೧. ವಿಭಙ್ಗವಾರೋ

ಹೇತುಪಚ್ಚಯೋ

೭೫. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ. (೧)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕಾ ಹೇತೂ ಚಿತ್ತಸಮುಟ್ಠಾನಾನಂ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೩)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ… ತೀಣಿ.

೭೬. ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ…ಪೇ….

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ವಿಚಿಕಿಚ್ಛಾಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ. (೨)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಉದ್ಧಚ್ಚಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ. (೩)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ವಿಚಿಕಿಚ್ಛಾಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೪)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಉದ್ಧಚ್ಚಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೫)

ಆರಮ್ಮಣಪಚ್ಚಯೋ

೭೭. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕಂ ರಾಗಂ ಅಸ್ಸಾದೇತಿ ಅಭಿನನ್ದತಿ; ತಂ ಆರಬ್ಭ ದಸ್ಸನೇನ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ವಿಚಿಕಿಚ್ಛಾ ಉಪ್ಪಜ್ಜತಿ, ದಸ್ಸನೇನ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ. ದಿಟ್ಠಿಂ ಅಸ್ಸಾದೇತಿ ಅಭಿನನ್ದತಿ; ತಂ ಆರಬ್ಭ ದಸ್ಸನೇನ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ವಿಚಿಕಿಚ್ಛಾ ಉಪ್ಪಜ್ಜತಿ, ದಸ್ಸನೇನ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ. ವಿಚಿಕಿಚ್ಛಂ ಆರಬ್ಭ ವಿಚಿಕಿಚ್ಛಾ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ದಸ್ಸನೇನ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ. ದಸ್ಸನೇನ ಪಹಾತಬ್ಬಹೇತುಕಂ ದೋಮನಸ್ಸಂ ಆರಬ್ಭ ದಸ್ಸನೇನ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ವಿಚಿಕಿಚ್ಛಾ ಉಪ್ಪಜ್ಜತಿ. (೧)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಅರಿಯಾ ದಸ್ಸನೇನ ಪಹಾತಬ್ಬಹೇತುಕೇ ಪಹೀನೇ ಕಿಲೇಸೇ ಪಚ್ಚವೇಕ್ಖನ್ತಿ, ಪುಬ್ಬೇ ಸಮುದಾಚಿಣ್ಣೇ ಕಿಲೇಸೇ ಜಾನನ್ತಿ, ದಸ್ಸನೇನ ಪಹಾತಬ್ಬಹೇತುಕೇ ಖನ್ಧೇ ಅನಿಚ್ಚತೋ…ಪೇ… ಚೇತೋಪರಿಯಞಾಣೇನ…ಪೇ… ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಯಥಾಕಮ್ಮೂಪಗಞಾಣಸ್ಸ ಅನಾಗತಂಸಞಾಣಸ್ಸ, ಆವಜ್ಜನಾಯ ಮೋಹಸ್ಸ ಚ ಆರಮ್ಮಣಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕೇ ಖನ್ಧೇ ಆರಬ್ಭ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೩)

೭೮. ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಭಾವನಾಯ ಪಹಾತಬ್ಬಹೇತುಕಂ ರಾಗಂ ಅಸ್ಸಾದೇತಿ ಅಭಿನನ್ದತಿ; ತಂ ಆರಬ್ಭ ಭಾವನಾಯ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ಉದ್ಧಚ್ಚಂ ಉಪ್ಪಜ್ಜತಿ, ಭಾವನಾಯ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ. ಉದ್ಧಚ್ಚಂ ಆರಬ್ಭ ಉದ್ಧಚ್ಚಂ ಉಪ್ಪಜ್ಜತಿ, ಭಾವನಾಯ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ. ಭಾವನಾಯ ಪಹಾತಬ್ಬಹೇತುಕಂ ದೋಮನಸ್ಸಂ ಆರಬ್ಭ ಭಾವನಾಯ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ, ಉದ್ಧಚ್ಚಂ ಉಪ್ಪಜ್ಜತಿ. (೧)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಭಾವನಾಯ ಪಹಾತಬ್ಬಹೇತುಕಂ ರಾಗಂ ಅಸ್ಸಾದೇತಿ ಅಭಿನನ್ದತಿ; ತಂ ಆರಬ್ಭ ದಸ್ಸನೇನ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ವಿಚಿಕಿಚ್ಛಾ ಉಪ್ಪಜ್ಜತಿ, ದಸ್ಸನೇನ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ. ಉದ್ಧಚ್ಚಂ ಆರಬ್ಭ ದಿಟ್ಠಿ ಉಪ್ಪಜ್ಜತಿ, ವಿಚಿಕಿಚ್ಛಾ ಉಪ್ಪಜ್ಜತಿ, ದಸ್ಸನೇನ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ. ಭಾವನಾಯ ಪಹಾತಬ್ಬಹೇತುಕಂ ದೋಮನಸ್ಸಂ ಆರಬ್ಭ ದಸ್ಸನೇನ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ವಿಚಿಕಿಚ್ಛಾ ಉಪ್ಪಜ್ಜತಿ. (೨)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಅರಿಯಾ ಭಾವನಾಯ ಪಹಾತಬ್ಬಹೇತುಕೇ ಪಹೀನೇ ಕಿಲೇಸೇ ಪಚ್ಚವೇಕ್ಖನ್ತಿ, ವಿಕ್ಖಮ್ಭಿತೇ ಕಿಲೇಸೇ ಪಚ್ಚವೇಕ್ಖನ್ತಿ, ಪುಬ್ಬೇ ಸಮುದಾಚಿಣ್ಣೇ ಕಿಲೇಸೇ ಜಾನನ್ತಿ, ಭಾವನಾಯ ಪಹಾತಬ್ಬಹೇತುಕೇ ಖನ್ಧೇ ಅನಿಚ್ಚತೋ…ಪೇ… ಚೇತೋಪರಿಯಞಾಣೇನ…ಪೇ… ಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಯಥಾಕಮ್ಮೂಪಗಞಾಣಸ್ಸ, ಅನಾಗತಂಸಞಾಣಸ್ಸ, ಆವಜ್ಜನಾಯ ಮೋಹಸ್ಸ ಚ ಆರಮ್ಮಣಪಚ್ಚಯೇನ ಪಚ್ಚಯೋ. (೩)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಭಾವನಾಯ ಪಹಾತಬ್ಬಹೇತುಕೇ ಖನ್ಧೇ ಆರಬ್ಭ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೪)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಭಾವನಾಯ ಪಹಾತಬ್ಬಹೇತುಕೇ ಖನ್ಧೇ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೫)

