೧. ವಿಭಙ್ಗವಾರೋ

ಹೇತುಪಚ್ಚಯೋ

೧೬. ಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಕಿಲೇಸಾ ಹೇತೂ ಸಮ್ಪಯುತ್ತಕಾನಂ ಕಿಲೇಸಾನಂ ಹೇತುಪಚ್ಚಯೇನ ಪಚ್ಚಯೋ. (ಮೂಲಂ ಪುಚ್ಛಿತಬ್ಬಂ.) ಕಿಲೇಸಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (ಮೂಲಂ ಪುಚ್ಛಿತಬ್ಬಂ.) ಕಿಲೇಸಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಕಿಲೇಸಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೩)

ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ನೋಕಿಲೇಸಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ…ಪೇ…. (೧)

ಆರಮ್ಮಣಪಚ್ಚಯೋ

೧೭. ಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಕಿಲೇಸೇ ಆರಬ್ಭ ಕಿಲೇಸಾ ಉಪ್ಪಜ್ಜನ್ತಿ. (ಮೂಲಂ ಪುಚ್ಛಿತಬ್ಬಂ.) ಕಿಲೇಸೇ ಆರಬ್ಭ ನೋಕಿಲೇಸಾ ಖನ್ಧಾ ಉಪ್ಪಜ್ಜನ್ತಿ. (ಮೂಲಂ ಪುಚ್ಛಿತಬ್ಬಂ.) ಕಿಲೇಸೇ ಆರಬ್ಭ ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ಉಪ್ಪಜ್ಜನ್ತಿ. (೩)

೧೮. ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ…ಪೇ… ಸೀಲಂ…ಪೇ… ಉಪೋಸಥಕಮ್ಮಂ…ಪೇ… ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ ವುಟ್ಠಹಿತ್ವಾ ಝಾನಂ ಪಚ್ಚವೇಕ್ಖತಿ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ…ಪೇ… ದಿಟ್ಠಿ…ಪೇ… ವಿಚಿಕಿಚ್ಛಾ…ಪೇ… ಉದ್ಧಚ್ಚಂ…ಪೇ… ದೋಮನಸ್ಸಂ ಉಪ್ಪಜ್ಜತಿ; ಅರಿಯಾ ಮಗ್ಗಾ ವುಟ್ಠಹಿತ್ವಾ…ಪೇ… ಫಲಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ; ಚಕ್ಖುಂ…ಪೇ… ವತ್ಥುಂ ನೋಕಿಲೇಸೇ ಖನ್ಧೇ ಅನಿಚ್ಚತೋ…ಪೇ… ದೋಮನಸ್ಸಂ ಉಪ್ಪಜ್ಜತಿ; ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ…ಪೇ… ಅನಾಗತಂಸಞಾಣಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ…ಪೇ… ಝಾನಾ ವುಟ್ಠಹಿತ್ವಾ ಝಾನಂ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ…ಪೇ… ದಿಟ್ಠಿ…ಪೇ… ವಿಚಿಕಿಚ್ಛಾ…ಪೇ… ಉದ್ಧಚ್ಚಂ ಉಪ್ಪಜ್ಜತಿ, ಝಾನೇ ಪರಿಹೀನೇ ವಿಪ್ಪಟಿಸಾರಿಸ್ಸ ದೋಮನಸ್ಸಂ ಉಪ್ಪಜ್ಜತಿ, ಚಕ್ಖುಂ…ಪೇ… ವತ್ಥುಂ ನೋಕಿಲೇಸೇ ಖನ್ಧೇ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ…ಪೇ… ದೋಮನಸ್ಸಂ ಉಪ್ಪಜ್ಜತಿ. (೨)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಚ ನೋಕಿಲೇಸಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ…ಪೇ… ಝಾನಾ ವುಟ್ಠಹಿತ್ವಾ…ಪೇ… ಚಕ್ಖುಂ…ಪೇ… ವತ್ಥುಂ ನೋಕಿಲೇಸೇ ಖನ್ಧೇ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ಉಪ್ಪಜ್ಜನ್ತಿ. (೩)

ಕಿಲೇಸೋ ಚ ನೋಕಿಲೇಸೋ ಚ ಧಮ್ಮಾ ಕಿಲೇಸಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ತೀಣಿ.

