೧-೭. ಪಟಿಚ್ಚವಾರಾದಿ
ಪಚ್ಚಯಚತುಕ್ಕಂ
೪೧. ಕುಸಲಂ ಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಕುಸಲೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಕುಸಲಂ ಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಅಬ್ಯಾಕತೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಕುಸಲಂ ಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಕುಸಲೋ ಕೇನಚಿ ವಿಞ್ಞೇಯ್ಯೋ ಚ ಅಬ್ಯಾಕತೋ ಕೇನಚಿ ವಿಞ್ಞೇಯ್ಯೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ. (೩)
ಅಕುಸಲಂ ಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಅಕುಸಲೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.
ಅಬ್ಯಾಕತಂ ಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಅಬ್ಯಾಕತೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)
ಕುಸಲಂ ಕೇನಚಿ ವಿಞ್ಞೇಯ್ಯಞ್ಚ ಅಬ್ಯಾಕತಂ ಕೇನಚಿ ವಿಞ್ಞೇಯ್ಯಞ್ಚ ಧಮ್ಮಂ ಪಟಿಚ್ಚ ಅಬ್ಯಾಕತೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)
ಅಕುಸಲಂ ಕೇನಚಿ ವಿಞ್ಞೇಯ್ಯಞ್ಚ ಅಬ್ಯಾಕತಂ ಕೇನಚಿ ವಿಞ್ಞೇಯ್ಯಞ್ಚ ಧಮ್ಮಂ ಪಟಿಚ್ಚ ಅಬ್ಯಾಕತೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)
೪೨. ಕುಸಲಂ ಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಕುಸಲೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ. (೧)
ಅಕುಸಲಂ ಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಅಕುಸಲೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ. (೧)
ಅಬ್ಯಾಕತಂ ಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಅಬ್ಯಾಕತೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ. (೧) (ಸಂಖಿತ್ತಂ.)
೪೩. ಹೇತುಯಾ ನವ, ಆರಮ್ಮಣೇ ತೀಣಿ…ಪೇ… ಅವಿಗತೇ ನವ (ಸಂಖಿತ್ತಂ).
ಪಚ್ಚನೀಯಂ
ನಹೇತುಪಚ್ಚಯೋ
೪೪. ಅಕುಸಲಂ ಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಅಕುಸಲೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ. (೧)
ಅಬ್ಯಾಕತಂ ಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಅಬ್ಯಾಕತೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ. (೧) (ಸಂಖಿತ್ತಂ.)
೪೫. ನಹೇತುಯಾ ದ್ವೇ, ನಆರಮ್ಮಣೇ ಪಞ್ಚ, ನಅಧಿಪತಿಯಾ ನವ…ಪೇ… ನೋವಿಗತೇ ಪಞ್ಚ (ಸಂಖಿತ್ತಂ. ಸಹಜಾತವಾರಮ್ಪಿ…ಪೇ… ಸಮ್ಪಯುತ್ತವಾರಮ್ಪಿ ಪಟಿಚ್ಚವಾರಸದಿಸಂ).
ಹೇತುಪಚ್ಚಯೋ
೪೬. ಕುಸಲೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಕುಸಲಸ್ಸ ಕೇನಚಿ ವಿಞ್ಞೇಯ್ಯಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ… ತೀಣಿ.
ಅಕುಸಲೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಅಕುಸಲಸ್ಸ ಕೇನಚಿ ವಿಞ್ಞೇಯ್ಯಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ… ತೀಣಿ.
ಅಬ್ಯಾಕತೋ ಕೇನಚಿ ವಿಞ್ಞೇಯ್ಯೋ ಧಮ್ಮೋ ಅಬ್ಯಾಕತಸ್ಸ ಕೇನಚಿ ವಿಞ್ಞೇಯ್ಯಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ. (೧) (ಸಂಖಿತ್ತಂ.)
೪೭. ಹೇತುಯಾ ಸತ್ತ, ಆರಮ್ಮಣೇ ನವ…ಪೇ… ಅವಿಗತೇ ತೇರಸ (ಸಂಖಿತ್ತಂ. ಯಥಾ ಕುಸಲತ್ತಿಕೇ ಪಞ್ಹಾವಾರಂ, ಏವಂ ವಿತ್ಥಾರೇತಬ್ಬಂ).
೪೮. ಕುಸಲಂ ನಕೇನಚಿ ವಿಞ್ಞೇಯ್ಯಂ ಧಮ್ಮಂ ಪಟಿಚ್ಚ ಕುಸಲೋ ನಕೇನಚಿ ವಿಞ್ಞೇಯ್ಯೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ (ಕೇನಚಿವಿಞ್ಞೇಯ್ಯಸದಿಸಂ).
ಕುಸಲತ್ತಿಕಚೂಳನ್ತರದುಕಂ ನಿಟ್ಠಿತಂ.