೧. ವಿಭಙ್ಗವಾರೋ

ಹೇತುಪಚ್ಚಯೋ

೯೦. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ವಿಪಾಕಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ ವಿಪಾಕಾ ಹೇತೂ ಸಪ್ಪಯುತ್ತಕಾನಂ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ. (೧)

ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ವಿಪಾಕಾ ಹೇತೂ ಚಿತ್ತಸಮುಟ್ಠಾನಾನಂ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ ವಿಪಾಕಾ ಹೇತೂ ಕಟತ್ತಾರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೨)

ವಿಪಾಕೋ ಧಮ್ಮೋ ವಿಪಾಕಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ ಹೇತುಪಚ್ಚಯೇನ ಪಚ್ಚಯೋ – ವಿಪಾಕಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ ವಿಪಾಕಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೩)

೯೧. ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ. (೧)

ವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮಾ ಹೇತೂ ಚಿತ್ತಸಮುಟ್ಠಾನಾನಂ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೨)

ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ ಹೇತುಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೩)

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ನೇವವಿಪಾಕನವಿಪಾಕಧಮ್ಮಧಮ್ಮಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ.

ಆರಮ್ಮಣಪಚ್ಚಯೋ

೯೨. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ವಿಪಾಕೇ ಖನ್ಧೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸತಿ, ಅಸ್ಸಾದೇತಿ ಅಭಿನನ್ದತಿ; ತಂ ಆರಬ್ಭ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ವಿಚಿಕಿಚ್ಛಾ ಉಪ್ಪಜ್ಜತಿ, ಉದ್ಧಚ್ಚಂ ಉಪ್ಪಜ್ಜತಿ, ದೋಮನಸ್ಸಂ ಉಪ್ಪಜ್ಜತಿ, ಕುಸಲಾಕುಸಲೇ ನಿರುದ್ಧೇ ವಿಪಾಕೋ ತದಾರಮ್ಮಣತಾ ಉಪ್ಪಜ್ಜತಿ. (೧)

ವಿಪಾಕೋ ಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಸೇಕ್ಖಾ ಫಲಂ ಪಚ್ಚವೇಕ್ಖನ್ತಿ, ವಿಪಾಕೇ ಖನ್ಧೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸನ್ತಿ, ಅಸ್ಸಾದೇನ್ತಿ ಅಭಿನನ್ದನ್ತಿ; ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ, ಚೇತೋಪರಿಯಞಾಣೇನ ವಿಪಾಕಚಿತ್ತಸಮಙ್ಗಿಸ್ಸ ಚಿತ್ತಂ ಜಾನನ್ತಿ. ವಿಪಾಕಾ ಖನ್ಧಾ ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಅನಾಗತಂಸಞಾಣಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೨)

ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಅರಹಾ ಫಲಂ ಪಚ್ಚವೇಕ್ಖತಿ, ವಿಪಾಕೇ ಖನ್ಧೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸತಿ, ಚೇತೋಪರಿಯಞಾಣೇನ ವಿಪಾಕಚಿತ್ತಸಮಙ್ಗಿಸ್ಸ ಚಿತ್ತಂ ಜಾನಾತಿ. ವಿಪಾಕಾ ಖನ್ಧಾ ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಅನಾಗತಂಸಞಾಣಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. (೩)

೯೩. ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ ದತ್ವಾ ಸೀಲಂ ಸಮಾದಿಯಿತ್ವಾ ಉಪೋಸಥಕಮ್ಮಂ ಕತ್ವಾ ತಂ ಪಚ್ಚವೇಕ್ಖತಿ, ಪುಬ್ಬೇ ಸುಚಿಣ್ಣಾನಿ ಪಚ್ಚವೇಕ್ಖತಿ, ಝಾನಾ ವುಟ್ಠಹಿತ್ವಾ ಝಾನಂ ಪಚ್ಚವೇಕ್ಖತಿ, ಸೇಕ್ಖಾ ಗೋತ್ರಭುಂ ಪಚ್ಚವೇಕ್ಖನ್ತಿ, ವೋದಾನಂ ಪಚ್ಚವೇಕ್ಖನ್ತಿ, ಸೇಕ್ಖಾ ಮಗ್ಗಾ ವುಟ್ಠಹಿತ್ವಾ ಮಗ್ಗಂ ಪಚ್ಚವೇಕ್ಖನ್ತಿ, ಸೇಕ್ಖಾ ಪಹೀನೇ ಕಿಲೇಸೇ ಪಚ್ಚವೇಕ್ಖನ್ತಿ, ವಿಕ್ಖಮ್ಭಿತೇ ಕಿಲೇಸೇ ಪಚ್ಚವೇಕ್ಖನ್ತಿ, ಪುಬ್ಬೇ ಸಮುದಾಚಿಣ್ಣೇ ಕಿಲೇಸೇ ಜಾನನ್ತಿ, ವಿಪಾಕಧಮ್ಮಧಮ್ಮೇ ಖನ್ಧೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸನ್ತಿ, ಅಸ್ಸಾದೇನ್ತಿ ಅಭಿನನ್ದನ್ತಿ; ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ, ಚೇತೋಪರಿಯಞಾಣೇನ ವಿಪಾಕಧಮ್ಮಧಮ್ಮಚಿತ್ತಸಮಙ್ಗಿಸ್ಸ ಚಿತ್ತಂ ಜಾನನ್ತಿ. ಆಕಾಸಾನಞ್ಚಾಯತನಕುಸಲಂ ವಿಞ್ಞಾಣಞ್ಚಾಯತನಕುಸಲಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಆಕಿಞ್ಚಞ್ಞಾಯತನಕುಸಲಂ ನೇವಸಞ್ಞಾನಾಸಞ್ಞಾಯತನಕುಸಲಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ವಿಪಾಕಧಮ್ಮಧಮ್ಮಾ ಖನ್ಧಾ ಇದ್ಧಿವಿಧಞಾಣಸ್ಸ, ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಯಥಾಕಮ್ಮೂಪಗಞಾಣಸ್ಸ, ಅನಾಗತಂಸಞಾಣಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮೇ ಖನ್ಧೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸನ್ತಿ, ಅಸ್ಸಾದೇನ್ತಿ ಅಭಿನನ್ದನ್ತಿ; ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ, ಕುಸಲಾಕುಸಲೇ ನಿರುದ್ಧೇ ವಿಪಾಕೋ ತದಾರಮ್ಮಣತಾ ಉಪ್ಪಜ್ಜತಿ. ಆಕಾಸಾನಞ್ಚಾಯತನಕುಸಲಂ ವಿಞ್ಞಾಣಞ್ಚಾಯತನವಿಪಾಕಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಆಕಿಞ್ಚಞ್ಞಾಯತನಕುಸಲಂ ನೇವಸಞ್ಞಾನಾಸಞ್ಞಾಯತನವಿಪಾಕಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೨)

ವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಅರಹಾ ಮಗ್ಗಾ ವುಟ್ಠಹಿತ್ವಾ ಮಗ್ಗಂ ಪಚ್ಚವೇಕ್ಖತಿ, ಪುಬ್ಬೇ ಸುಚಿಣ್ಣಾನಿ ಪಚ್ಚವೇಕ್ಖತಿ. ಅರಹಾ ಪಹೀನೇ ಕಿಲೇಸೇ ಪಚ್ಚವೇಕ್ಖತಿ, ಪುಬ್ಬೇ ಸಮುದಾಚಿಣ್ಣೇ ಕಿಲೇಸೇ ಜಾನಾತಿ, ವಿಪಾಕಧಮ್ಮಧಮ್ಮೇ ಖನ್ಧೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸತಿ, ಚೇತೋಪರಿಯಞಾಣೇನ ವಿಪಾಕಧಮ್ಮಧಮ್ಮಚಿತ್ತಸಮಙ್ಗಿಸ್ಸ ಚಿತ್ತಂ ಜಾನಾತಿ. ಆಕಾಸಾನಞ್ಚಾಯತನಕುಸಲಂ ವಿಞ್ಞಾಣಞ್ಚಾಯತನಕಿರಿಯಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಆಕಿಞ್ಚಞ್ಞಾಯತನಕುಸಲಂ ನೇವಸಞ್ಞಾನಾಸಞ್ಞಾಯತನಕಿರಿಯಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ವಿಪಾಕಧಮ್ಮಧಮ್ಮಾ ಖನ್ಧಾ ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಯಥಾಕಮ್ಮೂಪಗಞಾಣಸ್ಸ, ಅನಾಗತಂಸಞಾಣಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. (೩)