ಅಧಿಪತಿಪಚ್ಚಯೋ

೧೯. ಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಆರಮ್ಮಣಾಧಿಪತಿ – ಕಿಲೇಸೇ ಗರುಂ ಕತ್ವಾ ಕಿಲೇಸಾ ಉಪ್ಪಜ್ಜನ್ತಿ… ತೀಣಿ (ಆರಮ್ಮಣಾಧಿಪತಿಯೇವ). (೩)

ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ದಾನಂ…ಪೇ… ಸೀಲಂ…ಪೇ… ಉಪೋಸಥಕಮ್ಮಂ ಕತ್ವಾ ತಂ ಗರುಂ ಕತ್ವಾ ಪಚ್ಚವೇಕ್ಖತಿ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ; ಪುಬ್ಬೇ…ಪೇ… ಝಾನಾ…ಪೇ… ಅರಿಯಾ ಮಗ್ಗಾ ವುಟ್ಠಹಿತ್ವಾ ಮಗ್ಗಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ…ಪೇ… ಫಲಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ; ಚಕ್ಖುಂ…ಪೇ… ವತ್ಥುಂ ನೋಕಿಲೇಸೇ ಖನ್ಧೇ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. ಸಹಜಾತಾಧಿಪತಿ – ನೋಕಿಲೇಸಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ದಾನಂ…ಪೇ… ಝಾನಂ…ಪೇ… ಚಕ್ಖುಂ…ಪೇ… ವತ್ಥುಂ ನೋಕಿಲೇಸೇ ಖನ್ಧೇ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. ಸಹಜಾತಾಧಿಪತಿ – ನೋಕಿಲೇಸಾಧಿಪತಿ ಸಮ್ಪಯುತ್ತಕಾನಂ ಕಿಲೇಸಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೨)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಚ ನೋಕಿಲೇಸಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ದಾನಂ…ಪೇ… ಝಾನಂ…ಪೇ… ಚಕ್ಖುಂ…ಪೇ… ವತ್ಥುಂ ನೋಕಿಲೇಸೇ ಖನ್ಧೇ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ಉಪ್ಪಜ್ಜನ್ತಿ. ಸಹಜಾತಾಧಿಪತಿ – ನೋಕಿಲೇಸಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಕಿಲೇಸಾನಞ್ಚ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೩)

ಕಿಲೇಸೋ ಚ ನೋಕಿಲೇಸೋ ಚ ಧಮ್ಮಾ ಕಿಲೇಸಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ… ತೀಣಿ (ಆರಮ್ಮಣಾಧಿಪತಿಯೇವ). (೩)

ಅನನ್ತರಪಚ್ಚಯಾದಿ

೨೦. ಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಕಿಲೇಸಾ ಪಚ್ಛಿಮಾನಂ ಪಚ್ಛಿಮಾನಂ ಕಿಲೇಸಾನಂ ಅನನ್ತರಪಚ್ಚಯೇನ ಪಚ್ಚಯೋ. (ಮೂಲಂ ಕಾತಬ್ಬಂ.) ಪುರಿಮಾ ಪುರಿಮಾ ಕಿಲೇಸಾ ಪಚ್ಛಿಮಾನಂ ಪಚ್ಛಿಮಾನಂ ನೋಕಿಲೇಸಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ; ಕಿಲೇಸಾ ವುಟ್ಠಾನಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (ಮೂಲಂ ಕಾತಬ್ಬಂ.) ಪುರಿಮಾ ಪುರಿಮಾ ಕಿಲೇಸಾ ಪಚ್ಛಿಮಾನಂ ಪಚ್ಛಿಮಾನಂ ಕಿಲೇಸಾನಂ ಸಮ್ಪಯುತ್ತಕಾನಞ್ಚ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೩)

೨೧. ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ನೋಕಿಲೇಸಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ನೋಕಿಲೇಸಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ…ಪೇ… ಫಲಸಮಾಪತ್ತಿಯಾ ಅನನ್ತರಪಚ್ಚಯೇನ ಪಚ್ಚಯೋ. (ಮೂಲಂ ಕಾತಬ್ಬಂ.) ಪುರಿಮಾ ಪುರಿಮಾ ನೋಕಿಲೇಸಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಕಿಲೇಸಾನಂ ಅನನ್ತರಪಚ್ಚಯೇನ ಪಚ್ಚಯೋ; ಆವಜ್ಜನಾ ಕಿಲೇಸಾನಂ ಅನನ್ತರಪಚ್ಚಯೇನ ಪಚ್ಚಯೋ. (ಮೂಲಂ ಕಾತಬ್ಬಂ.) ಪುರಿಮಾ ಪುರಿಮಾ ನೋಕಿಲೇಸಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಕಿಲೇಸಾನಂ ಸಮ್ಪಯುತ್ತಕಾನಞ್ಚ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ; ಆವಜ್ಜನಾ ಕಿಲೇಸಾನಂ ಸಮ್ಪಯುತ್ತಕಾನಞ್ಚ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೩)

