೧. ವಿಭಙ್ಗವಾರೋ

ಹೇತುಪಚ್ಚಯೋ

೪೨. ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಸೇಕ್ಖಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ. (೧)

ಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಸೇಕ್ಖಾ ಹೇತೂ ಚಿತ್ತಸಮುಟ್ಠಾನಾನಂ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೨)

ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಚ ನೇವಸೇಕ್ಖನಾಸೇಕ್ಖಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಸೇಕ್ಖಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೩)

ಅಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ (ತೀಣಿ).

ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ನೇವಸೇಕ್ಖನಾಸೇಕ್ಖಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. ಪಟಿಸನ್ಧಿಕ್ಖಣೇ…ಪೇ…. (೧)

ಆರಮ್ಮಣಪಚ್ಚಯೋ

೪೩. ಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಅರಿಯಾ ಮಗ್ಗಾ ವುಟ್ಠಹಿತ್ವಾ ಮಗ್ಗಂ ಪಚ್ಚವೇಕ್ಖನ್ತಿ, ಸೇಕ್ಖಂ ಫಲಂ ಪಚ್ಚವೇಕ್ಖನ್ತಿ, ಚೇತೋಪರಿಯಞಾಣೇನ ಸೇಕ್ಖಚಿತ್ತಸಮಙ್ಗಿಸ್ಸ ಚಿತ್ತಂ ಜಾನನ್ತಿ, ಸೇಕ್ಖಾ ಖನ್ಧಾ ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಅನಾಗತಂಸಞಾಣಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ಅಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಅರಹಾ ಅಸೇಕ್ಖಂ ಫಲಂ ಪಚ್ಚವೇಕ್ಖತಿ, ಚೇತೋಪರಿಯಞಾಣೇನ ಅಸೇಕ್ಖಚಿತ್ತಸಮಙ್ಗಿಸ್ಸ ಚಿತ್ತಂ ಜಾನಾತಿ, ಅಸೇಕ್ಖಾ ಖನ್ಧಾ ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಅನಾಗತಂಸಞಾಣಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

೪೪. ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ ದತ್ವಾ ಸೀಲಂ ಸಮಾದಿಯಿತ್ವಾ ಉಪೋಸಥಕಮ್ಮಂ ಕತ್ವಾ ತಂ ಪಚ್ಚವೇಕ್ಖತಿ, ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ ವುಟ್ಠಹಿತ್ವಾ ಝಾನಂ ಪಚ್ಚವೇಕ್ಖತಿ, ಅರಿಯಾ ನಿಬ್ಬಾನಂ ಪಚ್ಚವೇಕ್ಖನ್ತಿ. ನಿಬ್ಬಾನಂ ಗೋತ್ರಭುಸ್ಸ, ವೋದಾನಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. ಅರಿಯಾ ಪಹೀನೇ ಕಿಲೇಸೇ ಪಚ್ಚವೇಕ್ಖನ್ತಿ ವಿಕ್ಖಮ್ಭಿತೇ ಕಿಲೇಸೇ ಪಚ್ಚವೇಕ್ಖನ್ತಿ, ಪುಬ್ಬೇ ಸಮುದಾಚಿಣ್ಣೇ ಕಿಲೇಸೇ ಜಾನನ್ತಿ, ಚಕ್ಖುಂ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸನ್ತಿ, ಅಸ್ಸಾದೇನ್ತಿ ಅಭಿನನ್ದನ್ತಿ, ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ, ಸೋತಂ…ಪೇ… ವತ್ಥುಂ ನೇವಸೇಕ್ಖನಾಸೇಕ್ಖೇ ಖನ್ಧೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸನ್ತಿ, ಅಸ್ಸಾದೇನ್ತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ, ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ, ಚೇತೋಪರಿಯಞಾಣೇನ ನೇವಸೇಕ್ಖನಾಸೇಕ್ಖಚಿತ್ತಸಮಙ್ಗಿಸ್ಸ ಚಿತ್ತಂ ಜಾನಾತಿ, ಆಕಾಸಾನಞ್ಚಾಯತನಂ ವಿಞ್ಞಾಣಞ್ಚಾಯತನಸ್ಸ…ಪೇ… ಆಕಿಞ್ಚಞ್ಞಾಯತನಂ ನೇವಸಞ್ಞಾನಾಸಞ್ಞಾಯತನಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ರೂಪಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಫೋಟ್ಠಬ್ಬಾಯತನಂ ಕಾಯವಿಞ್ಞಾಣಸ್ಸ…ಪೇ… ನೇವಸೇಕ್ಖನಾಸೇಕ್ಖಾ ಖನ್ಧಾ ಇದ್ಧಿವಿಧಞಾಣಸ್ಸ, ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಯಥಾಕಮ್ಮೂಪಗಞಾಣಸ್ಸ, ಅನಾಗತಂಸಞಾಣಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ನಿಬ್ಬಾನಂ ಮಗ್ಗಸ್ಸ, ಸೇಕ್ಖಸ್ಸ ಫಲಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೨)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ನಿಬ್ಬಾನಂ ಅಸೇಕ್ಖಸ್ಸ ಫಲಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೩)

