೧. ವಿಭಙ್ಗವಾರೋ

ಹೇತುಪಚ್ಚಯೋ

೭೫. ಕಿಲೇಸೋ ಚೇವ ಸಂಕಿಲೇಸಿಕೋ ಚ ಧಮ್ಮೋ ಕಿಲೇಸಸ್ಸ ಚೇವ ಸಂಕಿಲೇಸಿಕಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಕಿಲೇಸಾ ಚೇವ ಸಂಕಿಲೇಸಿಕಾ ಚ ಹೇತೂ ಸಮ್ಪಯುತ್ತಕಾನಂ ಕಿಲೇಸಾನಂ ಹೇತುಪಚ್ಚಯೇನ ಪಚ್ಚಯೋ (ಏವಂ ಚತ್ತಾರಿ, ಕಿಲೇಸದುಕಸದಿಸಂ.) (೪)

ಆರಮ್ಮಣಪಚ್ಚಯೋ

೭೬. ಕಿಲೇಸೋ ಚೇವ ಸಂಕಿಲೇಸಿಕೋ ಚ ಧಮ್ಮೋ ಕಿಲೇಸಸ್ಸ ಚೇವ ಸಂಕಿಲೇಸಿಕಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಕಿಲೇಸೇ ಆರಬ್ಭ ಕಿಲೇಸಾ ಉಪ್ಪಜ್ಜನ್ತಿ. (ಮೂಲಂ ಕಾತಬ್ಬಂ.) ಕಿಲೇಸೇ ಆರಬ್ಭ ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾ ಖನ್ಧಾ ಉಪ್ಪಜ್ಜನ್ತಿ. (ಮೂಲಂ ಕಾತಬ್ಬಂ.) ಕಿಲೇಸೇ ಆರಬ್ಭ ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ಉಪ್ಪಜ್ಜನ್ತಿ. (೩)

೭೭. ಸಂಕಿಲೇಸಿಕೋ ಚೇವ ನೋ ಚ ಕಿಲೇಸೋ ಧಮ್ಮೋ ಸಂಕಿಲೇಸಿಕಸ್ಸ ಚೇವ ನೋ ಚ ಕಿಲೇಸಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ…ಪೇ… ಸೀಲಂ…ಪೇ… ಉಪೋಸಥಕಮ್ಮಂ…ಪೇ… ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ ವುಟ್ಠಹಿತ್ವಾ ಝಾನಂ ಪಚ್ಚವೇಕ್ಖತಿ, ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ಉದ್ಧಚ್ಚಂ ಉಪ್ಪಜ್ಜತಿ, ಝಾನೇ ಪರಿಹೀನೇ ವಿಪ್ಪಟಿಸಾರಿಸ್ಸ ದೋಮನಸ್ಸಂ ಉಪ್ಪಜ್ಜತಿ; ಅರಿಯಾ ಗೋತ್ರಭುಂ ಪಚ್ಚವೇಕ್ಖನ್ತಿ, ವೋದಾನಂ ಪಚ್ಚವೇಕ್ಖನ್ತಿ, ಚಕ್ಖುಂ…ಪೇ… ವತ್ಥುಂ ಸಂಕಿಲೇಸಿಕೇ ಚೇವ ನೋ ಚ ಕಿಲೇಸೇ ಖನ್ಧೇ ಅನಿಚ್ಚತೋ…ಪೇ… ದೋಮನಸ್ಸಂ ಉಪ್ಪಜ್ಜತಿ; ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ…ಪೇ… ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ (ಇತರೇ ದ್ವೇ ಕಿಲೇಸದುಕಸದಿಸಾ, ಘಟನಾರಮ್ಮಣಾಪಿ ಕಿಲೇಸದುಕಸದಿಸಾ).

ಅಧಿಪತಿಪಚ್ಚಯೋ

೭೮. ಕಿಲೇಸೋ ಚೇವ ಸಂಕಿಲೇಸಿಕೋ ಚ ಧಮ್ಮೋ ಕಿಲೇಸಸ್ಸ ಚೇವ ಸಂಕಿಲೇಸಿಕಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ… ತೀಣಿ.

ಸಂಕಿಲೇಸಿಕೋ ಚೇವ ನೋ ಚ ಕಿಲೇಸೋ ಧಮ್ಮೋ ಸಂಕಿಲೇಸಿಕಸ್ಸ ಚೇವ ನೋ ಚ ಕಿಲೇಸಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ದಾನಂ…ಪೇ… ಸೀಲಂ…ಪೇ… ಉಪೋಸಥಕಮ್ಮಂ…ಪೇ… ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ ವುಟ್ಠಹಿತ್ವಾ ಝಾನಂ ಗರುಂ ಕತ್ವಾ ಪಚ್ಚವೇಕ್ಖತಿ, ಸೇಕ್ಖಾ ಗೋತ್ರಭುಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ, ವೋದಾನಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ; ಚಕ್ಖುಂ…ಪೇ… ವತ್ಥುಂ ಸಂಕಿಲೇಸಿಕೇ ಚೇವ ನೋ ಚ ಕಿಲೇಸೇ ಖನ್ಧೇ ಗರುಂ ಕತ್ವಾ ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾ ಖನ್ಧಾ ಉಪ್ಪಜ್ಜನ್ತಿ. ಸಹಜಾತಾಧಿಪತಿ – ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (ಇತರೇ ದ್ವೇಪಿ ಕಿಲೇಸದುಕಸದಿಸಾ. ಘಟನಾಧಿಪತಿಪಿ.)

ಅನನ್ತರಪಚ್ಚಯಾದಿ

೭೯. ಕಿಲೇಸೋ ಚೇವ ಸಂಕಿಲೇಸಿಕೋ ಚ ಧಮ್ಮೋ ಕಿಲೇಸಸ್ಸ ಚೇವ ಸಂಕಿಲೇಸಿಕಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ… ತೀಣಿ (ಕಿಲೇಸದುಕಸದಿಸಾ).

ಸಂಕಿಲೇಸಿಕೋ ಚೇವ ನೋ ಚ ಕಿಲೇಸೋ ಧಮ್ಮೋ ಸಂಕಿಲೇಸಿಕಸ್ಸ ಚೇವ ನೋ ಚ ಕಿಲೇಸಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಸಂಕಿಲೇಸಿಕಾನಞ್ಚೇವ ನೋ ಚ ಕಿಲೇಸಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ; ಅನುಲೋಮಂ ಗೋತ್ರಭುಸ್ಸ… ಅನುಲೋಮಂ ವೋದಾನಸ್ಸ… ಆವಜ್ಜನಾ ಸಂಕಿಲೇಸಿಕಾನಞ್ಚೇವ ನೋ ಚ ಕಿಲೇಸಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ.

(ಇತರೇ ದ್ವೇ ಅನನ್ತರಾ ಕಿಲೇಸದುಕಸದಿಸಾ, ನಿನ್ನಾನಾಕರಣಾ. ಘಟನಾನನ್ತರಮ್ಪಿ ಸಬ್ಬೇ ಪಚ್ಚಯಾ ಕಿಲೇಸದುಕಸದಿಸಾ, ನಿನ್ನಾನಾಕರಣಾ. ಉಪನಿಸ್ಸಯೇ ಲೋಕುತ್ತರಂ ನತ್ಥಿ, ಇದಂ ದುಕಂ ಕಿಲೇಸದುಕಸದಿಸಂ, ನಿನ್ನಾನಾಕರಣಂ.)

ಕಿಲೇಸಸಂಕಿಲೇಸಿಕದುಕಂ ನಿಟ್ಠಿತಂ.