೧. ವಿಭಙ್ಗವಾರೋ

ಹೇತುಪಚ್ಚಯೋ

೯೪. ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ… ಛ…ಪೇ… (ದಸ್ಸನೇನ ಪಹಾತಬ್ಬಹೇತುಕದುಕಸದಿಸಾ).

ಆರಮ್ಮಣಪಚ್ಚಯೋ

೯೫. ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ತೀಣಿ (ಆರಬ್ಭ ದಸ್ಸನೇನ ಪಹಾತಬ್ಬಹೇತುಕದುಕಸದಿಸಾ).

೯೬. ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ…ಪೇ… ಸೀಲಂ…ಪೇ… ಉಪೋಸಥಕಮ್ಮಂ ಕತ್ವಾ ತಂ ಪಚ್ಚವೇಕ್ಖತಿ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ನಭಾವನಾಯ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ದಿಟ್ಠಿ…ಪೇ… ವಿಚಿಕಿಚ್ಛಾ…ಪೇ… ನಭಾವನಾಯ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ, ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ…ಪೇ… ಅರಿಯಾ ಮಗ್ಗಾ…ಪೇ… ಫಲಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ; ಅರಿಯಾ ನಭಾವನಾಯ ಪಹಾತಬ್ಬಹೇತುಕೇ ಪಹೀನೇ ಕಿಲೇಸೇ…ಪೇ… ಪುಬ್ಬೇ ಸಮುದಾಚಿಣ್ಣೇ…ಪೇ… ಚಕ್ಖುಂ…ಪೇ… ವತ್ಥುಂ ನಭಾವನಾಯ ಪಹಾತಬ್ಬಹೇತುಕೇ ಖನ್ಧೇ ಚ ಮೋಹಞ್ಚ ಅನಿಚ್ಚತೋ…ಪೇ… ವಿಪಸ್ಸತಿ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ನಭಾವನಾಯ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ದಿಟ್ಠಿ…ಪೇ… ವಿಚಿಕಿಚ್ಛಾ…ಪೇ… ನಭಾವನಾಯ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ; ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ…ಪೇ… ಅನಾಗತಂಸಞಾಣಸ್ಸ, ಆವಜ್ಜನಾಯ, ಮೋಹಸ್ಸ ಚ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ…ಪೇ… ಸೀಲಂ…ಪೇ… ಝಾನಂ…ಪೇ… ಚಕ್ಖುಂ…ಪೇ… ವತ್ಥುಂ ನಭಾವನಾಯ ಪಹಾತಬ್ಬಹೇತುಕೇ ಖನ್ಧೇ ಚ ಮೋಹಞ್ಚ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ಭಾವನಾಯ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ಉದ್ಧಚ್ಚಂ…ಪೇ… ಭಾವನಾಯ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ. (೨)

ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಚಕ್ಖುಂ…ಪೇ… ವತ್ಥುಂ ನಭಾವನಾಯ ಪಹಾತಬ್ಬಹೇತುಕೇ ಖನ್ಧೇ ಚ ಮೋಹಞ್ಚ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ (ಘಟನಾರಮ್ಮಣಾ ತೀಣಿಪಿ ಕಾತಬ್ಬಾ). (೩)

ಅಧಿಪತಿಪಚ್ಚಯಾದಿ

೯೭. ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ಭಾವನಾಯ ಪಹಾತಬ್ಬಹೇತುಕಂ ರಾಗಂ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ಭಾವನಾಯ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ. ಸಹಜಾತಾಧಿಪತಿ – ಭಾವನಾಯ ಪಹಾತಬ್ಬಹೇತುಕಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ಭಾವನಾಯ ಪಹಾತಬ್ಬಹೇತುಕಂ ರಾಗಂ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ನಭಾವನಾಯ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. ಸಹಜಾತಾಧಿಪತಿ – ಭಾವನಾಯ ಪಹಾತಬ್ಬಹೇತುಕಾಧಿಪತಿ ಚಿತ್ತಸಮುಟ್ಠಾನಾನಂ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೨)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ಭಾವನಾಯ ಪಹಾತಬ್ಬಹೇತುಕಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೩)

