೧-೭. ಪಟಿಚ್ಚವಾರಾದಿ

ಪಚ್ಚಯಚತುಕ್ಕಂ

ಹೇತುಪಚ್ಚಯೋ

೮೪. ಅಜ್ಝತ್ತಿಕಂ ಕುಸಲಂ ಧಮ್ಮಂ ಪಟಿಚ್ಚ ಬಾಹಿರೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)

ಬಾಹಿರಂ ಕುಸಲಂ ಧಮ್ಮಂ ಪಟಿಚ್ಚ ಬಾಹಿರೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಬಾಹಿರಂ ಕುಸಲಂ ಧಮ್ಮಂ ಪಟಿಚ್ಚ ಅಜ್ಝತ್ತಿಕೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಬಾಹಿರಂ ಕುಸಲಂ ಧಮ್ಮಂ ಪಟಿಚ್ಚ ಅಜ್ಝತ್ತಿಕೋ ಕುಸಲೋ ಚ ಬಾಹಿರೋ ಕುಸಲೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ. (೩)

ಅಜ್ಝತ್ತಿಕಂ ಕುಸಲಞ್ಚ ಬಾಹಿರಂ ಕುಸಲಞ್ಚ ಧಮ್ಮಂ ಪಟಿಚ್ಚ ಬಾಹಿರೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧) (ಸಂಖಿತ್ತಂ.)

೮೫. ಹೇತುಯಾ ಪಞ್ಚ, ಆರಮ್ಮಣೇ ಪಞ್ಚ…ಪೇ… ಅವಿಗತೇ ಪಞ್ಚ. (ಸಂಖಿತ್ತಂ. ಚಿತ್ತದುಕಸದಿಸಂ. ಸಹಜಾತವಾರಮ್ಪಿ…ಪೇ… ಪಞ್ಹಾವಾರಮ್ಪಿ ವಿತ್ಥಾರೇತಬ್ಬಂ).

೮೬. ಅಜ್ಝತ್ತಿಕಂ ಅಕುಸಲಂ ಧಮ್ಮಂ ಪಟಿಚ್ಚ ಬಾಹಿರೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧)

ಬಾಹಿರಂ ಅಕುಸಲಂ ಧಮ್ಮಂ ಪಟಿಚ್ಚ ಬಾಹಿರೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಬಾಹಿರಂ ಅಕುಸಲಂ ಧಮ್ಮಂ ಪಟಿಚ್ಚ ಅಜ್ಝತ್ತಿಕೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಬಾಹಿರಂ ಅಕುಸಲಂ ಧಮ್ಮಂ ಪಟಿಚ್ಚ ಅಜ್ಝತ್ತಿಕೋ ಅಕುಸಲೋ ಚ ಬಾಹಿರೋ ಅಕುಸಲೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ. (೩)

ಅಜ್ಝತ್ತಿಕಂ ಅಕುಸಲಞ್ಚ ಬಾಹಿರಂ ಅಕುಸಲಞ್ಚ ಧಮ್ಮಂ ಪಟಿಚ್ಚ ಬಾಹಿರೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. (೧) (ಸಂಖಿತ್ತಂ.)

೮೭. ಹೇತುಯಾ ಪಞ್ಚ, ಆರಮ್ಮಣೇ ಪಞ್ಚ…ಪೇ… ಅವಿಗತೇ ಪಞ್ಚ. (ಸಂಖಿತ್ತಂ. ಚಿತ್ತದುಕಸದಿಸಂ. ಸಹಜಾತವಾರಮ್ಪಿ…ಪೇ… ಪಞ್ಹಾವಾರಮ್ಪಿ ವಿತ್ಥಾರೇತಬ್ಬಂ.)

೮೮. ಅಜ್ಝತ್ತಿಕಂ ಅಬ್ಯಾಕತಂ ಧಮ್ಮಂ ಪಟಿಚ್ಚ ಅಜ್ಝತ್ತಿಕೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ಬಾಹಿರಂ ಅಬ್ಯಾಕತಂ ಧಮ್ಮಂ ಪಟಿಚ್ಚ ಬಾಹಿರೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ.

ಅಜ್ಝತ್ತಿಕಂ ಅಬ್ಯಾಕತಞ್ಚ ಬಾಹಿರಂ ಅಬ್ಯಾಕತಞ್ಚ ಧಮ್ಮಂ ಪಟಿಚ್ಚ ಅಜ್ಝತ್ತಿಕೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ತೀಣಿ (ಸಂಖಿತ್ತಂ).