ಅಧಿಪತಿಪಚ್ಚಯೋ

೪೫. ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ಸೇಕ್ಖಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ಅರಿಯಾ ಮಗ್ಗಾ ವುಟ್ಠಹಿತ್ವಾ ಮಗ್ಗಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ, ಸೇಕ್ಖಂ ಫಲಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ. ಸಹಜಾತಾಧಿಪತಿ – ಸೇಕ್ಖಾಧಿಪತಿ ಚಿತ್ತಸಮುಟ್ಠಾನಾನಂ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೨)

ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಚ ನೇವಸೇಕ್ಖನಾಸೇಕ್ಖಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ಸೇಕ್ಖಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೩)

೪೬. ಅಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ಅಸೇಕ್ಖಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ಅಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ಅರಹಾ ಅಸೇಕ್ಖಂ ಫಲಂ ಗರುಂ ಕತ್ವಾ ಪಚ್ಚವೇಕ್ಖತಿ. ಸಹಜಾತಾಧಿಪತಿ – ಅಸೇಕ್ಖಾಧಿಪತಿ ಚಿತ್ತಸಮುಟ್ಠಾನಾನಂ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೨)

ಅಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಚ ನೇವಸೇಕ್ಖನಾಸೇಕ್ಖಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ಅಸೇಕ್ಖಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೩)

೪೭. ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ದಾನಂ ದತ್ವಾ ಸೀಲಂ ಸಮಾದಿಯಿತ್ವಾ ಉಪೋಸಥಕಮ್ಮಂ ಕತ್ವಾ ತಂ ಗರುಂ ಕತ್ವಾ ಪಚ್ಚವೇಕ್ಖತಿ, ಪುಬ್ಬೇ ಸುಚಿಣ್ಣಾನಿ ಗರುಂ ಕತ್ವಾ ಪಚ್ಚವೇಕ್ಖತಿ, ಝಾನಾ ವುಟ್ಠಹಿತ್ವಾ ಝಾನಂ ಗರುಂ ಕತ್ವಾ ಪಚ್ಚವೇಕ್ಖತಿ, ಅರಿಯಾ ನಿಬ್ಬಾನಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ, ನಿಬ್ಬಾನಂ ಗೋತ್ರಭುಸ್ಸ, ವೋದಾನಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಚಕ್ಖುಂ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. ಸೋತಂ…ಪೇ… ವತ್ಥುಂ ನೇವಸೇಕ್ಖನಾಸೇಕ್ಖೇ ಖನ್ಧೇ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. ಸಹಜಾತಾಧಿಪತಿ – ನೇವಸೇಕ್ಖನಾಸೇಕ್ಖಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಆರಮ್ಮಣಾಧಿಪತಿ – ನಿಬ್ಬಾನಂ ಮಗ್ಗಸ್ಸ, ಸೇಕ್ಖಸ್ಸ ಫಲಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. (೨)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಆರಮ್ಮಣಾಧಿಪತಿ – ನಿಬ್ಬಾನಂ ಅಸೇಕ್ಖಸ್ಸ ಫಲಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. (೩)

ಅನನ್ತರಪಚ್ಚಯೋ

೪೮. ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಸೇಕ್ಖಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಸೇಕ್ಖಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. ಮಗ್ಗೋ ಸೇಕ್ಖಸ್ಸ ಫಲಸ್ಸ… ಸೇಕ್ಖಂ ಫಲಂ ಸೇಕ್ಖಸ್ಸ ಫಲಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೧)

ಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಮಗ್ಗೋ ಅಸೇಕ್ಖಸ್ಸ ಫಲಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೨)

ಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಸೇಕ್ಖಂ ಫಲಂ ವುಟ್ಠಾನಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೩)

