೭. ಪಞ್ಹಾವಾರೋ

ಪಚ್ಚಯಚತುಕ್ಕಂ

ಆರಮ್ಮಣಪಚ್ಚಯಾದಿ

೨೦೦. ಮಗ್ಗಹೇತುಕೋ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಮಗ್ಗಹೇತುಕೋ ನಹೇತು ಧಮ್ಮೋ ಮಗ್ಗಾಧಿಪತಿಸ್ಸ ನಹೇತುಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಮಗ್ಗಹೇತುಕೋ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಚ ಮಗ್ಗಾಧಿಪತಿಸ್ಸ ನಹೇತುಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೩)

ಮಗ್ಗಾಧಿಪತಿ ನಹೇತು ಧಮ್ಮೋ ಮಗ್ಗಾಧಿಪತಿಸ್ಸ ನಹೇತುಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಮಗ್ಗಾಧಿಪತಿ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಮಗ್ಗಾಧಿಪತಿ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಚ ಮಗ್ಗಾಧಿಪತಿಸ್ಸ ನಹೇತುಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೩)

ಮಗ್ಗಹೇತುಕೋ ನಹೇತು ಚ ಮಗ್ಗಾಧಿಪತಿ ನಹೇತು ಚ ಧಮ್ಮಾ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ತೀಣಿ.

೨೦೧. ಮಗ್ಗಾರಮ್ಮಣೋ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ… ತೀಣಿ.

ಮಗ್ಗಹೇತುಕೋ ನಹೇತು ಧಮ್ಮೋ ಮಗ್ಗಹೇತುಕಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಮಗ್ಗಹೇತುಕೋ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಮಗ್ಗಹೇತುಕೋ ನಹೇತು ಧಮ್ಮೋ ಮಗ್ಗಾಧಿಪತಿಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಮಗ್ಗಹೇತುಕೋ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಚ ಮಗ್ಗಾಧಿಪತಿಸ್ಸ ನಹೇತುಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಮಗ್ಗಹೇತುಕೋ ನಹೇತು ಧಮ್ಮೋ ಮಗ್ಗಹೇತುಕಸ್ಸ ನಹೇತುಸ್ಸ ಚ ಮಗ್ಗಾಧಿಪತಿಸ್ಸ ನಹೇತುಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. (೫)

ಮಗ್ಗಾಧಿಪತಿ ನಹೇತು ಧಮ್ಮೋ ಮಗ್ಗಾಧಿಪತಿಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ… ಪಞ್ಚ.

ಮಗ್ಗಾರಮ್ಮಣೋ ನಹೇತು ಚ ಮಗ್ಗಾಧಿಪತಿ ನಹೇತು ಚ ಧಮ್ಮಾ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ… ತೀಣಿ.

ಮಗ್ಗಹೇತುಕೋ ನಹೇತು ಚ ಮಗ್ಗಾಧಿಪತಿ ನಹೇತು ಚ ಧಮ್ಮಾ ಮಗ್ಗಹೇತುಕಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ… ಪಞ್ಚ.

ಅನನ್ತರ-ಉಪನಿಸ್ಸಯಪಚ್ಚಯಾ

೨೦೨. ಮಗ್ಗಾರಮ್ಮಣೋ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. ಮಗ್ಗಾರಮ್ಮಣೋ ನಹೇತು ಧಮ್ಮೋ ಮಗ್ಗಾಧಿಪತಿಸ್ಸ ನಹೇತುಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. ಮಗ್ಗಾರಮ್ಮಣೋ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಚ ಮಗ್ಗಾಧಿಪತಿಸ್ಸ ನಹೇತುಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೩)

ಮಗ್ಗಾಧಿಪತಿ ನಹೇತು ಧಮ್ಮೋ ಮಗ್ಗಾಧಿಪತಿಸ್ಸ ನಹೇತುಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. ಮಗ್ಗಾಧಿಪತಿ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. ಮಗ್ಗಾಧಿಪತಿ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಚ ಮಗ್ಗಾಧಿಪತಿಸ್ಸ ನಹೇತುಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೩)

ಮಗ್ಗಾರಮ್ಮಣೋ ನಹೇತು ಚ ಮಗ್ಗಾಧಿಪತಿ ನಹೇತು ಚ ಧಮ್ಮಾ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ… ತೀಣಿ…ಪೇ….

೨೦೩. ಮಗ್ಗಾರಮ್ಮಣೋ ನಹೇತು ಧಮ್ಮೋ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ… ತೀಣಿ.

ಮಗ್ಗಹೇತುಕೋ ನಹೇತು ಧಮ್ಮೋ ಮಗ್ಗಹೇತುಕಸ್ಸ ನಹೇತುಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ… ಪಞ್ಚ.

ಮಗ್ಗಾಧಿಪತಿ ನಹೇತು ಧಮ್ಮೋ ಮಗ್ಗಾಧಿಪತಿಸ್ಸ ನಹೇತುಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ… ಪಞ್ಚ.

ಮಗ್ಗಾರಮ್ಮಣೋ ನಹೇತು ಚ ಮಗ್ಗಾಧಿಪತಿ ನಹೇತು ಚ ಧಮ್ಮಾ ಮಗ್ಗಾರಮ್ಮಣಸ್ಸ ನಹೇತುಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ… ತೀಣಿ.

ಮಗ್ಗಹೇತುಕೋ ನಹೇತು ಚ ಮಗ್ಗಾಧಿಪತಿ ನಹೇತು ಚ ಧಮ್ಮಾ ಮಗ್ಗಹೇತುಕಸ್ಸ ನಹೇತುಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ… ಪಞ್ಚ (ಸಂಖಿತ್ತಂ).

೨೦೪. ಆರಮ್ಮಣೇ ನವ, ಅಧಿಪತಿಯಾ ಏಕವೀಸ, ಅನನ್ತರೇ ನವ, ಸಮನನ್ತರೇ ನವ, ಸಹಜಾತೇ ಸತ್ತರಸ, ಅಞ್ಞಮಞ್ಞೇ ಸತ್ತರಸ, ನಿಸ್ಸಯೇ ಸತ್ತರಸ, ಉಪನಿಸ್ಸಯೇ ಏಕವೀಸ…ಪೇ… ಅವಿಗತೇ ಸತ್ತರಸ (ಸಂಖಿತ್ತಂ).

ನಹೇತುಯಾ ಏಕವೀಸ, ನಆರಮ್ಮಣೇ ಸತ್ತರಸ (ಸಂಖಿತ್ತಂ).

ಆರಮ್ಮಣಪಚ್ಚಯಾ ನಹೇತುಯಾ ನವ (ಸಂಖಿತ್ತಂ).

ನಹೇತುಪಚ್ಚಯಾ ಆರಮ್ಮಣೇ ನವ (ಸಂಖಿತ್ತಂ).

(ಯಥಾ ಕುಸಲತ್ತಿಕೇ ಪಞ್ಹಾವಾರಂ, ಏವಂ ವಿತ್ಥಾರೇತಬ್ಬಂ.)