೯೪. ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಅರಹಾ ನಿಬ್ಬಾನಂ ಪಚ್ಚವೇಕ್ಖತಿ. ನಿಬ್ಬಾನಂ ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. ಅರಹಾ ಚಕ್ಖುಂ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸತಿ. ಸೋತಂ… ಘಾನಂ… ಜಿವ್ಹಂ… ಕಾಯಂ… ರೂಪೇ… ಸದ್ದೇ… ಗನ್ಧೇ… ರಸೇ … ಫೋಟ್ಠಬ್ಬೇ… ವತ್ಥುಂ… ನೇವವಿಪಾಕನವಿಪಾಕಧಮ್ಮಧಮ್ಮೇ ಖನ್ಧೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸತಿ, ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ, ಚೇತೋಪರಿಯಞಾಣೇನ ನೇವವಿಪಾಕನವಿಪಾಕಧಮ್ಮಧಮ್ಮಚಿತ್ತಸಮಙ್ಗಿಸ್ಸ ಚಿತ್ತಂ ಜಾನಾತಿ. ಆಕಾಸಾನಞ್ಚಾಯತನಕಿರಿಯಂ ವಿಞ್ಞಾಣಞ್ಚಾಯತನಕಿರಿಯಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಆಕಿಞ್ಚಞ್ಞಾಯತನಕಿರಿಯಂ ನೇವಸಞ್ಞಾನಾಸಞ್ಞಾಯತನಕಿರಿಯಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ನೇವವಿಪಾಕನವಿಪಾಕಧಮ್ಮಧಮ್ಮಾ ಖನ್ಧಾ ಇದ್ಧಿವಿಧಞಾಣಸ್ಸ, ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಅನಾಗತಂಸಞಾಣಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ನಿಬ್ಬಾನಂ ಫಲಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಸೇಕ್ಖಾ ವಾ ಪುಥುಜ್ಜನಾ ವಾ ಚಕ್ಖುಂ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸನ್ತಿ, ಅಸ್ಸಾದೇನ್ತಿ ಅಭಿನನ್ದನ್ತಿ; ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ. ಕುಸಲಾಕುಸಲೇ ನಿರುದ್ಧೇ ವಿಪಾಕೋ ತದಾರಮ್ಮಣತಾ ಉಪ್ಪಜ್ಜತಿ. ಸೋತಂ… ಘಾನಂ… ಜಿವ್ಹಂ… ಕಾಯಂ… ರೂಪೇ… ಸದ್ದೇ… ಗನ್ಧೇ… ರಸೇ… ಫೋಟ್ಠಬ್ಬೇ… ವತ್ಥುಂ… ನೇವವಿಪಾಕನವಿಪಾಕಧಮ್ಮಧಮ್ಮೇ ಖನ್ಧೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸನ್ತಿ, ಅಸ್ಸಾದೇನ್ತಿ ಅಭಿನನ್ದನ್ತಿ; ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ. ಕುಸಲಾಕುಸಲೇ ನಿರುದ್ಧೇ ವಿಪಾಕೋ ತದಾರಮ್ಮಣತಾ ಉಪ್ಪಜ್ಜತಿ. ರೂಪಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಫೋಟ್ಠಬ್ಬಾಯತನಂ ಕಾಯವಿಞ್ಞಾಣಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೨)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಸೇಕ್ಖಾ ನಿಬ್ಬಾನಂ ಪಚ್ಚವೇಕ್ಖನ್ತಿ; ನಿಬ್ಬಾನಂ ಗೋತ್ರಭುಸ್ಸ, ವೋದಾನಸ್ಸ, ಮಗ್ಗಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. ಸೇಕ್ಖಾ ವಾ ಪುಥುಜ್ಜನಾ ವಾ ಚಕ್ಖುಂ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸನ್ತಿ, ಅಸ್ಸಾದೇನ್ತಿ ಅಭಿನನ್ದತಿ; ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ. ಸೋತಂ…ಪೇ… ನೇವವಿಪಾಕನವಿಪಾಕಧಮ್ಮಧಮ್ಮೇ ಖನ್ಧೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸನ್ತಿ, ಅಸ್ಸಾದೇನ್ತಿ ಅಭಿನನ್ದನ್ತಿ…ಪೇ… ದಿಬ್ಬೇನ ಚಕ್ಖುನಾ ರೂಪಂ ಪಸ್ಸನ್ತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣನ್ತಿ, ಚೇತೋಪರಿಯಞಾಣೇನ ನೇವವಿಪಾಕನವಿಪಾಕಧಮ್ಮಧಮ್ಮಚಿತ್ತಸಮಙ್ಗಿಸ್ಸ ಚಿತ್ತಂ ಜಾನನ್ತಿ. ನೇವವಿಪಾಕನವಿಪಾಕಧಮ್ಮಧಮ್ಮಾ ಖನ್ಧಾ ಇದ್ಧಿವಿಧಞಾಣಸ್ಸ, ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಅನಾಗತಂಸಞಾಣಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ. (೩)

ಅಧಿಪತಿಪಚ್ಚಯೋ

೯೫. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ವಿಪಾಕಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ವಿಪಾಕೋ ಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಆರಮ್ಮಣಾಧಿಪತಿ – ಸೇಕ್ಖಾ ಫಲಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ, ವಿಪಾಕೇ ಖನ್ಧೇ ಗರುಂ ಕತ್ವಾ ಅಸ್ಸಾದೇನ್ತಿ ಅಭಿನನ್ದನ್ತಿ; ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. (೨)

ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ಅರಹಾ ಫಲಂ ಗರುಂ ಕತ್ವಾ ಪಚ್ಚವೇಕ್ಖತಿ. ಸಹಜಾತಾಧಿಪತಿ – ವಿಪಾಕಾಧಿಪತಿ ಚಿತ್ತಸಮುಟ್ಠಾನಾನಂ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೩)

ವಿಪಾಕೋ ಧಮ್ಮೋ ವಿಪಾಕಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ವಿಪಾಕಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೪)

೯೬. ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ದಾನಂ ದತ್ವಾ ಸೀಲಂ ಸಮಾದಿಯಿತ್ವಾ ಉಪೋಸಥಕಮ್ಮಂ ಕತ್ವಾ ತಂ ಗರುಂ ಕತ್ವಾ ಪಚ್ಚವೇಕ್ಖತಿ, ಪುಬ್ಬೇ ಸುಚಿಣ್ಣಾನಿ ಗರುಂ ಕತ್ವಾ ಪಚ್ಚವೇಕ್ಖತಿ, ಝಾನಾ ವುಟ್ಠಹಿತ್ವಾ ಝಾನಂ ಗರುಂ ಕತ್ವಾ ಪಚ್ಚವೇಕ್ಖತಿ, ಸೇಕ್ಖಾ ಗೋತ್ರಭುಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ, ವೋದಾನಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ, ಸೇಕ್ಖಾ ಮಗ್ಗಾ ವುಟ್ಠಹಿತ್ವಾ ಮಗ್ಗಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ, ವಿಪಾಕಧಮ್ಮಧಮ್ಮೇ ಖನ್ಧೇ ಗರುಂ ಕತ್ವಾ ಅಸ್ಸಾದೇನ್ತಿ ಅಭಿನನ್ದನ್ತಿ; ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ,. ಸಹಜಾತಾಧಿಪತಿ – ವಿಪಾಕಧಮ್ಮಧಮ್ಮಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ಅರಹಾ ಮಗ್ಗಾ ವುಟ್ಠಹಿತ್ವಾ ಮಗ್ಗಂ ಗರುಂ ಕತ್ವಾ ಪಚ್ಚವೇಕ್ಖತಿ. ಸಹಜಾತಾಧಿಪತಿ – ವಿಪಾಕಧಮ್ಮಧಮ್ಮಾಧಿಪತಿ ಚಿತ್ತಸಮುಟ್ಠಾನಾನಂ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೨)

ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ವಿಪಾಕಧಮ್ಮಧಮ್ಮಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೩)

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ಅರಹಾ ನಿಬ್ಬಾನಂ ಗರುಂ ಕತ್ವಾ ಪಚ್ಚವೇಕ್ಖತಿ. ಸಹಜಾತಾಧಿಪತಿ – ನೇವವಿಪಾಕನವಿಪಾಕಧಮ್ಮಧಮ್ಮಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಆರಮ್ಮಣಾಧಿಪತಿ – ನಿಬ್ಬಾನಂ ಫಲಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. (೨)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಆರಮ್ಮಣಾಧಿಪತಿ – ಸೇಕ್ಖಾ ನಿಬ್ಬಾನಂ ಗರುಂ ಕತ್ವಾ ಪಚ್ಚವೇಕ್ಖನ್ತಿ. ನಿಬ್ಬಾನಂ ಗೋತ್ರಭುಸ್ಸ, ವೋದಾನಸ್ಸ, ಮಗ್ಗಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಚಕ್ಖುಂ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ; ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. ಸೋತಂ…ಪೇ… ನೇವವಿಪಾಕನವಿಪಾಕಧಮ್ಮಧಮ್ಮೇ ಖನ್ಧೇ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ; ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. (೩)

ಅನನ್ತರಪಚ್ಚಯೋ

೯೭. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ವಿಪಾಕಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ವಿಪಾಕಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. ಪಞ್ಚವಿಞ್ಞಾಣಂ ವಿಪಾಕಮನೋಧಾತುಯಾ ಅನನ್ತರಪಚ್ಚಯೇನ ಪಚ್ಚಯೋ. ವಿಪಾಕಮನೋಧಾತು ವಿಪಾಕಮನೋವಿಞ್ಞಾಣಧಾತುಯಾ ಅನನ್ತರಪಚ್ಚಯೇನ ಪಚ್ಚಯೋ. (೧)

ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ. ಭವಙ್ಗಂ ಆವಜ್ಜನಾಯ ಅನನ್ತರಪಚ್ಚಯೇನ ಪಚ್ಚಯೋ. ವಿಪಾಕಮನೋವಿಞ್ಞಾಣಧಾತು ಕಿರಿಯಮನೋವಿಞ್ಞಾಣಧಾತುಯಾ ಅನನ್ತರಪಚ್ಚಯೇನ ಪಚ್ಚಯೋ. (೨)

ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ವಿಪಾಕಧಮ್ಮಧಮ್ಮಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ವಿಪಾಕಧಮ್ಮಧಮ್ಮಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. ಅನುಲೋಮಂ ಗೋತ್ರಭುಸ್ಸ … ಅನುಲೋಮಂ ವೋದಾನಸ್ಸ… ಗೋತ್ರಭು ಮಗ್ಗಸ್ಸ… ವೋದಾನಂ ಮಗ್ಗಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೧)

ವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮಾ ಖನ್ಧಾ ವುಟ್ಠಾನಸ್ಸ… ಮಗ್ಗೋ ಫಲಸ್ಸ… ಸೇಕ್ಖಾನಂ ಅನುಲೋಮಂ ಫಲಸಮಾಪತ್ತಿಯಾ… ನಿರೋಧಾ ವುಟ್ಠಹನ್ತಸ್ಸ ನೇವಸಞ್ಞಾನಾಸಞ್ಞಾಯತನಕುಸಲಂ ಫಲಸಮಾಪತ್ತಿಯಾ ಅನನ್ತರಪಚ್ಚಯೇನ ಪಚ್ಚಯೋ. (೨)

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ನೇವವಿಪಾಕನವಿಪಾಕಧಮ್ಮಧಮ್ಮಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ನೇವವಿಪಾಕನವಿಪಾಕಧಮ್ಮಧಮ್ಮಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಆವಜ್ಜನಾ ಪಞ್ಚನ್ನಂ ವಿಞ್ಞಾಣಾನಂ ಅನನ್ತರಪಚ್ಚಯೇನ ಪಚ್ಚಯೋ. ನೇವವಿಪಾಕನವಿಪಾಕಧಮ್ಮಧಮ್ಮಾ ಖನ್ಧಾ ವುಟ್ಠಾನಸ್ಸ, ಅರಹತೋ ಅನುಲೋಮಂ ಫಲಸಮಾಪತ್ತಿಯಾ… ನಿರೋಧಾ ವುಟ್ಠಹನ್ತಸ್ಸ ನೇವಸಞ್ಞಾನಾಸಞ್ಞಾಯತನಕಿರಿಯಂ ಫಲಸಮಾಪತ್ತಿಯಾ ಅನನ್ತರಪಚ್ಚಯೇನ ಪಚ್ಚಯೋ. (೨)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಆವಜ್ಜನಾ ವಿಪಾಕಧಮ್ಮಧಮ್ಮಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೩)

ಸಮನನ್ತರಪಚ್ಚಯೋ

೯೮. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಸಮನನ್ತರಪಚ್ಚಯೇನ ಪಚ್ಚಯೋ (ಅನನ್ತರಸದಿಸಂ).

ಸಹಜಾತಪಚ್ಚಯೋ

೯೯. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಸಹಜಾತಪಚ್ಚಯೇನ ಪಚ್ಚಯೋ – ವಿಪಾಕೋ ಏಕೋ ಖನ್ಧೋ…ಪೇ… ತೀಣಿ.

ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಸಹಜಾತಪಚ್ಚಯೇನ ಪಚ್ಚಯೋ… ತೀಣಿ.

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಸಹಜಾತಪಚ್ಚಯೇನ ಪಚ್ಚಯೋ – ನೇವವಿಪಾಕನವಿಪಾಕಧಮ್ಮಧಮ್ಮೋ ಏಕೋ ಖನ್ಧೋ…ಪೇ… ಏಕಂ ಮಹಾಭೂತಂ…ಪೇ… ಬಾಹಿರಂ… ಆಹಾರಸಮುಟ್ಠಾನಂ… ಉತುಸಮುಟ್ಠಾನಂ… ಅಸಞ್ಞಸತ್ತಾನಂ ಏಕಂ ಮಹಾಭೂತಂ…ಪೇ…. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಸಹಜಾತಪಚ್ಚಯೇನ ಪಚ್ಚಯೋ – ಪಟಿಸನ್ಧಿಕ್ಖಣೇ ವತ್ಥು ವಿಪಾಕಾನಂ ಖನ್ಧಾನಂ ಸಹಜಾತಪಚ್ಚಯೇನ ಪಚ್ಚಯೋ. (೨)

ವಿಪಾಕೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ವಿಪಾಕಸ್ಸ ಧಮ್ಮಸ್ಸ ಸಹಜಾತಪಚ್ಚಯೇನ ಪಚ್ಚಯೋ – ಪಟಿಸನ್ಧಿಕ್ಖಣೇ ವಿಪಾಕೋ ಏಕೋ ಖನ್ಧೋ ಚ ವತ್ಥು ಚ ತಿಣ್ಣನ್ನಂ ಖನ್ಧಾನಂ…ಪೇ…. (೧)

ವಿಪಾಕೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಸಹಜಾತಪಚ್ಚಯೇನ ಪಚ್ಚಯೋ – ವಿಪಾಕಾ ಖನ್ಧಾ ಚ ಮಹಾಭೂತಾ ಚ ಚಿತ್ತಸಮುಟ್ಠಾನಾನಂ ರೂಪಾನಂ…ಪೇ… ಪಟಿಸನ್ಧಿಕ್ಖಣೇ ವಿಪಾಕಾ ಖನ್ಧಾ ಚ ಮಹಾಭೂತಾ ಚ ಕಟತ್ತಾರೂಪಾನಂ ಸಹಜಾತಪಚ್ಚಯೇನ ಪಚ್ಚಯೋ. (೨)