೪೯. ಅಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಅಸೇಕ್ಖಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಅಸೇಕ್ಖಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. ಅಸೇಕ್ಖಂ ಫಲಂ ಅಸೇಕ್ಖಸ್ಸ ಫಲಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೧)

ಅಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಅಸೇಕ್ಖಂ ಫಲಂ ವುಟ್ಠಾನಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೨)

೫೦. ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ನೇವಸೇಕ್ಖನಾಸೇಕ್ಖಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ನೇವಸೇಕ್ಖನಾಸೇಕ್ಖಾನಂ ಖನ್ಧಾನಂ…ಪೇ… ಅನುಲೋಮಂ ಗೋತ್ರಭುಸ್ಸ… ಅನುಲೋಮಂ ವೋದಾನಸ್ಸ… ಆವಜ್ಜನಾ ನೇವಸೇಕ್ಖನಾಸೇಕ್ಖಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೧)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಗೋತ್ರಭು ಮಗ್ಗಸ್ಸ… ವೋದಾನಂ ಮಗ್ಗಸ್ಸ… ಅನುಲೋಮಂ ಸೇಕ್ಖಾಯ ಫಲಸಮಾಪತ್ತಿಯಾ… ನಿರೋಧಾ ವುಟ್ಠಹನ್ತಸ್ಸ ನೇವಸಞ್ಞಾನಾಸಞ್ಞಾಯತನಕುಸಲಂ ಸೇಕ್ಖಾಯ ಫಲಸಮಾಪತ್ತಿಯಾ ಅನನ್ತರಪಚ್ಚಯೇನ ಪಚ್ಚಯೋ. (೨)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಅನುಲೋಮಂ ಅಸೇಕ್ಖಾಯ ಫಲಸಮಾಪತ್ತಿಯಾ… ನಿರೋಧಾ ವುಟ್ಠಹನ್ತಸ್ಸ ನೇವಸಞ್ಞಾನಾಸಞ್ಞಾಯತನಕಿರಿಯಂ ಅಸೇಕ್ಖಾಯ ಫಲಸಮಾಪತ್ತಿಯಾ ಅನನ್ತರಪಚ್ಚಯೇನ ಪಚ್ಚಯೋ. (೩)

ಸಮನನ್ತರಪಚ್ಚಯೋ

೫೧. ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಸಮನನ್ತರಪಚ್ಚಯೇನ ಪಚ್ಚಯೋ…ಪೇ… (ಅನನ್ತರಸದಿಸಂ, ಅಟ್ಠ ಪಞ್ಹಾ).

ಸಹಜಾತಪಚ್ಚಯಾದಿ

೫೨. ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಸಹಜಾತಪಚ್ಚಯೇನ ಪಚ್ಚಯೋ…ಪೇ… (ಪಟಿಚ್ಚವಾರೇ ಸಹಜಾತಸದಿಸಂ, ನವ ಪಞ್ಹಾ) ಅಞ್ಞಮಞ್ಞಪಚ್ಚಯೇನ ಪಚ್ಚಯೋ (ಪಟಿಚ್ಚವಾರೇ ಅಞ್ಞಮಞ್ಞಸದಿಸಂ, ತೀಣಿ. ನಿಸ್ಸಯಪಚ್ಚಯೇ ಕುಸಲತ್ತಿಕೇ ನಿಸ್ಸಯಪಚ್ಚಯಸದಿಸಂ, ತೇರಸ ಪಞ್ಹಾ).

