೧. ವಿಭಙ್ಗವಾರೋ

ಹೇತುಪಚ್ಚಯೋ

೧೦೨. ಸವಿತಕ್ಕಂ ಧಮ್ಮಂ ಪಟಿಚ್ಚ ಸವಿತಕ್ಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸವಿತಕ್ಕಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ…. ಸವಿತಕ್ಕಂ ಧಮ್ಮಂ ಪಟಿಚ್ಚ ಅವಿತಕ್ಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸವಿತಕ್ಕೇ ಖನ್ಧೇ ಪಟಿಚ್ಚ ವಿತಕ್ಕೋ ಚಿತ್ತಸಮುಟ್ಠಾನಞ್ಚ ರೂಪಂ; ಪಟಿಸನ್ಧಿಕ್ಖಣೇ…ಪೇ…. ಸವಿತಕ್ಕಂ ಧಮ್ಮಂ ಪಟಿಚ್ಚ ಸವಿತಕ್ಕೋ ಚ ಅವಿತಕ್ಕೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಸವಿತಕ್ಕಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ವಿತಕ್ಕೋ ಚ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ…. (೩)

೧೦೩. ಅವಿತಕ್ಕಂ ಧಮ್ಮಂ ಪಟಿಚ್ಚ ಅವಿತಕ್ಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅವಿತಕ್ಕಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ವಿತಕ್ಕಂ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ; ಪಟಿಸನ್ಧಿಕ್ಖಣೇ ಅವಿತಕ್ಕಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಕಟತ್ತಾ ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ವಿತಕ್ಕಂ ಪಟಿಚ್ಚ ಕಟತ್ತಾರೂಪಂ, ಖನ್ಧೇ ಪಟಿಚ್ಚ ವತ್ಥು, ವತ್ಥುಂ ಪಟಿಚ್ಚ ಖನ್ಧಾ, ವಿತಕ್ಕಂ ಪಟಿಚ್ಚ ವತ್ಥು, ವತ್ಥುಂ ಪಟಿಚ್ಚ ವಿತಕ್ಕೋ, ಏಕಂ ಮಹಾಭೂತಂ…ಪೇ…. (೧)

ಅವಿತಕ್ಕಂ ಧಮ್ಮಂ ಪಟಿಚ್ಚ ಸವಿತಕ್ಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ವಿತಕ್ಕಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ; ಪಟಿಸನ್ಧಿಕ್ಖಣೇ ವಿತಕ್ಕಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ, ಪಟಿಸನ್ಧಿಕ್ಖಣೇ ವತ್ಥುಂ ಪಟಿಚ್ಚ ಸವಿತಕ್ಕಾ ಖನ್ಧಾ. (೨)

ಅವಿತಕ್ಕಂ ಧಮ್ಮಂ ಪಟಿಚ್ಚ ಸವಿತಕ್ಕೋ ಚ ಅವಿತಕ್ಕೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ವಿತಕ್ಕಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ, ವಿತಕ್ಕಂ ಪಟಿಚ್ಚ ಸವಿತಕ್ಕಾ ಖನ್ಧಾ, ಮಹಾಭೂತೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ; ಪಟಿಸನ್ಧಿಕ್ಖಣೇ ವಿತಕ್ಕಂ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ ಕಟತ್ತಾ ಚ ರೂಪಂ, ಪಟಿಸನ್ಧಿಕ್ಖಣೇ ವಿತಕ್ಕಂ ಪಟಿಚ್ಚ ಸವಿತಕ್ಕಾ ಖನ್ಧಾ, ಮಹಾಭೂತೇ ಪಟಿಚ್ಚ ಕಟತ್ತಾರೂಪಂ, ಪಟಿಸನ್ಧಿಕ್ಖಣೇ ವತ್ಥುಂ ಪಟಿಚ್ಚ ಸವಿತಕ್ಕಾ ಖನ್ಧಾ, ಮಹಾಭೂತೇ ಪಟಿಚ್ಚ ಕಟತ್ತಾರೂಪಂ, ಪಟಿಸನ್ಧಿಕ್ಖಣೇ ವತ್ಥುಂ ಪಟಿಚ್ಚ ವಿತಕ್ಕೋ ಸಮ್ಪಯುತ್ತಕಾ ಚ ಖನ್ಧಾ. (೩)

