೧. ವಿಭಙ್ಗವಾರೋ

ನಹೇತುಪಚ್ಚಯೋ

೩೫೧. ಅಕುಸಲಂ ಧಮ್ಮಂ ಸಂಸಟ್ಠೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ವಿಚಿಕಿಚ್ಛಾಸಹಗತೇ ಉದ್ಧಚ್ಚಸಹಗತೇ ಖನ್ಧೇ ಸಂಸಟ್ಠೋ ವಿಚಿಕಿಚ್ಛಾಸಹಗತೋ ಉದ್ಧಚ್ಚಸಹಗತೋ ಮೋಹೋ. (೧)

ಅಬ್ಯಾಕತಂ ಧಮ್ಮಂ ಸಂಸಟ್ಠೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ನಹೇತುಪಚ್ಚಯಾ – ಅಹೇತುಕಂ ವಿಪಾಕಾಬ್ಯಾಕತಂ ಕಿರಿಯಾಬ್ಯಾಕತಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ, ತಯೋ ಖನ್ಧೇ ಸಂಸಟ್ಠೋ ಏಕೋ ಖನ್ಧೋ, ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ; ಅಹೇತುಕಪಟಿಸನ್ಧಿಕ್ಖಣೇ ವಿಪಾಕಾಬ್ಯಾಕತಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ, ತಯೋ ಖನ್ಧೇ ಸಂಸಟ್ಠೋ ಏಕೋ ಖನ್ಧೋ, ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ. (೧)

ನಅಧಿಪತಿಆದಿಪಚ್ಚಯಾ

೩೫೨. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ನಅಧಿಪತಿಪಚ್ಚಯಾ… ನಪುರೇಜಾತಪಚ್ಚಯಾ – ಅರೂಪೇ [ಆರುಪ್ಪೇ (ಸಬ್ಬತ್ಥ)] ಕುಸಲಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ. ಅಕುಸಲಂ ಧಮ್ಮಂ…ಪೇ… ಅಬ್ಯಾಕತಂ ಧಮ್ಮಂ…ಪೇ….

ನಪಚ್ಛಾಜಾತ-ನಆಸೇವನಪಚ್ಚಯಾ

೩೫೩. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ನಪಚ್ಛಾಜಾತಪಚ್ಚಯಾ… ತೀಣಿ. ನಆಸೇವನಪಚ್ಚಯಾ… ತೀಣಿ.

ನಕಮ್ಮಪಚ್ಚಯೋ

೩೫೪. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ನಕಮ್ಮಪಚ್ಚಯಾ. ಕುಸಲೇ ಖನ್ಧೇ ಸಂಸಟ್ಠಾ ಕುಸಲಾ ಚೇತನಾ. (೧)

ಅಕುಸಲಂ ಧಮ್ಮಂ ಸಂಸಟ್ಠೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ನಕಮ್ಮಪಚ್ಚಯಾ. ಅಕುಸಲೇ ಖನ್ಧೇ ಸಂಸಟ್ಠಾ ಅಕುಸಲಾ ಚೇತನಾ. (೧)

ಅಬ್ಯಾಕತಂ ಧಮ್ಮಂ ಸಂಸಟ್ಠೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ನಕಮ್ಮಪಚ್ಚಯಾ. ಕಿರಿಯಾಬ್ಯಾಕತೇ ಖನ್ಧೇ ಸಂಸಟ್ಠಾ ಕಿರಿಯಾಬ್ಯಾಕತಾ ಚೇತನಾ. (೧)

ನವಿಪಾಕಪಚ್ಚಯೋ

೩೫೫. ಕುಸಲಂ ಧಮ್ಮಂ ಸಂಸಟ್ಠೋ…ಪೇ… ಅಕುಸಲಂ ಧಮ್ಮಂ…ಪೇ… ಅಬ್ಯಾಕತಂ ಧಮ್ಮಂ ಸಂಸಟ್ಠೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ನವಿಪಾಕಪಚ್ಚಯಾ – ಕಿರಿಯಾಬ್ಯಾಕತಂ ಏಕಂ ಖನ್ಧಂ.

(ಸಂಸಟ್ಠವಾರೇ ಪಚ್ಚನೀಯವಿಭಙ್ಗೇ ನಕಮ್ಮೇ ಚ ನವಿಪಾಕೇ ಚ ಪಟಿಸನ್ಧಿ ನತ್ಥಿ; ಅವಸೇಸೇಸು ಸಬ್ಬತ್ಥ ಅತ್ಥಿ.)

ನಝಾನಪಚ್ಚಯೋ

೩೫೬. ಅಬ್ಯಾಕತಂ ಧಮ್ಮಂ ಸಂಸಟ್ಠೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ನಝಾನಪಚ್ಚಯಾ – ಪಞ್ಚವಿಞ್ಞಾಣಸಹಗತಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ. (೧)

ನಮಗ್ಗಪಚ್ಚಯೋ

೩೫೭. ಅಬ್ಯಾಕತಂ ಧಮ್ಮಂ ಸಂಸಟ್ಠೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ನಮಗ್ಗಪಚ್ಚಯಾ – ಅಹೇತುಕಂ ವಿಪಾಕಾಬ್ಯಾಕತಂ ಕಿರಿಯಾಬ್ಯಾಕತಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ; ಅಹೇತುಕಪಟಿಸನ್ಧಿಕ್ಖಣೇ…ಪೇ…. (೧)

ನವಿಪ್ಪಯುತ್ತಪಚ್ಚಯೋ

೩೫೮. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ನವಿಪ್ಪಯುತ್ತಪಚ್ಚಯಾ – ಅರೂಪೇ ಕುಸಲಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ. (೧)

ಅಕುಸಲಂ ಧಮ್ಮಂ ಸಂಸಟ್ಠೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ನವಿಪ್ಪಯುತ್ತಪಚ್ಚಯಾ – ಅರೂಪೇ ಅಕುಸಲಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ. (೧)

ಅಬ್ಯಾಕತಂ ಧಮ್ಮಂ ಸಂಸಟ್ಠೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ನವಿಪ್ಪಯುತ್ತಪಚ್ಚಯಾ – ಅರೂಪೇ ವಿಪಾಕಾಬ್ಯಾಕತಂ ಕಿರಿಯಾಬ್ಯಾಕತಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ. (ನವಿಪ್ಪಯುತ್ತೇ ಪಟಿಸನ್ಧಿ ನತ್ಥಿ.) (೧)