೧. ವಿಭಙ್ಗವಾರೋ

ನಹೇತುಪಚ್ಚಯೋ

೧೦೬. ಸವಿತಕ್ಕಂ ಧಮ್ಮಂ ಪಟಿಚ್ಚ ಸವಿತಕ್ಕೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕಂ ಸವಿತಕ್ಕಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಅಹೇತುಕಪಟಿಸನ್ಧಿಕ್ಖಣೇ…ಪೇ… ವಿಚಿಕಿಚ್ಛಾಸಹಗತೇ ಉದ್ಧಚ್ಚಸಹಗತೇ ಖನ್ಧೇ ಪಟಿಚ್ಚ ವಿಚಿಕಿಚ್ಛಾಸಹಗತೋ ಉದ್ಧಚ್ಚಸಹಗತೋ ಮೋಹೋ. (ಸವಿತಕ್ಕಮೂಲಕಾ ಅವಸೇಸಾ ದ್ವೇ ಪಞ್ಹಾ ಕಾತಬ್ಬಾ, ಅಹೇತುಕಂ ನಿನ್ನಾನಂ.) (೩)

ಅವಿತಕ್ಕಂ ಧಮ್ಮಂ ಪಟಿಚ್ಚ ಅವಿತಕ್ಕೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕಂ ಅವಿತಕ್ಕಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಅಹೇತುಕಂ ವಿತಕ್ಕಂ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ; ಅಹೇತುಕಪಟಿಸನ್ಧಿಕ್ಖಣೇ ವಿತಕ್ಕಂ ಪಟಿಚ್ಚ ಕಟತ್ತಾರೂಪಂ, ವಿತಕ್ಕಂ ಪಟಿಚ್ಚ ವತ್ಥು, ವತ್ಥುಂ ಪಟಿಚ್ಚ ವಿತಕ್ಕೋ, ಏಕಂ ಮಹಾಭೂತಂ…ಪೇ…. (೧)

ಅವಿತಕ್ಕಂ ಧಮ್ಮಂ ಪಟಿಚ್ಚ ಸವಿತಕ್ಕೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕಂ ವಿತಕ್ಕಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ, ಅಹೇತುಕಪಟಿಸನ್ಧಿಕ್ಖಣೇ ವಿತಕ್ಕಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ; ಪಟಿಸನ್ಧಿಕ್ಖಣೇ ವತ್ಥುಂ ಪಟಿಚ್ಚ ಅಹೇತುಕಾ ಸವಿತಕ್ಕಾ ಖನ್ಧಾ, ವಿತಕ್ಕಂ ಪಟಿಚ್ಚ ವಿಚಿಕಿಚ್ಛಾಸಹಗತೋ ಉದ್ಧಚ್ಚಸಹಗತೋ ಮೋಹೋ. (೨)

ಅವಿತಕ್ಕಂ ಧಮ್ಮಂ ಪಟಿಚ್ಚ ಸವಿತಕ್ಕೋ ಚ ಅವಿತಕ್ಕೋ ಚ ಧಮ್ಮಾ ಉಪ್ಪಜ್ಜನ್ತಿ ನಹೇತುಪಚ್ಚಯಾ. (ಸಂಖಿತ್ತಂ. ಹೇತುಪಚ್ಚಯಸದಿಸಂ. ‘‘ಅಹೇತುಕ’’ನ್ತಿ ನಿಯಾಮೇತಬ್ಬಂ.) (೩)

ಸವಿತಕ್ಕಞ್ಚ ಅವಿತಕ್ಕಞ್ಚ ಧಮ್ಮಂ ಪಟಿಚ್ಚ ಸವಿತಕ್ಕೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕಂ ಸವಿತಕ್ಕಂ ಏಕಂ ಖನ್ಧಞ್ಚ ವಿತಕ್ಕಞ್ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಅಹೇತುಕಪಟಿಸನ್ಧಿಕ್ಖಣೇ ಸವಿತಕ್ಕಂ ಏಕಂ ಖನ್ಧಞ್ಚ ವಿತಕ್ಕಞ್ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಅಹೇತುಕಪಟಿಸನ್ಧಿಕ್ಖಣೇ ಸವಿತಕ್ಕಂ ಏಕಂ ಖನ್ಧಞ್ಚ ವತ್ಥುಞ್ಚ ವಿತಕ್ಕಞ್ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ವಿಚಿಕಿಚ್ಛಾಸಹಗತೇ ಉದ್ಧಚ್ಚಸಹಗತೇ ಖನ್ಧೇ ಚ ವಿತಕ್ಕಞ್ಚ ಪಟಿಚ್ಚ ವಿಚಿಕಿಚ್ಛಾಸಹಗತೋ ಉದ್ಧಚ್ಚಸಹಗತೋ ಮೋಹೋ. (ಅವಸೇಸಾ ದ್ವೇ ಪಞ್ಹಾ ಹೇತುಪಚ್ಚಯಸದಿಸಾ ನಿನ್ನಾನಾ, ಅಹೇತುಕನ್ತಿ ನಿಯಾಮೇತಬ್ಬಂ.) (೩)