೨. ಸಙ್ಖ್ಯಾವಾರೋ

ಸುದ್ಧಂ

೨೯. ಹೇತುಯಾ ಚತ್ತಾರಿ, ಆರಮ್ಮಣೇ ಚತ್ತಾರಿ, ಅಧಿಪತಿಯಾ ಪಞ್ಚ, ಅನನ್ತರೇ ಚತ್ತಾರಿ, ಸಮನನ್ತರೇ ಚತ್ತಾರಿ, ಸಹಜಾತೇ ಪಞ್ಚ, ಅಞ್ಞಮಞ್ಞೇ ದ್ವೇ, ನಿಸ್ಸಯೇ ಸತ್ತ, ಉಪನಿಸ್ಸಯೇ ಚತ್ತಾರಿ, ಪುರೇಜಾತೇ ದ್ವೇ, ಪಚ್ಛಾಜಾತೇ ದ್ವೇ, ಆಸೇವನೇ ದ್ವೇ, ಕಮ್ಮೇ ಚತ್ತಾರಿ, ವಿಪಾಕೇ ಏಕಂ, ಆಹಾರೇ ಚತ್ತಾರಿ, ಇನ್ದ್ರಿಯೇ ಚತ್ತಾರಿ, ಝಾನೇ ಚತ್ತಾರಿ, ಮಗ್ಗೇ ಚತ್ತಾರಿ, ಸಮ್ಪಯುತ್ತೇ ದ್ವೇ, ವಿಪ್ಪಯುತ್ತೇ ತೀಣಿ, ಅತ್ಥಿಯಾ ಸತ್ತ, ನತ್ಥಿಯಾ ಚತ್ತಾರಿ, ವಿಗತೇ ಚತ್ತಾರಿ, ಅವಿಗತೇ ಸತ್ತ.

ಪಚ್ಚನೀಯುದ್ಧಾರೋ

೩೦. ದಸ್ಸನೇನ ಪಹಾತಬ್ಬೋ ಧಮ್ಮೋ ದಸ್ಸನೇನ ಪಹಾತಬ್ಬಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ಸಹಜಾತಪಚ್ಚಯೇನ ಪಚ್ಚಯೋ… ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ದಸ್ಸನೇನ ಪಹಾತಬ್ಬೋ ಧಮ್ಮೋ ನದಸ್ಸನೇನ ಪಹಾತಬ್ಬಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ಸಹಜಾತಪಚ್ಚಯೇನ ಪಚ್ಚಯೋ… ಉಪನಿಸ್ಸಯಪಚ್ಚಯೇನ ಪಚ್ಚಯೋ… ಪಚ್ಛಾಜಾತಪಚ್ಚಯೇನ ಪಚ್ಚಯೋ… ಕಮ್ಮಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬೋ ಧಮ್ಮೋ ದಸ್ಸನೇನ ಪಹಾತಬ್ಬಸ್ಸ ಚ ನದಸ್ಸನೇನ ಪಹಾತಬ್ಬಸ್ಸ ಚ ಧಮ್ಮಸ್ಸ ಸಹಜಾತಪಚ್ಚಯೇನ ಪಚ್ಚಯೋ. (೩)

೩೧. ನದಸ್ಸನೇನ ಪಹಾತಬ್ಬೋ ಧಮ್ಮೋ ನದಸ್ಸನೇನ ಪಹಾತಬ್ಬಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ಸಹಜಾತಪಚ್ಚಯೇನ ಪಚ್ಚಯೋ… ಉಪನಿಸ್ಸಯಪಚ್ಚಯೇನ ಪಚ್ಚಯೋ… ಪುರೇಜಾತಪಚ್ಚಯೇನ ಪಚ್ಚಯೋ… ಪಚ್ಛಾಜಾತಪಚ್ಚಯೇನ ಪಚ್ಚಯೋ… ಕಮ್ಮಪಚ್ಚಯೇನ ಪಚ್ಚಯೋ… ಆಹಾರಪಚ್ಚಯೇನ ಪಚ್ಚಯೋ… ಇನ್ದ್ರಿಯಪಚ್ಚಯೇನ ಪಚ್ಚಯೋ. (೧)

ನದಸ್ಸನೇನ ಪಹಾತಬ್ಬೋ ಧಮ್ಮೋ ದಸ್ಸನೇನ ಪಹಾತಬ್ಬಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ಉಪನಿಸ್ಸಯಪಚ್ಚಯೇನ ಪಚ್ಚಯೋ… ಪುರೇಜಾತಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬೋ ಚ ನದಸ್ಸನೇನ ಪಹಾತಬ್ಬೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಸ್ಸ ಧಮ್ಮಸ್ಸ ಸಹಜಾತಂ, ಪುರೇಜಾತಂ. (೧)

ದಸ್ಸನೇನ ಪಹಾತಬ್ಬೋ ಚ ನದಸ್ಸನೇನ ಪಹಾತಬ್ಬೋ ಚ ಧಮ್ಮಾ ನದಸ್ಸನೇನ ಪಹಾತಬ್ಬಸ್ಸ ಧಮ್ಮಸ್ಸ ಸಹಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ. (೨)