೮೯. ಹೇತುಯಾ ನವ, ಆರಮ್ಮಣೇ ಪಞ್ಚ, ಅಧಿಪತಿಯಾ ಪಞ್ಚ…ಪೇ… ಅಞ್ಞಮಞ್ಞೇ ಪಞ್ಚ, ನಿಸ್ಸಯೇ ನವ, ಉಪನಿಸ್ಸಯೇ ಪಞ್ಚ, ಪುರೇಜಾತೇ ಪಞ್ಚ, ಆಸೇವನೇ ಪಞ್ಚ, ಕಮ್ಮೇ…ಪೇ… ಮಗ್ಗೇ ನವ, ಸಮ್ಪಯುತ್ತೇ ಪಞ್ಚ, ವಿಪ್ಪಯುತ್ತೇ ನವ…ಪೇ… ಅವಿಗತೇ ನವ (ಸಂಖಿತ್ತಂ).

ನಹೇತುಯಾ ನವ, ನಆರಮ್ಮಣೇ ನವ, ನಅಧಿಪತಿಯಾ ನವ…ಪೇ… ನಕಮ್ಮೇ ತೀಣಿ, ನವಿಪಾಕೇ ಪಞ್ಚ, ನಆಹಾರೇ ಏಕಂ, ನಇನ್ದ್ರಿಯೇ ಏಕಂ, ನಝಾನೇ ಪಞ್ಚ, ನಮಗ್ಗೇ ನವ, ನಸಮ್ಪಯುತ್ತೇ ನವ, ನವಿಪ್ಪಯುತ್ತೇ ಪಞ್ಚ, ನೋನತ್ಥಿಯಾ ನವ, ನೋವಿಗತೇ ನವ (ಸಂಖಿತ್ತಂ. ಸಹಜಾತವಾರಮ್ಪಿ…ಪೇ… ಸಮ್ಪಯುತ್ತವಾರಮ್ಪಿ ವಿತ್ಥಾರೇತಬ್ಬಂ.)

೯೦. ಬಾಹಿರೋ ಅಬ್ಯಾಕತೋ ಧಮ್ಮೋ ಬಾಹಿರಸ್ಸ ಅಬ್ಯಾಕತಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ (ಸಂಖಿತ್ತಂ).

ಬಾಹಿರೋ ಅಬ್ಯಾಕತೋ ಧಮ್ಮೋ ಬಾಹಿರಸ್ಸ ಅಬ್ಯಾಕತಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ… ತೀಣಿ.

೯೧. ಹೇತುಯಾ ತೀಣಿ, ಆರಮ್ಮಣೇ ನವ, ಅಧಿಪತಿಯಾ ನವ (ಅಜ್ಝತ್ತಿಕೋ ಬಾಹಿರಸ್ಸ ಗಮನಕಾಲೇ ಸಹಜಾತಾಧಿಪತಿ, ಮಜ್ಝೇ ತೀಸುಪಿ ಸಹಜಾತಾಧಿಪತಿ), ಅನನ್ತರೇ ನವ, ಸಹಜಾತೇ ನವ, ಅಞ್ಞಮಞ್ಞೇ ಪಞ್ಚ, ನಿಸ್ಸಯೇ ನವ, ಉಪನಿಸ್ಸಯೇ ನವ, ಪುರೇಜಾತೇ ನವ (ಆರಮ್ಮಣಪುರೇಜಾತಮ್ಪಿ ವತ್ಥುಪುರೇಜಾತಮ್ಪಿ), ಪಚ್ಛಾಜಾತೇ ನವ, ಆಸೇವನೇ ನವ, ಕಮ್ಮೇ ತೀಣಿ, ವಿಪಾಕೇ ನವ, ಆಹಾರೇ ನವ (ತಿಣ್ಣನ್ನಂ ಕಬಳೀಕಾರೋ ಆಹಾರೋ), ಇನ್ದ್ರಿಯೇ ನವ (ತಿಣ್ಣನ್ನಂ ರೂಪಜೀವಿತಿನ್ದ್ರಿಯಂ), ಝಾನೇ ಮಗ್ಗೇ ತೀಣಿ, ಸಮ್ಪಯುತ್ತೇ ಪಞ್ಚ, ವಿಪ್ಪಯುತ್ತೇ ನವ, ಅತ್ಥಿಯಾ ನವ…ಪೇ… ಅವಿಗತೇ ನವ (ಸಂಖಿತ್ತಂ).