೭೯. ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ ದತ್ವಾ…(ವಿತ್ಥಾರೇತಬ್ಬಂ ದಸ್ಸನತ್ತಿಕಸದಿಸಂ) ಆವಜ್ಜನಾಯ ಮೋಹಸ್ಸ ಚ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ ದತ್ವಾ… (ಯಥಾ ದಸ್ಸನತ್ತಿಕಂ). (೨)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ ದತ್ವಾ… (ಯಥಾ ದಸ್ಸನತ್ತಿಕಂ). (೩)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಚಕ್ಖುಂ ಆರಬ್ಭ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. ಸೋತಂ…ಪೇ… ವತ್ಥುಂ… ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೇ ಖನ್ಧೇ ಆರಬ್ಭ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೪)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಚಕ್ಖುಂ…ಪೇ… ವತ್ಥುಂ… ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೇ ಖನ್ಧೇ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೫)

೮೦. ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ವಿಚಿಕಿಚ್ಛಾಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಉಪ್ಪಜ್ಜನ್ತಿ. (೧)

ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ವಿಚಿಕಿಚ್ಛಾಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೨)

ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ವಿಚಿಕಿಚ್ಛಾಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೩)

೮೧. ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಉದ್ಧಚ್ಚಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಉಪ್ಪಜ್ಜನ್ತಿ. (೧)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಉದ್ಧಚ್ಚಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಉಪ್ಪಜ್ಜನ್ತಿ. (೨)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಉದ್ಧಚ್ಚಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೩)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಉದ್ಧಚ್ಚಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೪)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಉದ್ಧಚ್ಚಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೫)

ಅಧಿಪತಿಪಚ್ಚಯೋ

೮೨. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ (ದಸ್ಸನತ್ತಿಕಸದಿಸಂ, ದಸ ಪಞ್ಹಾ).

ಅನನ್ತರಪಚ್ಚಯೋ

೮೩. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ದಸ್ಸನೇನ ಪಹಾತಬ್ಬಹೇತುಕಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೧)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ವಿಚಿಕಿಚ್ಛಾಸಹಗತಾ ಖನ್ಧಾ ಪಚ್ಛಿಮಸ್ಸ ಪಚ್ಛಿಮಸ್ಸ ಮೋಹಸ್ಸ ಅನನ್ತರಪಚ್ಚಯೇನ ಪಚ್ಚಯೋ; ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ವುಟ್ಠಾನಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ವಿಚಿಕಿಚ್ಛಾಸಹಗತಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ. (೩)

೮೪. ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಭಾವನಾಯ ಪಹಾತಬ್ಬಹೇತುಕಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೧)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಉದ್ಧಚ್ಚಸಹಗತಾ ಖನ್ಧಾ ಪಚ್ಛಿಮಸ್ಸ ಪಚ್ಛಿಮಸ್ಸ ಮೋಹಸ್ಸ ಅನನ್ತರಪಚ್ಚಯೇನ ಪಚ್ಚಯೋ; ಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ವುಟ್ಠಾನಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೨)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಉದ್ಧಚ್ಚಸಹಗತಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ. (೩)