ವಿಪಾಕಧಮ್ಮಧಮ್ಮೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಸಹಜಾತಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮಾ ಖನ್ಧಾ ಚ ಮಹಾಭೂತಾ ಚ ಚಿತ್ತಸಮುಟ್ಠಾನಾನಂ ರೂಪಾನಂ ಸಹಜಾತಪಚ್ಚಯೇನ ಪಚ್ಚಯೋ. (೧)

ಅಞ್ಞಮಞ್ಞಪಚ್ಚಯೋ

೧೦೦. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಅಞ್ಞಮಞ್ಞಪಚ್ಚಯೇನ ಪಚ್ಚಯೋ – ವಿಪಾಕೋ ಏಕೋ ಖನ್ಧೋ…ಪೇ… ಪಟಿಸನ್ಧಿಕ್ಖಣೇ…ಪೇ…. (೧)

ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಅಞ್ಞಮಞ್ಞಪಚ್ಚಯೇನ ಪಚ್ಚಯೋ – ಪಟಿಸನ್ಧಿಕ್ಖಣೇ ವಿಪಾಕಾ ಖನ್ಧಾ ವತ್ಥುಸ್ಸ ಅಞ್ಞಮಞ್ಞಪಚ್ಚಯೇನ ಪಚ್ಚಯೋ. (೨)

ವಿಪಾಕೋ ಧಮ್ಮೋ ವಿಪಾಕಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ ಅಞ್ಞಮಞ್ಞಪಚ್ಚಯೇನ ಪಚ್ಚಯೋ – ಪಟಿಸನ್ಧಿಕ್ಖಣೇ ವಿಪಾಕೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ವತ್ಥುಸ್ಸ ಚ ಅಞ್ಞಮಞ್ಞಪಚ್ಚಯೇನ ಪಚ್ಚಯೋ…ಪೇ…. (೩)

ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಅಞ್ಞಮಞ್ಞಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ…ಪೇ… ದ್ವೇ ಖನ್ಧಾ ದ್ವಿನ್ನಂ ಖನ್ಧಾನಂ…ಪೇ…. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಅಞ್ಞಮಞ್ಞಪಚ್ಚಯೇನ ಪಚ್ಚಯೋ – ನೇವವಿಪಾಕನವಿಪಾಕಧಮ್ಮಧಮ್ಮೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ…ಪೇ… ದ್ವೇ ಖನ್ಧಾ ದ್ವಿನ್ನಂ ಖನ್ಧಾನಂ…ಪೇ…. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಅಞ್ಞಮಞ್ಞಪಚ್ಚಯೇನ ಪಚ್ಚಯೋ – ಪಟಿಸನ್ಧಿಕ್ಖಣೇ ವತ್ಥು ವಿಪಾಕಾನಂ ಖನ್ಧಾನಂ…ಪೇ…. (೨)

ವಿಪಾಕೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ವಿಪಾಕಸ್ಸ ಧಮ್ಮಸ್ಸ…ಪೇ… ಪಟಿಸನ್ಧಿಕ್ಖಣೇ ವಿಪಾಕೋ ಏಕೋ ಖನ್ಧೋ ಚ ವತ್ಥು ಚ…ಪೇ…. (೧) (ಸತ್ತ ಪಞ್ಹಾ).

ನಿಸ್ಸಯಪಚ್ಚಯೋ

೧೦೧. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ನಿಸ್ಸಯಪಚ್ಚಯೇನ ಪಚ್ಚಯೋ… ತೀಣಿ. ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ… ತೀಣಿ.

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ…ಪೇ…. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ…ಪೇ… ಚಕ್ಖಾಯತನಂ ಚಕ್ಖುವಿಞ್ಞಾಣಸ್ಸ ನಿಸ್ಸಯಪಚ್ಚಯೇನ ಪಚ್ಚಯೋ…ಪೇ… ಕಾಯಾಯತನಂ ಕಾಯವಿಞ್ಞಾಣಸ್ಸ, ವತ್ಥು ವಿಪಾಕಾನಂ ಖನ್ಧಾನಂ…ಪೇ… ಪಟಿಸನ್ಧಿಕ್ಖಣೇ ವತ್ಥು ವಿಪಾಕಾನಂ ಖನ್ಧಾನಂ…ಪೇ…. (೨)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ನಿಸ್ಸಯಪಚ್ಚಯೇನ ಪಚ್ಚಯೋ – ವತ್ಥು ವಿಪಾಕಧಮ್ಮಧಮ್ಮಾನಂ ಖನ್ಧಾನಂ…ಪೇ…. (೩)

ವಿಪಾಕೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ವಿಪಾಕಸ್ಸ ಧಮ್ಮಸ್ಸ ನಿಸ್ಸಯಪಚ್ಚಯೇನ ಪಚ್ಚಯೋ – ಚಕ್ಖುವಿಞ್ಞಾಣಸಹಗತೋ ಏಕೋ ಖನ್ಧೋ ಚ ಚಕ್ಖಾಯತನಞ್ಚ…ಪೇ… ಕಾಯವಿಞ್ಞಾಣಸಹಗತೋ ಏಕೋ ಖನ್ಧೋ ಚ ಕಾಯಾಯತನಞ್ಚ…ಪೇ… ವಿಪಾಕೋ ಏಕೋ ಖನ್ಧೋ ಚ ವತ್ಥು ಚ ತಿಣ್ಣನ್ನಂ ಖನ್ಧಾನಂ… ಪಟಿಸನ್ಧಿಕ್ಖಣೇ ವಿಪಾಕೋ ಏಕೋ ಖನ್ಧೋ ಚ ವತ್ಥು ಚ…ಪೇ…. (೧)

ವಿಪಾಕೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ…ಪೇ… ವಿಪಾಕಾ ಖನ್ಧಾ ಚ ಮಹಾಭೂತಾ ಚ…ಪೇ… (ಸಂಖಿತ್ತಂ) ಪಟಿಸನ್ಧಿಕ್ಖಣೇ…ಪೇ…. (೨)

ವಿಪಾಕಧಮ್ಮಧಮ್ಮೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ವಿಪಾಕಧಮ್ಮಧಮ್ಮಸ್ಸ ನಿಸ್ಸಯಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮೋ ಏಕೋ ಖನ್ಧೋ ಚ ವತ್ಥು ಚ…ಪೇ…. (೧)

ವಿಪಾಕಧಮ್ಮಧಮ್ಮೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ನಿಸ್ಸಯಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮಾ ಖನ್ಧಾ ಚ ಮಹಾಭೂತಾ ಚ ಚಿತ್ತಸಮುಟ್ಠಾನಾನಂ ರೂಪಾನಂ…. (೨) (ತೇರಸ ಪಞ್ಹಾ).

ಉಪನಿಸ್ಸಯಪಚ್ಚಯೋ

೧೦೨. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ….

ಪಕತೂಪನಿಸ್ಸಯೋ – ಕಾಯಿಕಂ ಸುಖಂ ಕಾಯಿಕಸ್ಸ ಸುಖಸ್ಸ, ಕಾಯಿಕಸ್ಸ ದುಕ್ಖಸ್ಸ, ಫಲಸಮಾಪತ್ತಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಕಾಯಿಕಂ ದುಕ್ಖಂ ಕಾಯಿಕಸ್ಸ ಸುಖಸ್ಸ, ಕಾಯಿಕಸ್ಸ ದುಕ್ಖಸ್ಸ, ಫಲಸಮಾಪತ್ತಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಫಲಸಮಾಪತ್ತಿ ಕಾಯಿಕಸ್ಸ ಸುಖಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ವಿಪಾಕೋ ಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ….

ಪಕತೂಪನಿಸ್ಸಯೋ – ಕಾಯಿಕಂ ಸುಖಂ ಉಪನಿಸ್ಸಾಯ ದಾನಂ ದೇತಿ, ಸೀಲಂ ಸಮಾದಿಯತಿ…ಪೇ… ಸಙ್ಘಂ ಭಿನ್ದತಿ. ಕಾಯಿಕಂ ದುಕ್ಖಂ ಉಪನಿಸ್ಸಾಯ ದಾನಂ ದೇತಿ, ಸೀಲಂ ಸಮಾದಿಯತಿ…ಪೇ… ಸಙ್ಘಂ ಭಿನ್ದತಿ. ಕಾಯಿಕಂ ಸುಖಂ ಕಾಯಿಕಂ ದುಕ್ಖಂ ಸದ್ಧಾಯ…ಪೇ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ….

