೧. ವಿಭಙ್ಗವಾರೋ

ಹೇತುಪಚ್ಚಯೋ

೧೪೨. ಸಪ್ಪೀತಿಕಂ ಧಮ್ಮಂ ಪಟಿಚ್ಚ ಸಪ್ಪೀತಿಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಪ್ಪೀತಿಕಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ…. ಸಪ್ಪೀತಿಕಂ ಧಮ್ಮಂ ಪಟಿಚ್ಚ ಅಪ್ಪೀತಿಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಪ್ಪೀತಿಕೇ ಖನ್ಧೇ ಪಟಿಚ್ಚ ಪೀತಿ ಚ ಚಿತ್ತಸಮುಟ್ಠಾನಞ್ಚ ರೂಪಂ; ಪಟಿಸನ್ಧಿಕ್ಖಣೇ…ಪೇ…. ಸಪ್ಪೀತಿಕಂ ಧಮ್ಮಂ ಪಟಿಚ್ಚ ಸಪ್ಪೀತಿಕೋ ಚ ಅಪ್ಪೀತಿಕೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಸಪ್ಪೀತಿಕಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಪೀತಿ ಚ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ…. (೩)

ಅಪ್ಪೀತಿಕಂ ಧಮ್ಮಂ ಪಟಿಚ್ಚ ಅಪ್ಪೀತಿಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಪ್ಪೀತಿಕಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಪೀತಿಂ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ; ಪಟಿಸನ್ಧಿಕ್ಖಣೇ ಅಪ್ಪೀತಿಕಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಕಟತ್ತಾ ಚ ರೂಪಂ, ದ್ವೇ ಖನ್ಧೇ…ಪೇ… ಪೀತಿಂ ಪಟಿಚ್ಚ ಕಟತ್ತಾರೂಪಂ, ಖನ್ಧೇ ಪಟಿಚ್ಚ ವತ್ಥು, ವತ್ಥುಂ ಪಟಿಚ್ಚ ಖನ್ಧಾ, ಪೀತಿಂ ಪಟಿಚ್ಚ ವತ್ಥು, ವತ್ಥುಂ ಪಟಿಚ್ಚ ಪೀತಿ, ಏಕಂ ಮಹಾಭೂತಂ…ಪೇ…. (ಯಥಾ ಸವಿತಕ್ಕದುಕಂ ಸಬ್ಬತ್ಥ, ಏವಂ ಸಪ್ಪೀತಿಕದುಕಂ ಕಾತಬ್ಬಂ, ಸಬ್ಬತ್ಥ ಪವತ್ತಿಪಟಿಸನ್ಧಿ ನವಪಿ ಪಞ್ಹಾ.)