೮೫. ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮೋ ಪುರಿಮೋ ವಿಚಿಕಿಚ್ಛಾಸಹಗತೋ ಉದ್ಧಚ್ಚಸಹಗತೋ ಮೋಹೋ ಪಚ್ಛಿಮಸ್ಸ ಪಚ್ಛಿಮಸ್ಸ ವಿಚಿಕಿಚ್ಛಾಸಹಗತಸ್ಸ ಉದ್ಧಚ್ಚಸಹಗತಸ್ಸ ಮೋಹಸ್ಸ ಅನನ್ತರಪಚ್ಚಯೇನ ಪಚ್ಚಯೋ; ಪುರಿಮಾ ಪುರಿಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ; ಅನುಲೋಮಂ ಗೋತ್ರಭುಸ್ಸ… ಅನುಲೋಮಂ ವೋದಾನಸ್ಸ…ಪೇ… ನಿರೋಧಾ ವುಟ್ಠಹನ್ತಸ್ಸ ನೇವಸಞ್ಞಾನಾಸಞ್ಞಾಯತನಂ ಫಲಸಮಾಪತ್ತಿಯಾ ಅನನ್ತರಪಚ್ಚಯೇನ ಪಚ್ಚಯೋ. (೧)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮೋ ಪುರಿಮೋ ವಿಚಿಕಿಚ್ಛಾಸಹಗತೋ ಮೋಹೋ ಪಚ್ಛಿಮಾನಂ ಪಚ್ಛಿಮಾನಂ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ; ಆವಜ್ಜನಾ ದಸ್ಸನೇನ ಪಹಾತಬ್ಬಹೇತುಕಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೨)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮೋ ಪುರಿಮೋ ಉದ್ಧಚ್ಚಸಹಗತೋ ಮೋಹೋ ಪಚ್ಛಿಮಾನಂ ಪಚ್ಛಿಮಾನಂ ಉದ್ಧಚ್ಚಸಹಗತಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ; ಆವಜ್ಜನಾ ಭಾವನಾಯ ಪಹಾತಬ್ಬಹೇತುಕಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೩)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮೋ ಪುರಿಮೋ ವಿಚಿಕಿಚ್ಛಾಸಹಗತೋ ಮೋಹೋ ಪಚ್ಛಿಮಾನಂ ಪಚ್ಛಿಮಾನಂ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ; ಆವಜ್ಜನಾ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ. (೪)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮೋ ಪುರಿಮೋ ಉದ್ಧಚ್ಚಸಹಗತೋ ಮೋಹೋ ಪಚ್ಛಿಮಾನಂ ಪಚ್ಛಿಮಾನಂ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ; ಆವಜ್ಜನಾ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ. (೫)

೮೬. ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಪಚ್ಛಿಮಾನಂ ಪಚ್ಛಿಮಾನಂ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೧)

ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಪಚ್ಛಿಮಸ್ಸ ಪಚ್ಛಿಮಸ್ಸ ಮೋಹಸ್ಸ ಅನನ್ತರಪಚ್ಚಯೇನ ಪಚ್ಚಯೋ; ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ವುಟ್ಠಾನಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಪಚ್ಛಿಮಾನಂ ಪಚ್ಛಿಮಾನಂ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ. (೩)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ… ತೀಣಿ (ದಸ್ಸನೇನ ಸದಿಸಂ ಗಮನಂ).

ಸಮನನ್ತರಪಚ್ಚಯಾದಿ

೮೭. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಸಮನನ್ತರಪಚ್ಚಯೇನ ಪಚ್ಚಯೋ… (ಅನನ್ತರಸದಿಸಂ) ಸಹಜಾತಪಚ್ಚಯೇನ ಪಚ್ಚಯೋ… (ಸಂಖಿತ್ತಂ. ಪಟಿಚ್ಚವಾರೇ ಸಹಜಾತಸದಿಸಂ) ಅಞ್ಞಮಞ್ಞಪಚ್ಚಯೇನ ಪಚ್ಚಯೋ… (ಸಂಖಿತ್ತಂ. ಪಟಿಚ್ಚವಾರೇ ಅಞ್ಞಮಞ್ಞಸದಿಸಂ) ನಿಸ್ಸಯಪಚ್ಚಯೇನ ಪಚ್ಚಯೋ… (ಸಂಖಿತ್ತಂ. ಪಚ್ಚಯವಾರೇ ನಿಸ್ಸಯವಾರಸದಿಸಂ. ವಿಸುಂ ಘಟನಾ ನತ್ಥಿ).