ಪಕತೂಪನಿಸ್ಸಯೋ – ಅರಹಾ ಕಾಯಿಕಂ ಸುಖಂ ಉಪನಿಸ್ಸಾಯ ಅನುಪ್ಪನ್ನಂ ಕಿರಿಯಸಮಾಪತ್ತಿಂ ಉಪ್ಪಾದೇತಿ, ಉಪ್ಪನ್ನಂ ಸಮಾಪಜ್ಜತಿ, ಸಙ್ಖಾರೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸತಿ, ಕಾಯಿಕಂ ದುಕ್ಖಂ ಉಪನಿಸ್ಸಾಯ ಅನುಪ್ಪನ್ನಂ ಕಿರಿಯಸಮಾಪತ್ತಿಂ ಉಪ್ಪಾದೇತಿ, ಉಪ್ಪನ್ನಂ ಸಮಾಪಜ್ಜತಿ…ಪೇ…. (೩)

೧೦೩. ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ….

ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ದಾನಂ ದೇತಿ…ಪೇ… ಮಾನಂ ಜಪ್ಪೇತಿ… ದಿಟ್ಠಿಂ ಗಣ್ಹಾತಿ. ಸೀಲಂ… ಸುತಂ… ಚಾಗಂ… ಪಞ್ಞಂ ಉಪನಿಸ್ಸಾಯ ದಾನಂ ದೇತಿ…ಪೇ… ದಿಟ್ಠಿಂ ಗಣ್ಹಾತಿ. ರಾಗಂ… ದೋಸಂ… ಮೋಹಂ… ಮಾನಂ… ದಿಟ್ಠಿಂ… ಪತ್ಥನಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಮಾಪತ್ತಿಂ ಉಪ್ಪಾದೇತಿ, ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ…ಪೇ… ಸದ್ಧಾ…ಪೇ… ಪತ್ಥನಾ ಸದ್ಧಾಯ… ಸೀಲಸ್ಸ…ಪೇ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಪಠಮಸ್ಸ ಝಾನಸ್ಸ ಪರಿಕಮ್ಮಂ ಪಠಮಸ್ಸ…ಪೇ… ನೇವಸಞ್ಞಾನಾಸಞ್ಞಾಯತನಸ್ಸ ಪರಿಕಮ್ಮಂ ನೇವಸಞ್ಞಾನಾಸಞ್ಞಾಯತನಸ್ಸ…ಪೇ… ಪಠಮಂ ಝಾನಂ ದುತಿಯಸ್ಸ…ಪೇ… ಆಕಿಞ್ಚಞ್ಞಾಯತನಂ ನೇವಸಞ್ಞಾನಾಸಞ್ಞಾಯತನಸ್ಸ…ಪೇ… ಪಠಮಸ್ಸ ಮಗ್ಗಸ್ಸ ಪರಿಕಮ್ಮಂ ಪಠಮಸ್ಸ…ಪೇ… ಚತುತ್ಥಸ್ಸ ಮಗ್ಗಸ್ಸ ಪರಿಕಮ್ಮಂ ಚತುತ್ಥಸ್ಸ…ಪೇ… ಪಠಮೋ ಮಗ್ಗೋ ದುತಿಯಸ್ಸ…ಪೇ… ತತಿಯೋ ಮಗ್ಗೋ ಚತುತ್ಥಸ್ಸ ಮಗ್ಗಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಸೇಕ್ಖಾ ಮಗ್ಗಂ ಉಪನಿಸ್ಸಾಯ ಅನುಪ್ಪನ್ನಂ ಕುಸಲಸಮಾಪತ್ತಿಂ ಉಪ್ಪಾದೇನ್ತಿ…ಪೇ… ಮಗ್ಗೋ ಸೇಕ್ಖಾನಂ ಅತ್ಥಪ್ಪಟಿಸಮ್ಭಿದಾಯ…ಪೇ… ಠಾನಾಠಾನಕೋಸಲ್ಲಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಪಾಣಾತಿಪಾತೋ ಪಾಣಾತಿಪಾತಸ್ಸ…ಪೇ… ಮಿಚ್ಛಾದಿಟ್ಠಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ…ಪೇ… ಮಿಚ್ಛಾದಿಟ್ಠಿ ಮಿಚ್ಛಾದಿಟ್ಠಿಯಾ…ಪೇ… ಬ್ಯಾಪಾದಸ್ಸ…ಪೇ… ಮಾತುಘಾತಿಕಮ್ಮಂ ಮಾತುಘಾತಿಕಮ್ಮಸ್ಸ…ಪೇ… ನಿಯತಮಿಚ್ಛಾದಿಟ್ಠಿಯಾ…ಪೇ… ನಿಯತಮಿಚ್ಛಾದಿಟ್ಠಿ ನಿಯತಮಿಚ್ಛಾದಿಟ್ಠಿಯಾ…ಪೇ… ಸಙ್ಘಭೇದಕಕಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ….

ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ಅತ್ತಾನಂ ಆತಾಪೇತಿ ಪರಿತಾಪೇತಿ, ಪರಿಯಿಟ್ಠಿಮೂಲಕಂ ದುಕ್ಖಂ ಪಚ್ಚನುಭೋತಿ…ಪೇ… ಪತ್ಥನಂ ಉಪನಿಸ್ಸಾಯ ಅತ್ತಾನಂ ಆತಾಪೇತಿ ಪರಿತಾಪೇತಿ …ಪೇ… ಸದ್ಧಾ…ಪೇ… ಪತ್ಥನಾ ಕಾಯಿಕಸ್ಸ ಸುಖಸ್ಸ, ಕಾಯಿಕಸ್ಸ ದುಕ್ಖಸ್ಸ, ಫಲಸಮಾಪತ್ತಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಕುಸಲಾಕುಸಲಂ ಕಮ್ಮಂ ವಿಪಾಕಸ್ಸ [ಕಮ್ಮವಿಪಾಕಸ್ಸ (ಸ್ಯಾ.)] ಉಪನಿಸ್ಸಯಪಚ್ಚಯೇನ ಪಚ್ಚಯೋ. ಮಗ್ಗೋ ಫಲಸಮಾಪತ್ತಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ….

ಪಕತೂಪನಿಸ್ಸಯೋ – ಅರಹಾ ಮಗ್ಗಂ ಉಪನಿಸ್ಸಾಯ ಅನುಪ್ಪನ್ನಂ ಕಿರಿಯಸಮಾಪತ್ತಿಂ ಉಪ್ಪಾದೇತಿ, ಉಪ್ಪನ್ನಂ ಸಮಾಪಜ್ಜತಿ, ಸಙ್ಖಾರೇ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸತಿ. ಮಗ್ಗೋ ಅರಹತೋ ಅತ್ಥಪ್ಪಟಿಸಮ್ಭಿದಾಯ…ಪೇ… ಠಾನಾಠಾನಕೋಸಲ್ಲಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

೧೦೪. ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ….

ಪಕತೂಪನಿಸ್ಸಯೋ – ಅರಹಾ ಉತುಂ… ಭೋಜನಂ… ಸೇನಾಸನಂ ಉಪನಿಸ್ಸಾಯ ಅನುಪ್ಪನ್ನಂ ಕಿರಿಯಸಮಾಪತ್ತಿಂ ಉಪ್ಪಾದೇತಿ…ಪೇ…. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ….

ಪಕತೂಪನಿಸ್ಸಯೋ – ಉತು… ಭೋಜನಂ… ಸೇನಾಸನಂ, ಕಾಯಿಕಸ್ಸ ಸುಖಸ್ಸ, ಕಾಯಿಕಸ್ಸ ದುಕ್ಖಸ್ಸ, ಫಲಸಮಾಪತ್ತಿಯಾ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ …ಪೇ….

