೧. ವಿಭಙ್ಗವಾರೋ

ಹೇತುಪಚ್ಚಯೋ

೫೭. ದಸ್ಸನೇನ ಪಹಾತಬ್ಬಹೇತುಕಂ ಧಮ್ಮಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ನದಸ್ಸನೇನ ಪಹಾತಬ್ಬಹೇತುಕಂ ಧಮ್ಮಂ ಪಚ್ಚಯಾ ನದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ನದಸ್ಸನೇನ ಪಹಾತಬ್ಬಹೇತುಕಂ ಏಕಂ ಖನ್ಧಂ ಪಚ್ಚಯಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ… (ಯಾವ ಅಜ್ಝತ್ತಿಕಾ ಮಹಾಭೂತಾ) ವತ್ಥುಂ ಪಚ್ಚಯಾ ನದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ. (೧)

ನದಸ್ಸನೇನ ಪಹಾತಬ್ಬಹೇತುಕಂ ಧಮ್ಮಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ವತ್ಥುಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ, ವಿಚಿಕಿಚ್ಛಾಸಹಗತಂ ಮೋಹಂ ಪಚ್ಚಯಾ ಸಮ್ಪಯುತ್ತಕಾ ಖನ್ಧಾ. (೨)

ನದಸ್ಸನೇನ ಪಹಾತಬ್ಬಹೇತುಕಂ ಧಮ್ಮಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕೋ ಚ ನದಸ್ಸನೇನ ಪಹಾತಬ್ಬಹೇತುಕೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ವತ್ಥುಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ, ಮಹಾಭೂತೇ ಪಚ್ಚಯಾ ಚಿತ್ತಸಮುಟ್ಠಾನಂ ರೂಪಂ, ವಿಚಿಕಿಚ್ಛಾಸಹಗತಂ ಮೋಹಂ ಪಚ್ಚಯಾ ಸಮ್ಪಯುತ್ತಕಾ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ. (೩)

೫೮. ದಸ್ಸನೇನ ಪಹಾತಬ್ಬಹೇತುಕಞ್ಚ ನದಸ್ಸನೇನ ಪಹಾತಬ್ಬಹೇತುಕಞ್ಚ ಧಮ್ಮಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ದಸ್ಸನೇನ ಪಹಾತಬ್ಬಹೇತುಕಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ…ಪೇ… ವಿಚಿಕಿಚ್ಛಾಸಹಗತಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ…ಪೇ…. (೧)

ದಸ್ಸನೇನ ಪಹಾತಬ್ಬಹೇತುಕಞ್ಚ ನದಸ್ಸನೇನ ಪಹಾತಬ್ಬಹೇತುಕಞ್ಚ ಧಮ್ಮಂ ಪಚ್ಚಯಾ ನದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ದಸ್ಸನೇನ ಪಹಾತಬ್ಬಹೇತುಕೇ ಖನ್ಧೇ ಚ ಮಹಾಭೂತೇ ಚ ಪಚ್ಚಯಾ ಚಿತ್ತಸಮುಟ್ಠಾನಂ ರೂಪಂ, ವಿಚಿಕಿಚ್ಛಾಸಹಗತೇ ಖನ್ಧೇ ಚ ಮೋಹಞ್ಚ ಪಚ್ಚಯಾ ಚಿತ್ತಸಮುಟ್ಠಾನಂ ರೂಪಂ. (೨)

ದಸ್ಸನೇನ ಪಹಾತಬ್ಬಹೇತುಕಞ್ಚ ನದಸ್ಸನೇನ ಪಹಾತಬ್ಬಹೇತುಕಞ್ಚ ಧಮ್ಮಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕೋ ಚ ನದಸ್ಸನೇನ ಪಹಾತಬ್ಬಹೇತುಕೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ದಸ್ಸನೇನ ಪಹಾತಬ್ಬಹೇತುಕಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ…ಪೇ… ದಸ್ಸನೇನ ಪಹಾತಬ್ಬಹೇತುಕೇ ಖನ್ಧೇ ಚ ಮಹಾಭೂತೇ ಚ ಪಚ್ಚಯಾ ಚಿತ್ತಸಮುಟ್ಠಾನಂ ರೂಪಂ, ವಿಚಿಕಿಚ್ಛಾಸಹಗತಂ ಏಕಂ ಖನ್ಧಞ್ಚ ಮೋಹಞ್ಚ ಪಚ್ಚಯಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ ಚ…ಪೇ…. (೩)

ಆರಮ್ಮಣಪಚ್ಚಯೋ

೫೯. ದಸ್ಸನೇನ ಪಹಾತಬ್ಬಹೇತುಕಂ ಧಮ್ಮಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ… ತೀಣಿ (ಪಟಿಚ್ಚಸದಿಸಾ).

