೧-೭. ಪಟಿಚ್ಚವಾರಾದಿ

ಪಚ್ಚಯಚತುಕ್ಕಂ

ಹೇತುಪಚ್ಚಯೋ

೩೦. ಕುಸಲಂ ಆಸವವಿಪ್ಪಯುತ್ತಂ ಅನಾಸವಂ ಧಮ್ಮಂ ಪಟಿಚ್ಚ ಕುಸಲೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)

ಅಬ್ಯಾಕತಂ ಆಸವವಿಪ್ಪಯುತ್ತಂ ಅನಾಸವಂ ಧಮ್ಮಂ ಪಟಿಚ್ಚ ಅಬ್ಯಾಕತೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ (ಸಂಖಿತ್ತಂ).

೩೧. ಹೇತುಯಾ ದ್ವೇ, ಆರಮ್ಮಣೇ ದ್ವೇ…ಪೇ… ಅವಿಗತೇ ದ್ವೇ (ಸಂಖಿತ್ತಂ).

(ಸಹಜಾತವಾರಮ್ಪಿ…ಪೇ… ಸಮ್ಪಯುತ್ತವಾರಮ್ಪಿ ಪಟಿಚ್ಚವಾರಸದಿಸಂ.)

ಹೇತುಆರಮ್ಮಣಪಚ್ಚಯಾದಿ

೩೨. ಕುಸಲೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಕುಸಲಸ್ಸ ಆಸವವಿಪ್ಪಯುತ್ತಸ್ಸ ಅನಾಸವಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ. (೧)

ಅಬ್ಯಾಕತೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಅಬ್ಯಾಕತಸ್ಸ ಆಸವವಿಪ್ಪಯುತ್ತಸ್ಸ ಅನಾಸವಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ. (೧)

ಅಬ್ಯಾಕತೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಅಬ್ಯಾಕತಸ್ಸ ಆಸವವಿಪ್ಪಯುತ್ತಸ್ಸ ಅನಾಸವಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ಅಬ್ಯಾಕತೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಕುಸಲಸ್ಸ ಆಸವವಿಪ್ಪಯುತ್ತಸ್ಸ ಅನಾಸವಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ಕುಸಲೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಕುಸಲಸ್ಸ ಆಸವವಿಪ್ಪಯುತ್ತಸ್ಸ ಅನಾಸವಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ಅಬ್ಯಾಕತೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಅಬ್ಯಾಕತಸ್ಸ ಆಸವವಿಪ್ಪಯುತ್ತಸ್ಸ ಅನಾಸವಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ಅಬ್ಯಾಕತೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಕುಸಲಸ್ಸ ಆಸವವಿಪ್ಪಯುತ್ತಸ್ಸ ಅನಾಸವಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ಕುಸಲೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಅಬ್ಯಾಕತಸ್ಸ ಆಸವವಿಪ್ಪಯುತ್ತಸ್ಸ ಅನಾಸವಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೧)

ಅಬ್ಯಾಕತೋ ಆಸವವಿಪ್ಪಯುತ್ತೋ ಅನಾಸವೋ ಧಮ್ಮೋ ಅಬ್ಯಾಕತಸ್ಸ ಆಸವವಿಪ್ಪಯುತ್ತಸ್ಸ ಅನಾಸವಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೧) (ಸಂಖಿತ್ತಂ.)

೩೩. ಹೇತುಯಾ ದ್ವೇ, ಆರಮ್ಮಣೇ ದ್ವೇ, ಅಧಿಪತಿಯಾ ತೀಣಿ, ಅನನ್ತರೇ ದ್ವೇ, ಸಮನನ್ತರೇ ದ್ವೇ, ಸಹಜಾತೇ ದ್ವೇ, ಅಞ್ಞಮಞ್ಞೇ ದ್ವೇ, ನಿಸ್ಸಯೇ ದ್ವೇ, ಉಪನಿಸ್ಸಯೇ ಚತ್ತಾರಿ…ಪೇ… ಅವಿಗತೇ ದ್ವೇ (ಸಂಖಿತ್ತಂ).

(ಯಥಾ ಕುಸಲತ್ತಿಕೇ ಪಞ್ಹಾವಾರಂ, ಏವಂ ವಿತ್ಥಾರೇತಬ್ಬಂ.)

ಕುಸಲತ್ತಿಕಆಸವಗೋಚ್ಛಕಂ ನಿಟ್ಠಿತಂ.

೧-೨೦-೫೪. ಕುಸಲತ್ತಿಕ-ಸಞ್ಞೋಜನಾದಿದುಕಾನಿ

೩೪. ಅಕುಸಲಂ ಸಞ್ಞೋಜನಂ ಧಮ್ಮಂ ಪಟಿಚ್ಚ…ಪೇ… ಅಕುಸಲಂ ಗನ್ಥಂ… ಓಘಂ… ಯೋಗಂ… ನೀವರಣಂ….

ಕುಸಲಂ ನೋಪರಾಮಾಸಂ ಧಮ್ಮಂ ಪಟಿಚ್ಚ ಕುಸಲೋ ನೋಪರಾಮಾಸೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (ಆಸವಗೋಚ್ಛಕಸದಿಸಂ.) ದಿಟ್ಠಿಂ ಪಟಿಚ್ಚ ದಿಟ್ಠಿ ನ ಉಪ್ಪಜ್ಜತಿ.

ಕುಸಲತ್ತಿಕೇ ಛ ಗೋಚ್ಛಕಂ ನಿಟ್ಠಿತಂ.