೨೨. ಕಿಲೇಸೋ ಚ ನೋಕಿಲೇಸೋ ಚ ಧಮ್ಮಾ ಕಿಲೇಸಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಕಿಲೇಸಾನಂ ಅನನ್ತರಪಚ್ಚಯೇನ ಪಚ್ಚಯೋ. (ಮೂಲಂ ಕಾತಬ್ಬಂ.) ಪುರಿಮಾ ಪುರಿಮಾ ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ನೋಕಿಲೇಸಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ; ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ವುಟ್ಠಾನಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (ಮೂಲಂ ಕಾತಬ್ಬಂ.) ಪುರಿಮಾ ಪುರಿಮಾ ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಕಿಲೇಸಾನಂ ಸಮ್ಪಯುತ್ತಕಾನಞ್ಚ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೩)

ಸಮನನ್ತರಪಚ್ಚಯೇನ ಪಚ್ಚಯೋ, ಸಹಜಾತಪಚ್ಚಯೇನ ಪಚ್ಚಯೋ, ಅಞ್ಞಮಞ್ಞಪಚ್ಚಯೇನ ಪಚ್ಚಯೋ, ನಿಸ್ಸಯಪಚ್ಚಯೇನ ಪಚ್ಚಯೋ.

ಉಪನಿಸ್ಸಯಪಚ್ಚಯೋ

೨೩. ಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಕಿಲೇಸಾ ಕಿಲೇಸಾನಂ ಉಪನಿಸ್ಸಯಪಚ್ಚಯೇನ ಪಚ್ಚಯೋ… ತೀಣಿ.

೨೪. ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ದಾನಂ ದೇತಿ…ಪೇ… ಮಾನಂ ಜಪ್ಪೇತಿ, ದಿಟ್ಠಿಂ ಗಣ್ಹಾತಿ; ಸೀಲಂ…ಪೇ… ಪಞ್ಞಂ… ರಾಗಂ… ದೋಸಂ… ಮೋಹಂ… ಮಾನಂ… ದಿಟ್ಠಿಂ… ಪತ್ಥನಂ… ಕಾಯಿಕಂ ಸುಖಂ…ಪೇ… ಸೇನಾಸನಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಙ್ಘಂ ಭಿನ್ದತಿ; ಸದ್ಧಾ…ಪೇ… ಸೇನಾಸನಂ ಸದ್ಧಾಯ…ಪೇ… ಫಲಸಮಾಪತ್ತಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ಮಾನಂ ಜಪ್ಪೇತಿ… ದಿಟ್ಠಿಂ ಗಣ್ಹಾತಿ; ಸೀಲಂ…ಪೇ… ಸೇನಾಸನಂ ಉಪನಿಸ್ಸಾಯ ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ; ಸದ್ಧಾ…ಪೇ… ಸೇನಾಸನಂ ಕಿಲೇಸಾನಂ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಚ ನೋಕಿಲೇಸಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ಮಾನಂ ಜಪ್ಪೇತಿ… ದಿಟ್ಠಿಂ ಗಣ್ಹಾತಿ; ಸೀಲಂ…ಪೇ… ಸೇನಾಸನಂ ಉಪನಿಸ್ಸಾಯ ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ; ಸದ್ಧಾ…ಪೇ… ಸೇನಾಸನಂ ಕಿಲೇಸಾನಂ ಸಮ್ಪಯುತ್ತಕಾನಞ್ಚ ಖನ್ಧಾನಂ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

ಕಿಲೇಸೋ ಚ ನೋಕಿಲೇಸೋ ಚ ಧಮ್ಮಾ ಕಿಲೇಸಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ… ತೀಣಿ.

ಪುರೇಜಾತಪಚ್ಚಯೋ

೨೫. ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅನಿಚ್ಚತೋ…ಪೇ… ದೋಮನಸ್ಸಂ ಉಪ್ಪಜ್ಜತಿ, ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ. ರೂಪಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಫೋಟ್ಠಬ್ಬಾಯತನಂ ಕಾಯವಿಞ್ಞಾಣಸ್ಸ…ಪೇ…. ವತ್ಥುಪುರೇಜಾತಂ – ಚಕ್ಖಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಕಾಯಾಯತನಂ ಕಾಯವಿಞ್ಞಾಣಸ್ಸ…ಪೇ… ವತ್ಥು ನೋಕಿಲೇಸಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೧)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ…ಪೇ… ದೋಮನಸ್ಸಂ ಉಪ್ಪಜ್ಜತಿ. ವತ್ಥುಪುರೇಜಾತಂ – ವತ್ಥು ಕಿಲೇಸಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೨)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಚ ನೋಕಿಲೇಸಸ್ಸ ಚ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ಉಪ್ಪಜ್ಜನ್ತಿ. ವತ್ಥುಪುರೇಜಾತಂ – ವತ್ಥು ಕಿಲೇಸಾನಂ ಸಮ್ಪಯುತ್ತಕಾನಞ್ಚ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೩)