ನದಸ್ಸನೇನ ಪಹಾತಬ್ಬಹೇತುಕಂ ಧಮ್ಮಂ ಪಚ್ಚಯಾ ನದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ನದಸ್ಸನೇನ ಪಹಾತಬ್ಬಹೇತುಕಂ ಏಕಂ ಖನ್ಧಂ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ… ಚಕ್ಖಾಯತನಂ ಪಚ್ಚಯಾ ಚಕ್ಖುವಿಞ್ಞಾಣಂ…ಪೇ… ವತ್ಥುಂ ಪಚ್ಚಯಾ ನದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ, ವತ್ಥುಂ ಪಚ್ಚಯಾ ವಿಚಿಕಿಚ್ಛಾಸಹಗತೋ ಮೋಹೋ. ನದಸ್ಸನೇನ ಪಹಾತಬ್ಬಹೇತುಕಂ ಧಮ್ಮಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ವತ್ಥುಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ, ವಿಚಿಕಿಚ್ಛಾಸಹಗತಂ ಮೋಹಂ ಪಚ್ಚಯಾ ಸಮ್ಪಯುತ್ತಕಾ ಖನ್ಧಾ. ನದಸ್ಸನೇನ ಪಹಾತಬ್ಬಹೇತುಕಂ ಧಮ್ಮಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕೋ ಚ ನದಸ್ಸನೇನ ಪಹಾತಬ್ಬಹೇತುಕೋ ಚ ಧಮ್ಮಾ ಉಪ್ಪಜ್ಜನ್ತಿ ಆರಮ್ಮಣಪಚ್ಚಯಾ – ವತ್ಥುಂ ಪಚ್ಚಯಾ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ. (೩)

೬೦. ದಸ್ಸನೇನ ಪಹಾತಬ್ಬಹೇತುಕಞ್ಚ ನದಸ್ಸನೇನ ಪಹಾತಬ್ಬಹೇತುಕಞ್ಚ ಧಮ್ಮಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ದಸ್ಸನೇನ ಪಹಾತಬ್ಬಹೇತುಕಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ…ಪೇ… ವಿಚಿಕಿಚ್ಛಾಸಹಗತಂ ಏಕಂ ಖನ್ಧಞ್ಚ ಮೋಹಞ್ಚ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ…ಪೇ…. (೧)

ದಸ್ಸನೇನ ಪಹಾತಬ್ಬಹೇತುಕಞ್ಚ ನದಸ್ಸನೇನ ಪಹಾತಬ್ಬಹೇತುಕಞ್ಚ ಧಮ್ಮಂ ಪಚ್ಚಯಾ ನದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ವಿಚಿಕಿಚ್ಛಾಸಹಗತೇ ಖನ್ಧೇ ಚ ವತ್ಥುಞ್ಚ ಪಚ್ಚಯಾ ವಿಚಿಕಿಚ್ಛಾಸಹಗತೋ ಮೋಹೋ. (೨)

ದಸ್ಸನೇನ ಪಹಾತಬ್ಬಹೇತುಕಞ್ಚ ನದಸ್ಸನೇನ ಪಹಾತಬ್ಬಹೇತುಕಞ್ಚ ಧಮ್ಮಂ ಪಚ್ಚಯಾ ದಸ್ಸನೇನ ಪಹಾತಬ್ಬಹೇತುಕೋ ಚ ನದಸ್ಸನೇನ ಪಹಾತಬ್ಬಹೇತುಕೋ ಚ ಧಮ್ಮಾ ಉಪ್ಪಜ್ಜನ್ತಿ ಆರಮ್ಮಣಪಚ್ಚಯಾ – ವಿಚಿಕಿಚ್ಛಾಸಹಗತಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ತಯೋ ಖನ್ಧಾ ಮೋಹೋ ಚ…ಪೇ… ದ್ವೇ ಖನ್ಧೇ ಚ…ಪೇ…. (೩)