ಉಪನಿಸ್ಸಯಪಚ್ಚಯೋ

೮೮. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ೫೧ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ದಸ್ಸನೇನ ಪಹಾತಬ್ಬಹೇತುಕಂ ರಾಗಂ ಉಪನಿಸ್ಸಾಯ ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ. ದಸ್ಸನೇನ ಪಹಾತಬ್ಬಹೇತುಕಂ ದೋಸಂ… ಮೋಹಂ… ದಿಟ್ಠಿಂ… ಪತ್ಥನಂ ಉಪನಿಸ್ಸಾಯ ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ. ದಸ್ಸನೇನ ಪಹಾತಬ್ಬಹೇತುಕೋ ರಾಗೋ… ದೋಸೋ… ಮೋಹೋ… ದಿಟ್ಠಿ… ಪತ್ಥನಾ ದಸ್ಸನೇನ ಪಹಾತಬ್ಬಹೇತುಕಸ್ಸ ರಾಗಸ್ಸ…ಪೇ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ದಸ್ಸನೇನ ಪಹಾತಬ್ಬಹೇತುಕಂ ರಾಗಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಮಾಪತ್ತಿಂ ಉಪ್ಪಾದೇತಿ. ದಸ್ಸನೇನ ಪಹಾತಬ್ಬಹೇತುಕಂ ದೋಸಂ… ಮೋಹಂ… ದಿಟ್ಠಿಂ… ಪತ್ಥನಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಮಾಪತ್ತಿಂ ಉಪ್ಪಾದೇತಿ. ದಸ್ಸನೇನ ಪಹಾತಬ್ಬಹೇತುಕೋ ರಾಗೋ…ಪೇ… ಪತ್ಥನಾ… ಸದ್ಧಾಯ…ಪೇ… ಪಞ್ಞಾಯ… ಕಾಯಿಕಸ್ಸ ಸುಖಸ್ಸ, ಕಾಯಿಕಸ್ಸ ದುಕ್ಖಸ್ಸ ಫಲಸಮಾಪತ್ತಿಯಾ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ದಸ್ಸನೇನ ಪಹಾತಬ್ಬಹೇತುಕೋ ರಾಗೋ… ದೋಸೋ… ಮೋಹೋ… ದಿಟ್ಠಿ… ಪತ್ಥನಾ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

೮೯. ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಭಾವನಾಯ ಪಹಾತಬ್ಬಹೇತುಕೋ ರಾಗೋ… ದೋಸೋ… ಮೋಹೋ… ಮಾನೋ… ಪತ್ಥನಾ ಭಾವನಾಯ ಪಹಾತಬ್ಬಹೇತುಕಸ್ಸ ರಾಗಸ್ಸ… ದೋಸಸ್ಸ… ಮೋಹಸ್ಸ… ಮಾನಸ್ಸ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಭಾವನಾಯ ಪಹಾತಬ್ಬಹೇತುಕಂ ರಾಗಂ ಉಪನಿಸ್ಸಾಯ ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ. ಭಾವನಾಯ ಪಹಾತಬ್ಬಹೇತುಕಂ ದೋಸಂ… ಮೋಹಂ… ಮಾನಂ… ಪತ್ಥನಂ ಉಪನಿಸ್ಸಾಯ ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ. ಭಾವನಾಯ ಪಹಾತಬ್ಬಹೇತುಕೋ ರಾಗೋ…ಪೇ… ಪತ್ಥನಾ ದಸ್ಸನೇನ ಪಹಾತಬ್ಬಹೇತುಕಸ್ಸ ರಾಗಸ್ಸ… ದೋಸಸ್ಸ… ಮೋಹಸ್ಸ… ದಿಟ್ಠಿಯಾ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಸಕಭಣ್ಡೇ ಛನ್ದರಾಗೋ ಪರಭಣ್ಡೇ ಛನ್ದರಾಗಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಸಕಪರಿಗ್ಗಹೇ ಛನ್ದರಾಗೋ ಪರಪರಿಗ್ಗಹೇ ಛನ್ದರಾಗಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಭಾವನಾಯ ಪಹಾತಬ್ಬಹೇತುಕಂ ರಾಗಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಮಾಪತ್ತಿಂ ಉಪ್ಪಾದೇತಿ. ಭಾವನಾಯ ಪಹಾತಬ್ಬಹೇತುಕಂ ದೋಸಂ… ಮೋಹಂ… ಮಾನಂ… ಪತ್ಥನಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಮಾಪತ್ತಿಂ ಉಪ್ಪಾದೇತಿ. ಭಾವನಾಯ ಪಹಾತಬ್ಬಹೇತುಕೋ ರಾಗೋ…ಪೇ… ಪತ್ಥನಾ ಸದ್ಧಾಯ…ಪೇ… ಪಞ್ಞಾಯ… ಕಾಯಿಕಸ್ಸ ಸುಖಸ್ಸ, ಕಾಯಿಕಸ್ಸ ದುಕ್ಖಸ್ಸ ಫಲಸಮಾಪತ್ತಿಯಾ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ…. ಪಕತೂಪನಿಸ್ಸಯೋ – ಭಾವನಾಯ ಪಹಾತಬ್ಬಹೇತುಕೋ ರಾಗೋ…ಪೇ… ಪತ್ಥನಾ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೪)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಭಾವನಾಯ ಪಹಾತಬ್ಬಹೇತುಕೋ ರಾಗೋ…ಪೇ… ಪತ್ಥನಾ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೫)

