೧-೭. ಪಟಿಚ್ಚವಾರಾದಿ

ಪಚ್ಚಯಚತುಕ್ಕಂ

ಹೇತುಪಚ್ಚಯೋ

೧೮೬. ಮಿಚ್ಛತ್ತನಿಯತಂ ನಹೇತುಂ ಧಮ್ಮಂ ಪಟಿಚ್ಚ ಮಿಚ್ಛತ್ತನಿಯತೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ಸಮ್ಮತ್ತನಿಯತಂ ನಹೇತುಂ ಧಮ್ಮಂ ಪಟಿಚ್ಚ ಸಮ್ಮತ್ತನಿಯತೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಸಮ್ಮತ್ತನಿಯತಂ ನಹೇತುಂ ಧಮ್ಮಂ ಪಟಿಚ್ಚ ಅನಿಯತೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಸಮ್ಮತ್ತನಿಯತಂ ನಹೇತುಂ ಧಮ್ಮಂ ಪಟಿಚ್ಚ ಸಮ್ಮತ್ತನಿಯತೋ ನಹೇತು ಚ ಅನಿಯತೋ ನಹೇತು ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ. (೩)

ಅನಿಯತಂ ನಹೇತುಂ ಧಮ್ಮಂ ಪಟಿಚ್ಚ ಅನಿಯತೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)

ಮಿಚ್ಛತ್ತನಿಯತಂ ನಹೇತುಞ್ಚ ಅನಿಯತಂ ನಹೇತುಞ್ಚ ಧಮ್ಮಂ ಪಟಿಚ್ಚ ಅನಿಯತೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)

ಸಮ್ಮತ್ತನಿಯತಂ ನಹೇತುಞ್ಚ ಅನಿಯತಂ ನಹೇತುಞ್ಚ ಧಮ್ಮಂ ಪಟಿಚ್ಚ ಅನಿಯತೋ ನಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧) (ಸಂಖಿತ್ತಂ.)

೧೮೭. ಹೇತುಯಾ ನವ, ಆರಮ್ಮಣೇ ತೀಣಿ, ಅಧಿಪತಿಯಾ ನವ…ಪೇ… ವಿಪಾಕೇ ಏಕಂ…ಪೇ… ಅವಿಗತೇ ನವ (ಸಂಖಿತ್ತಂ).

ಪಚ್ಚನೀಯಂ

ನಹೇತುಪಚ್ಚಯೋ

೧೮೮. ಅನಿಯತಂ ನಹೇತುಂ ಧಮ್ಮಂ ಪಟಿಚ್ಚ ಅನಿಯತೋ ನಹೇತು ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ (ಸಂಖಿತ್ತಂ).

ನಹೇತುಯಾ ಏಕಂ, ನಆರಮ್ಮಣೇ ಪಞ್ಚ, ನಅಧಿಪತಿಯಾ ತೀಣಿ…ಪೇ… ನೋವಿಗತೇ ಪಞ್ಚ (ಸಂಖಿತ್ತಂ).

ಹೇತುಪಚ್ಚಯಾ ನಆರಮ್ಮಣೇ ಪಞ್ಚ (ಸಂಖಿತ್ತಂ).

ನಹೇತುಪಚ್ಚಯಾ ಆರಮ್ಮಣೇ ಏಕಂ (ಸಂಖಿತ್ತಂ).

(ಸಹಜಾತವಾರಮ್ಪಿ…ಪೇ… ಸಮ್ಪಯುತ್ತವಾರಮ್ಪಿ ಪಟಿಚ್ಚವಾರಸದಿಸಂ ವಿತ್ಥಾರೇತಬ್ಬಂ.)

ಆರಮ್ಮಣ-ಅಧಿಪತಿ-ಅನನ್ತರಪಚ್ಚಯಾ

೧೮೯. ಮಿಚ್ಛತ್ತನಿಯತೋ ನಹೇತು ಧಮ್ಮೋ ಅನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ಸಮ್ಮತ್ತನಿಯತೋ ನಹೇತು ಧಮ್ಮೋ ಅನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ಅನಿಯತೋ ನಹೇತು ಧಮ್ಮೋ ಅನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಅನಿಯತೋ ನಹೇತು ಧಮ್ಮೋ ಮಿಚ್ಛತ್ತನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಅನಿಯತೋ ನಹೇತು ಧಮ್ಮೋ ಸಮ್ಮತ್ತನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೩)

೧೯೦. ಮಿಚ್ಛತ್ತನಿಯತೋ ನಹೇತು ಧಮ್ಮೋ ಮಿಚ್ಛತ್ತನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ… ತೀಣಿ.

ಸಮ್ಮತ್ತನಿಯತೋ ನಹೇತು ಧಮ್ಮೋ ಸಮ್ಮತ್ತನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಮ್ಮತ್ತನಿಯತೋ ನಹೇತು ಧಮ್ಮೋ ಅನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಮ್ಮತ್ತನಿಯತೋ ನಹೇತು ಧಮ್ಮೋ ಸಮ್ಮತ್ತನಿಯತಸ್ಸ ನಹೇತುಸ್ಸ ಚ ಅನಿಯತಸ್ಸ ನಹೇತುಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. (೩)

ಅನಿಯತೋ ನಹೇತು ಧಮ್ಮೋ ಅನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಅನಿಯತೋ ನಹೇತು ಧಮ್ಮೋ ಸಮ್ಮತ್ತನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. (೨)

ಮಿಚ್ಛತ್ತನಿಯತೋ ನಹೇತು ಧಮ್ಮೋ ಅನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೧)

ಸಮ್ಮತ್ತನಿಯತೋ ನಹೇತು ಧಮ್ಮೋ ಅನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೧)

ಅನಿಯತೋ ನಹೇತು ಧಮ್ಮೋ ಅನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. ಅನಿಯತೋ ನಹೇತು ಧಮ್ಮೋ ಮಿಚ್ಛತ್ತನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. ಅನಿಯತೋ ನಹೇತು ಧಮ್ಮೋ ಸಮ್ಮತ್ತನಿಯತಸ್ಸ ನಹೇತುಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೩) (ಸಂಖಿತ್ತಂ.)

೧೯೧. ಆರಮ್ಮಣೇ ಪಞ್ಚ, ಅಧಿಪತಿಯಾ ಅಟ್ಠ, ಅನನ್ತರೇ ಪಞ್ಚ, ಸಮನನ್ತರೇ ಪಞ್ಚ, ಸಹಜಾತೇ ನವ, ಅಞ್ಞಮಞ್ಞೇ ತೀಣಿ, ನಿಸ್ಸಯೇ ತೇರಸ, ಉಪನಿಸ್ಸಯೇ ಸತ್ತ…ಪೇ… ಅವಿಗತೇ ತೇರಸ (ಸಂಖಿತ್ತಂ).

ನಹೇತುಯಾ ತೇರಸ, ನಆರಮ್ಮಣೇ ತೇರಸ, ನಅಧಿಪತಿಯಾ ತೇರಸ (ಸಂಖಿತ್ತಂ).

ಆರಮ್ಮಣಪಚ್ಚಯಾ ನಹೇತುಯಾ ಪಞ್ಚ (ಸಂಖಿತ್ತಂ).

ನಹೇತುಪಚ್ಚಯಾ ಆರಮ್ಮಣೇ ಪಞ್ಚ (ಸಂಖಿತ್ತಂ).

(ಯಥಾ ಕುಸಲತ್ತಿಕೇ ಪಞ್ಹಾವಾರಂ, ಏವಂ ವಿತ್ಥಾರೇತಬ್ಬಂ.)