೧-೭. ಪಟಿಚ್ಚವಾರಾದಿ

ಹೇತುಪಚ್ಚಯೋ

೨೧. ಅಕುಸಲಂ ಕಿಲೇಸಞ್ಚೇವ ಸಂಕಿಲೇಸಿಕಞ್ಚ ಧಮ್ಮಂ ಪಟಿಚ್ಚ ಅಕುಸಲೋ ಕಿಲೇಸೋ ಚೇವ ಸಂಕಿಲೇಸಿಕೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ (ಸಂಖಿತ್ತಂ).

ಹೇತುಯಾ ಏಕಂ…ಪೇ… ಅವಿಗತೇ ಏಕಂ (ಸಂಖಿತ್ತಂ).

(ಸಹಜಾತವಾರೇಪಿ…ಪೇ… ಪಞ್ಹಾವಾರೇಪಿ ಸಬ್ಬತ್ಥ ಏಕಂ.)

೨೨. ಕುಸಲಂ ಸಂಕಿಲೇಸಿಕಞ್ಚೇವ ನೋ ಚ ಕಿಲೇಸಂ ಧಮ್ಮಂ ಪಟಿಚ್ಚ ಕುಸಲೋ ಸಂಕಿಲೇಸಿಕೋ ಚೇವ ನೋ ಚ ಕಿಲೇಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ಅಕುಸಲಂ ಸಂಕಿಲೇಸಿಕಞ್ಚೇವ ನೋ ಚ ಕಿಲೇಸಂ ಧಮ್ಮಂ ಪಟಿಚ್ಚ ಅಕುಸಲೋ ಸಂಕಿಲೇಸಿಕೋ ಚೇವ ನೋ ಚ ಕಿಲೇಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ಅಬ್ಯಾಕತಂ ಸಂಕಿಲೇಸಿಕಞ್ಚೇವ ನೋ ಚ ಕಿಲೇಸಂ ಧಮ್ಮಂ ಪಟಿಚ್ಚ ಅಬ್ಯಾಕತೋ ಸಂಕಿಲೇಸಿಕೋ ಚೇವ ನೋ ಚ ಕಿಲೇಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ.

ಕುಸಲಂ ಸಂಕಿಲೇಸಿಕಞ್ಚೇವ ನೋ ಚ ಕಿಲೇಸಞ್ಚ ಅಬ್ಯಾಕತಂ ಸಂಕಿಲೇಸಿಕಞ್ಚೇವ ನೋ ಚ ಕಿಲೇಸಞ್ಚ ಧಮ್ಮಂ ಪಟಿಚ್ಚ ಅಬ್ಯಾಕತೋ ಸಂಕಿಲೇಸಿಕೋ ಚೇವ ನೋ ಚ ಕಿಲೇಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)

ಅಕುಸಲಂ ಸಂಕಿಲೇಸಿಕಞ್ಚೇವ ನೋ ಚ ಕಿಲೇಸಞ್ಚ ಅಬ್ಯಾಕತಂ ಸಂಕಿಲೇಸಿಕಞ್ಚೇವ ನೋ ಚ ಕಿಲೇಸಞ್ಚ ಧಮ್ಮಂ ಪಟಿಚ್ಚ ಅಬ್ಯಾಕತೋ ಸಂಕಿಲೇಸಿಕೋ ಚೇವ ನೋ ಚ ಕಿಲೇಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ (ಸಂಖಿತ್ತಂ).

೨೩. ಹೇತುಯಾ ನವ, ಆರಮ್ಮಣೇ ತೀಣಿ…ಪೇ… ಅವಿಗತೇ ನವ (ಸಂಖಿತ್ತಂ. ಸಹಜಾತವಾರಮ್ಪಿ…ಪೇ… ಸಮ್ಪಯುತ್ತವಾರಮ್ಪಿ ಪಟಿಚ್ಚವಾರಸದಿಸಂ).

೨೪. ಕುಸಲೋ ಸಂಕಿಲೇಸಿಕೋ ಚೇವ ನೋ ಚ ಕಿಲೇಸೋ ಧಮ್ಮೋ ಕುಸಲಸ್ಸ ಸಂಕಿಲೇಸಿಕಸ್ಸ ಚೇವ ನೋ ಚ ಕಿಲೇಸಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ… ತೀಣಿ.

ಅಬ್ಯಾಕತೋ ಸಂಕಿಲೇಸಿಕೋ ಚೇವ ನೋ ಚ ಕಿಲೇಸೋ ಧಮ್ಮೋ ಅಬ್ಯಾಕತಸ್ಸ ಸಂಕಿಲೇಸಿಕಸ್ಸ ಚೇವ ನೋ ಚ ಕಿಲೇಸಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ. (೧) (ಸಂಖಿತ್ತಂ.)

೨೫. ಹೇತುಯಾ ಚತ್ತಾರಿ, ಆರಮ್ಮಣೇ ನವ, ಅಧಿಪತಿಯಾ ನವ…ಪೇ… ಅವಿಗತೇ ತೇರಸ (ಸಂಖಿತ್ತಂ. ಯಥಾ ಕುಸಲತ್ತಿಕೇ ಪಞ್ಹಾವಾರಂ, ಏವಂ ವಿತ್ಥಾರೇತಬ್ಬಂ).