೧. ವಿಭಙ್ಗವಾರೋ

ಹೇತುಪಚ್ಚಯೋ

೨೩೪. ಕುಸಲಂ ಧಮ್ಮಂ ಸಹಜಾತೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕುಸಲಂ ಏಕಂ ಖನ್ಧಂ ಸಹಜಾತಾ ತಯೋ ಖನ್ಧಾ, ತಯೋ ಖನ್ಧೇ ಸಹಜಾತೋ ಏಕೋ ಖನ್ಧೋ, ದ್ವೇ ಖನ್ಧೇ ಸಹಜಾತಾ ದ್ವೇ ಖನ್ಧಾ. ಕುಸಲಂ ಧಮ್ಮಂ ಸಹಜಾತೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕುಸಲೇ ಖನ್ಧೇ ಸಹಜಾತಂ ಚಿತ್ತಸಮುಟ್ಠಾನಂ ರೂಪಂ. ಕುಸಲಂ ಧಮ್ಮಂ ಸಹಜಾತೋ ಕುಸಲೋ ಚ ಅಬ್ಯಾಕತೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಕುಸಲಂ ಏಕಂ ಖನ್ಧಂ ಸಹಜಾತಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ, ತಯೋ ಖನ್ಧೇ ಸಹಜಾತೋ ಏಕೋ ಖನ್ಧೋ ಚಿತ್ತಸಮುಟ್ಠಾನಞ್ಚ ರೂಪಂ, ದ್ವೇ ಖನ್ಧೇ ಸಹಜಾತಾ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ. (೩)

೨೩೫. ಅಕುಸಲಂ ಧಮ್ಮಂ ಸಹಜಾತೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಕುಸಲಂ ಏಕಂ ಖನ್ಧಂ ಸಹಜಾತಾ ತಯೋ ಖನ್ಧಾ, ತಯೋ ಖನ್ಧೇ ಸಹಜಾತೋ ಏಕೋ ಖನ್ಧೋ, ದ್ವೇ ಖನ್ಧೇ ಸಹಜಾತಾ ದ್ವೇ ಖನ್ಧಾ. ಅಕುಸಲಂ ಧಮ್ಮಂ ಸಹಜಾತೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಕುಸಲೇ ಖನ್ಧೇ ಸಹಜಾತಂ ಚಿತ್ತಸಮುಟ್ಠಾನಂ ರೂಪಂ. ಅಕುಸಲಂ ಧಮ್ಮಂ ಸಹಜಾತೋ ಅಕುಸಲೋ ಚ ಅಬ್ಯಾಕತೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಅಕುಸಲಂ ಏಕಂ ಖನ್ಧಂ ಸಹಜಾತಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ, ತಯೋ ಖನ್ಧೇ ಸಹಜಾತೋ ಏಕೋ ಖನ್ಧೋ ಚಿತ್ತಸಮುಟ್ಠಾನಞ್ಚ ರೂಪಂ, ದ್ವೇ ಖನ್ಧೇ ಸಹಜಾತಾ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ. (೩)

೨೩೬. ಅಬ್ಯಾಕತಂ ಧಮ್ಮಂ ಸಹಜಾತೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ವಿಪಾಕಾಬ್ಯಾಕತಂ ಕಿರಿಯಾಬ್ಯಾಕತಂ ಏಕಂ ಖನ್ಧಂ ಸಹಜಾತಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ, ತಯೋ ಖನ್ಧೇ ಸಹಜಾತೋ ಏಕೋ ಖನ್ಧೋ ಚಿತ್ತಸಮುಟ್ಠಾನಞ್ಚ ರೂಪಂ, ದ್ವೇ ಖನ್ಧೇ ಸಹಜಾತಾ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ; ಪಟಿಸನ್ಧಿಕ್ಖಣೇ ವಿಪಾಕಾಬ್ಯಾಕತಂ ಏಕಂ ಖನ್ಧಂ ಸಹಜಾತಾ ತಯೋ ಖನ್ಧಾ ಕಟತ್ತಾ ಚ ರೂಪಂ, ತಯೋ ಖನ್ಧೇ ಸಹಜಾತೋ ಏಕೋ ಖನ್ಧೋ ಕಟತ್ತಾ ಚ ರೂಪಂ, ದ್ವೇ ಖನ್ಧೇ ಸಹಜಾತಾ ದ್ವೇ ಖನ್ಧಾ ಕಟತ್ತಾ ಚ ರೂಪಂ; ಖನ್ಧೇ ಸಹಜಾತಂ ವತ್ಥು, ವತ್ಥುಂ ಸಹಜಾತಾ ಖನ್ಧಾ; ಏಕಂ ಮಹಾಭೂತಂ ಸಹಜಾತಾ ತಯೋ ಮಹಾಭೂತಾ, ತಯೋ ಮಹಾಭೂತೇ ಸಹಜಾತಂ ಏಕಂ ಮಹಾಭೂತಂ, ದ್ವೇ ಮಹಾಭೂತೇ ಸಹಜಾತಾ ದ್ವೇ ಮಹಾಭೂತಾ, ಮಹಾಭೂತೇ ಸಹಜಾತಂ ಚಿತ್ತಸಮುಟ್ಠಾನಂ ರೂಪಂ ಕಟತ್ತಾರೂಪಂ ಉಪಾದಾರೂಪಂ. (೧)

೨೩೭. ಕುಸಲಞ್ಚ ಅಬ್ಯಾಕತಞ್ಚ ಧಮ್ಮಂ ಸಹಜಾತೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕುಸಲೇ ಖನ್ಧೇ ಚ ಮಹಾಭೂತೇ ಚ ಸಹಜಾತಂ ಚಿತ್ತಸಮುಟ್ಠಾನಂ ರೂಪಂ. (೧)

ಅಕುಸಲಞ್ಚ ಅಬ್ಯಾಕತಞ್ಚ ಧಮ್ಮಂ ಸಹಜಾತೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಕುಸಲೇ ಖನ್ಧೇ ಚ ಮಹಾಭೂತೇ ಚ ಸಹಜಾತಂ ಚಿತ್ತಸಮುಟ್ಠಾನಂ ರೂಪಂ. (೧)

(ಯಥಾ ಪಟಿಚ್ಚವಾರೇ ಏವಂ ವಿತ್ಥಾರೇತಬ್ಬಂ.)