೯೦. ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಮಾಪತ್ತಿಂ ಉಪ್ಪಾದೇತಿ. ಸೀಲಂ…ಪೇ… ಪಞ್ಞಂ… ಕಾಯಿಕಂ ಸುಖಂ… ಕಾಯಿಕಂ ದುಕ್ಖಂ… ಉತುಂ… ಭೋಜನಂ… ಸೇನಾಸನಂ… ಮೋಹಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸದ್ಧಾ…ಪೇ… ಮೋಹೋ ಸದ್ಧಾಯ…ಪೇ… ಫಲಸಮಾಪತ್ತಿಯಾ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ದಿಟ್ಠಿಂ ಗಣ್ಹಾತಿ. ಸೀಲಂ…ಪೇ… ಪಞ್ಞಂ… ಕಾಯಿಕಂ ಸುಖಂ… ಕಾಯಿಕಂ ದುಕ್ಖಂ…ಪೇ… ಸೇನಾಸನಂ… ಮೋಹಂ ಉಪನಿಸ್ಸಾಯ ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ. ಸದ್ಧಾ…ಪೇ… ಸೇನಾಸನಂ ಮೋಹೋ ಚ ದಸ್ಸನೇನ ಪಹಾತಬ್ಬಹೇತುಕಸ್ಸ ರಾಗಸ್ಸ…ಪೇ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ಮಾನಂ ಜಪ್ಪೇತಿ…ಪೇ… ಮೋಹಂ ಉಪನಿಸ್ಸಾಯ ಮಾನಂ ಜಪ್ಪೇತಿ. ಸದ್ಧಾ…ಪೇ… ಸೇನಾಸನಂ ಮೋಹೋ ಚ ಭಾವನಾಯ ಪಹಾತಬ್ಬಹೇತುಕಸ್ಸ ರಾಗಸ್ಸ…ಪೇ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಾ…ಪೇ… ಪಞ್ಞಾ… ಕಾಯಿಕಂ ಸುಖಂ… ಕಾಯಿಕಂ ದುಕ್ಖಂ…ಪೇ… ಸೇನಾಸನಂ ಮೋಹೋ ಚ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೪)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಾ…ಪೇ… ಸೇನಾಸನಂ ಮೋಹೋ ಚ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೫)

೯೧. ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ದಸ್ಸನೇನ ಪಹಾತಬ್ಬಹೇತುಕಸ್ಸ ರಾಗಸ್ಸ…ಪೇ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಸದ್ಧಾಯ…ಪೇ… ಪಞ್ಞಾಯ… ಕಾಯಿಕಸ್ಸ ಸುಖಸ್ಸ, ಕಾಯಿಕಸ್ಸ ದುಕ್ಖಸ್ಸ ಫಲಸಮಾಪತ್ತಿಯಾ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

೯೨. ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಪಕತೂಪನಿಸ್ಸಯೋ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ದಸ್ಸನೇನ ಪಹಾತಬ್ಬಹೇತುಕಸ್ಸ ರಾಗಸ್ಸ…ಪೇ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಭಾವನಾಯ ಪಹಾತಬ್ಬಹೇತುಕಸ್ಸ ರಾಗಸ್ಸ…ಪೇ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಸದ್ಧಾಯ…ಪೇ… ಫಲಸಮಾಪತ್ತಿಯಾ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಪಕತೂಪನಿಸ್ಸಯೋ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೪)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೫)

ಪುರೇಜಾತಪಚ್ಚಯೋ

೯೩. ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ ಅನಿಚ್ಚತೋ…ಪೇ… ವಿಪಸ್ಸತಿ, ಸೋತಂ…ಪೇ… ವತ್ಥುಂ ಅನಿಚ್ಚತೋ…ಪೇ… ವಿಪಸ್ಸತಿ; ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ, ರೂಪಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಫೋಟ್ಠಬ್ಬಾಯತನಂ ಕಾಯವಿಞ್ಞಾಣಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ. ವತ್ಥುಪುರೇಜಾತಂ – ಚಕ್ಖಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಕಾಯಾಯತನಂ ಕಾಯವಿಞ್ಞಾಣಸ್ಸ…ಪೇ… ವತ್ಥು ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾನಂ ಖನ್ಧಾನಂ ಮೋಹಸ್ಸ ಚ ಪುರೇಜಾತಪಚ್ಚಯೇನ ಪಚ್ಚಯೋ. (೧)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅಸ್ಸಾದೇತಿ ಅಭಿನನ್ದತಿ; ತಂ ಆರಬ್ಭ ದಸ್ಸನೇನ ಪಹಾತಬ್ಬಹೇತುಕೋ ರಾಗೋ…ಪೇ… ದಿಟ್ಠಿ…ಪೇ… ವಿಚಿಕಿಚ್ಛಾ…ಪೇ… ದಸ್ಸನೇನ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ. ವತ್ಥುಪುರೇಜಾತಂ – ವತ್ಥು ದಸ್ಸನೇನ ಪಹಾತಬ್ಬಹೇತುಕಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೨)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅಸ್ಸಾದೇತಿ ಅಭಿನನ್ದತಿ; ತಂ ಆರಬ್ಭ ಭಾವನಾಯ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ಉದ್ಧಚ್ಚಂ ಉಪ್ಪಜ್ಜತಿ, ಭಾವನಾಯ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ. ವತ್ಥುಪುರೇಜಾತಂ – ವತ್ಥು ಭಾವನಾಯ ಪಹಾತಬ್ಬಹೇತುಕಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೩)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಆರಬ್ಭ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. ವತ್ಥುಪುರೇಜಾತಂ – ವತ್ಥು ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಪುರೇಜಾತಪಚ್ಚಯೇನ ಪಚ್ಚಯೋ. (೪)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. ವತ್ಥುಪುರೇಜಾತಂ – ವತ್ಥು ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಪುರೇಜಾತಪಚ್ಚಯೇನ ಪಚ್ಚಯೋ. (೫)