ಪಚ್ಛಾಜಾತಾಸೇವನಪಚ್ಚಯಾ

೨೬. ಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ (ಸಂಖಿತ್ತಂ). (೧)

ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ (ಸಂಖಿತ್ತಂ). (೧)

ಕಿಲೇಸೋ ಚ ನೋಕಿಲೇಸೋ ಚ ಧಮ್ಮಾ ನೋಕಿಲೇಸಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ (ಸಂಖಿತ್ತಂ) ಆಸೇವನಪಚ್ಚಯೇನ ಪಚ್ಚಯೋ …ನವ.

ಕಮ್ಮಪಚ್ಚಯೋ

೨೭. ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸಹಜಾತಾ, ನಾನಾಕ್ಖಣಿಕಾ. ಸಹಜಾತಾ – ನೋಕಿಲೇಸಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ…ಪೇ…. ನಾನಾಕ್ಖಣಿಕಾ – ನೋಕಿಲೇಸಾ ಚೇತನಾ ವಿಪಾಕಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೧)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ನೋಕಿಲೇಸಾ ಚೇತನಾ ಕಿಲೇಸಾನಂ ಕಮ್ಮಪಚ್ಚಯೇನ ಪಚ್ಚಯೋ. (೨)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಚ ನೋಕಿಲೇಸಸ್ಸ ಚ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ನೋಕಿಲೇಸಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಕಿಲೇಸಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೩)

ವಿಪಾಕಪಚ್ಚಯಾದಿ

೨೮. ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ವಿಪಾಕಪಚ್ಚಯೇನ ಪಚ್ಚಯೋ… ಏಕಂ… ಆಹಾರಪಚ್ಚಯೇನ ಪಚ್ಚಯೋ… ತೀಣಿ… ಇನ್ದ್ರಿಯಪಚ್ಚಯೇನ ಪಚ್ಚಯೋ… ತೀಣಿ… ಝಾನಪಚ್ಚಯೇನ ಪಚ್ಚಯೋ… ತೀಣಿ… ಮಗ್ಗಪಚ್ಚಯೇನ ಪಚ್ಚಯೋ… ನವ… ಸಮ್ಪಯುತ್ತಪಚ್ಚಯೇನ ಪಚ್ಚಯೋ… ನವ.

ವಿಪ್ಪಯುತ್ತಪಚ್ಚಯೋ

೨೯. ಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ (ಸಂಖಿತ್ತಂ). (೧)

ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ (ಸಂಖಿತ್ತಂ). (೧)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ಕಿಲೇಸಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೨)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಚ ನೋಕಿಲೇಸಸ್ಸ ಚ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ಕಿಲೇಸಾನಂ ಸಮ್ಪಯುತ್ತಕಾನಞ್ಚ ಖನ್ಧಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೩)

ಕಿಲೇಸೋ ಚ ನೋಕಿಲೇಸೋ ಚ ಧಮ್ಮಾ ನೋಕಿಲೇಸಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ (ಸಂಖಿತ್ತಂ. ವಿತ್ಥಾರೇತಬ್ಬಂ.)

ಅತ್ಥಿಪಚ್ಚಯಾದಿ

೩೦. ಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ… ಏಕಂ (ಪಟಿಚ್ಚಸದಿಸಂ). (೧)

ಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ (ಸಂಖಿತ್ತಂ). (೨)

ಕಿಲೇಸೋ ಧಮ್ಮೋ ಕಿಲೇಸಸ್ಸ ಚ ನೋಕಿಲೇಸಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ (ಪಟಿಚ್ಚಸದಿಸಂ). (೩)

ನೋಕಿಲೇಸೋ ಧಮ್ಮೋ ನೋಕಿಲೇಸಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ (ಸಂಖಿತ್ತಂ). (೧)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ (ಸಂಖಿತ್ತಂ. ಸಹಜಾತಂ ಸಹಜಾತಸದಿಸಂ, ಪುರೇಜಾತಂ ಪುರೇಜಾತಸದಿಸಂ.) (೨)