೯೮. ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ದಾನಂ…ಪೇ… ಸೀಲಂ…ಪೇ… ಉಪೋಸಥಕಮ್ಮಂ ಕತ್ವಾ ತಂ ಗರುಂ ಕತ್ವಾ ಪಚ್ಚವೇಕ್ಖತಿ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ನಭಾವನಾಯ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ಪುಬ್ಬೇ…ಪೇ… ಝಾನಾ…ಪೇ… ಅರಿಯಾ ಮಗ್ಗಾ ವುಟ್ಠಹಿತ್ವಾ…ಪೇ… ಫಲಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ; ಚಕ್ಖುಂ…ಪೇ… ವತ್ಥುಂ ನಭಾವನಾಯ ಪಹಾತಬ್ಬಹೇತುಕೇ ಖನ್ಧೇ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ನಭಾವನಾಯ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. ಸಹಜಾತಾಧಿಪತಿ – ನಭಾವನಾಯ ಪಹಾತಬ್ಬಹೇತುಕಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ – ದಾನಂ…ಪೇ… ಝಾನಂ…ಪೇ… ಚಕ್ಖುಂ…ಪೇ… ವತ್ಥುಂ ನಭಾವನಾಯ ಪಹಾತಬ್ಬಹೇತುಕೇ ಖನ್ಧೇ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ಭಾವನಾಯ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ. (೨)

(ಅನನ್ತರಪಚ್ಚಯೇ ನಭಾವನಾಯ ಪಹಾತಬ್ಬಹೇತುಕಕಾರಣಾ ವಿಚಿಕಿಚ್ಛಾಸಹಗತೋ ಮೋಹೋ ನ ಕಾತಬ್ಬೋ, ಉದ್ಧಚ್ಚಸಹಗತೋ ಮೋಹೋ ಕಾತಬ್ಬೋ.) ಸಮನನ್ತರಪಚ್ಚಯೇನ ಪಚ್ಚಯೋ… ಸಹಜಾತಪಚ್ಚಯೇನ ಪಚ್ಚಯೋ… ನವ… ಅಞ್ಞಮಞ್ಞಪಚ್ಚಯೇನ ಪಚ್ಚಯೋ… ಛ… ನಿಸ್ಸಯಪಚ್ಚಯೇನ ಪಚ್ಚಯೋ… ನವ.

ಉಪನಿಸ್ಸಯಪಚ್ಚಯೋ

೯೯. ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಭಾವನಾಯ ಪಹಾತಬ್ಬಹೇತುಕಾನಂ ಖನ್ಧಾನಂ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (ಮೂಲಂ ಕಾತಬ್ಬಂ.) ಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ನಭಾವನಾಯ ಪಹಾತಬ್ಬಹೇತುಕಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ; ಸಕಭಣ್ಡೇ ಛನ್ದರಾಗೋ ಪರಭಣ್ಡೇ ಛನ್ದರಾಗಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ; ಸಕಪರಿಗ್ಗಹೇ ಛನ್ದರಾಗೋ ಪರಪರಿಗ್ಗಹೇ ಛನ್ದರಾಗಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (ಮೂಲಂ ಕಾತಬ್ಬಂ.) ಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

