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸಂ ಧಮ್ಮಂ ಪಟಿಚ್ಚ ಕಿಲೇಸೋ ಚೇವ ಸಂಕಿಲಿಟ್ಠೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಂಕಿಲಿಟ್ಠೇ ಚೇವ ನೋ ಚ ಕಿಲೇಸೇ ಖನ್ಧೇ ಪಟಿಚ್ಚ ಕಿಲೇಸಾ. (೨)

ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸಂ ಧಮ್ಮಂ ಪಟಿಚ್ಚ ಕಿಲೇಸೋ ಚೇವ ಸಂಕಿಲಿಟ್ಠೋ ಚ ಸಂಕಿಲಿಟ್ಠೋ ಚೇವ ನೋ ಚ ಕಿಲೇಸೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಕಿಲೇಸಾ ಚ…ಪೇ… ದ್ವೇ ಖನ್ಧೇ…ಪೇ…. (೩)

೮೨. ಕಿಲೇಸಞ್ಚೇವ ಸಂಕಿಲಿಟ್ಠಞ್ಚ ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸಞ್ಚ ಧಮ್ಮಂ ಪಟಿಚ್ಚ ಕಿಲೇಸೋ ಚೇವ ಸಂಕಿಲಿಟ್ಠೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಲೋಭಞ್ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ಮೋಹೋ ದಿಟ್ಠಿ ಥಿನಂ ಉದ್ಧಚ್ಚಂ ಅಹಿರಿಕಂ ಅನೋತ್ತಪ್ಪಂ (ಚಕ್ಕಂ). (೧)

ಕಿಲೇಸಞ್ಚೇವ ಸಂಕಿಲಿಟ್ಠಞ್ಚ ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸಞ್ಚ ಧಮ್ಮಂ ಪಟಿಚ್ಚ ಸಂಕಿಲಿಟ್ಠೋ ಚೇವ ನೋ ಚ ಕಿಲೇಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸಂ ಏಕಂ ಖನ್ಧಞ್ಚ ಕಿಲೇಸೇ ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ…ಪೇ…. (೨)

ಕಿಲೇಸಞ್ಚೇವ ಸಂಕಿಲಿಟ್ಠಞ್ಚ ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸಞ್ಚ ಧಮ್ಮಂ ಪಟಿಚ್ಚ ಕಿಲೇಸೋ ಚೇವ ಸಂಕಿಲಿಟ್ಠೋ ಚ ಸಂಕಿಲಿಟ್ಠೋ ಚೇವ ನೋ ಚ ಕಿಲೇಸೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಸಂಕಿಲಿಟ್ಠಞ್ಚೇವ ನೋ ಚ ಕಿಲೇಸಂ ಏಕಂ ಖನ್ಧಞ್ಚ ಲೋಭಞ್ಚ ಪಟಿಚ್ಚ ತಯೋ ಖನ್ಧಾ ಮೋಹೋ ದಿಟ್ಠಿ ಥಿನಂ ಉದ್ಧಚ್ಚಂ ಅಹಿರಿಕಂ ಅನೋತ್ತಪ್ಪಂ…ಪೇ… ದ್ವೇ ಖನ್ಧೇ ಚ…ಪೇ… (ಚಕ್ಕಂ). (೩)