ನೋಕಿಲೇಸೋ ಧಮ್ಮೋ ಕಿಲೇಸಸ್ಸ ಚ ನೋಕಿಲೇಸಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ (ಸಹಜಾತಂ ಸಹಜಾತಸದಿಸಂ, ಪುರೇಜಾತಂ ಪುರೇಜಾತಸದಿಸಂ.) (೩)

೩೧. ಕಿಲೇಸೋ ಚ ನೋಕಿಲೇಸೋ ಚ ಧಮ್ಮಾ ಕಿಲೇಸಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ಲೋಭೋ ಚ ಸಮ್ಪಯುತ್ತಕಾ ಚ ಖನ್ಧಾ ಮೋಹಸ್ಸ, ದಿಟ್ಠಿಯಾ, ಥಿನಸ್ಸ, ಉದ್ಧಚ್ಚಸ್ಸ, ಅಹಿರಿಕಸ್ಸ, ಅನೋತ್ತಪ್ಪಸ್ಸ ಅತ್ಥಿಪಚ್ಚಯೇನ ಪಚ್ಚಯೋ (ಚಕ್ಕಂ). ಸಹಜಾತೋ – ಲೋಭೋ ಚ ವತ್ಥು ಚ ಮೋಹಸ್ಸ, ದಿಟ್ಠಿಯಾ, ಥಿನಸ್ಸ, ಉದ್ಧಚ್ಚಸ್ಸ, ಅಹಿರಿಕಸ್ಸ, ಅನೋತ್ತಪ್ಪಸ್ಸ ಅತ್ಥಿಪಚ್ಚಯೇನ ಪಚ್ಚಯೋ (ಚಕ್ಕಂ). (೧)

ಕಿಲೇಸೋ ಚ ನೋಕಿಲೇಸೋ ಚ ಧಮ್ಮಾ ನೋಕಿಲೇಸಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ. ಸಹಜಾತೋ – ನೋಕಿಲೇಸೋ ಏಕೋ ಖನ್ಧೋ ಚ ಕಿಲೇಸೋ ಚ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ ಚ…ಪೇ…. ಸಹಜಾತಾ – ಕಿಲೇಸಾ ಚ ಮಹಾಭೂತಾ ಚ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಸಹಜಾತಾ – ಕಿಲೇಸಾ ಚ ವತ್ಥು ಚ ನೋಕಿಲೇಸಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಕಿಲೇಸಾ ಚ ಸಮ್ಪಯುತ್ತಕಾ ಖನ್ಧಾ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ಕಬಳೀಕಾರೋ ಆಹಾರೋ ಚ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಕಿಲೇಸಾ ಚ ಸಮ್ಪಯುತ್ತಕಾ ಚ ಖನ್ಧಾ ರೂಪಜೀವಿತಿನ್ದ್ರಿಯಞ್ಚ ಕಟತ್ತಾರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೨)

ಕಿಲೇಸೋ ಚ ನೋಕಿಲೇಸೋ ಚ ಧಮ್ಮಾ ಕಿಲೇಸಸ್ಸ ಚ ನೋಕಿಲೇಸಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ನೋಕಿಲೇಸೋ ಏಕೋ ಖನ್ಧೋ ಚ ಲೋಭೋ ಚ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಮೋಹಸ್ಸ ಚ, ದಿಟ್ಠಿಯಾ, ಥಿನಸ್ಸ, ಉದ್ಧಚ್ಚಸ್ಸ, ಅಹಿರಿಕಸ್ಸ, ಅನೋತ್ತಪ್ಪಸ್ಸ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ ಚ…ಪೇ…. ಸಹಜಾತೋ – ಲೋಭೋ ಚ ವತ್ಥು ಚ ಮೋಹಸ್ಸ, ದಿಟ್ಠಿಯಾ, ಥಿನಸ್ಸ, ಉದ್ಧಚ್ಚಸ್ಸ, ಅಹಿರಿಕಸ್ಸ, ಅನೋತ್ತಪ್ಪಸ್ಸ ಸಮ್ಪಯುತ್ತಕಾನಞ್ಚ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ (ಚಕ್ಕಂ). (೩)

ನತ್ಥಿಪಚ್ಚಯೇನ ಪಚ್ಚಯೋ… ವಿಗತಪಚ್ಚಯೇನ ಪಚ್ಚಯೋ… ಅವಿಗತಪಚ್ಚಯೇನ ಪಚ್ಚಯೋ.