ಉಪನಿಸ್ಸಯಪಚ್ಚಯೋ

೫೩. ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಪಠಮೋ ಮಗ್ಗೋ ದುತಿಯಸ್ಸ ಮಗ್ಗಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ದುತಿಯೋ ಮಗ್ಗೋ ತತಿಯಸ್ಸ ಮಗ್ಗಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ತತಿಯೋ ಮಗ್ಗೋ ಚತುತ್ಥಸ್ಸ ಮಗ್ಗಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಮಗ್ಗೋ ಸೇಕ್ಖಾಯ ಫಲಸಮಾಪತ್ತಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಮಗ್ಗೋ ಅಸೇಕ್ಖಾಯ ಫಲಸಮಾಪತ್ತಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಅರಿಯಾ ಮಗ್ಗಂ ಉಪನಿಸ್ಸಾಯ ಅನುಪ್ಪನ್ನಂ ಕುಸಲಸಮಾಪತ್ತಿಂ ಉಪ್ಪಾದೇನ್ತಿ, ಉಪ್ಪನ್ನಂ ಸಮಾಪಜ್ಜನ್ತಿ, ಸಙ್ಖಾರೇ ಅನಿಚ್ಚತೋ…ಪೇ… ವಿಪಸ್ಸನ್ತಿ, ಮಗ್ಗೋ ಅರಿಯಾನಂ ಅತ್ಥಪ್ಪಟಿಸಮ್ಭಿದಾಯ…ಪೇ… ಪಟಿಭಾನಪ್ಪಟಿಸಮ್ಭಿದಾಯ… ಠಾನಾಠಾನಕೋಸಲ್ಲಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಸೇಕ್ಖಾ ಫಲಸಮಾಪತ್ತಿಯಾ ಕಾಯಿಕಸ್ಸ ಸುಖಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

೫೪. ಅಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಅನನ್ತರೂಪನಿಸ್ಸಯೋ – ಪುರಿಮಾ ಪುರಿಮಾ ಅಸೇಕ್ಖಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಅಸೇಕ್ಖಾನಂ ಖನ್ಧಾನಂ…ಪೇ… ಅಸೇಕ್ಖಂ ಫಲಂ ಅಸೇಕ್ಖಸ್ಸ ಫಲಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ಅಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಅಸೇಕ್ಖಾ ಫಲಸಮಾಪತ್ತಿ ಕಾಯಿಕಸ್ಸ ಸುಖಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

೫೫. ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ನೇವಸೇಕ್ಖನಾಸೇಕ್ಖಂ ಸದ್ಧಂ ಉಪನಿಸ್ಸಾಯ ದಾನಂ ದೇತಿ. ಸೀಲಂ…ಪೇ… ಉಪೋಸಥಕಮ್ಮಂ…ಪೇ… ಝಾನಂ…ಪೇ… ವಿಪಸ್ಸನಂ…ಪೇ… ಅಭಿಞ್ಞಂ…ಪೇ… ಸಮಾಪತ್ತಿಂ ಉಪ್ಪಾದೇತಿ, ಮಾನಂ ಜಪ್ಪೇತಿ, ದಿಟ್ಠಿಂ ಗಣ್ಹಾತಿ. ನೇವಸೇಕ್ಖನಾಸೇಕ್ಖಂ ಸೀಲಂ…ಪೇ… ಪಞ್ಞಂ… ರಾಗಂ…ಪೇ… ಪತ್ಥನಂ… ಕಾಯಿಕಂ ಸುಖಂ…ಪೇ… ಉತುಂ… ಭೋಜನಂ… ಸೇನಾಸನಂ ಉಪನಿಸ್ಸಾಯ ದಾನಂ ದೇತಿ, ಸೀಲಂ…ಪೇ… ಸಮಾಪತ್ತಿಂ ಉಪ್ಪಾದೇತಿ, ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ. ನೇವಸೇಕ್ಖನಾಸೇಕ್ಖಾ ಸದ್ಧಾ…ಪೇ… ಪಞ್ಞಾ, ರಾಗೋ…ಪೇ… ಪತ್ಥನಾ, ಕಾಯಿಕಂ ಸುಖಂ…ಪೇ… ಸೇನಾಸನಂ ನೇವಸೇಕ್ಖನಾಸೇಕ್ಖಾಯ ಸದ್ಧಾಯ…ಪೇ… ಪಞ್ಞಾಯ, ರಾಗಸ್ಸ…ಪೇ… ಪತ್ಥನಾಯ, ಕಾಯಿಕಸ್ಸ ಸುಖಸ್ಸ, ಕಾಯಿಕಸ್ಸ ದುಕ್ಖಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಪಠಮಸ್ಸ ಝಾನಸ್ಸ ಪರಿಕಮ್ಮಂ ಪಠಮಸ್ಸ ಝಾನಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ…ಪೇ… ನೇವಸಞ್ಞಾನಾಸಞ್ಞಾಯತನಸ್ಸ ಪರಿಕಮ್ಮಂ ನೇವಸಞ್ಞಾನಾಸಞ್ಞಾಯತನಸ್ಸ…ಪೇ… ಪಠಮಂ ಝಾನಂ ದುತಿಯಸ್ಸ ಝಾನಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ…ಪೇ… ಆಕಿಞ್ಚಞ್ಞಾಯತನಂ ನೇವಸಞ್ಞಾನಾಸಞ್ಞಾಯತನಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಪಠಮಸ್ಸ ಮಗ್ಗಸ್ಸ ಪರಿಕಮ್ಮಂ ಪಠಮಸ್ಸ ಮಗ್ಗಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ…ಪೇ… ಚತುತ್ಥಸ್ಸ ಮಗ್ಗಸ್ಸ ಪರಿಕಮ್ಮಂ ಚತುತ್ಥಸ್ಸ ಮಗ್ಗಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಕಾಯಿಕಂ ಸುಖಂ… ಕಾಯಿಕಂ ದುಕ್ಖಂ… ಉತುಂ… ಭೋಜನಂ… ಸೇನಾಸನಂ ಅಸೇಕ್ಖಾಯ ಫಲಸಮಾಪತ್ತಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

