೧. ವಿಭಙ್ಗವಾರೋ

ಹೇತುಪಚ್ಚಯೋ

೧೮. ಆಚಯಗಾಮಿಂ ಧಮ್ಮಂ ಪಚ್ಚಯಾ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಆಚಯಗಾಮಿಂ ಏಕಂ ಖನ್ಧಂ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಪಚ್ಚಯಾ ದ್ವೇ ಖನ್ಧಾ. (೧)

ಆಚಯಗಾಮಿಂ ಧಮ್ಮಂ ಪಚ್ಚಯಾ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಆಚಯಗಾಮೀ ಖನ್ಧೇ ಪಚ್ಚಯಾ ಚಿತ್ತಸಮುಟ್ಠಾನಂ ರೂಪಂ. (೨)

ಆಚಯಗಾಮಿಂ ಧಮ್ಮಂ ಪಚ್ಚಯಾ ಆಚಯಗಾಮೀ ಚ ನೇವಾಚಯಗಾಮಿನಾಪಚಯಗಾಮೀ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಆಚಯಗಾಮಿಂ ಏಕಂ ಖನ್ಧಂ ಪಚ್ಚಯಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ…. (೩)

ಅಪಚಯಗಾಮಿಂ ಧಮ್ಮಂ ಪಚ್ಚಯಾ ಅಪಚಯಗಾಮೀ ಧಮ್ಮೋ… ತೀಣಿ.

೧೯. ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ನೇವಾಚಯಗಾಮಿನಾಪಚಯಗಾಮಿಂ ಏಕಂ ಖನ್ಧಂ ಪಚ್ಚಯಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ… ಖನ್ಧೇ ಪಚ್ಚಯಾ ವತ್ಥು, ವತ್ಥುಂ ಪಚ್ಚಯಾ ಖನ್ಧಾ; ಏಕಂ ಮಹಾಭೂತಂ ಪಚ್ಚಯಾ…ಪೇ… ವತ್ಥುಂ ಪಚ್ಚಯಾ ನೇವಾಚಯಗಾಮಿನಾಪಚಯಗಾಮೀ ಖನ್ಧಾ. (೧)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ವತ್ಥುಂ ಪಚ್ಚಯಾ ಆಚಯಗಾಮೀ ಖನ್ಧಾ. (೨)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ಅಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ವತ್ಥುಂ ಪಚ್ಚಯಾ ಅಪಚಯಗಾಮೀ ಖನ್ಧಾ. (೩)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ಆಚಯಗಾಮೀ ಚ ನೇವಾಚಯಗಾಮಿನಾಪಚಯಗಾಮೀ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ವತ್ಥುಂ ಪಚ್ಚಯಾ ಆಚಯಗಾಮೀ ಖನ್ಧಾ, ಮಹಾಭೂತೇ ಪಚ್ಚಯಾ ಚಿತ್ತಸಮುಟ್ಠಾನಂ ರೂಪಂ. (೪)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ಅಪಚಯಗಾಮೀ ಚ ನೇವಾಚಯಗಾಮಿನಾಪಚಯಗಾಮೀ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ವತ್ಥುಂ ಪಚ್ಚಯಾ ಅಪಚಯಗಾಮೀ ಖನ್ಧಾ, ಮಹಾಭೂತೇ ಪಚ್ಚಯಾ ಚಿತ್ತಸಮುಟ್ಠಾನಂ ರೂಪಂ. (೫)

೨೦. ಆಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಚ್ಚಯಾ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಆಚಯಗಾಮಿಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ…. (೧)

ಆಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಚ್ಚಯಾ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಆಚಯಗಾಮೀ ಖನ್ಧೇ ಚ ಮಹಾಭೂತೇ ಚ ಪಚ್ಚಯಾ ಚಿತ್ತಸಮುಟ್ಠಾನಂ ರೂಪಂ. (೨)

ಆಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಚ್ಚಯಾ ಆಚಯಗಾಮೀ ಚ ನೇವಾಚಯಗಾಮಿನಾಪಚಯಗಾಮೀ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಆಚಯಗಾಮಿಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಆಚಯಗಾಮೀ ಖನ್ಧೇ ಚ ಮಹಾಭೂತೇ ಚ ಪಚ್ಚಯಾ ಚಿತ್ತಸಮುಟ್ಠಾನಂ ರೂಪಂ. (೩)

ಅಪಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಚ್ಚಯಾ ಅಪಚಯಗಾಮೀ ಧಮ್ಮೋ… ತೀಣಿ.

ಆರಮ್ಮಣಪಚ್ಚಯೋ

೨೧. ಆಚಯಗಾಮಿಂ ಧಮ್ಮಂ ಪಚ್ಚಯಾ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ಆಚಯಗಾಮಿಂ ಏಕಂ ಖನ್ಧಂ ಪಚ್ಚಯಾ…ಪೇ…. (೧)

ಅಪಚಯಗಾಮಿಂ ಧಮ್ಮಂ ಪಚ್ಚಯಾ ಅಪಚಯಗಾಮೀ ಧಮ್ಮೋ… ಏಕಂ.