೧೦೦. ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಮಾಪತ್ತಿಂ ಉಪ್ಪಾದೇತಿ, ದಿಟ್ಠಿಂ ಗಣ್ಹಾತಿ; ಸೀಲಂ…ಪೇ… ಪಞ್ಞಂ… ನಭಾವನಾಯ ಪಹಾತಬ್ಬಹೇತುಕಂ ರಾಗಂ… ದೋಸಂ… ಮೋಹಂ… ದಿಟ್ಠಿಂ… ಪತ್ಥನಂ… ಕಾಯಿಕಂ ಸುಖಂ… ಕಾಯಿಕಂ ದುಕ್ಖಂ…ಪೇ… ಸೇನಾಸನಂ ಉಪನಿಸ್ಸಾಯ ದಾನಂ ದೇತಿ…ಪೇ… ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ; ಸದ್ಧಾ…ಪೇ… ಸೇನಾಸನಂ ಸದ್ಧಾಯ…ಪೇ… ಪಞ್ಞಾಯ… ನಭಾವನಾಯ ಪಹಾತಬ್ಬಹೇತುಕಸ್ಸ ರಾಗಸ್ಸ … ದೋಸಸ್ಸ… ಮೋಹಸ್ಸ… ದಿಟ್ಠಿಯಾ… ಪತ್ಥನಾಯ… ಕಾಯಿಕಸ್ಸ ಸುಖಸ್ಸ…ಪೇ… ಫಲಸಮಾಪತ್ತಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ಮಾನಂ ಜಪ್ಪೇತಿ…ಪೇ… ಸದ್ಧಾ …ಪೇ… ಸೇನಾಸನಂ ಭಾವನಾಯ ಪಹಾತಬ್ಬಹೇತುಕಸ್ಸ ರಾಗಸ್ಸ… ದೋಸಸ್ಸ… ಮೋಹಸ್ಸ… ಮಾನಸ್ಸ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಾ…ಪೇ… ಪಞ್ಞಾ… ಕಾಯಿಕಂ ಸುಖಂ…ಪೇ… ಸೇನಾಸನಂ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ (ಘಟನೂಪನಿಸ್ಸಯಾಪಿ ತೀಣಿಪಿ ಕಾತಬ್ಬಾ). (೩)

ಪುರೇಜಾತಪಚ್ಚಯಾದಿ

೧೦೧. ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ… ತೀಣಿ… ಪಚ್ಛಾಜಾತಪಚ್ಚಯೇನ ಪಚ್ಚಯೋ… ತೀಣಿ… ಆಸೇವನಪಚ್ಚಯೇನ ಪಚ್ಚಯೋ… ನವ… ಕಮ್ಮಪಚ್ಚಯೇನ ಪಚ್ಚಯೋ (ನಭಾವನಾಯ ಪಹಾತಬ್ಬಭಾಜನಕಾರಣೇ ನಾನಾಕ್ಖಣಿಕಾ ಲಬ್ಭತಿ ) …ಪೇ… ನೋವಿಗತಪಚ್ಚಯೇನ ಪಚ್ಚಯೋ. (ಸಂಖಿತ್ತಂ. ಯಥಾ ದಸ್ಸನೇನ ಪಹಾತಬ್ಬಹೇತುಕದುಕಂ ಏವಂ ಭಾವನಾಯ ಪಹಾತಬ್ಬಹೇತುಕಪಚ್ಚಯಾಪಿ ಪಚ್ಚನೀಯಾಪಿ ವಿಭಾಗೋಪಿ ಗಣನಾಪಿ ನಿನ್ನಾನಾಕರಣಾ.)

ನದಸ್ಸನೇನ ಪಹಾತಬ್ಬೋ ಧಮ್ಮೋ ನದಸ್ಸನೇನ ಪಹಾತಬ್ಬಸ್ಸ ಧಮ್ಮಸ್ಸ…ಪೇ…. (ಪರನ್ತೇನ ಸಕಭಣ್ಡಛನ್ದರಾಗೋಪಿ ಕಾತಬ್ಬೋ.)

ಭಾವನಾಯ ಪಹಾತಬ್ಬೋ ಧಮ್ಮೋ ನಭಾವನಾಯ ಪಹಾತಬ್ಬಸ್ಸ ಧಮ್ಮಸ್ಸ…ಪೇ…. (ಪರನ್ತೇನ ‘‘ಸಕಭಣ್ಡಛನ್ದರಾಗೋ’’ತಿ ಕಾತಬ್ಬಂ.)

ಭಾವನಾಯಪಹಾತಬ್ಬಹೇತುಕದುಕಂ ನಿಟ್ಠಿತಂ.