ಪುರೇಜಾತಪಚ್ಚಯೋ

೫೬. ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ ಅನಿಚ್ಚತೋ…ಪೇ… ವಿಪಸ್ಸತಿ, ಅಸ್ಸಾದೇತಿ ಅಭಿನನ್ದತಿ; ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ. ಸೋತಂ…ಪೇ… ವತ್ಥುಂ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ, ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ, ರೂಪಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಫೋಟ್ಠಬ್ಬಾಯತನಂ ಕಾಯವಿಞ್ಞಾಣಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ. ವತ್ಥುಪುರೇಜಾತಂ – ಚಕ್ಖಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಕಾಯಾಯತನಂ ಕಾಯವಿಞ್ಞಾಣಸ್ಸ, ವತ್ಥು ನೇವಸೇಕ್ಖನಾಸೇಕ್ಖಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೧)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ. ವತ್ಥುಪುರೇಜಾತಂ – ವತ್ಥು ಸೇಕ್ಖಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೨)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ. ವತ್ಥುಪುರೇಜಾತಂ – ವತ್ಥು ಅಸೇಕ್ಖಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೩)

ಪಚ್ಛಾಜಾತಪಚ್ಚಯೋ

೫೭. ಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ಸೇಕ್ಖಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ಅಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ಅಸೇಕ್ಖಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ನೇವಸೇಕ್ಖನಾಸೇಕ್ಖಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ಆಸೇವನಪಚ್ಚಯೋ

೫೮. ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಆಸೇವನಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ನೇವಸೇಕ್ಖನಾಸೇಕ್ಖಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ನೇವಸೇಕ್ಖನಾಸೇಕ್ಖಾನಂ ಖನ್ಧಾನಂ ಆಸೇವನಪಚ್ಚಯೇನ ಪಚ್ಚಯೋ. ಅನುಲೋಮಂ ಗೋತ್ರಭುಸ್ಸ… ಅನುಲೋಮಂ ವೋದಾನಸ್ಸ ಆಸೇವನಪಚ್ಚಯೇನ ಪಚ್ಚಯೋ. (೧)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಆಸೇವನಪಚ್ಚಯೇನ ಪಚ್ಚಯೋ – ಗೋತ್ರಭು ಮಗ್ಗಸ್ಸ… ವೋದಾನಂ ಮಗ್ಗಸ್ಸ ಆಸೇವನಪಚ್ಚಯೇನ ಪಚ್ಚಯೋ. (೨)

ಕಮ್ಮಪಚ್ಚಯೋ

೫೯. ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸಹಜಾತಾ, ನಾನಾಕ್ಖಣಿಕಾ. ಸಹಜಾತಾ – ಸೇಕ್ಖಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಕಮ್ಮಪಚ್ಚಯೇನ ಪಚ್ಚಯೋ. ನಾನಾಕ್ಖಣಿಕಾ – ಸೇಕ್ಖಾ ಚೇತನಾ ವಿಪಾಕಾನಂ ಸೇಕ್ಖಾನಂ ಖನ್ಧಾನಂ ಕಮ್ಮಪಚ್ಚಯೇನ ಪಚ್ಚಯೋ. (೧)

ಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ. ನಾನಾಕ್ಖಣಿಕಾ – ಸೇಕ್ಖಾ ಚೇತನಾ ಅಸೇಕ್ಖಾನಂ ಖನ್ಧಾನಂ ಕಮ್ಮಪಚ್ಚಯೇನ ಪಚ್ಚಯೋ. (೨)

ಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ. ಸಹಜಾತಾ – ಸೇಕ್ಖಾ ಚೇತನಾ ಚಿತ್ತಸಮುಟ್ಠಾನಾನಂ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೩)

ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಚ ನೇವಸೇಕ್ಖನಾಸೇಕ್ಖಸ್ಸ ಚ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸೇಕ್ಖಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೪)

೬೦. ಅಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಅಸೇಕ್ಖಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಕಮ್ಮಪಚ್ಚಯೇನ ಪಚ್ಚಯೋ. (೧)

ಅಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಅಸೇಕ್ಖಾ ಚೇತನಾ ಚಿತ್ತಸಮುಟ್ಠಾನಾನಂ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೨)

ಅಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಚ ನೇವಸೇಕ್ಖನಾಸೇಕ್ಖಸ್ಸ ಚ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಅಸೇಕ್ಖಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೩)

೬೧. ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸಹಜಾತಾ, ನಾನಾಕ್ಖಣಿಕಾ. ಸಹಜಾತಾ – ನೇವಸೇಕ್ಖನಾಸೇಕ್ಖಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. ಪಟಿಸನ್ಧಿಕ್ಖಣೇ…ಪೇ…. ನಾನಾಕ್ಖಣಿಕಾ – ನೇವಸೇಕ್ಖನಾಸೇಕ್ಖಾ ಚೇತನಾ ವಿಪಾಕಾನಂ ನೇವಸೇಕ್ಖನಾಸೇಕ್ಖಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೧)

ವಿಪಾಕಪಚ್ಚಯೋ

೬೨. ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ವಿಪಾಕಪಚ್ಚಯೇನ ಪಚ್ಚಯೋ – ವಿಪಾಕೋ ಸೇಕ್ಖೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ…ಪೇ… (ಸೇಕ್ಖಮೂಲಕೇ ತೀಣಿ ).

ಅಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ವಿಪಾಕಪಚ್ಚಯೇನ ಪಚ್ಚಯೋ – ಅಸೇಕ್ಖೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ…ಪೇ… (ಅಸೇಕ್ಖಮೂಲಕೇ ತೀಣಿ).

ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ವಿಪಾಕಪಚ್ಚಯೇನ ಪಚ್ಚಯೋ – ವಿಪಾಕೋ ನೇವಸೇಕ್ಖನಾಸೇಕ್ಖೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ…ಪೇ… ಪಟಿಸನ್ಧಿಕ್ಖಣೇ…ಪೇ… ಖನ್ಧಾ ವತ್ಥುಸ್ಸ ವಿಪಾಕಪಚ್ಚಯೇನ ಪಚ್ಚಯೋ. (೧)

ಆಹಾರಪಚ್ಚಯಾದಿ

೬೩. ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಆಹಾರಪಚ್ಚಯೇನ ಪಚ್ಚಯೋ… ಇನ್ದ್ರಿಯಪಚ್ಚಯೇನ ಪಚ್ಚಯೋ… ಝಾನಪಚ್ಚಯೇನ ಪಚ್ಚಯೋ… ಮಗ್ಗಪಚ್ಚಯೇನ ಪಚ್ಚಯೋ… ಸಮ್ಪಯುತ್ತಪಚ್ಚಯೇನ ಪಚ್ಚಯೋ…ಪೇ….

ವಿಪ್ಪಯುತ್ತಪಚ್ಚಯೋ

೬೪. ಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ. ಸಹಜಾತಾ – ಸೇಕ್ಖಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಸೇಕ್ಖಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ (೧).

ಅಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ (ಸೇಕ್ಖಸದಿಸಂ).

ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ. ಸಹಜಾತಾ – ನೇವಸೇಕ್ಖನಾಸೇಕ್ಖಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪಟಿಸನ್ಧಿಕ್ಖಣೇ ನೇವಸೇಕ್ಖನಾಸೇಕ್ಖಾ ಖನ್ಧಾ ಕಟತ್ತಾರೂಪಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಖನ್ಧಾ ವತ್ಥುಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ವತ್ಥು ಖನ್ಧಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ಚಕ್ಖಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಕಾಯಾಯತನಂ ಕಾಯವಿಞ್ಞಾಣಸ್ಸ, ವತ್ಥು ನೇವಸೇಕ್ಖನಾಸೇಕ್ಖಾನಂ ಖನ್ಧಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ನೇವಸೇಕ್ಖನಾಸೇಕ್ಖಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೧)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ಸೇಕ್ಖಾನಂ ಖನ್ಧಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೨)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ಅಸೇಕ್ಖಾನಂ ಖನ್ಧಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೩)