ಪಚ್ಛಾಜಾತಪಚ್ಚಯೋ

೯೪. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ಆಸೇವನಪಚ್ಚಯೋ

೯೫. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆಸೇವನಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ದಸ್ಸನೇನ ಪಹಾತಬ್ಬಹೇತುಕಾನಂ ಖನ್ಧಾನಂ ಆಸೇವನಪಚ್ಚಯೇನ ಪಚ್ಚಯೋ. (೧)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆಸೇವನಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ವಿಚಿಕಿಚ್ಛಾಸಹಗತಾ ಖನ್ಧಾ ಪಚ್ಛಿಮಸ್ಸ ಪಚ್ಛಿಮಸ್ಸ ಮೋಹಸ್ಸ ಆಸೇವನಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆಸೇವನಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ವಿಚಿಕಿಚ್ಛಾಸಹಗತಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಆಸೇವನಪಚ್ಚಯೇನ ಪಚ್ಚಯೋ.

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ (ಸಂಖಿತ್ತಂ) ತೀಣಿ.

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ…ಪೇ…. (ಆಸೇವನಮೂಲಕೇ ವುಟ್ಠಾನಸ್ಸಪಿ ಆವಜ್ಜನಾಯಪಿ ಪಹಾತಬ್ಬಂ, ಸತ್ತರಸ ಪಞ್ಹಾ ಪರಿಪುಣ್ಣಾ, ಅನನ್ತರಸದಿಸಾ).

ಕಮ್ಮಪಚ್ಚಯೋ

೯೬. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಕಮ್ಮಪಚ್ಚಯೇನ ಪಚ್ಚಯೋ. (೧)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸಹಜಾತಾ, ನಾನಾಕ್ಖಣಿಕಾ. ಸಹಜಾತಾ ದಸ್ಸನೇನ ಪಹಾತಬ್ಬಹೇತುಕಾ ಚೇತನಾ ಮೋಹಸ್ಸ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. ನಾನಾಕ್ಖಣಿಕಾ – ದಸ್ಸನೇನ ಪಹಾತಬ್ಬಹೇತುಕಾ ಚೇತನಾ ವಿಪಾಕಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಮೋಹಸ್ಸ ಚ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೩)

೯೭. ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಭಾವನಾಯ ಪಹಾತಬ್ಬಹೇತುಕಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಕಮ್ಮಪಚ್ಚಯೇನ ಪಚ್ಚಯೋ. (೧)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಭಾವನಾಯ ಪಹಾತಬ್ಬಹೇತುಕಾ ಚೇತನಾ ಮೋಹಸ್ಸ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೨)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಭಾವನಾಯ ಪಹಾತಬ್ಬಹೇತುಕಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಮೋಹಸ್ಸ ಚ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೩)

೯೮. ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸಹಜಾತಾ, ನಾನಾಕ್ಖಣಿಕಾ. ಸಹಜಾತಾ – ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. ಪಟಿಸನ್ಧಿಕ್ಖಣೇ…ಪೇ…. ನಾನಾಕ್ಖಣಿಕಾ – ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾ ಚೇತನಾ ವಿಪಾಕಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೧)

ವಿಪಾಕಪಚ್ಚಯೋ

೯೯. ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ವಿಪಾಕಪಚ್ಚಯೇನ ಪಚ್ಚಯೋ (ಪವತ್ತಿಪಟಿಸನ್ಧಿ) ವಿಪಾಕಾ ಖನ್ಧಾ ವತ್ಥುಸ್ಸ…ಪೇ….

ಆಹಾರಪಚ್ಚಯೋ

೧೦೦. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆಹಾರಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕಾ ಆಹಾರಾ ಸಮ್ಪಯುತ್ತಕಾನಂ ಖನ್ಧಾನಂ ಆಹಾರಪಚ್ಚಯೇನ ಪಚ್ಚಯೋ. (೧)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆಹಾರಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕಾ ಆಹಾರಾ ಮೋಹಸ್ಸ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಆಹಾರಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಆಹಾರಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕಾ ಆಹಾರಾ ಸಮ್ಪಯುತ್ತಕಾನಂ ಖನ್ಧಾನಂ ಮೋಹಸ್ಸ ಚ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಆಹಾರಪಚ್ಚಯೇನ ಪಚ್ಚಯೋ. (೩)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ… ತೀಣಿ (ದಸ್ಸನೇನ ಸದಿಸಂ).

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಆಹಾರಪಚ್ಚಯೇನ ಪಚ್ಚಯೋ – ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾ ಆಹಾರಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಆಹಾರಪಚ್ಚಯೇನ ಪಚ್ಚಯೋ. ಪಟಿಸನ್ಧಿಕ್ಖಣೇ…ಪೇ… ಕಬಳೀಕಾರೋ ಆಹಾರೋ ಇಮಸ್ಸ ಕಾಯಸ್ಸ ಆಹಾರಪಚ್ಚಯೇನ ಪಚ್ಚಯೋ.