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ… ನೇವಾಚಯಗಾಮಿನಾಪಚಯಗಾಮಿಂ ಏಕಂ ಖನ್ಧಂ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ… ವತ್ಥುಂ ಪಚ್ಚಯಾ ಖನ್ಧಾ, ಚಕ್ಖಾಯತನಂ ಪಚ್ಚಯಾ ಚಕ್ಖುವಿಞ್ಞಾಣಂ…ಪೇ… ಕಾಯಾಯತನಂ ಪಚ್ಚಯಾ ಕಾಯವಿಞ್ಞಾಣಂ. ವತ್ಥುಂ ಪಚ್ಚಯಾ ನೇವಾಚಯಗಾಮಿನಾಪಚಯಗಾಮೀ ಖನ್ಧಾ. (೧)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ವತ್ಥುಂ ಪಚ್ಚಯಾ ಆಚಯಗಾಮೀ ಖನ್ಧಾ. (೨)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ಅಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ವತ್ಥುಂ ಪಚ್ಚಯಾ ಅಪಚಯಗಾಮೀ ಖನ್ಧಾ. (೩)

ಆಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಚ್ಚಯಾ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ಆಚಯಗಾಮಿಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ…. (೧)

ಅಪಚಯಗಾಮಿಞ್ಚ ನೇವಾಚಯಗಾಮಿನಾಪಚಯಗಾಮಿಞ್ಚ ಧಮ್ಮಂ ಪಚ್ಚಯಾ ಅಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ – ಅಪಚಯಗಾಮಿಂ ಏಕಂ ಖನ್ಧಞ್ಚ ವತ್ಥುಞ್ಚ ಪಚ್ಚಯಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ…. (೧)

ಅಧಿಪತಿಪಚ್ಚಯೋ

೨೨. ಆಚಯಗಾಮಿಂ ಧಮ್ಮಂ ಪಚ್ಚಯಾ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ಅಧಿಪತಿಪಚ್ಚಯಾ… ತೀಣಿ.

ಅಪಚಯಗಾಮಿಂ ಧಮ್ಮಂ ಪಚ್ಚಯಾ ಅಪಚಯಗಾಮೀ ಧಮ್ಮೋ… ತೀಣಿ.

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ… ಏಕಂ…ಪೇ… ವತ್ಥುಂ ಪಚ್ಚಯಾ ನೇವಾಚಯಗಾಮಿನಾಪಚಯಗಾಮೀ ಖನ್ಧಾ.

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ಆಚಯಗಾಮೀ ಧಮ್ಮೋ…ಪೇ… (ಇಧಾಪಿ ಘಟನಾ ಹೇತುಸದಿಸಾ).

ಅನನ್ತರಪಚ್ಚಯಾದಿ

೨೩. ಆಚಯಗಾಮಿಂ ಧಮ್ಮಂ ಪಚ್ಚಯಾ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ಅನನ್ತರಪಚ್ಚಯಾ… ಸಮನನ್ತರಪಚ್ಚಯಾ… ಸಹಜಾತಪಚ್ಚಯಾ… ತೀಣಿ.

ಅಪಚಯಗಾಮಿಂ ಧಮ್ಮಂ ಪಚ್ಚಯಾ ಅಪಚಯಗಾಮೀ ಧಮ್ಮೋ… ತೀಣಿ.

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ನೇವಾಚಯಗಾಮಿನಾಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ಸಹಜಾತಪಚ್ಚಯಾ – ನೇವಾಚಯಗಾಮಿನಾಪಚಯಗಾಮಿಂ ಏಕಂ ಖನ್ಧಂ ಪಚ್ಚಯಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ…ಪೇ… ಪಟಿಸನ್ಧಿಕ್ಖಣೇ…ಪೇ… ಅಸಞ್ಞಸತ್ತಾನಂ ಏಕಂ ಮಹಾಭೂತಂ…ಪೇ… ಚಕ್ಖಾಯತನಂ ಪಚ್ಚಯಾ ಚಕ್ಖುವಿಞ್ಞಾಣಂ…ಪೇ… ಕಾಯಾಯತನಂ ಪಚ್ಚಯಾ ಕಾಯವಿಞ್ಞಾಣಂ. ವತ್ಥುಂ ಪಚ್ಚಯಾ…ಪೇ…. (೧)

ನೇವಾಚಯಗಾಮಿನಾಪಚಯಗಾಮಿಂ ಧಮ್ಮಂ ಪಚ್ಚಯಾ ಆಚಯಗಾಮೀ ಧಮ್ಮೋ ಉಪ್ಪಜ್ಜತಿ ಸಹಜಾತಪಚ್ಚಯಾ (ಸಂಖಿತ್ತಂ, ಸಬ್ಬೇ ಘಟನಾ ಕಾತಬ್ಬಾ).

ಅಞ್ಞಮಞ್ಞಪಚ್ಚಯಾದಿ

೨೪. ಅಪಚಯಗಾಮಿಂ ಧಮ್ಮಂ ಪಚ್ಚಯಾ ಅಪಚಯಗಾಮೀ ಧಮ್ಮೋ ಉಪ್ಪಜ್ಜತಿ ಅಞ್ಞಮಞ್ಞಪಚ್ಚಯಾ… ನಿಸ್ಸಯಪಚ್ಚಯಾ… ಉಪನಿಸ್ಸಯಪಚ್ಚಯಾ… ಪುರೇಜಾತಪಚ್ಚಯಾ… ಆಸೇವನಪಚ್ಚಯಾ… ಕಮ್ಮಪಚ್ಚಯಾ… ವಿಪಾಕಪಚ್ಚಯಾ… ಆಹಾರಪಚ್ಚಯಾ… ಇನ್ದ್ರಿಯಪಚ್ಚಯಾ… ಝಾನಪಚ್ಚಯಾ… ಮಗ್ಗಪಚ್ಚಯಾ… ಸಮ್ಪಯುತ್ತಪಚ್ಚಯಾ… ವಿಪ್ಪಯುತ್ತಪಚ್ಚಯಾ… ಅತ್ಥಿಪಚ್ಚಯಾ… ನತ್ಥಿಪಚ್ಚಯಾ… ವಿಗತಪಚ್ಚಯಾ… ಅವಿಗತಪಚ್ಚಯಾ.