ಪಕತೂಪನಿಸ್ಸಯೋ – ಉತುಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಙ್ಘಂ ಭಿನ್ದತಿ. ಭೋಜನಂ… ಸೇನಾಸನಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಙ್ಘಂ ಭಿನ್ದತಿ. ಉತು… ಭೋಜನಂ… ಸೇನಾಸನಂ ಸದ್ಧಾಯ…ಪೇ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

ಪುರೇಜಾತಪಚ್ಚಯೋ

೧೦೫. ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ.

ಆರಮ್ಮಣಪುರೇಜಾತಂ – ಅರಹಾ ಚಕ್ಖುಂ ಅನಿಚ್ಚತೋ…ಪೇ… ಕಾಯಂ… ರೂಪೇ… ಫೋಟ್ಠಬ್ಬೇ… ವತ್ಥುಂ ಅನಿಚ್ಚತೋ…ಪೇ… ದಿಬ್ಬೇನ ಚಕ್ಖುನಾ ರೂಪಂ…ಪೇ… ದಿಬ್ಬಾಯ ಸೋತಧಾತುಯಾ ಸದ್ದಂ…ಪೇ…. ವತ್ಥುಪುರೇಜಾತಂ – ವತ್ಥು ನೇವವಿಪಾಕನವಿಪಾಕಧಮ್ಮಧಮ್ಮಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ.

ಆರಮ್ಮಣಪುರೇಜಾತಂ – ಸೇಕ್ಖಾ ವಾ ಪುಥುಜ್ಜನಾ ವಾ ಚಕ್ಖುಂ ಅನಿಚ್ಚತೋ ದುಕ್ಖತೋ ಅನತ್ತತೋ ವಿಪಸ್ಸನ್ತಿ, ಅಸ್ಸಾದೇನ್ತಿ ಅಭಿನನ್ದನ್ತಿ; ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ. ಕುಸಲಾಕುಸಲೇ ನಿರುದ್ಧೇ ವಿಪಾಕೋ ತದಾರಮ್ಮಣತಾ ಉಪ್ಪಜ್ಜತಿ. ಸೋತಂ…ಪೇ… ವತ್ಥುಂ ಅನಿಚ್ಚತೋ…ಪೇ… ತದಾರಮ್ಮಣತಾ ಉಪ್ಪಜ್ಜತಿ. ರೂಪಾಯತನಂ ಚಕ್ಖುವಿಞ್ಞಾಣಸ್ಸ ಪುರೇಜಾತ…ಪೇ… ಫೋಟ್ಠಬ್ಬಾಯತನಂ ಕಾಯವಿಞ್ಞಾಣಸ್ಸ…ಪೇ…. ವತ್ಥುಪುರೇಜಾತಂ – ಚಕ್ಖಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಕಾಯಾಯತನಂ ಕಾಯವಿಞ್ಞಾಣಸ್ಸ…ಪೇ… ವತ್ಥು ವಿಪಾಕಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೨)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ.

ಆರಮ್ಮಣಪುರೇಜಾತಂ – ಸೇಕ್ಖಾ ವಾ ಪುಥುಜ್ಜನಾ ವಾ ಚಕ್ಖುಂ…ಪೇ… ಆರಬ್ಭ ರಾಗೋ…ಪೇ… ದೋಮನಸ್ಸಂ ಉಪ್ಪಜ್ಜತಿ. ಸೋತಂ…ಪೇ… ವತ್ಥುಂ ಅನಿಚ್ಚತೋ…ಪೇ… ದೋಮನಸ್ಸಂ…ಪೇ… ದಿಬ್ಬೇನ ಚಕ್ಖುನಾ ರೂಪಂ…ಪೇ… ದಿಬ್ಬಾಯ ಸೋತಧಾತುಯಾ ಸದ್ದಂ…ಪೇ….

ವತ್ಥುಪುರೇಜಾತಂ – ವತ್ಥು ವಿಪಾಕಧಮ್ಮಧಮ್ಮಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೩)

ಪಚ್ಛಾಜಾತಪಚ್ಚಯೋ

೧೦೬. ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ವಿಪಾಕಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ…. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ…. (೧)

ಆಸೇವನಪಚ್ಚಯೋ

೧೦೭. ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಆಸೇವನಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ವಿಪಾಕಧಮ್ಮಧಮ್ಮಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ವಿಪಾಕಧಮ್ಮಧಮ್ಮಾನಂ ಖನ್ಧಾನಂ…ಪೇ… ಅನುಲೋಮಂ ಗೋತ್ರಭುಸ್ಸ… ಅನುಲೋಮಂ ವೋದಾನಸ್ಸ… ಗೋತ್ರಭು ಮಗ್ಗಸ್ಸ… ವೋದಾನಂ ಮಗ್ಗಸ್ಸ ಆಸೇವನಪಚ್ಚಯೇನ ಪಚ್ಚಯೋ. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಆಸೇವನಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ…ಪೇ… ಪಚ್ಚಯೋ. (೧)

ಕಮ್ಮಪಚ್ಚಯೋ

೧೦೮. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ವಿಪಾಕಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಕಮ್ಮಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ ವಿಪಾಕಾ ಚೇತನಾ…ಪೇ…. (೧)

ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ವಿಪಾಕಾ ಚೇತನಾ ಚಿತ್ತಸಮುಟ್ಠಾನಾನಂ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ ವಿಪಾಕಾ ಚೇತನಾ ಕಟತ್ತಾರೂಪಾನಂ…ಪೇ… ಚೇತನಾ ವತ್ಥುಸ್ಸ ಕಮ್ಮಪಚ್ಚಯೇನ ಪಚ್ಚಯೋ. (೨)

ವಿಪಾಕೋ ಧಮ್ಮೋ ವಿಪಾಕಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ವಿಪಾಕಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ ವಿಪಾಕಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೩)

ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಕಮ್ಮಪಚ್ಚಯೇನ ಪಚ್ಚಯೋ. (೧)

ವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ. ನಾನಾಕ್ಖಣಿಕಾ – ವಿಪಾಕಧಮ್ಮಧಮ್ಮಾ ಚೇತನಾ ವಿಪಾಕಾನಂ ಖನ್ಧಾನಂ ಕಮ್ಮಪಚ್ಚಯೇನ ಪಚ್ಚಯೋ. (೨)

ವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸಹಜಾತಾ, ನಾನಾಕ್ಖಣಿಕಾ. ಸಹಜಾತಾ – ವಿಪಾಕಧಮ್ಮಧಮ್ಮಾ ಚೇತನಾ ಚಿತ್ತಸಮುಟ್ಠಾನಾನಂ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. ನಾನಾಕ್ಖಣಿಕಾ – ವಿಪಾಕಧಮ್ಮಧಮ್ಮಾ ಚೇತನಾ ಕಟತ್ತಾರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೩)

ವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ. ನಾನಾಕ್ಖಣಿಕಾ – ವಿಪಾಕಧಮ್ಮಧಮ್ಮಾ ಚೇತನಾ ವಿಪಾಕಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೪)

ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ವಿಪಾಕಧಮ್ಮಧಮ್ಮಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೫)

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ನೇವವಿಪಾಕನವಿಪಾಕಧಮ್ಮಧಮ್ಮಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೧)

ವಿಪಾಕಪಚ್ಚಯೋ

೧೦೯. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ವಿಪಾಕಪಚ್ಚಯೇನ ಪಚ್ಚಯೋ – ವಿಪಾಕೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ವಿಪಾಕಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ…ಪೇ…. (೧)

ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ವಿಪಾಕಪಚ್ಚಯೇನ ಪಚ್ಚಯೋ – ವಿಪಾಕಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ವಿಪಾಕಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ ವಿಪಾಕಾ ಖನ್ಧಾ ಕಟತ್ತಾರೂಪಾನಂ ವಿಪಾಕಪಚ್ಚಯೇನ ಪಚ್ಚಯೋ. ಖನ್ಧಾ ವತ್ಥುಸ್ಸ…ಪೇ…. (೨)

ವಿಪಾಕೋ ಧಮ್ಮೋ ವಿಪಾಕಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ ವಿಪಾಕಪಚ್ಚಯೇನ ಪಚ್ಚಯೋ – ವಿಪಾಕೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ವಿಪಾಕಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ ವಿಪಾಕೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಕಟತ್ತಾ ಚ ರೂಪಾನಂ ವಿಪಾಕಪಚ್ಚಯೇನ ಪಚ್ಚಯೋ. (೩)

ಆಹಾರಪಚ್ಚಯೋ

೧೧೦. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಆಹಾರಪಚ್ಚಯೇನ ಪಚ್ಚಯೋ – ವಿಪಾಕಾ ಆಹಾರಾ ಸಮ್ಪಯುತ್ತಕಾನಂ ಖನ್ಧಾನಂ… ತೀಣಿ. (ಪಟಿಸನ್ಧಿಪಿ ಇಮೇಸಂ ತಿಣ್ಣನ್ನಂ ಕಾತಬ್ಬಾ.)

ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಆಹಾರಪಚ್ಚಯೇನ ಪಚ್ಚಯೋ… ತೀಣಿ.

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಆಹಾರಪಚ್ಚಯೇನ ಪಚ್ಚಯೋ – ನೇವವಿಪಾಕನವಿಪಾಕಧಮ್ಮಧಮ್ಮಾ ಆಹಾರಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಞ್ಚ ರೂಪಾನಂ ಆಹಾರಪಚ್ಚಯೇನ ಪಚ್ಚಯೋ; ಕಬಳೀಕಾರೋ ಆಹಾರೋ ಇಮಸ್ಸ ಕಾಯಸ್ಸ ಆಹಾರಪಚ್ಚಯೇನ ಪಚ್ಚಯೋ. (೧)

ಇನ್ದ್ರಿಯಪಚ್ಚಯೋ

೧೧೧. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಇನ್ದ್ರಿಯಪಚ್ಚಯೇನ ಪಚ್ಚಯೋ… ತೀಣಿ (ಪಟಿಸನ್ಧಿ ಕಾತಬ್ಬಾ [ಕಾತಬ್ಬಂ (ಸೀ.)].) ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಇನ್ದ್ರಿಯಪಚ್ಚಯೇನ ಪಚ್ಚಯೋ… ತೀಣಿ.

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಇನ್ದ್ರಿಯಪಚ್ಚಯೇನ ಪಚ್ಚಯೋ – ನೇವವಿಪಾಕನವಿಪಾಕಧಮ್ಮಧಮ್ಮಾ ಇನ್ದ್ರಿಯಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಇನ್ದ್ರಿಯಪಚ್ಚಯೇನ ಪಚ್ಚಯೋ; ರೂಪಜೀವಿತಿನ್ದ್ರಿಯಂ ಕಟತ್ತಾರೂಪಾನಂ ಇನ್ದ್ರಿಯಪಚ್ಚಯೇನ ಪಚ್ಚಯೋ. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಇನ್ದ್ರಿಯಪಚ್ಚಯೇನ ಪಚ್ಚಯೋ – ಚಕ್ಖುನ್ದ್ರಿಯಂ ಚಕ್ಖುವಿಞ್ಞಾಣಸ್ಸ ಇನ್ದ್ರಿಯಪಚ್ಚಯೇನ ಪಚ್ಚಯೋ; ಕಾಯಿನ್ದ್ರಿಯಂ…ಪೇ…. (೨)

ವಿಪಾಕೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ವಿಪಾಕಸ್ಸ ಧಮ್ಮಸ್ಸ ಇನ್ದ್ರಿಯಪಚ್ಚಯೇನ ಪಚ್ಚಯೋ – ಚಕ್ಖುನ್ದ್ರಿಯಞ್ಚ ಚಕ್ಖುವಿಞ್ಞಾಣಞ್ಚ ಚಕ್ಖುವಿಞ್ಞಾಣಸಹಗತಾನಂ ಖನ್ಧಾನಂ ಇನ್ದ್ರಿಯಪಚ್ಚಯೇನ ಪಚ್ಚಯೋ…ಪೇ… ಕಾಯಿನ್ದ್ರಿಯಞ್ಚ ಕಾಯವಿಞ್ಞಾಣಞ್ಚ ಕಾಯವಿಞ್ಞಾಣಸಹಗತಾನಂ ಖನ್ಧಾನಂ ಇನ್ದ್ರಿಯಪಚ್ಚಯೇನ ಪಚ್ಚಯೋ. (೧)

ಝಾನಪಚ್ಚಯೋ

೧೧೨. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಝಾನಪಚ್ಚಯೇನ ಪಚ್ಚಯೋ… ತೀಣಿ. ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಝಾನಪಚ್ಚಯೇನ ಪಚ್ಚಯೋ … ತೀಣಿ.

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಝಾನಪಚ್ಚಯೇನ ಪಚ್ಚಯೋ – ನೇವವಿಪಾಕನವಿಪಾಕಧಮ್ಮಧಮ್ಮಾ ಝಾನಙ್ಗಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಝಾನಪಚ್ಚಯೇನ ಪಚ್ಚಯೋ.

ಮಗ್ಗಪಚ್ಚಯೋ

೧೧೩. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಮಗ್ಗಪಚ್ಚಯೇನ ಪಚ್ಚಯೋ… ತೀಣಿ. ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಮಗ್ಗಪಚ್ಚಯೇನ ಪಚ್ಚಯೋ… ತೀಣಿ. ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಮಗ್ಗಪಚ್ಚಯೇನ ಪಚ್ಚಯೋ. ನೇವವಿಪಾಕನವಿಪಾಕಧಮ್ಮಧಮ್ಮಾ ಮಗ್ಗಙ್ಗಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಮಗ್ಗಪಚ್ಚಯೇನ ಪಚ್ಚಯೋ.

ಸಮ್ಪಯುತ್ತಪಚ್ಚಯೋ

೧೧೪. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಸಮ್ಪಯುತ್ತಪಚ್ಚಯೇನ ಪಚ್ಚಯೋ – ವಿಪಾಕೋ ಏಕೋ ಖನ್ಧೋ ತಿಣ್ಣನ್ನಂ…ಪೇ… ದ್ವೇ ಖನ್ಧಾ ದ್ವಿನ್ನಂ…ಪೇ… ಪಟಿಸನ್ಧಿಕ್ಖಣೇ…ಪೇ… ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಸಮ್ಪಯುತ್ತಪಚ್ಚಯೇನ ಪಚ್ಚಯೋ; ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಸಮ್ಪಯುತ್ತಪಚ್ಚಯೇನ ಪಚ್ಚಯೋ; ದ್ವೇ ಖನ್ಧಾ ದ್ವಿನ್ನಂ ಖನ್ಧಾನಂ ಸಮ್ಪಯುತ್ತಪಚ್ಚಯೇನ ಪಚ್ಚಯೋ.

ವಿಪ್ಪಯುತ್ತಪಚ್ಚಯೋ

೧೧೫. ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ. ಸಹಜಾತಾ – ವಿಪಾಕಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ ವಿಪಾಕಾ ಖನ್ಧಾ ಕಟತ್ತಾರೂಪಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ; ಖನ್ಧಾ ವತ್ಥುಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ವಿಪಾಕಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೧)

ವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ. ಸಹಜಾತಾ – ವಿಪಾಕಧಮ್ಮಧಮ್ಮಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ವಿಪಾಕಧಮ್ಮಧಮ್ಮಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ. ಸಹಜಾತಾ – ನೇವವಿಪಾಕನವಿಪಾಕಧಮ್ಮಧಮ್ಮಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ನೇವವಿಪಾಕನವಿಪಾಕಧಮ್ಮಧಮ್ಮಾನಂ ಖನ್ಧಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ನೇವವಿಪಾಕನವಿಪಾಕಧಮ್ಮಧಮ್ಮಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತಂ – ಪಟಿಸನ್ಧಿಕ್ಖಣೇ ವತ್ಥು ವಿಪಾಕಾನಂ ಖನ್ಧಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ಚಕ್ಖಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಕಾಯಾಯತನಂ ಕಾಯವಿಞ್ಞಾಣಸ್ಸ…ಪೇ… ವತ್ಥು ವಿಪಾಕಾನಂ ಖನ್ಧಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೨)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ವಿಪಾಕಧಮ್ಮಧಮ್ಮಾನಂ ಖನ್ಧಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೩)

