೧. ವಿಭಙ್ಗವಾರೋ

ನಹೇತುಪಚ್ಚಯೋ

೮. ಆಚಯಗಾಮಿಂ ಧಮ್ಮಂ ಪಟಿಚ್ಚ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ವಿಚಿಕಿಚ್ಛಾಸಹಗತೇ ಉದ್ಧಚ್ಚಸಹಗತೇ ಖನ್ಧೇ ಪಟಿಚ್ಚ ವಿಚಿಕಿಚ್ಛಾಸಹಗತೋ ಉದ್ಧಚ್ಚಸಹಗತೋ ಮೋಹೋ. (೧)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕಂ ನೇವಾಚಯಗಾಮಿನಾಪಚಯಗಾಮಿಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಅಹೇತುಕಪಟಿಸನ್ಧಿಕ್ಖಣೇ…ಪೇ… ಖನ್ಧೇ ಪಟಿಚ್ಚ ವತ್ಥು, ವತ್ಥುಂ ಪಟಿಚ್ಚ ಖನ್ಧಾ; ಏಕಂ ಮಹಾಭೂತಂ…ಪೇ… ಬಾಹಿರಂ… ಆಹಾರಸಮುಟ್ಠಾನಂ… ಉತುಸಮುಟ್ಠಾನಂ… ಅಸಞ್ಞಸತ್ತಾನಂ ಏಕಂ ಮಹಾಭೂತಂ…ಪೇ…. (೧)

ನಆರಮ್ಮಣಪಚ್ಚಯೋ

೯. ಆಚಯಗಾಮಿಂ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಆರಮ್ಮಣಪಚ್ಚಯಾ – ಆಚಯಗಾಮೀ ಖನ್ಧೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (೧)

ಅಪಚಯಗಾಮಿಂ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಆರಮ್ಮಣಪಚ್ಚಯಾ – ಅಪಚಯಗಾಮೀ ಖನ್ಧೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (೧)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಆರಮ್ಮಣಪಚ್ಚಯಾ – ನೇವಾಚಯಗಾಮಿನಾಪಚಯಗಾಮೀ ಖನ್ಧೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. ಪಟಿಸನ್ಧಿಕ್ಖಣೇ…ಪೇ… ಖನ್ಧೇ ಪಟಿಚ್ಚ ವತ್ಥು…ಪೇ… ಏಕಂ ಮಹಾಭೂತಂ…ಪೇ… ಬಾಹಿರಂ… ಆಹಾರಸಮುಟ್ಠಾನಂ… ಉತುಸಮುಟ್ಠಾನಂ… ಅಸಞ್ಞಸತ್ತಾನಂ…ಪೇ…. (೧)

ಆಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಆರಮ್ಮಣಪಚ್ಚಯಾ – ಆಚಯಗಾಮೀ ಖನ್ಧೇ ಚ ಮಹಾಭೂತೇ ಚ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (೧)

ಅಪಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಆರಮ್ಮಣಪಚ್ಚಯಾ – ಅಪಚಯಗಾಮೀ ಖನ್ಧೇ ಚ ಮಹಾಭೂತೇ ಚ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (೧)

ನಅಧಿಪತಿಪಚ್ಚಯೋ

೧೦. ಆಚಯಗಾಮಿಂ ಧಮ್ಮಂ ಪಟಿಚ್ಚ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಅಧಿಪತಿಪಚ್ಚಯಾ… ತೀಣಿ.

ಅಪಚಯಗಾಮಿಂ ಧಮ್ಮಂ ಪಟಿಚ್ಚ ಅಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಅಧಿಪತಿಪಚ್ಚಯಾ – ಅಪಚಯಗಾಮೀ ಖನ್ಧೇ ಪಟಿಚ್ಚ ಅಪಚಯಗಾಮೀ ಅಧಿಪತಿ. (೧)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಅಧಿಪತಿಪಚ್ಚಯಾ – ನೇವಾಚಯಗಾಮಿನಾಪಚಯಗಾಮಿಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ… ಖನ್ಧೇ ಪಟಿಚ್ಚ ವತ್ಥು, ವತ್ಥುಂ ಪಟಿಚ್ಚ ಖನ್ಧಾ; ಏಕಂ ಮಹಾಭೂತಂ…ಪೇ… ಬಾಹಿರಂ… ಆಹಾರಸಮುಟ್ಠಾನಂ… ಉತುಸಮುಟ್ಠಾನಂ… ಅಸಞ್ಞಸತ್ತಾನಂ ಏಕಂ ಮಹಾಭೂತಂ…ಪೇ…. (೧)

ಆಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಅಧಿಪತಿಪಚ್ಚಯಾ – ಆಚಯಗಾಮೀ ಖನ್ಧೇ ಚ ಮಹಾಭೂತೇ ಚ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (೧)

ನಅನನ್ತರಪಚ್ಚಯಾದಿ

೧೧. ಆಚಯಗಾಮಿಂ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಅನನ್ತರಪಚ್ಚಯಾ… ನಸಮನನ್ತರಪಚ್ಚಯಾ… ನಅಞ್ಞಮಞ್ಞಪಚ್ಚಯಾ… ನಉಪನಿಸ್ಸಯಪಚ್ಚಯಾ… ನಪುರೇಜಾತಪಚ್ಚಯಾ (ಕುಸಲತ್ತಿಕಸದಿಸಾ ಸತ್ತ ಪಞ್ಹಾ)… ನಪಚ್ಛಾಜಾತಪಚ್ಚಯಾ.

ನಆಸೇವನಪಚ್ಚಯೋ

೧೨. ಆಚಯಗಾಮಿಂ ಧಮ್ಮಂ ಪಟಿಚ್ಚ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಆಸೇವನಪಚ್ಚಯಾ… ತೀಣಿ.

ಅಪಚಯಗಾಮಿಂ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಆಸೇವನಪಚ್ಚಯಾ – ಅಪಚಯಗಾಮೀ ಖನ್ಧೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (೧)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಆಸೇವನಪಚ್ಚಯಾ (ಏಕಾ ಪಞ್ಹಾ ಸಬ್ಬೇ ಮಹಾಭೂತಾ ಕಾತಬ್ಬಾ).

ಆಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಆಸೇವನಪಚ್ಚಯಾ – ಆಚಯಗಾಮೀ ಖನ್ಧೇ ಚ ಮಹಾಭೂತೇ ಚ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (೧)

ಅಪಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಆಸೇವನಪಚ್ಚಯಾ – ಅಪಚಯಗಾಮೀ ಖನ್ಧೇ ಚ ಮಹಾಭೂತೇ ಚ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪಂ. (೧)

ನಕಮ್ಮಪಚ್ಚಯೋ

೧೩. ಆಚಯಗಾಮಿಂ ಧಮ್ಮಂ ಪಟಿಚ್ಚ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಕಮ್ಮಪಚ್ಚಯಾ – ಆಚಯಗಾಮೀ ಖನ್ಧೇ ಪಟಿಚ್ಚ ಆಚಯಗಾಮೀ ಚೇತನಾ. (೧)

ಅಪಚಯಗಾಮಿಂ ಧಮ್ಮಂ ಪಟಿಚ್ಚ ಅಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಕಮ್ಮಪಚ್ಚಯಾ – ಅಪಚಯಗಾಮೀ ಖನ್ಧೇ ಪಟಿಚ್ಚ ಅಪಚಯಗಾಮೀ ಚೇತನಾ. (೧)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ನಕಮ್ಮಪಚ್ಚಯಾ – ನೇವಾಚಯಗಾಮಿನಾಪಚಯಗಾಮೀ ಖನ್ಧೇ ಪಟಿಚ್ಚ ನೇವಾಚಯಗಾಮಿನಾಪಚಯಗಾಮೀ ಚೇತನಾ; ಬಾಹಿರಂ… ಆಹಾರಸಮುಟ್ಠಾನಂ… ಉತುಸಮುಟ್ಠಾನಂ… ಏಕಂ ಮಹಾಭೂತಂ…ಪೇ…. (೧)

ನವಿಪಾಕಪಚ್ಚಯಾದಿ

೧೪. ಆಚಯಗಾಮಿಂ ಧಮ್ಮಂ ಪಟಿಚ್ಚ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ನವಿಪಾಕಪಚ್ಚಯಾ (ಪರಿಪುಣ್ಣಂ, ಪಟಿಸನ್ಧಿ ನತ್ಥಿ)… ನಆಹಾರಪಚ್ಚಯಾ… ನಇನ್ದ್ರಿಯಪಚ್ಚಯಾ… ನಝಾನಪಚ್ಚಯಾ… ನಮಗ್ಗಪಚ್ಚಯಾ… ನಸಮ್ಪಯುತ್ತಪಚ್ಚಯಾ… ನವಿಪ್ಪಯುತ್ತಪಚ್ಚಯಾ (ತೀಣಿ)… ನೋನತ್ಥಿಪಚ್ಚಯಾ… ನೋವಿಗತಪಚ್ಚಯಾ.