೧೦೪. ಸವಿತಕ್ಕಞ್ಚ ಅವಿತಕ್ಕಞ್ಚ ಧಮ್ಮಂ ಪಟಿಚ್ಚ ಸವಿತಕ್ಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸವಿತಕ್ಕಂ ಏಕಂ ಖನ್ಧಞ್ಚ ವಿತಕ್ಕಞ್ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ …ಪೇ… ಪಟಿಸನ್ಧಿಕ್ಖಣೇ ಸವಿತಕ್ಕಂ ಏಕಂ ಖನ್ಧಞ್ಚ ವಿತಕ್ಕಞ್ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ ಸವಿತಕ್ಕಂ ಏಕಂ ಖನ್ಧಞ್ಚ ವತ್ಥುಞ್ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ…. (೧)

ಸವಿತಕ್ಕಞ್ಚ ಅವಿತಕ್ಕಞ್ಚ ಧಮ್ಮಂ ಪಟಿಚ್ಚ ಅವಿತಕ್ಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸವಿತಕ್ಕೇ ಖನ್ಧೇ ಚ ವಿತಕ್ಕಞ್ಚ ಮಹಾಭೂತೇ ಚ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ; ಪಟಿಸನ್ಧಿಕ್ಖಣೇ ಸವಿತಕ್ಕೇ ಖನ್ಧೇ ಚ ವಿತಕ್ಕಞ್ಚ ಮಹಾಭೂತೇ ಚ ಪಟಿಚ್ಚ ಕಟತ್ತಾರೂಪಂ, ಪಟಿಸನ್ಧಿಕ್ಖಣೇ ಸವಿತಕ್ಕೇ ಖನ್ಧೇ ಚ ವತ್ಥುಞ್ಚ ಪಟಿಚ್ಚ ವಿತಕ್ಕೋ. (೨)

ಸವಿತಕ್ಕಞ್ಚ ಅವಿತಕ್ಕಞ್ಚ ಧಮ್ಮಂ ಪಟಿಚ್ಚ ಸವಿತಕ್ಕೋ ಚ ಅವಿತಕ್ಕೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಸವಿತಕ್ಕಂ ಏಕಂ ಖನ್ಧಞ್ಚ ವಿತಕ್ಕಞ್ಚ ಪಟಿಚ್ಚ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಸವಿತಕ್ಕಂ ಏಕಂ ಖನ್ಧಞ್ಚ ವಿತಕ್ಕಞ್ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಸವಿತಕ್ಕೇ ಖನ್ಧೇ ಚ ವಿತಕ್ಕಞ್ಚ ಮಹಾಭೂತೇ ಚ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ; ಪಟಿಸನ್ಧಿಕ್ಖಣೇ ಸವಿತಕ್ಕಂ ಏಕಂ ಖನ್ಧಞ್ಚ ವಿತಕ್ಕಞ್ಚ ಪಟಿಚ್ಚ ತಯೋ ಖನ್ಧಾ ಕಟತ್ತಾ ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ ಸವಿತಕ್ಕಂ ಏಕಂ ಖನ್ಧಞ್ಚ ವಿತಕ್ಕಞ್ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಸವಿತಕ್ಕೇ ಖನ್ಧೇ ಚ ವಿತಕ್ಕಞ್ಚ ಮಹಾಭೂತೇ ಚ ಪಟಿಚ್ಚ ಕಟತ್ತಾರೂಪಂ, ಪಟಿಸನ್ಧಿಕ್ಖಣೇ ಸವಿತಕ್ಕಂ ಏಕಂ ಖನ್ಧಞ್ಚ ವತ್ಥುಞ್ಚ ಪಟಿಚ್ಚ ತಯೋ ಖನ್ಧಾ ವಿತಕ್ಕೋ ಚ…ಪೇ… ದ್ವೇ ಖನ್ಧೇ…ಪೇ…. (೩) (ಸಂಖಿತ್ತಂ.)