ಅತ್ಥಿಪಚ್ಚಯೋ

೬೫. ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸೇಕ್ಖೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ…ಪೇ…. (೧)

ಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ. ಸಹಜಾತಾ – ಸೇಕ್ಖಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಸೇಕ್ಖಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. (೨)

ಸೇಕ್ಖೋ ಧಮ್ಮೋ ಸೇಕ್ಖಸ್ಸ ಚ ನೇವಸೇಕ್ಖನಾಸೇಕ್ಖಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸೇಕ್ಖೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ…ಪೇ…. (೩)

ಅಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ತೀಣಿ (ಸೇಕ್ಖಸದಿಸಂ).

೬೬. ನೇವಸೇಕ್ಖನಾಸೇಕ್ಖೋ ಧಮ್ಮೋ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ. ಸಹಜಾತೋ – ನೇವಸೇಕ್ಖನಾಸೇಕ್ಖೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ…ಪೇ… ಪಟಿಸನ್ಧಿಕ್ಖಣೇ…ಪೇ… ಖನ್ಧಾ ವತ್ಥುಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ವತ್ಥು ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ, ಏಕಂ ಮಹಾಭೂತಂ…ಪೇ… ಬಾಹಿರಂ…ಪೇ… ಅಸಞ್ಞಸತ್ತಾನಂ…ಪೇ…. ಪುರೇಜಾತಂ – ಚಕ್ಖುಂ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸತಿ; ಅಸ್ಸಾದೇತಿ ಅಭಿನನ್ದತಿ; ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ. ಸೋತಂ…ಪೇ… ವತ್ಥುಂ ಅನಿಚ್ಚತೋ…ಪೇ… ವಿಪಸ್ಸತಿ, ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ, ರೂಪಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಫೋಟ್ಠಬ್ಬಾಯತನಂ ಕಾಯವಿಞ್ಞಾಣಸ್ಸ…ಪೇ… ಚಕ್ಖಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಕಾಯಾಯತನಂ ಕಾಯವಿಞ್ಞಾಣಸ್ಸ… ವತ್ಥು ನೇವಸೇಕ್ಖನಾಸೇಕ್ಖಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ನೇವಸೇಕ್ಖನಾಸೇಕ್ಖಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಕಬಳೀಕಾರೋ ಆಹಾರೋ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ರೂಪಜೀವಿತಿನ್ದ್ರಿಯಂ ಕಟತ್ತಾರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೧)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ಸೇಕ್ಖಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೨)

ನೇವಸೇಕ್ಖನಾಸೇಕ್ಖೋ ಧಮ್ಮೋ ಅಸೇಕ್ಖಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ಅಸೇಕ್ಖಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೩)

೬೭. ಸೇಕ್ಖೋ ಚ ನೇವಸೇಕ್ಖನಾಸೇಕ್ಖೋ ಚ ಧಮ್ಮಾ ಸೇಕ್ಖಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ಸೇಕ್ಖೋ ಏಕೋ ಖನ್ಧೋ ಚ ವತ್ಥು ಚ ತಿಣ್ಣನ್ನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ…ಪೇ…. (೧)

ಸೇಕ್ಖೋ ಚ ನೇವಸೇಕ್ಖನಾಸೇಕ್ಖೋ ಚ ಧಮ್ಮಾ ನೇವಸೇಕ್ಖನಾಸೇಕ್ಖಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ. ಸಹಜಾತಾ – ಸೇಕ್ಖಾ ಖನ್ಧಾ ಚ ಮಹಾಭೂತಾ ಚ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಸೇಕ್ಖಾ ಖನ್ಧಾ ಚ ಕಬಳೀಕಾರೋ ಆಹಾರೋ ಚ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಸೇಕ್ಖಾ ಖನ್ಧಾ ಚ ರೂಪಜೀವಿತಿನ್ದ್ರಿಯಞ್ಚ ಕಟತ್ತಾರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೨)

ಅಸೇಕ್ಖೋ ಚ ನೇವಸೇಕ್ಖನಾಸೇಕ್ಖೋ ಚ ಧಮ್ಮಾ ಅಸೇಕ್ಖಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… (ದ್ವೇ ಪಞ್ಹಾ ಕಾತಬ್ಬಾ, ಸೇಕ್ಖಸದಿಸಾ).