ಇನ್ದ್ರಿಯಪಚ್ಚಯಾದಿ

೧೦೧. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಇನ್ದ್ರಿಯಪಚ್ಚಯೇನ ಪಚ್ಚಯೋ… ತೀಣಿ (ಆಹಾರಸದಿಸಂ. ಮೋಹೋ ಕಾತಬ್ಬೋ).

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ… ತೀಣಿ.

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಇನ್ದ್ರಿಯಪಚ್ಚಯೇನ ಪಚ್ಚಯೋ – ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾ ಇನ್ದ್ರಿಯಾ ಸಮ್ಪಯುತ್ತಕಾನಂ ಖನ್ಧಾನಂ…ಪೇ… ಚಕ್ಖುನ್ದ್ರಿಯಂ ಚಕ್ಖುವಿಞ್ಞಾಣಸ್ಸ…ಪೇ… ಕಾಯಿನ್ದ್ರಿಯಂ ಕಾಯವಿಞ್ಞಾಣಸ್ಸ…ಪೇ… ರೂಪಜೀವಿತಿನ್ದ್ರಿಯಂ ಕಟತ್ತಾರೂಪಾನಂ ಇನ್ದ್ರಿಯಪಚ್ಚಯೇನ ಪಚ್ಚಯೋ… ಝಾನಪಚ್ಚಯೇನ ಪಚ್ಚಯೋ… ಮಗ್ಗಪಚ್ಚಯೇನ ಪಚ್ಚಯೋ… (ಇಮೇ ಸಹೇತುಕಾ ಕಾತಬ್ಬಾ) ಸಮ್ಪಯುತ್ತಪಚ್ಚಯೇನ ಪಚ್ಚಯೋ (ಪಟಿಚ್ಚವಾರೇ ಸಮ್ಪಯುತ್ತವಾರಸದಿಸಂ).

ವಿಪ್ಪಯುತ್ತಪಚ್ಚಯೋ

೧೦೨. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ (ದಸ್ಸನತ್ತಿಕಸದಿಸಂ).

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ (ದಸ್ಸನತ್ತಿಕಸದಿಸಂ).

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ (ದಸ್ಸನತ್ತಿಕಸದಿಸಂ). ಪಚ್ಛಾಜಾತಾ – ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಚ ಮೋಹೋ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ…ಪೇ…. (೧)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ದಸ್ಸನೇನ ಪಹಾತಬ್ಬಹೇತುಕಾನಂ ಖನ್ಧಾನಂ…ಪೇ…. (೨)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ಭಾವನಾಯ ಪಹಾತಬ್ಬಹೇತುಕಾನಂ ಖನ್ಧಾನಂ…ಪೇ…. (೩)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೪)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೫)

೧೦೩. ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ. ಸಹಜಾತಾ – ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಚಿತ್ತಸಮುಟ್ಠಾನಾನಂ ರೂಪಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೧)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ. ಸಹಜಾತಾ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಚಿತ್ತಸಮುಟ್ಠಾನಾನಂ ರೂಪಾನಂ…ಪೇ…. ಪಚ್ಛಾಜಾತಾ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೧)

ಅತ್ಥಿಪಚ್ಚಯಾದಿ

೧೦೪. ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ…ಪೇ…. (೧)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ. ಸಹಜಾತಾ – ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಸಹಜಾತಾ – ವಿಚಿಕಿಚ್ಛಾಸಹಗತಾ ಖನ್ಧಾ ಮೋಹಸ್ಸ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ದಸ್ಸನೇನ ಪಹಾತಬ್ಬಹೇತುಕೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ವಿಚಿಕಿಚ್ಛಾಸಹಗತೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಮೋಹಸ್ಸ ಚ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ…. (೩)

ಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ… ತೀಣಿ.