ಅತ್ಥಿಪಚ್ಚಯೋ

೧೧೬. ವಿಪಾಕೋ ಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ವಿಪಾಕೋ ಏಕೋ ಖನ್ಧೋ ತಿಣ್ಣನ್ನಂ…ಪೇ… ಪಟಿಸನ್ಧಿಕ್ಖಣೇ ವಿಪಾಕೋ ಏಕೋ ಖನ್ಧೋ ತಿಣ್ಣನ್ನಂ…ಪೇ…. (೧)

ವಿಪಾಕೋ ಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ…ಪೇ… ಸಹಜಾತಂ, ಪಚ್ಛಾಜಾತಂ. ಸಹಜಾತಾ – ವಿಪಾಕಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ; ಪಟಿಸನ್ಧಿಖಣೇ ವಿಪಾಕಾ ಖನ್ಧಾ ಕಟತ್ತಾರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ವಿಪಾಕಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. (೨)

ವಿಪಾಕೋ ಧಮ್ಮೋ ವಿಪಾಕಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ ಅತ್ಥಿಪಚ್ಚಯೇನ ಪಚ್ಚಯೋ – ವಿಪಾಕೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ… ಪಟಿಸನ್ಧಿಕ್ಖಣೇ…ಪೇ…. (೩)

೧೧೭. ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ… ದ್ವೇ ಖನ್ಧಾ ದ್ವಿನ್ನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೧)

ವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ. ಸಹಜಾತಾ – ವಿಪಾಕಧಮ್ಮಧಮ್ಮಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ವಿಪಾಕಧಮ್ಮಧಮ್ಮಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. (೨)

ವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಚ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಚ…ಪೇ… ವಿಪಾಕಧಮ್ಮಧಮ್ಮೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…. (೩)

ನೇವವಿಪಾಕನವಿಪಾಕಧಮ್ಮಧಮ್ಮೋ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ …ಪೇ… ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ. ಸಹಜಾತೋ – ನೇವವಿಪಾಕನವಿಪಾಕಧಮ್ಮಧಮ್ಮೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ ದ್ವಿನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ; ಏಕಂ ಮಹಾಭೂತಂ…ಪೇ… ಮಹಾಭೂತಾ ಚಿತ್ತಸಮುಟ್ಠಾನಾನಂ ರೂಪಾನಂ ಕಟತ್ತಾರೂಪಾನಂ ಉಪಾದಾರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಬಾಹಿರಂ… ಆಹಾರಸಮುಟ್ಠಾನಂ… ಉತುಸಮುಟ್ಠಾನಂ… ಅಸಞ್ಞಸತ್ತಾನಂ ಏಕಂ ಮಹಾಭೂತಂ…ಪೇ….

ಪುರೇಜಾತಂ – ಅರಹಾ ಚಕ್ಖುಂ ಅನಿಚ್ಚತೋ…ಪೇ… ಸೋತಂ…ಪೇ… ವತ್ಥುಂ ಅನಿಚ್ಚತೋ…ಪೇ… ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ, ವತ್ಥು ನೇವವಿಪಾಕನವಿಪಾಕಧಮ್ಮಧಮ್ಮಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ.

ಪಚ್ಛಾಜಾತಾ – ನೇವವಿಪಾಕನವಿಪಾಕಧಮ್ಮಧಮ್ಮಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ; ಕಬಳೀಕಾರೋ ಆಹಾರೋ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ; ರೂಪಜೀವಿತಿನ್ದ್ರಿಯಂ ಕಟತ್ತಾರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೧)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತಂ – ಪಟಿಸನ್ಧಿಕ್ಖಣೇ ವತ್ಥು ವಿಪಾಕಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪುರೇಜಾತಂ – ಸೇಕ್ಖಾ ವಾ ಪುಥುಜ್ಜನಾ ವಾ ಚಕ್ಖುಂ ಅನಿಚ್ಚತೋ…ಪೇ… ಅಸ್ಸಾದೇನ್ತಿ; ತಂ ಆರಬ್ಭ ರಾಗೋ…ಪೇ… ದೋಮನಸ್ಸಂ…ಪೇ… ಕುಸಲಾಕುಸಲೇ ನಿರುದ್ಧೇ ವಿಪಾಕೋ ತದಾರಮ್ಮಣತಾ…ಪೇ… ಸೋತಂ…ಪೇ… ವತ್ಥುಂ…ಪೇ… ವಿಪಾಕೋ ತದಾರಮ್ಮಣತಾ…ಪೇ… ರೂಪಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಫೋಟ್ಠಬ್ಬಾಯತನಂ ಕಾಯವಿಞ್ಞಾಣಸ್ಸ…ಪೇ… ಚಕ್ಖಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಕಾಯಾಯತನಂ ಕಾಯವಿಞ್ಞಾಣಸ್ಸ…ಪೇ… ವತ್ಥು ವಿಪಾಕಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೨)

ನೇವವಿಪಾಕನವಿಪಾಕಧಮ್ಮಧಮ್ಮೋ ವಿಪಾಕಧಮ್ಮಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪುರೇಜಾತಂ – ಸೇಕ್ಖಾ ವಾ ಪುಥುಜ್ಜನಾ ವಾ ಚಕ್ಖುಂ ಅನಿಚ್ಚತೋ…ಪೇ… ಅಸ್ಸಾದೇನ್ತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ. ಸೋತಂ…ಪೇ… ವತ್ಥುಂ ಅನಿಚ್ಚತೋ…ಪೇ… ದೋಮನಸ್ಸಂ ಉಪ್ಪಜ್ಜತಿ. ದಿಬ್ಬೇನ ಚಕ್ಖುನಾ…ಪೇ… ವತ್ಥು ವಿಪಾಕಧಮ್ಮಧಮ್ಮಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೩)

೧೧೮. ವಿಪಾಕೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ವಿಪಾಕಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ಚಕ್ಖುವಿಞ್ಞಾಣಸಹಗತೋ ಏಕೋ ಖನ್ಧೋ ಚ ಚಕ್ಖಾಯತನಞ್ಚ ತಿಣ್ಣನ್ನಂ…ಪೇ… ಕಾಯವಿಞ್ಞಾಣಸಹಗತೋ…ಪೇ… ವಿಪಾಕೋ ಏಕೋ ಖನ್ಧೋ ಚ ವತ್ಥು ಚ ತಿಣ್ಣನ್ನಂ ಖನ್ಧಾನಂ…ಪೇ… ಪಟಿಸನ್ಧಿಕ್ಖಣೇ ವಿಪಾಕೋ ಏಕೋ ಖನ್ಧೋ ಚ ವತ್ಥು ಚ ತಿಣ್ಣನ್ನಂ…ಪೇ…. (೧)

ವಿಪಾಕೋ ಚ ನೇವವಿಪಾಕನವಿಪಾಕಧಮ್ಮಧಮ್ಮೋ ಚ ಧಮ್ಮಾ ನೇವವಿಪಾಕನವಿಪಾಕಧಮ್ಮಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ. ಸಹಜಾತಾ – ವಿಪಾಕಾ ಖನ್ಧಾ ಚ ಮಹಾಭೂತಾ ಚ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪಟಿಸನ್ಧಿಕ್ಖಣೇ ವಿಪಾಕಾ ಖನ್ಧಾ ಚ ಮಹಾಭೂತಾ ಚ ಕಟತ್ತಾರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ.

ಪಚ್ಛಾಜಾತಾ – ವಿಪಾಕಾ ಖನ್ಧಾ ಚ ಕಬಳೀಕಾರೋ ಆಹಾರೋ ಚ ಇಮಸ್ಸ ಕಾಯಸ್ಸ…ಪೇ… ಪಚ್ಛಾಜಾತಾ ವಿಪಾಕಾ ಖನ್ಧಾ ಚ ರೂಪಜೀವಿತಿನ್ದ್ರಿಯಞ್ಚ ಕಟತ್ತಾರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೨)