೧೦೫. ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ. ಸಹಜಾತೋ – ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ವಿಚಿಕಿಚ್ಛಾಸಹಗತೋ ಉದ್ಧಚ್ಚಸಹಗತೋ ಮೋಹೋ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪಟಿಸನ್ಧಿಕ್ಖಣೇ…ಪೇ… ಅಸಞ್ಞಸತ್ತಾನಂ…ಪೇ…. ಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅನಿಚ್ಚತೋ…ಪೇ… ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ, ರೂಪಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಫೋಟ್ಠಬ್ಬಾಯತನಂ ಕಾಯವಿಞ್ಞಾಣಸ್ಸ…ಪೇ… ಚಕ್ಖಾಯತನಂ…ಪೇ… ಕಾಯಾಯತನಂ…ಪೇ… ವತ್ಥು ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾನಂ ಖನ್ಧಾನಂ ಮೋಹಸ್ಸ ಚ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಾ ಖನ್ಧಾ ಚ ಮೋಹೋ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ; ಕಬಳೀಕಾರೋ ಆಹಾರೋ ಇಮಸ್ಸ ಕಾಯಸ್ಸ…ಪೇ… ರೂಪಜೀವಿತಿನ್ದ್ರಿಯಂ ಕಟತ್ತಾರೂಪಾನಂ…ಪೇ…. (೧)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ವಿಚಿಕಿಚ್ಛಾಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅಸ್ಸಾದೇತಿ ಅಭಿನನ್ದತಿ; ತಂ ಆರಬ್ಭ ದಸ್ಸನೇನ ಪಹಾತಬ್ಬಹೇತುಕೋ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ವಿಚಿಕಿಚ್ಛಾ ಉಪ್ಪಜ್ಜತಿ, ದಸ್ಸನೇನ ಪಹಾತಬ್ಬಹೇತುಕಂ ದೋಮನಸ್ಸಂ ಉಪ್ಪಜ್ಜತಿ, ವತ್ಥು ದಸ್ಸನೇನ ಪಹಾತಬ್ಬಹೇತುಕಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೨)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ಉದ್ಧಚ್ಚಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅಸ್ಸಾದೇತಿ ಅಭಿನನ್ದತಿ…ಪೇ… ವತ್ಥು ಭಾವನಾಯ ಪಹಾತಬ್ಬಹೇತುಕಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೩)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ವಿಚಿಕಿಚ್ಛಾಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪುರೇಜಾತಂ – ಚಕ್ಖುಂ ಆರಬ್ಭ ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ…ಪೇ… ವತ್ಥುಂ ಆರಬ್ಭ…ಪೇ… ವತ್ಥು ವಿಚಿಕಿಚ್ಛಾಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅತ್ಥಿಪಚ್ಚಯೇನ ಪಚ್ಚಯೋ. (೪)

ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಧಮ್ಮೋ ಭಾವನಾಯ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ಉದ್ಧಚ್ಚಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪುರೇಜಾತಂ – ಚಕ್ಖುಂ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ…ಪೇ… ವತ್ಥುಂ ಆರಬ್ಭ…ಪೇ… ವತ್ಥು ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅತ್ಥಿಪಚ್ಚಯೇನ ಪಚ್ಚಯೋ. (೫)

೧೦೬. ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ದಸ್ಸನೇನ ಪಹಾತಬ್ಬಹೇತುಕೋ ಏಕೋ ಖನ್ಧೋ ಚ ವತ್ಥು ಚ ತಿಣ್ಣನ್ನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ …ಪೇ… ದ್ವೇ ಖನ್ಧಾ…ಪೇ… ವಿಚಿಕಿಚ್ಛಾಸಹಗತೋ ಏಕೋ ಖನ್ಧೋ ಚ ಮೋಹೋ ಚ ತಿಣ್ಣನ್ನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ…ಪೇ…. (೧)

ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ. ಸಹಜಾತಾ – ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಚ ಮಹಾಭೂತಾ ಚ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಸಹಜಾತಾ – ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಸಹಜಾತಾ – ವಿಚಿಕಿಚ್ಛಾಸಹಗತಾ ಖನ್ಧಾ ಚ ವತ್ಥು ಚ ಮೋಹಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ವಿಚಿಕಿಚ್ಛಾಸಹಗತಾ ಖನ್ಧಾ ಚ ಮೋಹೋ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಚ ಕಬಳೀಕಾರೋ ಆಹಾರೋ ಚ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ದಸ್ಸನೇನ ಪಹಾತಬ್ಬಹೇತುಕಾ ಖನ್ಧಾ ಚ ರೂಪಜೀವಿತಿನ್ದ್ರಿಯಞ್ಚ ಕಟತ್ತಾರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೨)

ದಸ್ಸನೇನ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಸ್ಸ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ವಿಚಿಕಿಚ್ಛಾಸಹಗತೋ ಏಕೋ ಖನ್ಧೋ ಚ ವತ್ಥು ಚ ತಿಣ್ಣನ್ನಂ ಖನ್ಧಾನಂ ಮೋಹಸ್ಸ ಚ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ…ಪೇ… ವಿಚಿಕಿಚ್ಛಾಸಹಗತೋ ಏಕೋ ಖನ್ಧೋ ಚ ಮೋಹೋ ಚ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ ಚ ಮೋಹೋ ಚ…ಪೇ…. (೩)

ಭಾವನಾಯ ಪಹಾತಬ್ಬಹೇತುಕೋ ಚ ನೇವದಸ್ಸನೇನ ನಭಾವನಾಯ ಪಹಾತಬ್ಬಹೇತುಕೋ ಚ ಧಮ್ಮಾ ಭಾವನಾಯ ಪಹಾತಬ್ಬಹೇತುಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ (ಸಂಖಿತ್ತಂ. ತಿಸ್ಸೋ ಪಞ್ಹಾ, ದಸ್ಸನೇನ ನಯೇನ ವಿಭಜಿತಬ್ಬಾ, ‘‘ಉದ್ಧಚ್ಚ’’ನ್ತಿ ನಿಯಾಮೇತಬ್ಬಂ) ನತ್ಥಿಪಚ್ಚಯೇನ ಪಚ್ಚಯೋ… ವಿಗತಪಚ್ಚಯೇನ ಪಚ್ಚಯೋ… ಅವಿಗತಪಚ್ಚಯೇನ ಪಚ್ಚಯೋ….